Apr 02 2016

యశస్వి ||రెండో నెంబరువాడి రెండో ప్రేమకధ||నిజంగా.. నిజం

Published by at 6:43 PM under my social views

Brick wall

ఏందుకనో రెండుకు.. నేనంటే మక్కువ
నాకూ రెండు మీదే మనసెక్కువ

అన్నదమ్ములు నాన్నకు ఇద్దరు
నేను మరి రెండోవాడి ..రెండోవాడ్ని
అందరికీ ఇద్దరేసి లింగళ్ళే
అన్నకూ నాకూ పెదనాన్న చిన్నాన్నల వల్ల
ఇద్దరు తమ్ముళ్ళు, ఇద్దరు అన్నలు..
అమ్మ తరఫు ఏ పెద్దమ్మ వల్లనైనా నాకు ఉన్నది
ఇద్దరిద్దరు అక్కలు

అన్న వల్ల ఇంటికి వెలుగొచ్చింది
భాను కిరణాల్ని తట్టుకోవడానికి,
వెన్నెల కురిపించే పని పెట్టుకోవడానికి
రెండుగా నా అవసరమొచ్చింది
నన్ను చూడడానికి అందరూ
మా ఇంటికి రెండోసారి వచ్చేవారు

అన్నయ్యకూ నాకూ కలిపి
అవి ఏవైనా సరే!; రెండు – రెండు తెచ్చేవారు
పండగలకి ఒకేరకం రెండు జతలు
బట్టలు బిగుతైనప్పుడల్లా సిద్దంగా ఉండేది
అదే తానుముక్కలోని అన్నకు కుట్టించిన చొక్కా
నా నిక్కర్లకు బదులుగా వాడి పాంట్లను తొడిగేవాడ్ని

అదేంటో చోద్యం!!
ఒకటి నుంచి పది దాక
రెండు తక్కువ పది ఊళ్ళల్లో చదివా
ఊరూ, క్లాసూ మారినన్నిసార్లూ
అరమార్కు తేడా ఉన్నా, ఆరుమార్కులున్నా
ఏ రెండుసార్లో తప్ప రెండోవాడిగానే ఉన్నా

ఎందుకిలా జరిగేదో తలపట్టుకు కూర్చున్నా
తెలిసేది కాదు అమ్మకూ- నాన్నకు
నే ఇంట్లో చదివేవాడ్ని కాదంటే బళ్ళో నమ్మరు
క్లాసు బయట అల్లరిని చూస్తే ఏ పంతులమ్మా నన్ను నేనని నమ్మదు

నే చెప్పినదెంత నవ్వులాటగా ఉన్నా
నేను పుట్టిన ఒకటో తేదీమీదొట్టు
ఎప్పట్నించో రెండుగానే బతుకుతున్నా
ఎక్కడో పోగొట్టుకున్న నన్ను అక్షరాలలో వెతుక్కుంటున్నా

పెళ్లయిన సంవత్సరానికి..
అదే తారీకున పుట్టినోడు.
ఏ దివ్యలోకాలనుంచో
రెండు రెళ్ళని పక్కపక్కన పెట్టుకుని
ఈనెలే 22 న ఊడిపడ్డోడు…
వాడు నేను కన్నోడు; ఓరోజు నన్నడిగాడు

మరి “నన్నొక్కడ్నే ఎందుకు కన్నావని?”
వాడితో అన్నాన్నేను.. ఒక్కొక్కటిగా ఉన్నవి
నువ్వూ- అమ్మా నా జీవితంలో రెండే ఉండాలని
నీతో కలిపి నా కవిత్వం నే కన్న కలలని.. నాకు పుట్టిన బిడ్డలని

ఈ రెండే నా జీవితమంతా నిండాలని
మీ నీడనే నా శేష జీవితం పండాలని

రెండక్షరాల తడి జీవితమంతా
పరుచుకున్నప్పుడు
13456789ల్లా కాకుండా
2 లా మీకు మరోమారులా
గుండెల్లో నిండా కూర్చుండాలని..

నా రెండో పుస్తకం రెండోభాగంరెండు మాటలు రాస్తున్నా…
రెండు చేతులతో దీవించండి.

=1.4.16=

RTS Perm Link

No responses yet

Trackback URI | Comments RSS

Leave a Reply

*

RTSMirror Powered by JalleDa