మేడి పండ్లను తింటు మైమరచి పాడేటి

కోకిలమ్మ పాట కళ్ళార జూచితిని

వడుపుగా వృక్షాల మాను వలిచేస్తున్న

వడ్రంగి పిట్టల వాలు గాంచితి నేను

నురగ పొంగులమ్మ గౌడ గంగమ్మనే

కమ్మని రుచివున్న కల్లు తాగితి నేను

బురద నీటిలోన బుడబుడా తలదూర్చు

మట్టగుడెస పులుసు మధురంగ తిన్నాను

జొన్నకంకులు కోసి ఊసబియ్యము చేసి

వేరుశనగను కాల్చి వలిచిపెట్టినారు

దోసకాయను కోసి ఉప్పుకారము జల్లి

పెసర బొబ్బర కాయలనుడికించి పెట్టారు

కమ్మరి కొడవళ్ళూ కుమ్మరుల కుండలు

వడ్రంగి ఉలితోటి పల్లెపనిచేస్తుంది

నాపల్లె అందాలు మనసులో దాచాను

వారిచ్చు దైర్యాన్ని గుండెలో నింపాను

మనసు గాయమైన మరితిరిగి వస్తాను

నాకింత చోటివ్వు ననుకన్న నాయమ్మ ….!

                       -శ్రీనివాస్ ప్రభు             

RTS Perm Link