Archive for the 'my social views' Category

Aug 01 2018

| ప రాం ప్రే య సీ..!|-31

Published by under my social views

ఇంతకీ ఏంటంటాను!
సాహిత్యం సంస్కారాన్ని నేర్పుతుంది. అదేంటో తెలియని అమాయకత్వం నీది. ఎలా పెంచాలో తెలియక మీ భవిష్యత్తు తలుపులు మూసేసింది ముందుతరం. జీవితమంటే షాపింగ్ మాల్ సంస్కృతి కాదు, డాబుగా కనబడడం కాదు, ఎవరి కాళ్ళ మీద వాళ్ళు నిలబడడం. ఒద్దికగా సర్దుకోవడం. నేను చెప్పినా నువ్వు వినిపించుకోవు, చనువు ఎంత పని చేస్తుందో చూశావా! అందుకే ఇలా నా మాటామనసూ పరుస్తున్నా. యుగధర్మం ఒకటుంటుంది. త్రేతాయుగాన రాముడు చీకటి పడిందని చెప్పి విశ్రాంతి తీసుకుని మరునాడు యుద్ధానికి రమ్మని రావణుడిని వెనక్కి పంపేశాడట. ద్వాపరలో రథమెక్కితే నిలువరించలేమని రాధేయుడ్ని కృష్ణుడు నిరాయుధుడిగా ఉన్నప్పుడే వధించమన్నాడు. కలియుగంలో తనను వదిలివెళ్లిన లక్ష్మిని వెతుక్కుంటూ వచ్చి వేరే పెళ్లి చేసుకున్నాడు శ్రీనివాసుడు. కాలమహిమ. ఎవరితో ఏ పనిని ఎలా చేయిస్తుందో! ఎవరెలా ఉంటే మనకెందుకు అంటావా! నా మాట నువ్వు వినిపించుకుంటే నేనూఅదే అంటా. నువ్వూనేను ఈ యుగానికి చెందినవాళ్ళం మాత్రమేనా! మనకథ బ్లాక్ బస్టర్ జోనర్ కానీ, కాకపోనీ. ఇది సీరియస్ కామెడీ సస్పెన్స్ థ్రిల్లర్. కొన్ని సీన్లు తొలగిస్తే.. క్లాసికల్ రొమాంటిక్ మెలోడ్రామా. నాకు నువ్వు-నీకు నేను సీక్వెల్ రెండు.

RTS Perm Link

No responses yet

Aug 01 2018

| ప రాం ప్రే య సీ..!|-30

Published by under my social views

5. ….గుర్తుకొస్తున్నాయి.
అమ్మ హిందీ భాషా ప్రవీణ్ పూర్తయ్యింది. హైస్కూల్ చదువుతో పాటు నాతో పరీక్షలు కట్టించడం సమాంతరంగా మొదలైంది. హిందీ సాహిత్యం చదవాల్సిన అవసరం. అప్పుడే క్రికెట్టు కూడా చూడడమూ ఆడడమూ. గవర్నమెంట్ బడుల్లో తెలుగు మీడియం, ఆటపాటలతో రోజులు దొర్లిపోవడం. పెదనాన్నగారు క్లాస్ టీచరుగా పెద్దమ్మ(అమ్మ అక్క) సంరక్షణ లో పది చదవడం, చిన్నాన్న(నాన్న తమ్ముడు) కాలేజీలో పీజీ చెయ్యడం ఇవన్నీ తీపి గుర్తులు, ఇంటర్ రెసిడెన్షియల్ జీవితం ఓ చేదు గుళిక. డిగ్రీ చదువు నల్లేరు పై నడక.. అప్పట్లో డాన్సు ప్రదర్శనలు నే వేసిన తప్పటడుగులు. డిగ్రీలో శ్రీకాంత్ అడ్డాల సావాసం వెచ్చని తలపు. కొప్పర్తి మాష్టారి పరిచయం ఓ మేలుమలుపు. అప్పుడేది చేతికి అందితే అది చదివా. వెక్కెక్కి ఏడుస్తూ సహవాసి రక్తాశ్రువులు, ఊహల్లో విహరిస్తూ.. బొమ్మదేవర నాగకుమారి ఆంధ్రభూమి సీరియల్ పయనమయే ప్రియతమా. యండమూరి ఓ పజిల్, షాడో మధుబాబు ఓ విజిల్. కొన్ని పదుల కవిత్వ పుస్తకాలను ఆశ్వాదిస్తూ. పుస్తకాలు నాకు ప్రేమను పంచసాగాయి. పుస్తకం తీస్తేనే నిద్రొచ్చేసే నీకు.. ఎంత చదివినా తరగని పుస్తకంలా దొరికావు. తరిచేకొద్దీ కొత్తగా అనిపించే మస్తకం నువ్వే. చూసేకొద్దీ నచ్చే సినిమా మనదే. ఎలా చెప్పేది! నువ్వంటే ఎంత ఇష్టం నాకు!!

RTS Perm Link

No responses yet

Aug 01 2018

| ప రాం ప్రే య సీ..!|-29

Published by under my social views

4. ….గుర్తుకొస్తున్నాయి..
అమ్మ నాకు కావలసినంత స్వేచ్ఛ ఇచ్చింది. దాని చుట్టూ క్రమశిక్షణ అనే పెద్ద పంజరాన్ని నిర్మించింది. వేరే ప్రపంచం మీద దృష్టి లేకుండా పెంచింది. ఆమె జీవనానుభవసారం నేను. కథలు, చదివిన పుస్తకాలు ఊహాలోకంలో విహరింపజేశాయి. చందమామలు, బాలమిత్రలు, బుజ్జాయిలు నేస్తాలు నాకు. ఆపై ఇతిహాసాలు, ఎన్టీఓడి పౌరాణిక సినిమాలూ ఆసక్తిరేపాయి. ఐదోక్లాసప్పుడు ఐభీమవరం గ్రామంలో ఉండేవాళ్ళం. సైకిల్ తొక్కుతూ లైబ్రరీకి వెళ్ళబోయి కనుమూరి బాపిరాజు గారి కారుకు అడ్డంగా పడ్డాను. మోకాళ్ళు కొట్టుకుపోయిన నన్ను చేతులమీద ఎత్తుకుని తెచ్చి అప్పగించారు. దెబ్బలు తగ్గేవరకు పుస్తకాలు, కాసెట్లు ఇంటికి తెచ్చిచ్చే ఏర్పాటు చేశారు. వాటితోపాటు చదివా, కెనెత్ ఆండర్సన్ వేటడైరీ- శివానిపల్లి నల్ల చిరుత, భారతదేశపుటడవుల్లో ఇతర సాహసాలు. ఒక వైపు పులిపిల్లలతో ఆడుకున్న బాలభరతుడి సారస్వతం, మరోవైపు మనుషుల్ని తినే మృగాల భరతం. పచ్చిపాలలో కోడిగుడ్డు కలుపుకుని కథల్ని తాగినరోజులు… నీకొంగుకు కట్టుకున్నాక నామానాన నేను కొట్టుకుపోకుండా ఒడిసిపట్టుకున్నావు. నీ అవసరాలకు నా స్వేచ్ఛని ముడిపెట్టి గంపకింద కోడిలా దాపెట్టావు. రాసే అలవాటును రాజిల్లేట్టు చేశావు. ఎలా కృతజ్ఞత తీర్చుకోను!

RTS Perm Link

No responses yet

Aug 01 2018

| ప రాం ప్రే య సీ..!|-28

Published by under my social views

3. …గుర్తుకొస్తున్నాయి..
మొదటి ఏడేళ్ళూ ఊహ తెలియనిహాయిలో, తరువాత ఇరవై నేర్చుకునే తపనలో. ఎదగడం ఎంతసేపు! కొవ్వూరు, తణుకు, ఆకివీడు, ఖమ్మం, నారాయణపురం-కాన్వెంటు-హైస్కూలు చదువులు; విజయవాడ, తణుకు, కాకినాడ-ఇంటర్ డిగ్రీ పీజీలు, ఉజ్జోగం రాజమహేంద్రి, అక్కడే కలిసాగా నిన్ను, ఆగింది ఎక్కడ! ఆయాసం తగ్గనే లేదు. చదువు చెడకుండానే డాన్సు, డ్రాయింగు. చుట్టాలింటికి ఎన్నడూ వెళ్ళిందిలేదు. ఉక్రోషానికి కొదవులేదు, డిక్టేషన్ లో మార్కు తగ్గినా, ఎలక్యూషన్ లో మెట్టుదిగినా, రికార్డుబుక్కులో బొమ్మెయ్యమన్నప్పుడు అన్నయ్య బెట్టు చేసినా తన్నుకొచ్చేది కన్నీరు. అమ్మ నా హిందీ ట్యూషన్ టీచరు, ఫస్ట్ ఎయిడ్ డాక్టరు. అపాహిజ్ లా మిగిలిపోవడమో, తునక్ మిజాజ్ లా ఊగిపోవడమో కూడదనే చెప్పేది సుద్దులు గాయాలకి కట్లుకడుతూ. వంట పట్టించుకునే వయసొచ్చేటప్పటికి చాలా దెబ్బలు తగిలాయి లడ్డూ పాపా! దెబ్బతిన్నవాడ్ని కొట్టి ఏడ్చే ఆమ్మలే లోకమంతా. గారం కొంత చెడగొట్టింది. పోగొట్టుకున్నా సున్నితత్వం కొంత, మాట మెత్తదనం మారలేదు, మొండితనం మిగిలిఉంది ఉంది కొంత. జీవితంపరీక్ష ఓ కవ్వింత, గెలవాలని నీకోసం నా ప్రయాసం. పట్టు చిక్కుతుందన్న ఆశ రవ్వంత. చాలమందికి ఉప్పూ నిప్పూ కాపురం చేయడం వింత.

RTS Perm Link

No responses yet

Aug 01 2018

| ప రాం ప్రే య సీ..!|-27

Published by under my social views

..గుర్తుకొస్తున్నాయి..
అదిగో అప్పుడు నాకు ఊహ రాలేదు, పసికాళ్ళకు వేసిన సాక్సులు ఒరుసుకుపోయి గుక్కపట్టాను, నొప్పి గుర్తులేదు; మిగిలిపోయిన మచ్చ ఓ జ్ఞాపకం. నాన్న కొట్టాడని అమ్మ ఒకతె గోదారి ఒడ్డుకు వెళ్ళి కూర్చోడం, పక్కింటి వెంకట్రావు మామయ్య చూసి తీసుకురావడం. తిరిగి రాకపోతే మాగతేమయ్యేదో; అమ్మా! ముందెప్పుడన్నా ఇలా పోవాలనిపిస్తే మమ్మల్ని మాత్రం మమ్మల్ని చంపొద్దమ్మా.. అన్న అన్నమాట ఎప్పటికీ జ్ఞాపకం. వరదాయని నదికి వరదవచ్చి శివలింగాన్ని చుట్టినరోజు, గట్టుతెగి కొట్టుకుపోతామేమో అన్న భయం, అమ్మ గుండెచిక్కబెట్టుకుని పసుపూకుంకుమలు సమర్పించుకుంటున్న దృశ్యం ఓ జ్ఞాపకం. ఇంటిముందున్న సైకిల్ రిక్షా కడ్డీతొక్కబోయి జారినప్పుడు తొడ ఇరుక్కుపోయి విలవిల్లాడుతుంటే అమ్మవచ్చి విడిపించిన జ్ఞాపకం. పిల్లి బయట పరిగెడుతుంటే నేను బెదిరి కిటికీలోంచి జారి గడ్డం బద్దలుకొట్టుకున్నప్పుడు చెరోచంకన బిడ్దల్నెత్తుకుని అమ్మ ఆసుపత్రికి పరిగెత్తుకుంటూ తీసుకెళ్ళిన జ్ఞాపకం. రెండేళ్ళకోసారి ఊరు మారిన జ్ఞాపకం, ఊరుమారిన ప్రతిసారీ దూరమైన స్నేహితులు జ్ఞాపకం. చెమరింతల నీ కళ్ళతడిజారిన బంగారు చెక్కిళ్ళు, నిద్రలేని రాత్రుళ్ళలో తీరని దిగుళ్ళు.. రెండేళ్ళ ఎడబాటుకు ఆనవాళ్ళు. ప్రతీసందర్భమూ తీపి బాధల జ్ఞాపకమే.

RTS Perm Link

No responses yet

Aug 01 2018

| ప రాం ప్రే య సీ..!|-26

Published by under my social views

1. గుర్తుకొస్తున్నాయి..
ఎందుకింత ఆలస్యంగా పరిచయమయ్యావని నిలదీసావుగా! మరో జన్మంటూ ఉంటే వేరే వారెవరి కంటాపడకుండా ఇద్దరం బావామరదళ్ళుగా కలసి పెరగాలని, కబుర్లెన్నో చెప్పుకోవాలని ఉబలాట పడ్డావే! కాసేపు నాతోపాటు చిన్నపిల్లవై నడిచొస్తావా, గుర్తున్నవన్నీ చూపిస్తా. కొన్నితలపుల్ని కాలం చెరిపేసినా మిగిలున్నవన్నీ నువ్వెవ్వరో తెలియని కాలంలో నీకై నా ఆరాటాలే. – చిన్నోడ్ని కదా అమ్మకి, చేరిక వల్లో గారం వల్లో చురుకెక్కువ. అమ్మ తప్ప ఇంకెవ్వరూ కనపడని కాలం లో తన నా దేవత, ఇదే మాట కనిపించిన చోటల్లా రాసుకున్నా. చెక్కలపై బలపాలతోనో, గోడలపై పెన్సిళ్ళతోనో. నాన్నతో పని ఉండి గుమ్మం తొక్కిన ప్రతి ఒక్కరూ, అమ్మను కని ఈమాట పైకి అన్నవాళ్ళే. పెట్టుపోతల్లో లోటెప్పుడూ చూడని కళ్ళకి ఇప్పటికీ ఆ కదిలే దృశ్యాల ఆనవాళ్ళే కంటి ముందర. ఒళ్ళు నలగకుండా ఉండాలంటే ఏదో నేర్పుతూ కూర్చోబెట్టాలని కళలన్నింటిలోనూ వేలు పెట్టించింది, దొరికిన చోట దొరికినంత అవేమైతే ఇప్పుడేమి, ఆడపిల్లలానే పెంచింది. చెరోముద్దా తినిపిస్తూ పురాణేతిహాసాలు వినిపించింది. అమ్మ కధలన్నీ ఆణిముత్యాలే. నాన్న ఉద్యోగం నిమిత్తం ఊళ్ళట్టుకు తిరుగుతున్నప్పుడు పక్కన వేసుకుని వినువీధిన చందమామను చూపించింది. ఇప్పుడు నా చందమామ నువ్వే, వెన్నెలమ్మా నువ్వే

RTS Perm Link

No responses yet

Aug 01 2018

| ప రాం ప్రే య సీ..!|-25

Published by under my social views

నారికేళ సలిలము భంగిన్
ఏమండీ, లక్కీ, చిన్నిబాబు కదా నేనొక్కద్దాన్నే చూసుకోలేను; సిరిని కూడా తెచ్చుకుంటానే! పన్నెండేళ్ళనాటి మాట. సతీష్! లక్కీబాబుకి చపాతీ, నాకూ- సిరికీ ఇడ్లీ ఇంకా మసాల దోశ.. నిన్నరాత్రి మాట. లడ్డూ! నువ్వేమడిగినా వద్దనలేను. కాదన్న కారణమేమన్నా ఉందంటే అది సిరి ఉన్నందున కాదు; సంపద లేనందునే. మెతుకు పోతే బతుకు పోయే నేపథ్యం నుంచి నేను, బ్రతికిచెడినజీవితం లోంచి నువ్వూ వచ్చి ఒకచోట కలబడ్డాం. ఒక్కసారిగా నీకూనాకూ నడుమ పిల్లాడు-పిల్ల. నీకు ఇద్దరూ, నాకు ముగ్గురూ పిల్లలై కొత్తకాపురం కాస్తా కుటుంబరావు సంసారమైంది. ఏ మాటకామాటే చెప్పుకోవాలి. లోకం మొత్తాన్ని ఓ పక్కకు నెట్టేసి ఈ పిల్లలిద్దరూ మన ఏకాంత సమయాల్ని ఆక్రమించాక, మనది నాలుగు స్తంభాలాట. ఆటలన్నీ ఆహ్లాదంగానే ఉంటాయి. జీవితం ఓ గాలి దుమారం. దూరం నుంచి భయపెడుతుంది. గడ్డిపోచలం మనకేం భయం! నీ అల్లరి కెరటాల తాకిడికి నిత్యం తడుస్తున్న వాడ్ని. నీ ఆనందాలు, తాపాల వెనుక మెదడులోని న్యూరాన్ల అసమతుల్యత, ఆనువంశిక కారణాలు ఒకానొక ఒత్తిడి సందర్భాన బయటపడ్డప్పుడూ దేవుడు మనజట్టే. అందుకే ఈపసిమనసును నాతో ముడిపెట్టాడు. నన్నుచూసి నువ్వు నవ్వినప్పుడల్లా నీలోంచి దేవుడు తొంగిచూస్తూ పలకరిస్తున్న చప్పుడు.

RTS Perm Link

No responses yet

Aug 01 2018

| ప రాం ప్రే య సీ..!|-24

Published by under my social views

ఆకతాయి మాటలు
పసివాడ్ని చూడటానికి వచ్చారు చుట్టపట్టాలు, అమ్మలక్కలు కొందరు-ఇంకా గుండ్రంగా ఉంటాడనుకున్నాం అంటూ బుగ్గలు నొక్కుకున్నారని ఐదున్నరపౌన్లు పుట్టినవాడ్ని చూసి అనవసరంగా కన్నీరొలికావు, కడుపుతో ఉన్నప్పుడు పాలింకా తాగిఉంటేనా! అనికుమిలావు. తిండిఏం తక్కువ మనకు! అత్తగారింట సపోటాల పాలజ్యూస్ ముందు మొహంమొత్తి నువ్వు ఓడిపోలేదూ!, బాదంపాలు బలవంతాన నీకు తాగించలేదూ! బరువో పెరిగినంతనో, నేనింతలా కనబడ్డంతనో బిడ్డపుట్టడం తోనే పెద్దగా కనబడాలా! లోకం శుభకరే, కొండకచో మనతో ఆడేది సలిలకేళి కుదిపేసి తప్పుకుంటుంది కొన్నిసార్లు. మమత వల్ల కన్నీళ్ళు దృశ్యాన్ని మసకబారుస్తాయి. వాస్తవానికి మహావృక్షాల విత్తనాలు చిన్నగానే ఉంటాయి. సారవంతమైన క్షేత్రం నీది. మన చిన్నోడికేం తక్కువ. ముక్కుపచ్చలారేవరకూ నీరెండ కాపడంలో వాడెన్ని కబుర్లు చెప్పేవాడనుకున్నావ్, తీరా ఎదిగిపోయాక సరదాలన్నీ నీవేనా! దమ్ముంటే ఇంతకన్నా చక్కనోడ్ని ఎవరికన్నా కని చూపించమన్నావ్ గుర్తుందా! భూమ్మీద ఇప్పటి దాక ఇలాంటి మాట ఏ మగడన్నా విన్నాడా! మళ్ళా అబ్బాయెందుకు నాకు! చక్కని చుక్కని కని సాఫల్య అని పేరుపెడతానన్నాను. రాతల్ని మించి కనే సాఫల్యమేముంది ఈ లోకాన నాకు!

RTS Perm Link

No responses yet

Aug 01 2018

| ప రాం ప్రే య సీ..!|-23

Published by under my social views

ఔరా అమ్మకు చెల్లా..
ఎదురుచూపుల నెప్పుల్ని ఏడాదిగా మోస్తున్న ఆ పిల్ల.. తీపికబురు విన్నాక తలారా స్నానం చేసి దీపం వెలిగించుకుని నీదగ్గరకు వచ్చింది. వాడ్ని దగ్గర్నుంచి చూసుకుంటూ నిలిచుంది. తనూ చిన్నపిల్లే కదా, ఇప్పుడు పిన్ని అనే పెద్దరికం. అప్పుడా కంటికీ, ఈ చంటికీ మధ్య త్రేతాయుగపు అనురాగపు జల్లు, ద్వాపరయుగపు పురాస్మృతులు, శబరి అనురాగం, యశోద పరవశం, మింటి వెలుగు విరుపున పటాపంచలైన మోక్షమార్గం, తీరా కోరుకున్న దరి చేరాక అంతర్యామి సాక్షాత్కారం లో అంతకు మించినదేమీ తోచక స్థాణువై నిలబడిన సుప్త చేతనావస్థ. చేష్టలుడిగి చిత్తరువైన వైనమో, సంభాషణో వారిరువురి బంధం జన్మాంతరాలుగా పెనవేసుకున్నదేమో అన్న సంశయాన్ని మోస్తూ నిశ్శబ్దం. నిజం చేస్తూ ఆ తరువాత కాలంలో సమస్తం వదిలిపెట్టి వాడి కోసమే కట్టుబడడం, వాడిని వదిలి తనూ, తనని వదిలి నువ్వూ పుష్కర కాలం గా ఉండలేనితనం లోకం ముక్కుమీద మనమే వేలు వేసి వెనక్కి నెట్టేయడం.. పురా శిలాజానికి చలనం వచ్చి కాలం కాని కాలం లో జీవంపోసుకున్న అమాయకపు రాజకుమారి మీ అమ్మగారు వెనుదిరిగి రాని మహారాజుని తల్చుకుంటూ ఒంటరిగా గడిపేస్తూ.. నువ్వు నాతో ఆడుతున్న తోడుబొమ్మలాట ఈ తోలుబొమ్మలాట యధాస్థితి అనివార్యమై. ప్రేమకు బందీనై నేను.

RTS Perm Link

No responses yet

Aug 01 2018

| ప రాం ప్రే య సీ..!|-22

Published by under my social views

ఇంట కాసిన పండువెన్నెల
పిల్లాడు పుట్టకుండానే రెండు కుటుంబాలకి వారధి గా మారతాడు. పుట్టాక కుటుంబాల మధ్య కనిపించని ప్రయాణాలు చేస్తాడు వాడ్ని తమవాడని ఒప్పించుకునేందుకు ఎవరిలెక్కలు వారివి. ఇంటిపేరు నిలబెట్టే వాడని తండ్రి తరుపు, తమపిల్ల ప్రాణాలొడ్డి రక్తం పంచామని తల్లితరుపు.. మావాడే అనుకుంటారు శిశువును. ఇక్కడన్నీ మురిపాలే. నా అన్న తనలా ముందుగా తన్నుకొచ్చిన తమ్ముడి కొడుకులో వారసత్వం చూసుకోవడం మురిపెం. తన సంజెరేవునే ఇంటికొచ్చిన తోటికోడలు ఆరిందాగా బాలింత ఐపోవడం, ఊహించినట్టే బువ్వాలాటల చెల్లి సరదా తీర్చేసుకోవడం; మరిదికాదు వీడు నీ పెద్దకొడుకని అప్పగిస్తూ పెళ్ళిపీటల మీదే తల్లిని చేసిన అత్తగారి వైనం గుర్తొచ్చి సంధ్య వదిన.. ఉక్కిరిబిక్కిరి మురిపంలో. ఇంటిపేరు లెక్కల్లో ఒకటి పెరిగిందన్న మురిపెంలో తన మానాన మా నాన్న. వెతలకీ, నలతలకి నలిగినా చిరునవ్వు వదలని చిద్విలాసి మీ డాడీ.. నునుపుకండల పిల్లవస్తాదులో తన ప్రతిబింబాన్ని చూసుకుంటూ పొందిన జీవితకాలపు చివరి మురిపెం. ఎప్పుడు ఎదుగుతాడో, ఎప్పుడూ చికెన్ ముక్క పెట్టుకుంటానో అనుకుంటూ నువ్వు. గుర్తు తెచ్చుకునేకొద్దీ గోదారి పొంగులా, వరదగుడి వెన్నెల మనసుని చుట్టబెడుతూ..

RTS Perm Link

No responses yet

Aug 01 2018

| ప రాం ప్రే య సీ..!|-21

Published by under my social views

పెళ్ళిరోజు C/o లేబర్ రూం
ఏం లక్కీగాడో! పుడుతూనే పెద్ద ఇబ్బంది పెట్టేశాడు. నా పెళ్ళి రోజు సరదాలన్నీ చెడగొట్టేశాడు. లడ్డూపాపని ఆసుపత్రిలో అడ్డంగా పడుకోబెట్టేశాడు. రాజమండ్రి కంటే దుర్గ ఆసుపత్రిలో మధ్యాహ్నం మూడు గంటలకి వాడి ప్రయాణం కత్తెరకోతలతో మొదలైంది, పావుగంటలో నర్సు తెల్లని గుడ్డలో చుట్టిన బొమ్మను చూపించింది. నేను చూసినప్పుడు వాడు ధ్యానం లో ఉన్నాడు నన్ను చూశాకే కేర్ మన్నాడు. ఏం చెప్పాడు వాడు నాకు! ఇది నీ పెళ్ళీ రోజు కాదు, నా పుట్టినరోజు అనా! ఇక ముందు అమ్మకు నీకన్నా నేనే ముందనా! ఏదైనా వాడు కేర్ అన్నాడు, ఏవో జాగ్రత్తలు చెప్పాడు. నేనింకా నువ్వు సొమ్మసిల్లి ఉన్నావన్న బెంగలో ఉన్నాను. అక్కడ అత్తగారు, కానుపు అలసట తెలిసిన మనిషి, తల్లి మనసు.. కూతురి ధ్యాసలో ఉన్నారు. ఎవరో అంటున్నారు, మగపిల్లాడు పుట్టినా నేనేం గంతులెయ్యలేదేంటని, పిల్లాడ్ని చూపించిన ఆవిడ పేరు మాత్రం కనుక్కున్నాను.. మస్తానమ్మ. నా సమస్తాన్ని తొట్టతొలుత ఈ నేలమీద జాబిల్లిని చేసి చూపెట్టినమ్మ. నోరు తీపి చేస్తే సరిపోతుందా! అమ్మ వచ్చింది కోడలి కష్టాన్ని మురిపెంగా కందామని. అప్పుడూ నువ్వు ఆమంచిగంధం చీరలోనే అలానే తడిచిన నీ మేను. ఇప్పుడు వాడు నీలా నిద్దరపోతుంటే అప్పటి నా చూపుల్తో నువ్వు.

RTS Perm Link

No responses yet

Aug 01 2018

| ప రాం ప్రే య సీ..!|-20

Published by under my social views

పురుడు ముందరి పాట్లు
పిల్ల నీళ్ళోసుకుందంటే.. పుట్టేది ఎవరు! బొండుమల్లా, బూందీ లడ్డూనా! పిల్లల బొమ్మల్ని పొద్దస్తమానూ కనిపించేలా గోడకంటించ తెస్తే మీ అమ్మగారు వద్దంది. బొమ్మలో బాబుది చట్టిముక్కట, ఇంతకన్నా అందంగా ఉంటాడా మీ మనవడు! అడిగా, చూద్దురులెండీ అందావిడ. ఏమిటో అతిశయం అనుకుంటుంటే నువ్వు అన్నావూ.. మీ ముక్కు వాడికొస్తుందని మా అమ్మ ధీమా. అసలు పిల్లలంటేనే అందమైనవారు, అందులో అందమైన పిల్లలు వేరంటే ఏమంటాను! ఎవరి పరిధిలో వారి ఆలోచనలని సరిపెట్టుకుంటాను. ఆరోగ్యమే అందం కదా అనుకుని నడక మంచిదని నడిపించేవాడ్ని. సంఘీదేవాలయానికి మొదటిసారి వచ్చాక, మెట్లు చూసి వెనకడుగు వేయాలా, నీ నడుముకు చేయి ఊతం ఇచ్చి ఆరోనెలలో అన్నీ ఎక్కించానే, నాలుగేసి కాళ్ళు-చేతులూ, కళ్ళూ ఇంకా కనబడని వాడ్ని కనిపెట్టి ఉన్నాయన్న భరోసా. ఆపై నిత్యం మోస్తున్నవాడి నిండు ఆశీస్సులు. తొమ్మిది నెలలు నిండి తొమ్మిదో రోజున చక్రం సినిమా కి వెళ్ళామా! అక్కడే పుట్టేస్తే! జైల్లో పుట్టిన జ్ఞాని రాష్ట్రపతి అయాడు. మన జీవితచక్రాన్ని ప్రేమ చమురు తో తిప్పే ఇరుసును ముద్దుగా ఏమని పిలుచుకుందాం! రెండువారాలాగి మరీ పెళ్ళిరోజున దిగాడు మగపిల్లాడు, అన్నారందరూ లక్కీగాడని!

RTS Perm Link

No responses yet

Aug 01 2018

| ప రాం ప్రే య సీ..!|-19

Published by under my social views

మెచ్చిన ముచ్చట్లు
అసలా వాన ఎలా మొదలయ్యిందో! ఓ కరెంటు పోయిన పగలు, మొరాయించిన కంప్యూటర్లను వదిలేసి, లాంజ్ లో మేగజైన్లను తిరగేస్తుంటే కనిపించిన సుష్మాస్వరాజ్ బొమ్మ, పోచమ్మ అన్నట్టుంది..‘ఇలానే ఉంటుంది సతీష్ గారి అమ్మ’. ఇంతలో సామవేదం శాస్తి; బావగాడికి నాలుక మీద మచ్చ.. అత్తా కోడళ్ళుగా సరిగ్గ సరిపోతారు అనేశాడు. నీ బుర్రలో తొలిచే పురుగును వదిలేశాడు. పెద్దల వాగ్దానాలన్నీ పిట్టలదొర ప్రేలాపనలుగా మార్చిన కాలం నన్ను నీ మనసున వరుడిగ కూర్చోబెట్టింది. నీ ఇష్టసఖి సౌజన్య అన్నయ్యకీ నచ్చావటగా, అప్పుడు కలవని జాతకాలు, మనిద్దరికీ ఎలా కలిసాయో తెలుసు. సినిమాతెరపై దేవుడు కనిపిస్తే దండం పెట్టుకునేదానివి, నీకు నచ్చిన చీటీ వచ్చేవరకూ దేవుడి బొమ్మ ముందు దోబూచులాడావ్, ఎంతఇష్టం లేకపోతే అట్లా చేస్తావ్. నిన్నిష్టపడ్ద శ్రీనివాసుడ్ని నువ్విష్టపడ్ద శ్రీనివాసుడ్ని ఇద్దరినీ తలచుకోవడం ఒక్కటే నాకు. ఆ మాటకొస్తే నిన్నిష్టపడ్ద వారెవరన్నా నీకన్నా ఇష్టం. బండి మీద మనం షికారుకెళ్ళే రోజుల్లో ఏ కుర్రచెయ్యో నీ నగుమోముని మెచ్చుకుంటూ సైగచేస్తే నేనూ నవ్వుకుంటాను, మనమిద్దరం ఒక్కటవ్వడం ఈ లోకం మొత్తం కోరుకుంది. ముగ్గురవ్వడం లో ముచ్చట్లు చెప్పడం ఇంకా మిగిలిఉంది.

RTS Perm Link

No responses yet

Aug 01 2018

| ప రాం ప్రే య సీ..!|-18

Published by under my social views

నచ్చని ఇచ్చకాలు
ముందొకలానూ, పెళ్లయ్యాక ఇంకోలానూ ఉంటారని ఈళ్ళని ఆళ్ళూ, ఆళ్ళని ఈళ్ళు ఆడిపోసుకుంటారు ఆడాళ్ళూ, మగాళ్ళు. అసలా ఒకేలా ఉండటం విసుగనిపించదూ. పెళ్ళి మంత్రాలకు అర్థాలు వెతకను నేను, భార్యవి కదా అని.. ప్రేమించడం నాకు చేత కాదు. పుట్టినప్పటినుంచీ అందరూ నన్ను ప్రేమించినవాళ్ళే; అందినదే ఇచ్చిపుచ్చుకుంటున్నాను. ఈ జిందగీ ఎంత వింతైనదో ఒకచోట వదిలితే మరో చోట పట్టుకోవాలి. పంచుకున్న చోట గిట్టుబాటు కానంతమాత్రాన నొచ్చుకునేది ఏముంటుంది! లక్ష నిరాకరణల నడుమ కలిసి జీవిద్దాం అన్న అంగీకారం పై గౌరవం నాకు, భౌతికప్రేమ మధురమైనదీ మోహం మొహం మొత్తేసేదనీ తెల్సు, నేల మీద నిలబడి జీవించేందుకు చేసుకున్న సర్దుబాట్లే అన్నీ. అసలు జీవించడమే ఓ ఉత్సవం ఐనప్పుడు కలిసి జీవించడం ఎప్పుడూ ఆనందమే. నా ప్రపంచాన్ని నీకు అందించడం, నీ ప్రపంచం లోకి నన్ను ఆహ్వానించడం, మన ప్రపంచాన్ని సృష్టించుకోవడం, ఎవరి ప్రపంచం లో వాళ్ళు మిగిలిపోవడం ఇది తనను తాను అద్దం లో చూసుకోలేని ప్రపంచపు పరిభాష. ఎవ్వరు ఈ లోకాన్ని ఎలా చూసినా ప్రతి చినుకులోనూ అదే తడి. మరి నిన్నే నా లోకమని అంటుందని ఎందుకంటే, నన్ను తడిపిన తడి చినుకువి, జడివానవి నువ్వేమరి.

RTS Perm Link

No responses yet

Aug 01 2018

| ప రాం ప్రే య సీ..!|-17

Published by under my social views

నేనేమో అమ్మరెమ్మ-తానేమో వెన్నెలకొమ్మ
మా అమ్మమ్మ ఊరేమో పొలమూరు, గోదావరి ఇవతలి పేరు బక్కరైతుకి అమ్మ ఐదో సంతు, తొమ్మిదో ఏడు బాలానందం కి వెళ్ళిందని తిట్లుతిప్పని ఇంటి పడికట్టు. ఎస్సెసెల్సీ చదివితే ఊరి బడిగట్టు దిగినట్టు.. చుట్టం చూపుకి వచ్చినోడు నచ్చిందన్నాడని చదువుకున్నాడని, కూడూ-గుడ్డా కొదవుండదని నాన్నకి కట్టబెట్టారు గానీ ఇక్కడ ఉద్యోగం లేక పక్క రాష్ట్రానికి వలసవెళ్ళిన వైనం. పాసింజరు రైలు ప్రయాణాల దూరాభారం. పేదరికానికి కొత్తరూపు దిగువ మధ్యతరగతి జీవితం. ఒంటి రెక్కల మీద ఇద్దర్ని కనిపెంచడం, కధలు చెబితే నీతి, చదువు చెబితే రీతి అలవడుతుందని నమ్మి ఆచరించడం. నాకు పాలు పట్టాలనో, కనిపెట్టుకునుండాలనో నా స్కూల్లో టీచరుగా చేరడం, తానే గురువై హిందీ పరీక్షలు కట్టించడం, సాహిత్యం ఆమె ఉగ్గుపాలు లలితకళలన్నీ నా నోటికందించిన పోతపాలు, నేనెన్ని చెప్పినా నన్ను ద్దిద్దితీర్చిన అమ్మ తపన చర్వితచర్వణం. ఎదగడంలో లోపమెక్కడ ఉందో వేళ్ళూనుకున్న నేలంతా సార్వంతమే, ఆకాశాన్ని అందుకోవడం లో సగందూరం లోనే ఆగిపోయాను. అప్పుడు కనిపించావు నువ్వు ఆకాశం లో సగమై, ఆశల తారకల నడుమ నీకై వికసించాను, నన్ను ఎల్లవేళలా వెలిగించి ఉంచేది నీనెలవంక నవ్వు; మనం కన్న తురాయి పువ్వు.

RTS Perm Link

No responses yet

Aug 01 2018

| ప రాం ప్రే య సీ..!|-16

Published by under my social views

అత్త అల్లం- కోడలు వెల్లుల్లి (ప్రాక్టికల్)
అత్తమ్మా! ఏం వండుకుందాం!!-ఇంతపొద్దున్న ఎందుకమ్మా, పన్నెండింటికి చూద్దాం. మీరుండండి అత్తమ్మా, నేను చేస్తాను-నీకెందుకమ్మా బండపని! కోడలుతో గ్లాసు కూడా కడిగించకూడదనుకున్నా మషాలాలు ఎక్కువైతే మీ మామయ్య తినలేరు, సాయం ఉండు చాలు. ఇంక చాలు అత్తమ్మా సపోటా జ్యూస్ తాగలేను- మనతోట పంట నీకిష్టమే కదా. బయటేమీ తిని రాకండి. మీకోసం పొడిపప్పూ, కొబ్బరిపచ్చడి చేశా. ఆమ్లెట్వేసుకుందాం- ‘అబ్బా! బిర్యానీ తినొద్దామనుకున్నా’.
ఇంతకు మించి సరిహద్దు తగాదాలేమైనా ఉంటాయా! అత్తా-కోడళ్ళకి! ఒకరు వేసవి మరొకరు వర్షరుతువు. వలయమై విస్తరిస్తున్న సందర్భాలు మబ్బులు. ఎంత ఎండ కాస్తే అంత వాన కురుస్తుంది. ఎండా- వానాలతో కలిసి నడవడం, ఏ సందర్భానికి ఆ గొడుగు పట్టడం ఇదే జీవనమకరందం. ఇది సరిగ్గా జరగనినాడు కష్టాలతో చలి కాచుకోవడం తప్పదు. అనివార్యమగు ఈ విషయముని గూర్చి అతిగా సోకింపతగదు.
కూర ఘుమఘుమలాడాలంటే అల్లంవెల్లుల్లీ పేస్టూ లా కలవాలి, కలబడాలి. విడివిడిగా ఏవీ బాగోవు, కలియబెట్టి ఉడికించే పనిలో ఎక్కువ తక్కువలు అనుభవాలు. వండుకు తినడమే ఆస్వాదన. రుచులన్నీ కలిసే ఉంటాయి రసాలూరిస్తూ.

RTS Perm Link

No responses yet

Aug 01 2018

| ప రాం ప్రే య సీ..!|-15

Published by under my social views

అత్త ఉల్లిపాయ- కోడలు మిరపకాయ (థియరీ)
ఉల్లికోసినా కన్నీళ్ళొస్తాయి, అత్త సుద్దులుచెప్పినా. కత్తి సాన పట్టేటప్పుడు నిప్పురవ్వలు, పోపు వేగేటప్పటి చిటపటలూ సహజం. ప్రాయాన్ని బట్టి మారే అభిప్రాయాలు తప్ప ఇద్దరూ ఒకే నాణేనికి రెండువైపులా ఉండి గోడున మగాడ్ని గిరగిరా తిప్పుతారు. అత్త స్టాండర్డ్ వర్షన్- ఓల్డ్ కోడలు అత్తకు లేటెస్ట్ వర్షన్-బీటా. అత్త ఊసులేకుండా కోడలు ప్రెషర్ కుక్కర్ తెరవదు, కోడరికం పరీక్షలో అత్తవేసేది అత్తెసరు మార్కులు. జీవితం వంట వండకముందు కత్తిపీటకు తప్ప కొత్తిమీరగాడికి ఈ ఘాటు అంతుచిక్కదు. అంతా మంచిగానే మొదలౌతుంది. అమ్మమీద బెంగ అత్తరికం మీదకి బదలాయింపు.. “అత్తమ్మ చేతిప్రేమ మీకు చేప పొట్టముక్క నాకు తోకముక్క”. “రోజంతా పడుకోవద్దని చెప్పరా అసలే ఒళ్ళు..” సారెలు, పెట్టుపోతలూలానే కారణాలూ తొందరగానే పాతబడిపోతాయి. “నేను కాకపోతే కోడలికి ఎవరు చెబుతారు!” “అయినా మీ అమ్మగారికి మీతర్వాతే నేను..” ఇదంతా సిద్ధాంత గ్రంధం. వాస్తవానికి ఇవే జీవనసాగరతీరాన్ని తాకే అసలైన ప్రేమకెరటాలు. తడిసి ముద్దయ్యే అదృష్టం అందరికీ ఉండొద్దూ! వెనకటికి సినిమా మిత్రుడు జనార్ధనమహర్షి చెప్పాడు. అమ్మా-ఆలీ నాకు రెండుకళ్ళు.. కళ్ళు ఒకదానికొకటి చూసుకోవు.

RTS Perm Link

No responses yet

Aug 01 2018

| ప రాం ప్రే య సీ..!|-14

Published by under my social views

ఇంకాస్త వెనక్కువెళ్ళి

మనమంటే ఈ నగరానికి వల్లమాలిన వాత్సల్యం. పెళ్ళిపీటల పై ఉండగానే హనీమూన్ కి రామోజీ తారానగరం నుంచి ఆహ్వానం. అన్న తోడల్లుడు కృష్ణారావు గారి పెళ్ళికానుక. వారంలోపున రెండ్రోజులు అక్కడ గడపమని. ఎన్ని చల్లని మనసుల దీవెనలో మన సాహచర్యం! ఈ నగరంలో నగరం ఆ తర్వాత ఉద్యోగానికి అక్కడికే రప్పించుకుంది. పుష్కర కాలంగా మూడు గ్రాసాల మృష్టాన్నాన్ని బిర్యానీల లెక్కన తింటున్నామంటే అది ఆ వేళావిశేషమే. మే 1, 2004 న ఐమాక్స్ లో నీకిష్టమైన నాగార్జున సినిమా. అధికారికంగా మనం చూసిన మొదటి సినిమా ‘నేనున్నాను’. అంత వరకూ ఎప్పుడు ఎక్కడ ఏ సినిమా చూసినా నా భుజం పై వాలిన తల నీ గుండె అదురును వినిపిస్తూనే ఉండేది! కాసేపట్లో నిన్ను ఒంటరిగా వదిలేసి మరలిపోతానన్న బెంగతో. సినిమా మధ్యలో నా చిట్టినుదురు చిలకమ్మ నాపై వాలి నిదురపోయింది. ఆనాటి పాట నా చెవుల్లో ఇప్పటికీ వినిపిస్తూనే ఉంది.   జన్మకి ఎరుగని అనురాగాన్ని పంచుతున్నావనీ, జన్మలు చాలని అనుబంధాన్ని పెంచుకున్నామని, శ్వాసతో శ్వాసే చెప్పెను మనసుతో మనసే చెప్పెను.. నేనున్నానని, నీకేం కాదనీ.  – ఆ మంచిగంధం చమటకి తడిసి నన్నంటుకునే ఉందికా.

RTS Perm Link

No responses yet

Aug 01 2018

| ప రాం ప్రే య సీ..!|-13

Published by under my social views

ఈనగరం ఎంతో మంచిది

నీ బొజ్జలో బొజ్జున్న బుజ్జోడి సాక్షిగా భాగ్యనగరం మనకు ఎంతో ప్రేమను పంచింది. నీళ్ళోసుకున్నపిల్ల  మగని చేయట్టుకు చాయ్ కొట్టు దగ్గరకి వస్తే వేడి పాలయ్యింది, నువ్వు వద్దన్నా బ్రతిమాలి మరీ బాదంపాలై నీతో తాగించింది. నా పని ముగించుకుని వచ్చేవరకూ  ఎదురుచూసేందుకు బడా మాల్ కు వస్తే కూర్చోబెట్టి సేదతీర్చే చల్లని గాలయ్యింది. నువ్వు లేచి బరువుగా వెళ్తున్నప్పుడు తన బరువు దిగినంత సంబరపడిపోయేది. బసెక్కిన ప్రతీసారి బిడ్దను మోసే తల్లికి సీటయ్యింది. లైన్లో నుంచోకుండానే

చేతికి అందివచ్చిన సినిమా టికెట్టయింది. ఆగిన ఏ ఆటో ఐనా బేరమాడకుండానే ఎక్కించుకుంది, రోడ్డుదాటే సమయాల్లో  ట్రాఫిక్ పోలీసు నీకు అన్నో, బాబాయో అయ్యేవాడు. అన్ని వైపులా వాహనాల్ని ఆపేసి జీబ్రా క్రాసింగ్ ని ఏనుగు అంబారీ చేసేవాడు, నేను మావటివాడ్ని అయ్యేవాడ్ని. నీతో కలసి నడిచిన దార్లన్నీ ఎన్నెన్నిసార్లు నన్ను నీగురించి కళ్ళతో ప్రశ్నించేవో! ఎందరికి ఏమిచ్చినా నాకు నిన్ను అందంగా చూసుకునే అవకాశాన్ని, ఊరంతా తోడుందన్న భరోసాని ఎల్లవేళలా ఇచ్చింది ఈ భాగ్య నగరమే.  సఫల ప్రేమకధకు సాక్షిగా పుట్టిన ఈ నగరమే, తన దుమ్ము చేతులతో నిమిరి, వాన చినుకులతో తడిపి మనల్ని సాకింది. ఇప్పటికీ మన ఆలనాపాలనా చూస్తూంది ఈ నగరమే.

RTS Perm Link

No responses yet

Aug 01 2018

| ప రాం ప్రే య సీ..!|-12

Published by under my social views

వాడెలా వచ్చాడు

ఆసుపత్రికి వెళ్ళేటప్పుడు గమనించలేదు. నల్లచుక్కల తెల్లచీర లో రిపోర్ట్స్ తో తిరిగొచ్చావు.  ఎప్పట్లానే నీ ముఖంలో నవ్వు, ఈపట్టు కొత్త కాంతితో. మీ అమ్మగారేదో చెప్పారు నా బయట చెవులకేమీ వినబడలేదు. చతురహస్తం తో నువ్వు అప్పుడే పొట్ట నిమురుకుంటున్నావు. అందమైన ఊహని నెమరువేసుకుంటూ నేను. వివాహం, కొత్త ఉద్యోగం, కొత్త బాధ్యత. ఆనందానికి ఆరోజు వడ్డీ ముడుపుగా కట్టబడింది. కాబోయే తండ్రి.. కొత్త పాత్ర. విషయం విన్నాక అమ్మ ఆదేశం-ఆనందంగా ఉంచాలి కోడలు పిల్లని. సాధన ఇప్పుడు అవసరం కదా! వివేకం, వైరాగ్యం, నిగ్రహం- ఇవే స్వస్వరూపానంద ఆవిర్భావానికి మోక్షమార్గాలు. హైదరాబాద్ బదలీ. ఒక్కడ్నే ఉందామని అమీర్ పేట్ లో బస, వసతి అనుకూలం గా ఉన్నా ఒక్కడినే అని వంటా-వార్పు పెట్టుకోలేదు.  వదిలి ఉండలేనని నా సాదాజీవితంలోకి సీదాగా  వచ్చేస్తే, చూలాల్ని నిండుగా ఎలా చూసేది!  ఊరే దిక్కయ్యింది. హర్ష మెస్, కాకతీయ పార్శిల్, హైదరాబాద్ సెంట్రల్  షికార్లు,  సత్యం థియేటర్ సినిమాలు, సారథి స్టూడియో  సినిమా షూటింగ్ లు, మేఘన  పార్శిళ్ళు.  బలవంతంగా బాదం మిల్క్, ఫలూదాలు, హైదరాబాద్! నీకు సలాం, నా పుట్టబోయే బిడ్డను వాడి అమ్మను నువ్వే అమ్మలా, ఆరోగ్యంగా ఉంచావ్. అప్పుడూ, ఎప్పుడూ.

RTS Perm Link

No responses yet

Aug 01 2018

| ప రాం ప్రే య సీ..!|-11

Published by under my social views

ఇద్దరు ముగ్గురయ్యేవేళ

ఎంత సాధన చేస్తే నైపుణ్యాలు అలవడుతాయి! కలల్నీ, పిల్లల్నీ కనడానికీ సాధన అవసరమే. వివేకం, వైరాగ్యం, నిగ్రహం, మోక్షం ఇవే సాధనామార్గాలు. మోక్షమంటే నా దృష్టిలో మనల్ని మనం తిరిగిపొందడమే. స్వస్వరూపానందా విర్భావమే. రెండు చిదానంద తనువులు మనువాడి ఓ నలుసుకి జీవం పోయడం ఓ తన్మయత, తాదాత్మ్యత. కేలండరు రెండువేలో సంవత్సరం దాటి నాలుగేళ్ల నాలుగు నెలల నాలుగో వారం లో అడుగుపెట్టినట్టు చూపిస్తున్న 22వ తారీకున అర్ధరాత్రి ముహూర్తానికి అనువుగా మధ్యాహ్నం రెండుగంటలు దాటాకా నీ చిటికెన వేలును కోరి గోదారి దాటాను. కాలం గిర్రున తిరిగి అదే రోజు అదే సమయం మనల్ని ముగ్గుర్ని చేసి చూపించింది. పెళ్ళిరోజుకి ఇంతకుమించిన పరమార్ధం ఏముంది! బిడ్ద పై మమకారం కలిగి మన ప్రాణాలురెండూ పెనవేసుకున్నాక నన్ను నీలో నిలిపి నవమాసాలూ ఎదురుచూశాను. ఆద్యంతాలూ నీవే. “మిమ్మల్నింకా ముందుగానే  కలవలేకపోయానన్న లోటు ఈ జన్మకు తీరదు, అత్తమ్మని ఇంకా ఎదురుచూడనివ్వొద్దు, వీలైనంత త్వరగా మనవడ్నివ్వాలి” అంటూ ఆలస్యాన్ని వద్దన్నావ్. ఆషాడం అడ్డురాకపోతే  కొత్త సంవత్సరం శుభాకాంక్షలు చెప్పేవాడేమో. నా యశోధరవి నువ్వు. చిరునవ్వులతో చిరాయువై వర్ధిల్లు.

RTS Perm Link

No responses yet

Aug 01 2018

| ప రాం ప్రే య సీ..!|-10

Published by under my social views

ఇద్దరు ఒకటయ్యేవేళ

జంటగా ఒకటవ్వాలంటే ఎనిమిది చర్యలు జరపాలట. స్మరణ, కీర్తన కేళిలు– తలచి, కొలిచి, పిలిచి ఆడుకోవడం; ప్రేక్షణ, గుహ్య భాషణ, సంకల్పాలు-ఒకరినొకరు చూసుకుని, చనువైనవి మాటాడుకుంటూ, అనువైన దారి వెతుక్కోవడం; అధ్యయన సాయం, క్రియానిర్వృత్తులు– ఆదారిన పయనించి గమ్యం చేరడం. ఏది తక్కువ మన ఆరాటంలో! ఇవన్నీ తీరడానికి మనకి రెండేళ్ళు పట్టింది. ఇప్పుడు అవన్నీ ఏకరువు పెట్టను. ఇక్కడో మాట ఒప్పుకోవాలి. ఎలా మొదలైందో అలా ముగియాలని లేదు. జీవితం ఎన్ని పరీక్షలు పెట్టినా నీ మీద నా ప్రేమ తగ్గింది లేదు, అలకలూ, ఆవేశాలూ ఎవరికీ తక్కువేం లేవు. అన్ని జంటల్లానే అంతుచిక్కని అంతఃసూత్రమేదో మనల్నిద్దరినీ కలిపి ఉంచింది.

ఈ కధలోంచి కొంచం బయటకి వచ్చి నిన్నటి మాట ఒకటి చెప్పనా! నువ్వెప్పుడో రాసిన ఉత్తరం ఒకటి రాత్రి నీకు చూపించానా! అక్షరమక్షరం చదువుకుని నవ్వుకున్నావ్. ఇది రాసింది ఇప్పటి నేను కాదు, అప్పుడు అదో పిచ్చిది అని తప్పించుకోవాలనుకున్నావ్. అందుకే నిజం ఒప్పేసుకున్నావ్. పెళ్ళైన కొన్నాళ్ళకే మేడమీద మైమరచిపోయి ఓ మాట అన్నావ్, అన్నీతీరాయి నాకు పిల్లల్ని కనడం తప్ప.. ఆ ఒక్కటీ తీరితే ఇక చచ్చిపోయినా పర్లేదు అని. నువ్వు నిజంగానే..!!

RTS Perm Link

No responses yet

Aug 01 2018

| ప రాం ప్రే య సీ..!|-9

Published by under my social views

మన పరవళ్ళు..

రమ్మని  పిలుపు; నీకు ఒంట్లో బాగోలేదని, ఆసుపత్రిలో సెలైన్ ఎక్కించేటప్పుడు వచ్చాను, తోటకూరకాడలా వాలిపోయి, నిర్వేదంతో సోలిపోయి.. అర్థం అయ్యింది మేనరికానికి మొగ్గు చూపమంటే   నిరశనదీక్ష చేసినట్టు. ఆపై తప్పక, నన్ను పిలచి మరీ నీభరోసాని పెంచినట్టు, దీక్ష విరమింపజేయడానికి కదలి వచ్చిన నాయకుడ్ని నేను,  ఆనాటి నుంచి మీఇంట  నా పలకరింపులకి ఆక్షేపణేం లేదు. మీఇంట మీచెల్లి ఒకతె వందమంది పెట్టు, దానికి నేను తెచ్చే జున్ను తో పోలిస్తే పెద్దగా నచ్చినట్టు లేను. అక్కకోసం రెక్కలగుర్రం మీద రాలేదని కాబోలు కొట్టేట్టు దాని చూపు. చనువిస్తే గొడవ పడేనో, గొడవపడితే చనువు పెరుగుతుందో దాని విషయం లో చెప్పడం కష్టమే, ముసలమ్మ మూడో కాలు కూర్చున్నాలేచే, నుంచున్నాలేచె అన్నట్టు. మీ తాతయ్య బాలకృష్ణతో కత్తులకొండయ్య సినిమా తీస్తున్నప్పుడు  ఓమారు ‘ఒసే! అన్నాడని మాట్లాడితే ఒట్టు’ అని మీ అమ్మగారు గొప్పగా చెప్పుకున్నట్టు.. అది నిజంగానే తట్టొరసల పిట్ట, నీకన్నా బాగా గుట్టు. ఓ పట్టాన ఏదీ నచ్చబెట్టుకోలేదు కదా, అన్నీ నువ్వే సరిపెట్టుకోవాలా. నిన్ను పెళ్ళాడాలంటే నీ చెల్లికి నచ్చడమేంటే పిచ్చి మొహమా! అందరు అక్కచెల్లెళ్ళూ ఇట్టాగే ఉంటే  కాపురాలు ఐనట్టేనా.  ఎట్టెట్టా!

RTS Perm Link

No responses yet

Aug 01 2018

| ప రాం ప్రే య సీ..!|-8

Published by under my social views

మన తిరుగుళ్ళు..

చెవికి ఇల్లు కట్టుకోవడమంటే నీతో  బండి మీద దూరప్రయాణం చెయ్యడమే. గట్టమ్మట రోడ్డు, రయ్యిమని ఢీకొట్టే గోదారినాదం. చెవిలో నీ మాటలసంగీతం.  ఓసారి పట్టిసీమకి వెళ్ళాం. మరోసారి లాంచీ మీద పేరంటాల పల్లి. నా పుట్టిన్రోజుకు  పేద్దకేకు  పట్టుకుని మా ఊరే వచ్చేసావ్, గుర్తుందా! అప్పుడు నువ్వేసుకుని ఉన్నది..   కోబాల్ట్ బ్లూ గాగ్రా చోళీ. నువ్వలా రైలు దిగుతుంటే.. ఐసా.. లగా ఐసా లగా అని అనలేను ఎందుకంటే.. నీలా మరెవ్వరూ లేరు; రారు. నను చూసి నువు నవ్వుతుంటే పేరు తెలీని పాపాయివి, మోరెత్తి  తుళ్ళుతుంటే నువ్వు తువ్వాయివి. వెళ్ళాల్సిన సమయం వచ్చినప్పుడు ఏపెళ్ళిలోనో, బువ్వాలబంతిలోనో అదాటుగా కనిపించిన అభావంగా చూసే అపరిచిత అమ్మాయివి. నీకు కోపం ఇట్టే వస్తుందో, నేను నీకు తెప్పిస్తానో ఎలా ఒప్పుకునేది! ఎవరైనా అందంగా ఎదురొస్తే బాగుంది కదా అని కూడా అనకూడదా నీతో! ఓసారి కుక్కపిల్లతో నడుస్తున్న ఓ పిల్లని అన్నాను, అలాంటి సందర్భాలలో అప్పుడొక్కసారే నవ్వావు తెరలు తెరలుగా, ఎవరిని అన్నానో తెలియక. నువ్వే నా ఇష్టసఖివి ఐనప్పుడు మనసులో మాట నీతో చెప్పకుండా ఎలా ఉంటాను!  నిష్కల్మష మనసు ముందు కపటంగా ఎలా ఉండగలను!

RTS Perm Link

No responses yet

Aug 01 2018

| ప రాం ప్రే య సీ..!|-7

Published by under my social views

గడుసరి లాహిరీ..

పీటలెక్కేటందుకు నీ పాట్లు నీకుంటాయని ఉద్యోగం మానేసావు. అన్నదమ్ములు లేని ఇల్లు, చెల్లేనెచ్చెలి. నాన్నని కాపాడుకుంటూ ఈదురుగాలుల్లో నుంచున్న అమ్మ. బయట సంబంధంవద్దని శాస్త్రం చెప్పే మేనమామ. అప్పట్లో నీకెన్ని ఇక్కట్లో! నన్ను చీకటిపరం చేసి రేపు మనమిద్దరం కలిసుండాలని నీ యుద్ధం ఒంటరిగా మొదలెట్టావు, చీకటిని చీల్చుకువస్తేనే కదా రేపటి బాలుడు కనపడేది!! నీ చూపుల వెచ్చదనం కనుమరుగైన  కాలంలో  నా  పనులు కొన్ని.. ఉద్యోగ బాధ్యతల్ని సక్రమంగా నిర్వర్తించడం, బెంగటిల్లినవేళల్లో నిన్నూరడించడం, నువ్వు  ఉండబట్టలేక బెదిరిస్తే చేతక్ ఎక్కి నీ చెంత చేరడం, ఆశల్ని సజీవంగా ఉంచుకునేందుకు ఒకరికొకరం సర్దిచెప్పుకోవడం. అసలు సమస్యేంటి! మీ ఆస్తి కరిగిపోవడం, అంతస్తు తరిగిపోవడం. ఏం తెచ్చుకోనక్కరలేదన్నా, వడ్డాణం అరవంకీ అడ్డం పెట్టుకుని  ఏర్పాట్లూ.. అంటూ ఆలస్యం చేసేశావు.

పెళ్ళంటే ఎంత కష్టమో అందరికీ ఆ అదృష్టం ఉండొద్దూ!  పెళ్ళికూతురే  కళ్యాణమండపం మాట్లాడుకుని రావడం. అది అవసరం మాత్రమే అయితే సరే; ఒంటరి ఈదులాట అలవాటుగా మారితే.. బలాన్ని బలహీనతగా మార్చుకోవడమే కదా! తోడు నీడలా ఉండాలా! నీడతోడుగ నిలుచుండాలా! ప్రియురాలా!!

RTS Perm Link

No responses yet

« Prev - Next »

RTSMirror Powered by JalleDa