Apr 26 2016

యశస్వి|| పులిపిల్లతో.. ప్రో కబడ్డీ||

Published by at 2:11 PM under my social views

1935219_10208603733873121_621756783200197120_n

పులిపిల్లని పెరట్లో పెంచుతున్నట్టుంది నా పని;
నిండా పన్నెండు లేవు బిడ్డకి
గుండెలమీద ఆడుకునే దశ దాటిపోయాక
ఈ లోకంలో నా భయాల్ని ఎలా చూపాలి!

ఏ రోహిత్ శర్మో నిన్ను ఆవహించినంత మాత్రాన
ఈ మండుటెండల్లో ఏ శిక్షణా శిబిరానికి పంపను !
దశరధుడి ప్రేమ టన్నుల లెక్కన ఉన్నా
ఏవిశ్వా’మిత్రుడో వచ్చి నిను పట్టుకుపోతాడని బెంగైతే లేదు..

తోడు పంపుదామంటే తమ్ముళ్ళెవరూ లేరు
సొంత దర్బారు జీవితానికి నేను నోచుకోలేదు
ఏ కైక కోరిక రాముడే కోరినట్టు
నువ్వడిగినంత మాత్రాన కోచింగ్ కి ఎట్లా పంపను

అమ్మా, పిన్నీమన ప్లాను విన్నారా
ఈ రామాయణాన్ని భాగవతం చేస్తారు
మా చిన్ని కృష్ణుడ్నిఎండలపాలు చేస్తావా అంటూ
నన్ను జంటగా ఇంటి మడుగులో ముంచేస్తారు
అప్పుడు ఏ విష్ణుముర్తి నన్ను రక్షిస్తాడు?

పరిగెడితే పాదాలు కందుతాయనుకున్న కాలం
నిన్నో మొన్నో గడిచినట్టే ఉంది
రబ్బరు బంతీ చెక్కబ్యాటు రోజులు
అట్లెట్టా గడిచిపోయాయి!

ఐపీఎల్ సీజన్లు చిన్నతెరకి ఎక్కి
నీకింత కిక్కెక్కిస్తున్నాయని
నాకు ఆలస్యంగా నైనా ఎరుకలోకి వచ్చింది
ఇప్పుడో ప్రత్యామ్నాయం వెతుక్కోవాలి

పద గుండెల్ని గోదా చేసి
ప్రస్తుతానికి ప్రో కబడ్డి ఆదుకుందాం దా.
ఒరే ఉంగా.. ఉంగా
లే పంగా !
=25.4.2016=

RTS Perm Link

No responses yet

Trackback URI | Comments RSS

Leave a Reply

*

RTSMirror Powered by JalleDa