నా లోకం!

Archive forపిల్లలు

అమ్మా….. సంవన్ ఈజ్ మేకింగ్ మదర్ అర్త్ సిక్………..

July 24, 2009 @ 12:29 pm · Filed under పిల్లలు, ప్రకృతి

……..

అని మా అబ్బాయి బాధతో అరిచాడు మేమందరమూ McDonald’s నుండి బయటకు వస్తుంటే. తీరా చూస్తే రోడ్డు మీద ఎవరో అరటి తొక్క, ఒక కవరు, స్ట్ర్ఱా పడేసారు. నిజమే నాన్నా. నీకు ఉన్న కనీస పాటి ఙానం కూడా వాళ్ళకి లేక పోయింది అని నేను కూడా వాపోయాను.

తరువాత అడిగాను ఇప్పుడు ఏమిటి చేద్దాం అని.ఆలోచించాడు. ఒక నిమిషం తరువాత నన్ను కూడా మళ్ళీ లోపలకు తీసుకు వెళ్ళి అక్కడ పని వాళ్ళకి ఆ చెత్త గురించి చెప్పాడు. వాళ్ళు కూడా ఏమీ అనకుండా వచ్చి శుభ్ర పరిచారు. మా వాడి మొహం విజయోత్సాహంతో వెలిగి పోయింది. నేను అడిగా నువ్వెందుకు శుభ్ర పరచలేదు అని. అప్పుడు అన్నాడు ‍ అమ్మా వాళ్ళకి చెప్తే మళ్ళా అలా జరగకుండా చూస్తారు అని. నేనూ ఆనంద పడ్డా. ఇప్పటికే కాదు ముందు ముందు కూడా అలా జరగకూడదు అని ఆలోచన వాడికి కలిగినందుకు. మంచిది బాబూ అంటే జవాబుగా వాదు అన్నాడు అసలు జనాలకి ఇలా మదర్ అర్త్ ని డర్టీ చేయొద్దు అని నేర్పిస్తే పోలా అని! అవును నాన్నా! ఇలానే కాదు ‍ చాలా మం‍ది చాలా రకాలుగా భూదేవి ని కాల్యుష్యం తో నింపుతున్నారు.అందుకే మనము చేసే ప్రతి పనిలోను మనమె జాగ్రత్తగా ఉంటూ వేలైతే మన చుట్టు పక్కల వారి చేతా అలాగే చేయించగలిగితే భూదేవి తప్పకుండా శుభ్ర పడుతుంది బాబూ అని చెప్పా. వై నాట్ ష్యూర్ అమ్మా అని ఎంతో ఆత్మ విశ్వాసంతో వాడు చెప్తుంటే భలే ముచ్చట వేసింది.

నా చిన్నప్పుడు తాతయ్య రోజూ పొద్దున నిద్ర లేచి మంచం దిగే ముందర ఏదో శ్లోకం చదివి నేలకు నమస్కారం చేయడం చూసేదాన్ని. (అయిదేళ్ళ వయసులో) ఒక రోజున‌ అడిగేసాను. ఎందుకు తాతయ్యా అలా చేస్తున్నారు అని. భూదేవికి నమస్కారం పెడుతున్నానమ్మా . నా పాదాలతో భూదేవిని తొక్కుతున్నందుకు క్షమించమని ప్రార్థన చేస్తున్నా అన్నారు ఆయన. నేను ఫక్కున నవ్వి అదేమిటి తాతయ్యా!భూదేవి, క్షమాపణ అని అంటున్నావు. భూమి అంటే ప్లానెట్ అర్త్ కదా. గొప్ప శాస్త్ర వేత్తవు నీకు తెలియదా ఏమిటి. మరి ఇలా మాట్లాదుతున్నావేమిటి అని నేనంటే ఆయన తప్పు లేదమ్మా. భూమి మనకి కావల్సినవి అన్నీ ఇస్తుంది కదా. నీకు ఇష్టమైన బొమ్మలకి కావాల్సిన ముడి సరుకు, జాం పండ్లు, ఉయ్యాల ఊగడానికి చెట్లు అన్నీ ఇస్తుంది కదా. మరి అలాంటప్పుదు భూమిని దేవతా సమానంగా తలిస్తే తప్పేమిటి అని ఆయన నన్ను ఎదురు ప్రశ్న వేసారు. మన దగ్గర సమాధానం నిల్. అప్పుడు ఆయన అన్నారు ప్రతి వస్తువుని దాని యొక్క ప్రయోజనం గుర్తించి, దానిని గౌరవించాలి అని. ఎందుకో తెలియలేదు అప్పుడు గానీ నాకు భలే సిగ్గేసింది. సారీ తాతయ్యా ఇందాక తెలియక నవ్వాను అన్నా.

ఆ శ్లోకం గుర్తు లేదు. రోజూ నేనేమీ నేలకు నమస్కారం చేయట్లేదు. కానీ తాతయ్య మాటలు మాత్రం మనసులో ఎప్పటికీ చెరగని ముద్ర వేసాయి.ఆ మాటల్లో శారాంసాన్ని నా పిల్లలకు కూడా నేర్పిద్దామని నా ప్రయత్నం. మొన్న మా వాడి మాటలు విన్నాక అనిపించింది, చిన్న పిల్లలకి, మన పెద్ద వాళ్ళకి ఉన్న సివిక్ సెంస్ మనకి ఎందుకు లేదూ అని.

RTS Perm Link

Permalink Comments (2)

నేనూ తెలుగు పాట పాడుతున్నా!

June 24, 2009 @ 7:34 pm · Filed under పిల్లలు, సినిమాలు

మాతృభాష మీద మమకారం ఎవరికి ఉండదు చెప్పండి!నాకూ ఉంది.దేశ భాషలందు తెలుగు లెస్స అంటారు. అలాంటి తెలుగుని నా పిల్లలు కూడా అనర్గళంగా మాట్లాడాలని ఒక చిన్న కోరిక. మరి దానికి నా వంతు కృషి నేను చేయాలిగా. అందుకే నా చిన్ని తండ్రికి, చిట్టి తల్లికి తెలుగు DVDలు, పాత కాలం సినిమాలు చూపిస్తున్నాను. ఇంట్లో ఎలాగూ మాట్లాడేది తెలుగు అయినా పిల్లలు బయట మాట్లాడేది ఆంగ్లం కావడంతో వారు ఎక్కడ తెలుగు ని వదిలేస్తారో అని భయం.వాళ్ళకీ ఆసక్తిగా ఉంటుంది అని కొంచెం తెలుగు సినిమా పాటలు కూడా వినిపిస్తున్నాము. ఇదిగొ ఇక్కడే వచ్చింది చిక్కు.

నేటి మన సినిమా పాట‌లలో అసలు తెలుగు సాహిత్యం కన (విన) పడితేగా. జనరంజకంగా ఉండాలని మధ్య మధ్య ఆంగ్ల పదాలు పెట్టేస్తున్నారు. అలా అని అన్నీ అలాంటి పాటలే అని నేను అనట్లేదు. ఉదాహరణకు నీ స్నేహం చిత్రంలో చినుకు తడికి అనే పాటలో సాహిత్యం ఎంత బాగుంటుందో కదా. పోనీ కొన్ని పాటలలో సాహిత్యం బావుంటే ఉఛ్ఛారణ గురించి మరి అడగకండి. స్వఛ్ఛమైన ఉఛ్ఛారణ ఉంటే నువ్వు పాటలకు పనికి రావు అన్నాడట మ్యూజిక్ డైరెక్టరు అని జోకులు సర్వ సాధారణమై పో యాయి.

మా అబ్బాయికి ణ పలికిద్దామని నేను చేసిన ప్రయత్నంతో నేటి రచనకు పునాది పడుతుందని నేను అసలు ఊహించలేదు సుమా! కష్ట పడి ణ అనిపించి, గణపతి, బాణము లాంటి పదాలు పలికించి అంతటితో నేను ఊరుకుని ఉంటే ఈ కథకు అంకురార్పణ జరిగేది కాదు.

మనము తెలుగింటి ఆడపడుచుని పదహారణాల తెలుగమ్మాయి అని సంభోధిస్తాము కదా. అదే ముక్క మా వాడి చెవిలో పడేశా. ఇంకేం ‍ ఒక సారి మా శ్రీవారు కారులో బొమ్మరిల్లు సినిమాలో పదహారణాల తెలుగు జులియట్ అనే పాట వింటుంటే మా సిసింద్రి విన్నాడు. నాకా సంగతి తెలియదు. మహదానందంగా నా దగ్గరకు వచ్చి “అమ్మా! నేనూ తెలుగు పాట పాడుతున్నా” అని ఆంగ్లంలోనే అన్నాడు. ఆహా! నా కృషి ఫలించింది అని లోలోపల మురిసిపోతూ ‍ ఏదీ నాకూ వినిపించవూ అని నేను అడగడం వాడు అదును చూసుకుని బెట్టు చేయడం వెంట వెంటనే జరిగి పోయాయి. మొత్తానికి పాడడం మొదలు పెట్టాడు.

పాటలోని మొదటి వాక్యం అయిన వెంటనే ‍Yo, Yo, Yo అంటూ ఆ తరువాత వచ్చే ఆంగ్లంలోని వాక్యాలు చక్కగా పాడి వినిపించాడు.ముందర మన మొహం వెలా తెలా పోయింది.క్షణంలో తేరుకుని ‍ రాగ భరితంగా పాడావు అని మెచ్చుకుని తెలుగు పాట అంటే మొత్తం తెలుగు లో పాడాలి బాబూ అని ఙానోపదేశం చేసాను. మరి సినిమాలలో అలా ఎందుకు పెట్టారు అమ్మా అని అడిగిన ప్రశ్నకు సమాధానం ఏమని చెప్పేది? తెలుగు దినం (అదేనండీ! తెలుగు డే) ఫంక్షను జరుపుకుని మన భాషకు తగిన గౌరవం ఇచ్చేసామని ఆనంద పడే ఈ రోజుల్లో అసలు ఇలాంటి ఆశలు పనికి రావేమో!

అయినా మనం మాత్రం ఆ విక్రమార్కుడికన్నా తక్కువ తిన్నామా ఏమిటి ! పట్టు వదలలేదు. సంగీతం టీచరు గారు నేర్పిన వరద వినాయక శరణం శరణం పాట పాడడం వచ్చే వరకు వదలలేదు.ఇప్పుడు మా వాడు “నేనూ తెలుగు పాట పాడుతున్నా” అంటే నిజమైన ఆనందమే :‍) ఆ నాలుగు ముక్కలూ కూడా తెలుగులో అనిపిద్దామని నా తదుపరి ప్రయత్నం. చూద్దాం ఎన్నాళ్ళకు అంటాడో!