అరె.. ఏముందిరా మనూళ్లో?
ఎప్పుడూ రారమ్మంటుంటావ్..
మీకంతా ఎలా గడుస్తాందిరా అక్కడ?

ఐ-మాక్స్ అంటే తెలుసారా నీకు?
పోనీ, నువ్వే చెప్పు ఏముందో..
షాపింగ్ మాల్‌లు లేవు,
కంట్రీ క్లబ్‌లు లేవు,
కిక్కెక్కించే పబ్‌లు లేవు,
మత్తెక్కించే బార్లు లేవు,
ఏం చేయమంటావురా అక్కడ?

పోనీ బాగా గుర్తు చేసుకుని చెప్పరా..
మనూళ్లో రోడ్లేమైనా వేయించారా?
నీ పొలానికి నీటి సంగతి దేవుడెరుగు..
నీ ఇంట్లో తాగడానికి మంచి
నీళ్లయినా వస్తున్నాయారా?

ఇవేవీ వద్దోయ్..
ఒరేయ్..
కనీసావసరాలైనా సంపాదించుకున్నార్రా మీరు?

అరె మనూళ్లో ఇంకా
మరుగుదొడ్లు లేని ఇళ్లు ఎన్ని ఉన్నాయ్రా?
పామో, చీమో కరిస్తే చూపించేందుకు
సర్కారీ దవాఖానా అయినా ఉందారా?
నీ తమ్ముడేం చేస్తున్నాడ్రా?
డాట్రవుతా, పోలీసవుతానని అస్తమానూ
కలలు కనేవాడు.. -
ఇప్పుడేమో పశువులు కాస్తున్నాడట!
కాలేజీలు కాదు కదా బడులయినా ఉన్నాయారా?

దేనికిరా ఊరంటారు దాన్ని..
నేర్చుకోండిరా..
తెలుగు భాషను నేర్చుకోండి!

అయినా నువ్వు పిలిచావ్ కాబట్టి -
తప్పకుండా వస్తా..
మనూరికి కాదు -
మన అడవికి…

RTS Perm Link

ఇన్నాళ్ల
నా నిరీక్షణకు ప్రతిఫలమా -
కలలో..
నీ దర్శనం…!

* * *

అడిగినదానికంటే
పదింతలు ఎక్కువే ఇచ్చావు -
నేనడిగింది నీ చిరునవ్వులు..
నువ్విచ్చింది నాకు కన్నీళ్లు…!

* * *

ఆశకు హద్దే లేకుండా పోతోంది
ఇంకా ఎదురుచూస్తూనే ఉంది -
ఆశగా నీ కోసం..
సమాధిలో…!
* * *

RTS Perm Link

ప్రత్యక్ష రాజకీయాల్లో తన అదృష్టాన్ని పరీక్షించుకునేందుకు మరో కొత్త నాయకుడు తెరపైకి రానున్నారు. ఆయన గుణగణాలు కీర్తించడం నారదాది మునీంద్రులకే సాధ్యం కాదు. గొప్ప పాటగాడు, వెన్నులో బుల్లెట్ ఉన్నవాడు, తెలంగాణ సాంస్కృతికోద్యమ నాయకుడు, పీపుల్స్‌వార్ మా’నస పుత్రుడు. పేరుకు నాస్తికుడే, తిరిగేవేమో రామాలయాలు. పోలవరం నిర్వాసితుల కోసం సంవత్సరాల తన నాస్తికత్వాన్ని తుంగలో తొక్కి రాముణ్ణి శరణు వేడాడు కూడా.

చరిష్మా లేదు, అహింసనే ఆయుధంగా చేసుకున్న గాంధీజీని అనుకరిస్తూ గోచీ, చొక్కాలేని అలంకరణ, ఆ పక్కనే తుపాకీని నమ్ముకున్న మావోయిస్టుల సానుభూతిపరుడనే ముద్ర.

పేరు గుమ్మడి విఠల్ రావు… ఎవరబ్బా అని బుర్రలు గోక్కుంటున్నారా.. సరే అయితే… గద్దర్!!
కుటుంబం.. భార్య విమల, పిల్లలు సూరీడు (ప్రస్తుతం అమెరికాలో ఉన్నారు), చంద్రుడు (2003లో అనారోగ్యం కారణంగా మరణించారు), వెన్నెల (డాక్టర్ అనుకుంటా)

సిల్వర్ స్క్రీన్‌పై రెచ్చిపోయి రికార్డులు నెలకొల్పిన విధంగానే ఎన్‌టిఆర్ రికార్డును కూడా అధిగమించేస్తామన్న అత్యాశో, స్పష్టమైన అవగాహన, ప్రణాళిక లేకపోవడం మూలానో… కారణాలేవైతేనేం, అట్టహాసంగా ప్రారంభమైన “ప్రజారాజ్యం” పార్టీ జంపింగ్ రాయుళ్లతో నిండిపోయి సార్వత్రిక ఎన్నికల్లో చతికిలపడింది. జాతరకి వచ్చేవారందరూ భక్తులు కారు, సభలకు హాజరయ్యే జనమంతా ఓట్లు వేయరు అనే విలువైన సూక్తిని చిరు & కో ఇప్పటికి అర్థం చేసుకునే ఉంటారు.

కోట్ల రూపాయల బడ్జెట్‌తో సినిమాలు తీసి, వందల ప్రింట్లతో పంపిణీ కార్యక్రమాలు చేపట్టి, రాష్ట్రంలోని థియేటర్లపై గుత్తాధిపత్యం సాధించిన మెగాస్టారుకే సాధ్యం కాని రాజకీయ క్రీడలో ఓ గోచీ పెట్టుకుని, నల్ల కంబళి, గుబురు గడ్డంతో, జజ్జనకరజనారే పాటలతో ఈయన ఏ మాత్రం ప్రభావం చూపగలడు. పోనీ, ఏమైనా స్పష్టమైన సిద్ధాంతాలకు కట్టుబడతాడా అంటే.. అదీ అనుమానమే.

ఎలాంటి నైతిక విలువలున్నాయని అతను ఈనాడు రాజకీయ పార్టీని స్థాపించి, తెలంగాణను కోరుతున్నాడు. ఆమాటకొస్తే ఏ రాజకీయ నాయకునికి లేని నైతిక విలువలు ఇతనికి ఎందుకు అనొచ్చు. అయితే దాదాపు 4 దశాబ్దాల పార్టీ జీవితం గడిపిన అతనికి ఇతరులకి తేడాల్లేవా. అలాంటప్పుడు ఇతనెందుకు. ఎలాంటి నిబద్ధత ఇతని స్వంతమని ఈ రోజు ప్రత్యేక రాష్ట్ర సాధన కోసం పార్టీని స్థాపిస్తున్నాడు. ఎప్పుడో 1969లో ముట్టుకుని వదిలేసిన తెలంగాణ ప్రత్యేక రాష్ట్ర సాధనని ఇప్పుడు మళ్లీ ఎందుకు నెత్తికెక్కించుకుంటున్నాడు.. నిజంగా అతనికీ విషయంలో నిజాయితీ ఉంటే.. ఈ 40 ఏళ్లూ అవిరామ కృషి చేసి ఉంటే, సమైక్య ఆంధ్ర రాష్ట్రం నుండి వేరుపడి తెలంగాణ ప్రత్యేక రాష్ట్రం ఆవిర్భవించాలని ఆ ప్రాంతం ప్రజలు భావిస్తూ ఉంటే తెలంగాణను వైఎస్, చంద్రబాబు కాదు కదా, సోనియా, వాజ్‌పేయిలు కూడా అడ్డుకుని ఉండలేరు.

తెలంగాణ కోసం కుష్టురోగిని కావలించుకుంటా, గొంగళి పురుగునైనా ముద్దెట్టుకుంటాననే డైలాగులతో బాటు, అడ్డొచ్చిన వాడి తలను తెలంగాణా తల్లికి అర్పిస్తానంటూ తైతక్కలాడే కేసిఆర్… ఆత్మప్రబోధం, అమ్మ ఆదేశం, అన్నగారి దీవెనలు అంటూ అర్థం పర్థంలేని ప్రకటనలతో నవ తెలంగాణ స్థాపించి, అంతలోనే (తన హైటు, వెయిటూ గుర్తొచ్చేమో) చిరు పార్టీలో విలీనం చేసిన గౌడు బ్రదరూ.. ఎక్స్‌ట్రా, ఎక్స్‌ట్రాల్లాగే ఈయనా తెలంగాణ ఆత్మగౌరవాన్ని నిచ్చెనలా ఉపయోగించుకోవాలనుకుంటున్నాడు.

ఇక్కడ నాదో చిన్న ప్రశ్న…

వేల సంఖ్యలో యువకులను పార్టీలోకి ఆకర్షించిన ప్రజాగాయకుడు, తన స్వంత కుటుంబాన్ని తన గీతాలతో, రాగాలతో, చిందులతో మార్చలేకపోయాడు. అతని జీవితంలో ఇది కూడా ఓ వైఫల్యమే. ఓ ఫ్యాక్టరీలో పని చేసి అతని భార్య విమల పిల్లలను చదివించుకున్నారట. భార్య అయితే సరే, మరి స్వంత కొడుకు సూరీడిని, కూతురు వెన్నెలను మార్చలేకపోయాడే. వారిని ఉద్యమంలో చేర్చ(లాగ)లేకపోయాడే.

చేర్చలేకపోయాడా లేక ఉద్దేశ్యపూర్వకంగానే తనకలవాటైన డ్రామాలాడుతున్నాడా. వ్యక్తిగత జీవితానికి ఏమాత్రం భద్రత లేని తాను కనీసం తన కుటుంబానికైనా భద్రత కల్పించాలనే స్వార్థంతో ముందుగానే వ్రాసుకున్న స్క్రీన్‌ప్లేతో నటిస్తున్నాడా.

మరి ఆయనకు దూరమైన భార్య అతని అవినీతి సంపాదననూ దూరం ఉంచిందా.. కేవలం తన కూలీ డబ్బులతో, సామాజిక వర్గం ఆధారంగా వచ్చిన రిజర్వేషన్లతోనే కూతురిని డాక్టర్‌ను చేసిందా, కొడుక్కి ఉన్నత చదువులు చెప్పించి అమెరికా పయనమయ్యేలా చేసిందా అనేవి ఎప్పటికీ శేషప్రశ్నలే..

“తప్పు చేయి, తప్పులు చేస్తూనే ఉండు, అయితే ఆ తప్పులను ఒప్పుకునేందుకు భయపడకు - అవి నేర్పే జీవితానుభవాలను మరిచిపోకు” అనేలా తాను మూడు చారిత్రాత్మక తప్పులను చేసినట్లు ఒప్పుకున్నాడు.

ముందుగా ఓ పద్యం (పాతదే):

కూరిమి గల దినములలో
నేరము లెన్నడును గలుగ నేరవు మఱి యా
కూరిమి విరసంబైనను
నేరములే తోచు చుండు నిక్కము సుమతీ!

1వ తప్పు - జంతర్‌మంతర్ సదస్సుకు అద్వానీని ఆహ్వానించడం
 ఉత్తినే ఆహ్వానించారా? కేంద్రంలో అధికారానికి వస్తే, వచ్చిన వెంటనే జేబులో నుంచి తెలంగాణ రాష్ట్రాన్ని తీసిచ్చేస్తామని ఆయనగారు ప్రకటించబట్టే కదా. విజయానికి సారథులు చాలా మందే ఉంటారు, పొరపాటున అపజయం ఎదురైందో అందరూ తప్పుకుంటారు. భాజపా లేదా ఎన్‌డిఏ కూటమి అధికారంలోకి వచ్చేస్తుందేమోనని పొరపాటునో, గ్రహపాటునో వీళ్లంతా ఆ వైపుకు గెంతారు. మొత్తానికే ఎసరొచ్చిందనుకోండి. అది వేరే విషయం.

2వ తప్పు - విప్లవకారులను చంపిన దేవేందర్‌గౌడ్‌ను అమరవీరుల స్థూపం వద్దకు ఆహ్వానించడం
 ఇదీ ఆ వరసే. అసలు ఆహ్వానించినప్పుడు, ఆహ్వానించిన తర్వాత ఇన్నాళ్ల వరకు కలగని ఆలోచన ఎన్నికల ఫలితాలు వెల్లడైన తర్వాతే ఎలా కలిగింది. సార్‌గారికి ఏ చెట్టు కింద జ్ఞానోదయమైంది. ఎన్నికల సమయంలో తన గొంతు నొక్కారంటూ, తానెక్కడికీ పారిపోలేదంటూ గగ్గోలు పెడుతున్న గద్దర్ సరిగ్గా ఎన్నికల సమయంలోనే ఆస్పత్రిలో చేరాల్సి వచ్చిందా. ఇన్ని సంవత్సరాలుగా చేయించుకోని వెన్ను శస్త్రచికిత్సకు ముహూర్తం ఇప్పుడే కుదురుతోందా. 

3వ తప్పు - కెసిఆర్ నిర్వహించిన విద్యార్థుల సభకు హాజరు కావడం
 హాజరయ్యానంటున్నారే గానీ, ఎందుకు హాజరయ్యారు. ఎలాంటి ప్రలోభాలకు లొంగకుండానే ఆయన వెంట తిరిగారా. ప్రలోభాలు అని ఎందుకు అంటున్నానంటే, ఈయన ఘనమైన గత చరిత్రే కారణం. గతంలో ఈ పెద్దమనిషి కాంగ్రెస్, తెదేపాలను భూస్థాపితం చేయమని, తరిమి కొట్టండని పిలుపునిచ్చాడు. మొన్నటికి మొన్న తెరాసతో చేతులు కలిపాడు. మళ్లీ నిన్న ప్రెస్ మీట్ పెట్టి - తప్పు చేసాను క్షమించండి అంటున్నాడు.

అంబేద్కర్ ఆశయాల ప్రేరణతో, ప్రేరేపణతో లక్షల రూపాయల విరాళాలు సేకరించి వెంకటాపురంలో మూడు ఎకరాల విస్తీర్ణంలో మహాబోధి హైస్కూల్‌ను ప్రారంభించారుగా, దాని సంగతేమిటి అని ఎవరైనా ప్రశ్నిస్తే ఈయన ఏం జవాబు చెబుతాడు.

చివరికి కొన్నాళ్ల తర్వాత తెలంగాణ ఉద్యమం ప్రారంభించి చాలా తప్పు చేశాను.. ఇది నా జీవితంలో చేసిన 4వ చారిత్రాత్మక తప్పు అని ముక్తాయించినా మనం ఆశ్చర్యపోనక్కర్లేదు కూడా.

సిద్ధాంతపరంగా గద్దర్ మావోయిస్టులకు సన్నిహితుడు. తుపాకీ గొట్టం ద్వారానే రాజ్యాధికారం వస్తుందనే నమ్మకాన్ని మావోయిస్టులు ఇంకా వదలుకోలేదు. ఎన్నికల రాజకీయాలకు వారు విముఖులు. ఇలాంటి సిద్ధాంతాల ఊబిలో కూరుకుని నిషేధంతో బయటకు వచ్చిన గద్దర్ తన కాళ్లకు అంటిన బురదను ఇంకా శుభ్రం చేసుకోనే లేదు. ఆ పార్టీ సానుభూతిపరుడు అనే ముసుగు తీయనేలేదు. అంతలోనే వారి సిద్ధాంతాలకు పూర్తి భిన్నమైన, వ్యతిరేకమైన ఎన్నికల రాజకీయాలను ఎలా చేపడతారు. ఇది రెండు పడవలపై కాళ్లు ఉంచినట్లు కాదా?

గద్దర్ గురించి మరికొన్ని, మరికొందరి అమూల్యమైన అభిప్రాయాలు, కథనాలు:
http://gsnaveen.wordpress.com/2006/10/20/bakta_gaddaru/
http://telugu.stalin-mao.net/?p=75

గద్దర్ పాటలు:
http://www.ourtelangana.com/node/2023

RTS Perm Link

అసలే విద్యుత్తు ఉండదు
ఉన్నా అందులోనూ కోతలు
రాత్రుళ్లు మోటారు పంపు దగ్గర కాపలాలు
కరెంటు - రైతు దాగుడుమూతలు
ఎప్పుడూ “అవుట్” అయ్యి “పోయేది” రైతే !!

తడిసీ తడవని పైరు
నకిలీ విత్తనాలు
రైతులపై తప్ప పంటల్లో
పురుగులపై పని చేయని మందులు !!

వానలు పడవు
జలయజ్ఞాలు ఫలించవు
కృత్రిమ వాన కరుణించదు
కప్పల పెళ్లిళ్లు కనికరించవు !!

పట్నవాసులేమి చేయగలరు
నేల విడిచి నింగికెగుస్తున్న
బియ్యం ధరను నిలువుగుడ్లతో చూడడం తప్ప !!

ఆకాశ గంగమ్మపై ఆశ ఎలాగూ పోయింది
ఇక అంతంత మాత్రంగా మిగిలింది
ఎండిన నదుల అట్టడుగున దాక్కున్న గంగమ్మే !!

ఇంతలో..
నదుల నీరు లేదు, నన్నడిగే వాడూ లేడు అంటూ
బయలుదేరారు “ఇసుకాసురులు” -
మేము లేమా స్వాహా చేసేందుకు అంటూ !!

నిర్భీతిగా, నిర్లజ్జగా, నిస్సిగ్గుగా
ట్రాక్టర్ల లోడులతో కప్పెట్టేస్తున్నారు….
భారతదేశ వెన్నెముకను
మనకు అన్నం పెట్టే రైతన్నను !!

RTS Perm Link

నాపై నీ అలక,
ఎడారిలో ఎండమావి అని నాకు తెలుసు..
ఎక్కడో గానీ ఉండదు,
కొండొకచో ఉన్నా ఎంతో కాలం నిలవదు…

కాదు కానేరదు,

నాపై నీ అలక,
నీ మనస్సు మందిరంలోని
నల్లరాతి శిల్పం అంటావా..

నా గుండె గదుల్లో
ప్రతిధ్వనించే ఆవేదన
దాని చెవులకు సోకనివ్వు..

అంత కఠిన పాషాణమూ
కరిగి అనుమతిస్తేనే
కడసారి చూపులకు
తరలిరా ప్రియతమా!!

RTS Perm Link

మొన్నటి కథ…!

బాల్యం అంటే…
వెచ్చటి అమ్మ కౌగిలిలో ఆదమరిచి నిద్రపోవడం,
‘అఆ’లు దిద్దించే నాన్నను చూసి దాక్కోవడం,
అక్కలతో, అన్నలతో గిల్లికజ్జాలు పెట్టుకోవడం,
ఎగిరే గాలిపటాలను చూస్తూ ఊహల్లో విహరించడం,
బడి ఎగ్గొట్టేందుకు వాన కోసం దేవుడిని ప్రార్థించడం,
దండించిన మాస్టారు సైకిల్ టైర్‌లో గాలి తీసేయడం,
సాయంకాలాలు బంతాటలు,
రాత్రుళ్లు దాగుడుమూతలు,
పక్క మీదకి చేరాక బామ్మల కాశీ మజిలీ కథలు..

బాల్యం అంటే…
ఒక సరదా.. మళ్లీ మళ్లీ తిరిగి వస్తే బాగుండునని
ప్రతి ఒక్కరు తపించే, ఆశించే
ఓ మధురమైన, అందమైన
మరిచిపోలేని ఓ అద్భుతమైన కల.

మరి నిన్నటి పరిస్థితి…!

బాల్యం అంటే…
బండెడు హోమ్ వర్క్,
స్పెషల్ క్లాసుల పర్వం,
తోటి పిల్లలతో ప్రోగ్రెస్ కార్డుల పోటీ,
ఉదయాన్నే కాళ్లీడ్చుకుంటూ ట్యూషన్లు,
సాయంకాలాలు కంప్యూటరు క్లాసులు,
డాన్సు క్లాసులు, యోగాభ్యాసాలు,
రాత్రుళ్లు ఆన్‌లైన్ కోచింగులు,
కాన్వెంట్ కుర్రాళ్లకు ఐఐటి టార్గెట్లు..

బాల్యం అంటే…
ఒక బాధ.. ఒక వ్యథ
నిద్రలో సైతం
ఉలికిపాటుకు గురిచేసే
ఓ పీడకల.

ఇక..

నేటి (దు)స్థితి…!

బాల్యం అంటే..
జిహాద్ పాఠాలు,
తుపాకీ గుళ్లు, సైనేడ్ బిళ్లలు..
ఆత్మాహుతి సైనికులు,
మత మౌఢ్యంలో కొట్టుమిట్లాడే
రాక్షసుల చేతుల్లో
ఊపిరి పోసుకునే మారణాయుధాలు,
ఉగ్రవాద రక్కసి కోరల్లో
ఆహుతవుతున్న చిన్నారులు..

నేటి బాలలు….
పసిమొగ్గ ప్రాయంలోనే
వాడిపోతున్న గులాబీలు..

మరి రేపు (?!?!?)….

(http://telugu.webdunia.com/miscellaneous/kidsworldకు స్పందన)

RTS Perm Link

Election Special

చిత్తూరు జిల్లాలో అదొక చిన్న అసెంబ్లీ నియోజకవర్గం.

అక్కడ దాదాపు ఇరవయ్యేళ్లుగా నిరవధికంగా తెదేపా అభ్యర్థినే విజయం వరిస్తుండేది. అతని బలమైన సామాజిక వర్గంతో పాటు, చంద్రబాబుతో ఉన్న అత్యంత సాన్నిహిత్యం మూలంగా అతను గెలిస్తే క్యాబినెట్ మంత్రి కూడా అవుతాడు కనుక, తద్వారా మరిన్ని ‘ప్రయో’జనాలను పొందవచ్చు కనుక ప్రజలు గుడ్డిగా అతడికే ఓట్లు గుద్దేవారు.

కానీ, ఆ పెద్దాయన సంవత్సరంలో 300 రోజులూ భాగ్యనగరంలో తిష్ట వేసి, ఇక్కడి ప్రజల గోడును పట్టించుకునేవాడు కాదు. ఆ ఊరిలో అతన్ని ఓడించే సత్తా మరొక ప్రధాన పార్టీ అయిన కాంగ్రెస్‌కు లేకపోయింది. మనోడికి ఎదురులేకపోయింది. ఆటోమేటిక్‌గా కళ్లు అతని బట్టతలపైనెక్కి కూర్చున్నాయి.

అదే తేదేపాలో మరొక బలమైన సామాజిక వర్గానికి చెందిన ఓ నాయకుండేవాడు. ఆర్థికంగానూ బలమైనవాడు కావడంతో పార్టీలో చేరిన కొన్ని రోజుల్లోనే రాష్ట్రస్థాయి నేతగా ఎదిగాడు. ఓ శుభముహూర్తాన పార్టీ టిక్కెట్ ఆశించి భంగపడ్డాడు. ఖేల్ ఖతం.. జెండా, కండువా రెండూ మార్చేశాడు. అతగాడి వైఖరితో మొహం మొత్తిన జనం ఇతనికి పట్టం కట్టారు.

ఇదంతా ఎందుకంటే -

కాంగ్రెస్ పార్టీలో అన్ని సంవత్సరాలుగా ఉన్నవారెవ్వరూ అతనిపై గెలవలేకపోయారు.
జిల్లాలో ఏ చిన్న పదవిని అనుభవించలేకపోయారు.
రాబడి, పరపతి రెండూ లేకపోవడంతో ఇతనికి జైకొట్టేసారు.

తిరుగుబాటు నాయకునికి అధికారం చేజిక్కగానే, అందరినీ చక్కగానే గమనించాడు. పదవ తరగతి తప్పి, పొట్టకూటి కోసం కేబుల్ వైర్లు చుట్టుకునే ఓ స్థానిక ‘నేతన్న’కు ఆ ఊరి గుడిని రాసిచ్చేసాడు. తన స్వంత లోకల్ ఛానెల్‌లో అతి శ్రద్ధాభక్తులతో పదవులు నిర్వర్తించిన మరొక ముఖ్యడికి పార్టీ పదవిని కానుకిచ్చేసాడు. అయినవారికి అందరికీ తాను తినగా మిగిలినది అంతో ఇంతో విదిల్చేవాడు.

కథ సాఫీగా జరిగితే ఇక వింతేముంది..

ఎదిగేకొద్దీ ఒదగమని పెద్దలు చెప్పారు గానీ, అది రాజకీయాల్లో పనికిరాదుగా. అడ్డమొచ్చినవాడిని, ముందున్నవాడినీ తొక్కుకుంటూ, తన్నుకుంటూ దూసుకెళ్లిపోకుంటే వెనుకే ఉండిపోతారు మరి. కాసింత పలుకుబడి రాగానే, కేబుల్ వైర్లోడికి ఆశ పుట్టింది. గుడికి వచ్చే కొందరు పెద్దలతో తెర వెనుక రాజకీయాలు నెరిపి, వారసత్వాలకు పెట్టింది పేరు అయినటువంటి కాంగ్రెస్ పార్టీకి, రాష్ట్రంలో శక్తివంతమైన యువనేతగా ఎదిగిన ఓ పత్రికాధిపతి(??)కి దగ్గరైపోయాడు.

ఇంతటికీ కారణం ఆ గుడి, ఈ తిరుగుబాటు ఎమ్మెల్యే పెట్టిన ఛైర్మన్‌గిరీ అనే భిక్ష.

అంతే ఇక చూస్కోండి.. నేను సైతం అంటూ టిక్కెట్ కోసం ఎగబడ్డాడు. ఇతనికి తోడు ఓ బేరాల్లేని డాక్టరు. గతంలో వీరిద్దరూ ఆ గుడి పదవి కోసం పోటీ పడ్డారు, దాదాపు వీధి పోరాటలకూ దిగారు. గుడి పదవే దక్కని ఆ పెద్ద డాక్టరు, ఏకంగా ఎమ్మెల్యే టిక్కెట్‌నే ఆశిస్తున్నాడు ఇప్పుడు. అతను, ఇతను ఏకమైపోయి ప్రస్తుత ఎమ్మెల్యేకు వ్యతిరేకంగా నినాదాలు, ధర్నాలు, సమావేశాలు నిర్వహించేస్తూ ఓట్లను చీల్చి, ఉన్నది కాస్తా ఊడగొట్టుకునే పనిలో నిమగ్నమయ్యారు.

కొసమెరుపు:
స్థానిక డిగ్రీ కళాశాలలో జరిగిన ఎన్నికల్లో గెలుపు కోసం వీరపాట్లు పడిన ఔత్సాహిక యువనేత ఒకరున్నారు. ఇతగాడి పుణ్యమా అని, అప్పటి నుంచి ఆ కాలేజీలో ఎన్నికలే బందైపోయాయి. ఇప్పటికి కూడా.. చాన్నాళ్ల క్రితమే పొట్టకూటి కోసం కర్ణాటకలో సెటిలైపోయిన ఆ పెద్దమనిషి ఇప్పుడు మళ్లీ స్వంత ఊరిలో పార్టీ అభి’వృద్ధి’ పనులు చేపట్టేస్తూ, సంక్షేమ కార్యక్రమాలకు, పీడిత తాడిత, అణగారిన వర్గాలకు దగ్గరైపోతున్నాననే భ్రమలో కొట్టుకుంటున్నాడు. ఈయన కూడా కాంగీయుడే. టిక్కెట్ కోసం ముచ్చటపడుతున్నవాడే. ఈయన అభిమానులెవరో, ఎంతమందో తెలియదుగానీ, వారి కోరిక మేరకు స్వతంత్ర అభ్యర్థిగా ఎన్నికల బరిలో దిగుతానని ప్రకటించేసాడు.

ఇవన్నీ చూడబోతే, ప్రస్తుత కాంగ్రెస్ ఎమ్మెల్యేను ఓడించడానికి గతంలో ఓడిపోయిన తెదేపా పెద్ద మనిషే తెర వెనుక ఉండి వీళ్లని పురికొల్పుతున్నాడని నియోజకవర్గ ప్రజలు అనుకుంటున్నారు..

మరి మీరు??!

RTS Perm Link

పిల్లలు చల్లనివారేనా.. అంతేనా.. మరేమీ కాదా అని ప్రశ్నిస్తే మనలో చాలా మంది తెల్లబోతారు…

ఎందుకు కారు, పిల్లలు గడుగ్గాయిలు, చిచ్చర పిడుగులు, సందేహ ప్రాణులు.

వాళ్లు అడిగే చిన్న చిన్న ప్రశ్నలకు, ఆ క్షణంలో వారి నుండి తప్పించుకునేందుకు ఏవో సమాధానాలు చెప్పి దాటవేస్తాం గానీ, లోతుగా ఆలోచించుకుంటూ పోతే మహా మహా వేదాంతులకు, పండితులకే అంతుపట్టని విశ్వ రహస్యాలుంటాయి.

ఆ రోజు ఆదివారం. ఇల్లు సందడిగా ఉంది. మా అక్క, బావ పిల్లలతో మా ఇంటికి వచ్చారు. ఇక్కడికే కాదు, ఎక్కడికి వెళ్లినా మా అక్క టీవి సీరియల్‌లు వదలదు, మా బావ పట్టుకున్న పేపర్ వదలడు. మా కోడలు, అల్లుడి ఆటలకు ఎక్కడా కొదువ లేదు. వాళ్లు ఒక్కో ఏరియాలో ఒక్కో బ్యాచ్‌ను మెయింటైన్ చేస్తుంటారు.

కోడలు బుద్ధిమంతురాలే, మేడ మీదో, వరండాలోనో బొమ్మలు పెట్టేసుకుని ఆడేసుకుంటుంది. మా అల్లుడు బబ్లూగారితోనే సమస్యలన్నీ. బ్యాట్ ఎత్తుకుని రోడ్డు మీద పడితే, బాల్‌ను కొట్టకుండా వాడితో పాటు ఆడే పిల్లల్ని కొట్టేస్తుంటాడు. మా అన్నగారు గతంలో అక్కడ టీచర్ గిరీ వెలగబెట్టారు కాబట్టి… చుట్టుపక్కల పిల్లలు ఆయన భయంతో వీడినేమి అనరు, అనలేరు.

కొండొకచో అన్నా వీడు అంతకు రెండింతలు అనకుండా ఊరుకోడు. అలాంటి ప్రతాపాలు నేనో, మా అన్నో చూసినా తుర్రుమంటూ పోయి అమ్మ కొంగు చాటున దాక్కుంటాడు - బుద్ధిమంతుడిలా. ఆ కొంగు వాళ్లమ్మదైతే ఫర్లేదు, మా అమ్మది.

అప్పటికీ కంట్రోల్ చేసుకోలేని పరిస్థితుల్లో వాడిని ఏమైనా అన్నామంటే, మా అమ్మ మా భరతం పట్టేస్తుంది.

ఒకసారి నేనే బలైపోయా వాడి తెలివితేటలకి. వెంటపడి ఓ దెబ్బ వేసానో లేదో ఎప్పట్లానే మా అమ్మనాశ్రయించాడు. వాడి తరపు ఈవిడ వకాల్తా.

మా అమ్మకో ఊత పదం ఉంది. “పోనీలేరా.. వాడి పాపాన వాడే పోతాడు. దేవుడు అన్నీ చూస్తుంటాడు” అని.

భాగస్వామ్య వ్యాపారం పేరుతో స్నేహితుడు నాకు శఠగోపం పెట్టినప్పుడు ఇదే మాట. అవసరానికి డబ్బు తీసుకున్న బంధువులు మొత్తానికి నామం పెట్టినప్పుడు అదే మాట. “పోనీలేరా.. వాడి పాపాన వాడే పోతాడు. దేవుడు అన్నీ చూస్తుంటాడు” అని.

మా వాడేదో ఏడుస్తున్నాడు కదాని ఊరడింపుగా ఇదే వాక్యాన్ని ఉపయోగించేసింది. ఆ తర్వాత ఆమెకు తీరిగ్గా నాలుక్కరుచుకునే అవకాశాన్ని వాడు ఇచ్చేసాడు.

అయితే అమ్మమ్మా.. దేవుడు అన్నీ చూస్తుంటాడా

అవును..

అంటే ఇప్పుడు చిన్న మామయ్య నన్ను కొట్టింది

అది కూడా..

మరి.. రెండ్రోజుల ముందు మా ఊరిలో నేను వంశీగాడిని కొట్టింది కూడా చూసాడంటావా

ఒక్క క్షణం ఖంగుతిన్న ఆవిడ అంతలోనే తేరుకుని - ఖచ్చితంగా చూసే ఉంటాడు అంది.

దేవుడు ఒక్కడే కదా.. అక్కడ, ఇక్కడ.. ఎంతమందిని చూస్తాడు.

అంతలోనే కలగజేసుకున్న మా అక్క వాడిని గద్దించడం, వాడు మళ్లీ వీధిలోకి తుర్రుమనడం జరిగిపోయాయి.

ప్రతి రోజూ నిద్రపోయే ముందు ఆ రోజు జరిగిన సంగతులను, సంఘటనలను సింహావలోకనం చేసుకోవడం నాకు పరిపాటి. వాటిలో ఎక్కువ భాగం సంతోషం కలిగించే సంఘటనలే ఉంటాయి. అందులో మా అల్లుడికి నా పక్కన పడుకుంటే గానీ నిద్ర రాదు. నేను వాళ్ల ఊరు వెళ్లినా, వాడు ఇక్కడికి వచ్చినా మా పడకలు పక్క పక్కన ఉండాల్సిందే. క్రమంగా నాకూ అలవాటైపోయింది.

ఆడి ఆడి అలసిపోయాడేమో, ఎక్కువసేపు కబుర్లాడకుండానే నిద్రలోకి జారుకున్నాడు.

వాడిని చూస్తుంటే నాకు నా బాల్యం గుర్తుకొస్తుంది. బాల్యంలో మేము కోల్పోయిన కొన్ని ఆనందాలను వెతికి పట్టుకుని మరీ వాళ్ల చేతికందిస్తుంటే అవన్నీ మేమే అనుభవిస్తున్నట్లు, మేము మళ్లీ చిన్నపిల్లలమైపోయినట్లు ఉంటుంది. నిద్రపోయేటప్పుడు పిల్లల్ని అదే పనిగా చూస్తుంటే వాళ్లకి దిష్టి తగులుతుందని వాళ్లు పుట్టినప్పటి నుండి అమ్మ వారిస్తూనే ఉంటుంది. పువ్వులను, పిల్లలను చూడకుండా ఎలా ఉంటాం..?

హఠాత్తుగా మా అమ్మతో వాడి వాదన గుర్తుకొచ్చింది.

నిజంగా దేవుడు అన్నీ చూస్తుంటాడా? దేవుడు ఒక్కడే కదా. మరి జనాభా సంఖ్య… రోజురోజుకీ పెరిగిపోతోంది. ఎవడి శక్తిమేరకు వాడు పాపాల చిట్టాను పెంచుకుంటున్నారు. పాతిక మందికి మించని తరగతి గదిలో పిల్లల అల్లరినే మాస్టర్లు భరించలేరే. ఇన్ని వేల కోట్ల ప్రజల పుణ్యాలు, పాపాలు, మంచి, చెడు, కోరికలు, కన్నీళ్లు, … ఎన్నని చూస్తాడు దేవుడు.

మధ్యలో పుట్టించడం, చంపడం వంటి అదనపు పని ఒత్తిడి ఉండనే ఉంది. ఏమైపోతాడు దేవుడు? మన కష్టాల గురించి ఆయనకి చెప్పుకుంటాం. మరి ఆయన కష్టాలు ఎవరితో చెప్పుకుంటాడు? మన మేనేజర్‌కి పైన మరొక మేనేజర్ ఉండే విధంగా, మన దేవుడికి ఆయన లోకంలో మరొక దేవుడుంటాడా? ఈయనకి అసలు విశ్రాంతే ఉండదా? భార్యా పిల్లలు, సంసారం ఉండవా?

ఆఫీస్‌లో రెండు మూడు గంటలు ఎక్కువ పని చేయాల్సి వస్తే మన మొహంలో రంగులు మారిపోతుంటాయే.. ఈయన సంగతేంటి?

అంతలోనే మరో సందేహం….

అసలు ఇంతకీ దేవుడున్నాడా? ఉన్నాడని మనం అనుకుంటున్నామా?

అలా అనుకుంటున్నానో లేదో, ఇలా మా అల్లుడుగారు తన ఎడమకాలితో చాచిపెట్టి డొక్కలో తన్నారు - నిద్రలోనే. దెబ్బకు దేవుడు దిగివచ్చాడు. అంతూపొంతూలేని ఆలోచనలతో హిమాలయ అంచులకు వెళ్లిపోతున్న నన్ను ఒక్క తన్నుతో మళ్లీ నా గదిలోకి తోసేశాడు. వాడిని సరిగ్గా పడుకోబెట్టి నేనూ నిద్రపోయాను, దేవుడికి దండం పెట్టుకుని…!!

RTS Perm Link

“ఈ రోజూ గొడవ పడ్డారేమో”

నాలో నేననుకున్నానో, పైకే అనేసానో. అప్పటికే యుద్ధం ముగిసినట్లుంది. ఇల్లంతా భరించలేనంత నిశ్శబ్దం. ఎవరి పనుల్లో వారు ఉన్నారు - నిశ్శబ్దంగానే, చప్పుడు చేయకుండా, కనురెప్పలు కదిలినా వినిపిస్తుందనుకున్నాడేమో మా అబ్బాయి కళ్లార్పకుండా వీక్లీలోని అక్షరాలను తరుముతున్నాడు. వాడి ఆలోచనలు ఎక్కడున్నాయో గానీ, తల అయితే పుస్తకంలోనే ఉంది.

 మా ఆవిడ.

 తెలిసిన విషయమే.

 తను ఎవరితో గొడవ పడినా వంట గదిలోని పాత్రలతో మాట్లాడేస్తుంటుంది. కాలికి తగిలే పీటపై చిటపటలాడుతుంది. చీపురును ఛీ ఛీ అంటుంది. నీకు బుద్ధిలేదు అని నా కారుపై విరుచుకు పడుతుంది.

 అలవాటైపోయిన విషయాలే ఇవన్నీ.

 అయితే అంతుపట్టని విషయమల్లా, ప్రస్తుత సమస్య ఏమిటనే.

 నాకు నేనుగా వాళ్ల వ్యవహారాల్లో వేలు పెట్టడం మానేసాను. ఎవరి అభిమానాలు వారికుంటాయిగా. నేనూ మినహాయింపును కాదు. భార్యాపిల్లల విషయాల్లో అభిమానాలు, ఆత్మాభిమానాలు ఏంటయ్యా అని మీరు అనుకోవచ్చు. గతంలో జరిగిన అనుభవాల దృష్ట్యా నేను ఉచిత సలహాలు ఇవ్వడం, మధ్యస్థాలు చేయడం మానుకున్నాను.

 ఉరుము ఉరిమి ఉరిమి మంగళంపై పడ్డట్లు వాళ్లిద్దరూ కలిసి నాతో చెడుగుడు ఆడేస్తారు. అబ్బాయి అలా తయారైనదానికి నేనే కారణమంటుంది భార్యామణి. నన్నే విషయంలోనూ సపోర్ట్ చేయరే అని మూతి ముడుచుకుంటాడు నా ముద్దుల కొడుకు.

ఇక ఈరోజు భోజన కార్యక్రమానికి సెలవు ప్రకటించేసినట్లే. వీరిద్దరి తగవుల పుణ్యమేమో గానీ, ఏకాదశి, అమావాస్యలకే కాకుండా ఇలాంటి అకాల ఉపవాసాలకు అలవాటు పడిపోయాను. కాసిని మంచినీళ్లు తాగి, సిస్టమ్ ముందు సెటిలైపోయాను. పర్సనల్ మెయిళ్లు ఏవైనా వచ్చాయేమోనని చెక్ చేసుకోవడానికి. అంత ముఖ్యమైనవి ఏవీ లేవు, మా అబ్బాయి కాన్వెంట్ అడ్మినిస్ట్రేటర్ నుండి తప్ప. ఈ ఇ-మెయిలే అమ్మా కొడుకుల గొడవకు మూలకారణమై ఉండవచ్చు.

అయినా మనవాడి ప్రోగ్రెస్ కార్డు, బిహేవియర్, కాండక్ట్ గురించి ఎప్పుడూ చింతించాల్సిన అవసరం లేదు, ఈసారేమైనా తిరకాసు జరిగిందా చెప్మా అనుకుంటూనే మెయిల్ ఓపెన్ చేసాను. తీరా చూస్తే, మా వాడి స్కూల్లో డార్జిలింగ్‌కు టూర్ ప్లాన్ చేస్తున్నారట. ఆసక్తి గల పిల్లలు పేర్లు నమోదు చేసుకోండి అంటున్నారు.

మా మధుకి కొడుకును ఒంటరిగా అంతంత దూరం పంపడం సుతారమూ నచ్చదు. తోటి పిల్లలు, టీచర్లు తోడు ఉంటారుగా అంటే వినదు. ఈ విషయంలో తను ఇప్పటివరకు రాజీ పడలేదు, ఇకపై రాజీ పడుతుందన్న నమ్మకమూ నాకు లేదు. మా వాడిపై తనకుండే ప్రేమ అలాంటిది.

కన్న తండ్రినైన నన్నే ఓ మాట కూడా అననీయదు. వాడినిక ఎవరూ ఏమీ అనరు. అలాగని అతి గారాబంతో వాడినేమీ పాడు చేయట్లేదు. తాను ఓవైపు ఆఫీస్ పనులు చూసుకుంటూనే, వాడి చదువు, ఆరోగ్యం విషయాల్లోనూ ఎంతో శ్రద్ధగా ఉంటుంది. నేను ఈ మాత్రం నిశ్చింతగా ఉన్నానంటే అందుక్కారణం నా మధు.

వాడికి ఎన్నో విషయాల్లో సపోర్టుగా ఉండే తను ఇందులో మాత్రం బద్ధ శత్రువు అయిపోతుంది. వాడికి అసలు బైట ప్రపంచమే తెలియదు. వాడి పుట్టినరోజుకి సకుటుంబ సపరివారంగా వెళ్లే తిరుమల తప్ప. బంధువుల ఇళ్లకు వెళ్లినా, వాడి స్కూల్, మా ఇద్దరి ఆఫీసుల పేర్లు చెప్పి ముచ్చటగా మూడు రోజులైనా గడిపింది లేదు. సమ్మర్‌లోనూ వాడిని ఒంటరిగా వాళ్ల మేనత్త వాళ్లింటికీ పంపదు. మా అక్కయ్య కూడా అప్పుడప్పుడు చాటుగా బాధ పడుతుంటుంది.

నా ఆలోచనల్లో నేనుండగానే అమ్మా కొడుకులిద్దరూ నా గదిలోకి దూరారు.

“విషయం తెలిసిందిగా మీకు.” ఉపోద్ఘాతాలు కూడా అనవసరం కాబోలు.

“ఊ”

“మీ అబ్బాయి ఈ సంవత్సరం మరీ పట్టుబడుతున్నాడు, డార్జిలింగ్‌కు వెళ్లి తీరాల్సిందేనట” వాళ్లు కొట్టుకున్నప్పుడు మాత్రం వాడు నా కొడుకైపోతాడు ఈవిడకి. మిగతా సందర్భాల్లో నెత్తిన పెట్టుకొని ఉంటుంది.

మధ్యలోనే మా వాడు అందుకున్నాడు..

“నా ఫ్రెండ్స్ అందరూ వెళుతున్నారు నాన్నా.. నా కంటే చిన్నవాళ్లు కూడా.. ఇంతవరకు నేనే ఊరికి వెళ్లలేదు. నా ఫ్రెండ్స్ అంతా హ్యాపీగా సెలవుల్లో ఊటీ, ఢిల్లీ వెళ్లి వస్తుంటారు తెలుసా. నాకు మాత్రం అమ్మమ్మ, నాన్నమ్మ ఊర్లు తప్పితే ఏమీ తెలియదు. నేను డార్జిలింగ్ చూడాల్సిందేనంటే అమ్మ ఒప్పుకోనంటోంది” ఇంగ్లీష్ మీడియం చదువులైనా అమ్మా నాన్న సంస్కృతే మధుకి, ఆ మాటకొస్తే నాకు ఇష్టం. మమ్మీ డాడీలను గుమ్మం తొక్కనివ్వలేదు.

“చివరి తేదీ ఎప్పుడు” అడిగాను

వాడి మొహంలో ఒక్కసారిగా వెలుగు - “ఎల్లుండే” ఠకీమని జవాబు

మధు మొహం ఎలా ఉంటుందో నేనూహించగలను - అందుకే చూడలేదు.

“రేపు ఉదయాన చెప్తాను గానీ, నువ్వు వెళ్లి చదువుకో” అన్నాను. మరొక మాటకు అవకాశం లేకుండా, ఇంకాస్సేపు అక్కడ ఉంటే ఏమైపోతుందోనన్నట్లు వాడు వెంటనే వెళ్లిపోయాడు.

 ”మధూ”

 ఆ వైపు నుంచి జవాబు లేదు..

 ”పిల్లలకు బయట ప్రపంచం తెలియడం అవసరం కదా. వాడి ఫ్రెండ్స్ అంతా టూర్ వెళ్లి వచ్చి, అక్కడి వింతలు, విశేషాలు చెబుతుంటే, మనవాడు బిక్కమొహం వేసుకుని వినాల్సి వస్తుంది. నా చిన్నతనంలో అలాంటి అనుభవాలు ఎదురయ్యాయి కూడా. మన అబ్బాయి అలా బాధపడటం అవసరమా చెప్పు..”

 మీరు, మీ అబ్బాయి మంచివాళ్లే. అయితే నేనేనా మీ ఆనందానికి అడ్డు వచ్చేది అంటూ ముక్కు చీదలేదు తను. నా గురించి నాకంటే, తనకే బాగా తెలుసు.

“అక్కడ ఎలాగుంటుందో ఏమిటో, అంతమంది పిల్లల్లో మన చిన్నా గురించి ఎవరు పట్టించుకుంటారు చెప్పండి. అందులోనూ ఇప్పటి వరకు వాడిని వదిలి వారం కాదు కదా, ఒక్క రోజూ ఉండలేదే. మీరే చెప్పండి - నిద్ర లేచి వాడిని చూడకుండా మీరు మరొక పని చేస్తారా, చేసారా?”

నిలదీసినట్లు కాకుండా, నెమ్మదిగానే అడిగింది. నిజమే. ఆలోచించాల్సిన విషయమే అనిపించింది నాక్కూడా. నెమ్మదిగా వెళ్లి చిన్నాగాడి గది తలుపు తట్టాను. మేల్కొన్నట్లే ఉన్నాడు.

 ”నువ్వు ఫ్రెండ్స్ కోసం వెళ్తానంటున్నావా, డార్జిలింగ్ చూడాలని ఉందా”

 ”డార్జిలింగ్ చూడాలని ఉంది, అంతే”

 ”సరే”నని నా గదికి వచ్చేసాను.

 మధు మా మాటలు వింటూనే ఉంది.

 ”చిన్నా డార్జిలింగ్ చూడాల్సిందేనంటున్నాడు. వాడి కోరికలోనూ న్యాయం లేకపోలేదు మధూ. వాడికి డార్జిలింగ్ చూడాలని ఉంది, నీకు వాడిని ఒంటరిగా పంపడం ఇష్టం లేదు. ఓ పని చేద్దాం. వాడితో పాటు మనమూ వెళ్దాం. స్కూల్ బస్‌లో కాదులే, మన కార్‌లోనే.. ఏవంటావ్” అన్నాను.

 ”బడ్జెట్..?” ఆర్థిక మంత్రి అవతారం ఎత్తింది.

“ఫర్లేదులేవోయ్.. నేను చూసుకుంటాలే”

 ఈయనేనా ఈ మాటలంటోంది..

 ఇంకా అపనమ్మకమే తన కళ్లల్లో.. అనవసర ఖర్చులకు ఆమడ దూరం నేను. ఆశ్చర్యంగా చూస్తూనే నిద్రకు ఉపక్రమించింది తను.

 ”ఇది అనవసరమైన ఖర్చు కాదు మధూ.. నా బిడ్డ కోరిక తీర్చడం నాకు అనవసరం అవుతుందా చెప్పు..”

 నేను నడుము వాల్చాను.. సంతృప్తిగా..

నిజమే.. ఆనందంగా ఉన్నది నేను ఒక్కడినే కాదు..

నా పక్కన పడుకున్న నా మధు, తలుపు చాటున నిలుచున్న మా చిన్నా కూడా..

RTS Perm Link