Archive for March, 2017

Mar 08 2017

యశస్వి || To my Antipode..||

Published by under my social views

నీ తీరంలోనే నే మొలకెత్తానని
ఏరై నువ్వు పారి చెప్పిన ఆ రోజుల్లో..
నా జీవనదాహానివి

నీ ఉరకల్ని కన్నవాడ్ని,
నీ జలజలల్ని విన్నవాడ్ని
నన్నుతవ్వుకుని మరీ నీ మూలాన్ని చేరుకున్నవాడ్ని..

నా రహస్యాన్ని నీలో మునిగి కనుగొన్నవాడ్ని
నిను పీల్చుకుని మరీ తెలుసుకున్నవాడ్ని

జీవితపు ఎగుడుదిగుళ్లలో నువ్వు ప్రవహిస్తున్నప్పుడు
నీ పంచన నే కుదురుకుని విస్తరిస్తున్నప్పుడు..

నా ప్రపంచంలోఅంతర్వాహినివి,
ఆ ప్రపంచాన్ని చుట్టేసిన సముద్రానివీ నువ్వే

నీ తుఫాను తాకిడికి నా మేను అల్లల్లాడిపోయేది
నిలువెల్ల నిను నింపుకున్న బరువుతో
నే నేల వాలితే …….

గడ్డిపోచ విలువ చేయని బతుకును
నీ అంతులేని పాద స్పర్శతో పునీతం చేసినందుకు
సాగిలపడి తీర్చుకునే మొక్కు అది

నీ ఒడిని చేరి మరోజన్మ పొందెందుకు
నా కొమ్మల్ని వేళ్ళు గా వంచుకుంటున్న వైనం
నీకు నన్ను సమర్పించుకుంటున్న నిలువుదోపిడి.
నా బెరడుని మట్టిగా మార్చి
నీ పాదాలకు రాయాలని ముడుపుగట్టిన పారాణిని

లేవాలని తోచినపుడు తొక్కిపట్టేది మన్నైనా
నను ఎల్లవేళలా నిలబెటింది నువ్వేకదా!

నువ్విలా నీ ప్రశాంత అభావవదనాన్ని నావైపు చూపిస్తుంటే
ఈ నేల ఆవలి వైపున కొలువైన అపారపారావారం
నాపై తిరగబడ్డట్టు..
నాలో ఎన్నో మౌన విస్ఫోటనలు..
జ్ఞాపకాల ఆకులై రాలిపోతున్నాయి.
=8.3.17=

RTS Perm Link

No responses yet

RTSMirror Powered by JalleDa