Archive for November, 2016

Nov 08 2016

యశస్వి ||వింటానంటే ఓ పిట్టమాట..||

Published by under my social views

pink-bird-cage

చిగురుటాకా!చిగురుటాకా!! ఈ చెట్టు మనదే
దీన్నే నేనూ కనిపెట్టుకుని ఉన్నా

గుడ్డే ప్రపంచం అనుకున్న గుడ్డి ప్రపంచాన్ని దాటి
ప్రపంచమే పెద్ద గుడ్డన్న మాటల్లోంచే పుట్టానే నేనూ

చుట్టూ పంజరముందంటే
ఎగరడం బాధని ఏదో సరిపెట్టుకున్నా

గతాన్ని తిడితే తట్టుకోలేక
తిట్టుజోలికి వెళ్ళననేగా నీముందు ఒట్టుపెట్టుకున్నా!!

నాకూ అవగతమే
నువ్వాలకించిన కధలన్నీ, అణగారిన వ్యధలన్నీ

నేనెవ్వరని ఈ సహచరుడ్ని అడగకే..
అది నేనెప్పటికీ చెప్పని నిజం

అణచినోడి తప్పులు గొప్పలుగా చెప్పినప్పుడు కలిసే విన్నాం
కంటి చెమ్మ ఉప్పదనాన్ని కలిసే కన్నాం

వేదన బాధ అని వేరే చెప్పాలా
నీకైనా-నాకైనా అనుభవాలు అవేకదా

తప్పులెందుకెంచవద్దంటున్నానంటే
అనగనగా అన్నవన్నీ అలాంటివేనని

శ్రద్దగా గూడల్లుకునే నా బోటిదానికి
తడకలతో వాటి నడుమ సందులతో పనేముంది!

కెక్కరిస్తే.. అస్థిపంజారాలే కనపడుతున్నవేళ
ఏ కళేబరాన్ని తన్ని అపవిత్రత ఆపాదించాలి

కుళ్ళిన శిధిలాల మధ్య ఏనుగుల స్మృతులతో
ఏ సింహాసనాల్ని భర్తీ చెయ్యాలి!

పాపాలచీడ పట్టిన చెట్టున పుట్టినదానినని
రాలుటాకుల తప్పుడుపాటల్ని
కూనిరాగాలుగా మలచుకున్నానని
పాచిపళ్ళన వాడు పాడిన పాటలన్నీ విన్నానని..

నువ్వెంత బెట్టుచేసినా
సగం నిజాన్ని పూర్తి అబద్దం చెయ్యరాక..
చెప్పనుగాక చెప్పను

గతించిన కాలపు చీకట్లను
తిట్టుకుంటూ ఆ చెట్టునే పద్దాకా.. కూర్చోలేను
చీకటి నీడ లేని నాడు
వెలుగునెలా ఊహించగలను!

వెలుగొచ్చే వేళ లేని పంజారాన్ని వదిలేసి నీతో కలసి సాగిపోతాను
అలసినప్పుడు ఆ నీడనే నీ ఒళ్ళో వాలిపోతా

ఓ చిగురుటాకా!!
వదిలేసే అలవాటు లేకే నీ ఇంట
ఈ కొమ్మ పట్టున ఎదురుగాలికి అడ్డంపడుతున్నా

చీకటింట ఇల్లుచక్కబెట్టుకుంటున్నా
వెలుగుముంగిట నీతో కలిసి ఆడుకుంటూన్నట్టు
కలల్ని కంటున్నా

గాలిలో ఎగిరే మనకు
ఏ మట్టీ అంటకూడదనుకుంటున్నా

=8.9.16= పాటపాటే కొత్తగా పాడుకుంటూ>>

RTS Perm Link

No responses yet

RTSMirror Powered by JalleDa