Aug 30 2013

యశస్వి’ || ప్రార్థించే చేతుల చిత్రం …(story behind a pen sketch)

Published by at 7:48 PM under my social views

డ్యూరర్ సోదరుల
ప్రార్థించే చేతుల అద్భుత సృష్టి వెనుక
నిండు జీవితాల కల..
ఎందరికి తెలుసు ఈ కథ..

అందుకే అల్లుతున్నా కవితలా..
నా కిది పంచుకోవడమే పండగ..
ఒక్కమాటతో వెలుగులోకి తెస్తున్నా..

450 ఏళ్ళ క్రితం గీసిన బొమ్మ..
ఆ స్ఫూర్తి ఈ లోకానికే ఓ వరమని..
చిత్రకారుడు ఆల్బెక్ట్ అయినా
ఆల్బర్ట్ సోదరప్రేమే అజరామరమయిన
కళాఖండపు రూపమని …

*****

దేశం జర్మనీ..
తండ్రిది బంగారం పని
18 మంది సంతానాన్ని సాకాలంటే..
18 గంటల కష్టం తప్పనిసరి.
ఇక చదివించడం తన వల్ల కానిదని

చిత్రకళకు పదునుపెట్టుకోవడానికి
పట్నం వెళ్ళడం ఇద్దరిలో ఒక్కరికే పరమని
అదీ వేరొకరి కష్టం పైన మాత్రమే సాధ్యమని..

నాణెం ఎగరేసి నిర్ణయించుకోవాలని..
గెలిచినవాడు ముందు విద్య నేర్వాలని..
నాలుగేళ్ళ కాలానికి శ్రమజీవిని
చదువుకు పంపడం ముందెళ్ళినోడి బాధ్యతని

కిక్కిరిసిన పడకల వద్ద
ఎన్ని చర్చల రాత్రుళ్ళు గడిచాయో..
అన్నదమ్ములిద్దరూ
ఎంత మథనపడ్డారో..

గెలిచిన ఆల్బెక్ట్ న్యూరెంబర్గ్ పట్టణానికి
పయనమై..విజయతీరాలను ముంచెత్తాడు..

నిలిచిన ఆల్బర్ట్ నాలుగాయనాలపాటు
కళోపాసనకే వెలుగురేకై
ప్రమాదకర పాతాళ కుహరాల లోకి
చీకటిని చీల్చుకుంటూ
ఆ సూర్యుడి ఉదయంకోసం
పడమటి ప్రయాణం చేసాడు

****
రానే వచ్చింది.. వేడుకలరోజు
విఖ్యాత కళాకారుడి విద్య, ముగిసింది
విశ్వకేతన రెపరెపలు చూసి
ఊరంతా మురిసి
తోట విందులో పొద్దు పొడిచింది

తారకల తళుకుల మధ్య
వంతులు మార్చుకునే సమయం..
ఒకరి జీవన సాఫల్యంలో తడిచిన
అన్నదమ్ముల బంధాలు

‘అన్నా! నీ రుణం తీర్చుకుంటా..
నువ్వెళ్ళి చదువుకో’ అన్న మాటకి
కాలు కదిలేనా! ఆల్బర్ట్ కి!!

చేయందుకోలేని అననుకూలత
పనిలో వేళ్ళెన్నిసార్లు విరిగాయో
లెక్కలేసుకోనివ్వని చీకటి గని
జీవిత కాలపు ఆలస్యం

ఉద్విగ్న క్షణాలు సృష్టించిన చరిత్ర అది..
ఆ కష్టజీవి చేతుల చిత్రాన్ని
గీసి లోకానికి అందివ్వడం
సహోదరుని కన్నీటి పని..

అందుకేనేమో.. నరాలు తేలిన
ఆ పొడారిన చేతుల్ని చూసినప్పుడల్లా..
ఆగలేక…
నా కంట తడి

==30.8.2013==

RTS Perm Link

2 responses so far

2 Responses to “యశస్వి’ || ప్రార్థించే చేతుల చిత్రం …(story behind a pen sketch)”

  1. లక్ష్మీపవన్on 30 Oct 2013 at 1:38 PM

    వణికే చేతుల వెనుక ఇంత కథ ఉందని అనుకోలేదు టీచర్.

  2. Yasaswion 03 Dec 2013 at 10:48 AM

    kadhaa chitraalu bratuku paaThaalu pustakaM lO chadivi,…

Trackback URI | Comments RSS

Leave a Reply

*

RTSMirror Powered by JalleDa