Mar 06 2013

రెండు గా బతకాలేమో..

రెండు గా బతకాలేమో మనమెప్పుడూ వింతగా
గతంలో నేనున్నపుడు నువు నా భవిష్యత్తులో దాక్కున్నావు
నువ్వే నా భవిష్యత్తు అనుకుంటే.. గతంలోకి తొంగిచూస్తున్నావు

రెండు గా ఉండాలేమో మనమిప్పుడు కొత్తగా
నిన్ను చూడాలని చీకట్లను దాటి వస్తే నీ ఎండ నామీద కాస్తున్నావు
నే వదిలిపెట్టిన నీడలన్నిటినీ నీ నెత్తిన బండలా మోస్తున్నావు

రెండు చోట్ల గడపాలేమో మనమెప్పుడూ రోజంతా
రూకలవేటలో బయట నేనుంటే గడపలోన పీడకలల్ని కంటున్నావు
రహదారి వెంట నా పరుగైతే అడ్డదారిలో నాకై ఎదురుచూస్తున్నావు

రెండుగా కనబడాలేమో మనమెప్పుడూ
భయాన్ని కప్పుకొని నా రక్షణలో నువ్వూ
ప్రేమని కప్పుకొని నీ నిరీక్షణలో నేనూ

నీతో నడవాలనీ, నీకై నిలిచిపోవాలనీ
రెండువైపులా ఊగుతోంది నా మనసు.
ప్రేమకీ జీవితానికీ మధ్య ఏది ఏమైనా తేడా ఏముంది?

RTS Perm Link

One response so far

One Response to “రెండు గా బతకాలేమో..”

  1. మద్దిరాల శ్రీనివాసులుon 24 Mar 2013 at 6:18 AM

    మనసు తోడ జనులు కనెడి భావాలతో
    కవితలల్లినావు ఘనము గాను
    భావ సంపదంత పరిమళించుచునుండె
    చిత్తరువుకు కవిత హత్తుకొనియె

Trackback URI | Comments RSS

Leave a Reply

*

RTSMirror Powered by JalleDa