Apr 04 2015

|| ఆ అమ్మాయి లిఫ్ట్ ఇచ్చినప్పుడు..||

Published by at 6:56 PM under my social views

Little Girl In Car

ఓ స్కూలు పిల్లాడ్ని ..
ఓ అల్లరిపిల్ల సరదాగా కారెక్కించుకుంది.
ఇంటిదగ్గర దింపాలనే
అంతకుమించిన కధేం లేదు.
ఏమీ లేకపోతే ఇది కవితా కాదు

అసలే మనోడికి కొంచెం ఎక్కువ ధైర్యం
గుర్రం కళ్ళాలను లాగినట్టు ఆమె
ముందుకురికిస్తే కారుని
బిక్కు-బిక్కు మంటూ కూర్చున్నాడు మనవాడు

నిశ్శబ్దాన్ని ఛేదిస్తున్నట్టు అడిగాడు
“ఎన్నేళ్ళ నుంచీ ఈ చోదన!”
ఓ పుష్కరం నుంచి” నిజం చెప్పింది..
అందులోనూ కవిత్వం లేదు.

ఆ పిల్ల దారిని జయించడానికే
చక్రం పట్టినట్టుంది
కొంచం భరోసా కలిగిందోలేదోనని
అబ్బాయిని మాటల్లో పెట్టింది
ఆ నాలుగు చక్రాలూ మనిషిని
ఆలోచనల వెనక్కి తోసేసినట్టు
కాలాన్ని లుంగచుట్టి తెస్తున్నాయని
బహుశా ఆమెకు తెలియదు
పరిచయం పెద్దగాలేక పోయినా
ఒకరికొకరు
పరిచయం అక్కర్లేని వారే ఇద్దరూ!

మొన్నీ మధ్యనే కదా
ఒకరి పుట్టినరోజున
మిఠాయిలు-పళ్ళూ పంచుకున్నారు
ఓ డ్రాయింగ్ మాస్టారిచ్చిన
రెండు పెన్సిళ్ళను
బహుమానంగా అందుకున్నారు
అపురూపంగా దాచుకున్నారు!

పోట్లాడుకోవడం చేతకాక
మాట్లాడుకోవద్దనుకున్న
తీర్మానం గురించి
ఇప్పుడిద్దరూ మాట్లాడడంలేదు
కలిసి ప్రయాణిస్తున్నారు
దారి చూపుల్ని కలవనివ్వడం లేదు
అయితేనేం మాటల్ని ఎవరాపమన్నారు!!

తన తొమ్మిదో క్లాసులో
పావలా పెరిగిన పాల ఐస్ రేటు

పదోక్లాసులో
దాచుకు తిన్న జీడిగుళ్ళ మూట

ఇంటి దగ్గర అమ్మ చేసే
నేతి సున్నుండ కోటా

రోడ్డు పక్క తోపుడు బండి
మిర్చి బజ్జి రుచీ

ఆడపిల్ల ‘నీయమ్మ’ అంటే
తన్నుకొచ్చే నవ్వూ

పోలిస్తే తట్టుకోలేని
ఆడపిల్ల నైజం

చేతి గీతల్లో దాక్కున్న
జాతకాల వైనం

గమ్యం చేరే ముందు
ఐదు క్షణాల మౌనం..

కొద్దికిద్దిగా ఎదుగుతూ వస్తున్న
అలోచనల్లో
తరుగుతున్న ఇద్దరి వయసు అంతరం.

అబ్బాయి మాటల్లో మర్మం అమ్మాయి కనిపెట్టిందో లేదో
తెలియదు కానీ..
కారు దిగాక ముందుకు జరిగిన కాలంలో
పెరిగింది వయసే తప్ప
దూరం కాదని,

చిరునవ్వే దూరాన్ని-
భారాన్ని తేలిక చేస్తుందని
ఆ పిల్లలిద్దరికీ తెలిసినట్టు
ఎవ్వరికీ తెలియదు

ఒకరికొకరు ఎదురుపడని ఒకానొక కాలంలో
వారి వయసులు..
పిల్లకి పాతిక పైనా పిల్లాడికి నలభై కిందా ఉండొచ్చు
అదీ కథ.
=28.3.2015=

RTS Perm Link

No responses yet

Trackback URI | Comments RSS

Leave a Reply

*

RTSMirror Powered by JalleDa