ఆన్‌లైన్‌లో 15 వేల సినిమాలు

ఇంటర్నెట్‌లో ఒకే సైట్‌లో 15,000 పైగా సినిమాలు, డాక్యుమెంటరీలు, టీవీ అవార్డ్ షోలు చూసే అవకాశం మనకు లభిస్తే…. ఒక ఐదేళ్ల క్రితం అయితే ఇలాంటి అవకాశం అందుబాటులోకి వస్తుందంటే కల్లో కూడా మనం ఊహించి ఉండము. కాని ఇప్పుడిది సాధ్యమవుతోంది మరి. ఇంగ్లీష్ సినిమాలు కూడా లెక్కలోకి తీసుకుంటే మరి కొన్ని వేల సినిమాలను మనం ఒకే సైట్‌లో చూడవచ్చు. ఆనందంగా డౌన్ లోడ్ చేసుకోవచ్చు కూడా.

ఇంటర్నెట్ లేదా అంతర్జాలం అనే నాలుగక్షరాల మాంత్రిక పదం ఇప్పుడు ప్రపంచ వినోద యవనికను ఏలుతోందంటే ఆశ్చర్చపోవలసిన పనిలేదు.

నిన్ననే శ్రీదేవీ మురళీధర్ గారు యధాలాపంగా ఒక ఆన్‌లైన్ సినిమాల సైట్‌ని పంపిస్తే నా కుతూహలాన్ని కొంత జోడించి ఆన్‌లైన్ పాఠకులకోసం దాని వివరాలు ఇక్కడే ప్రచురించాను.

వందలాది సినిమాలు ఒకే చోట ఆన్‌లైన్‌లో చూడవచ్చు అనే వార్త చాలామంది నెటిజన్లను ఆకర్షించినట్లుంది. కాని బెంగుళూరు నుంచి మిత్రులు సాప్ట్‌వేర్ ఇంజనీర్ కొమ్మిరెడ్డి శ్రీనివాస్ గారు ఇప్పుడే ఫోన్ చేసి మరికొన్ని విశేషాలు పంచుకున్నారు. కొన్ని వేల సినిమాలు ఒకే చోట చూడవచ్చు, 2 వేలకు పైగా తెలుగు సినిమాలను నెట్లో చూస్తూ డౌన్ లోడ్ చేసుకోవచ్చు అంటూ చెప్పుకుంటూ పోయారు.

శ్రీనివాస్ గారు చెప్పిన లింకు ఓపెన్ చేసి చూస్తే దిగ్భ్రమ. షాక్. ఎలా సాధ్యం ఇది. ఇంత స్పేస్ ఎలా నిర్వహిస్తున్నారు అని ఒకటే ప్రశ్నలు. ఇంగ్లీష్ సినిమాలను పక్కన పెట్టండి. హిందీ తెలుగు, తమిళం, వంటి ప్రముఖ భారతీయ సినిమాలే 15 వేలకు పైగా ఈ సైట్‌లో కన్పిస్తున్నాయి.

లెక్కకు తీసుకుంటే…

హిందీ – 3958
తెలుగు – 2060
తమిళం – 1855
మళయాళం – 1252
డబ్బింగ్ సినిమాలు 1219
రాజ్‌శ్రీ కేటగిరీ – 1162
బెంగాలీ – 569
కన్నడ 622
షార్ట్ ఫిల్మ్స్ – 302
మరాటీ – 220
పంజాబీ – 165
గుజరాతీ – 111

చెప్పుకుంటూ పోతే ఇవి మచ్చుకు కొన్ని సినిమాలు మాత్రమే.. వీటికి ఇంగ్లీష్ సినిమాలను కలపలేదు. అత్యంత పాత సినిమాలు, 2011లో విడుదలైన సినిమాలు కూడా ఈ సైట్‌లో చూడవచ్చు, డౌన్‌లోడ్ చేసుకోవచ్చు. సబ్‌స్క్రిప్షన్ అవకాశం కూడా ఉంది.

బాల్యంలో, తదుపరి జీవితంలో మనకు నచ్చిన లేదా మనం మెచ్చిన సినిమాలను మన ఇష్టప్రకారం చూడాలంటే వాటిని కొనుక్కోవాలి. లేదా టీవీలో వచ్చినప్పుడు వాటిని ఆ సమయంలో మాత్రమే చూడాలి. కాని ఇప్పుడు ప్రపంచం తన సరిహద్దులను తానే తెంచుకున్నట్లుంది. ఏదీ తన పరిమితుల్లో ఉండటం లేదు. హద్దులను, సరిహద్దులను, పరిమితులను బద్దలు గొట్టడమే ఇప్పుడు ఏకైక విలువ.

తెలుగులో గత 80 ఏళ్లలో 5 వేల సినిమాలు తయారయ్యాయనుకుంటే వాటిలో 2 వేల సినిమాలు ఒక్క ఈ సైట్‌లోనే కన్పిస్తున్నాయి.

ఒకే సైట్‌లో 15 వేల సినిమాలు అంటేనే నోరు తెరిచేస్తున్నాం. ఏమో.. 50 వేల సినిమాలను కూడా తన గర్భంలో దాచుకున్న మహా సైట్లు మనకు తెలియకుండా ఉన్నాయేమో ఎవరికి తెలుసు. ఇవి బయటపడే వరకు ప్రస్తుతానికి ఈ లింకుతో సంతృప్తి చెందుదాం మరి.

శ్రీనివాస్ గారూ అమూల్య సమాచారం పంచుకున్నందుకు ధన్యవాదాలు. రేపు మీరు పనిమీద చెన్నయ్ వస్తున్నారు కాబట్టి గురువారం సాయంత్రం చందమామ ఆఫీసులో తప్పక కలుసుకుందాం. మీరు కోరినట్లుగా మీకోసం ‘చందమామ ఆర్ట్‌బుక్’ సెట్ ఒకటి తీసిపెడతాను. మీరాక కోసం ఎదురు చూస్తుంటాను.

ఈ సైట్ నిర్వాహకులు పై లింకును అందరికీ తెలియజేయాలని మాత్రమే మనల్ని కోరుతున్నారు. ఇప్పుడా వంతు మనదే మరి.

మానవ వినోద విజ్ఞాన రంగం సృష్టించిన ఆత్యున్నత సాంకేతిక ఆవిష్కరణకు ప్రతిబింబమే సినిమా. శతాబ్ద కాలంగా ప్రపంచాన్ని ఇది మాయ చేసినంత మరేదీ చేయలేదు. 15 వేల సినిమాలు ఒకే చోట అందుబాటులోకి రావడం కూడా ఈ మాయలో భాగమే.

దాదాపు 15,000 పైగా సినిమాలను తనలో దాచుకున్న ఆ మహా సైట్ లింక్ కోసం ఇక్కడ చూడండి.

http://www.filmlinks4u.net/

సినిమా ప్రియులకు ఇంకేం కావాలి?

ఎస్వీ రామారావు గారు 2006లో రాసి ప్రచురించిన ‘నాటి 101 చిత్రాలు’ జాబితాలో పది సినిమాలు మినహాయిస్తే మిగతా 90 అపురూప చిత్రాలు శ్రీనివాస్ గారి సేకరణలో ఉన్నాయట. బెంగళూరుకే చెందిన శ్రీయుతులు, బి. విజయవర్ధన్, శ్రీనివాస్, కె. శివరామప్రసాద్ గార్లు,  హైదరాబాద్‌లో  శ్యామ్ నారాయణ్, కె. గౌరీశంకర్ గార్ల వంటివారు ఒక చోట కలుసుకుంటే ఆ దొరకని పది సినిమాలు కూడా దొరకొచ్చునని నా ప్రగాఢ విశ్వాసం.

ఏమో! ఏ పుట్టలో ఏ పాముందో ఎవరికి తెలుసు?

పగలే వెన్నెల కురిపించిన విజయా వారి సినిమాల సెట్, కెవి రెడ్డి గారి సినిమాల సెట్, మణిరత్నం సినిమాల సెట్, మన విశ్వనాధ్, బాపు వంటివారి సినిమాల సెట్ వంటివి టోకున భవిష్యత్తులో మనందరికీ లభించాలంటే పాత బంగారాన్ని హృదయంలో పొదువుకున్న పై మాన్యులకే సాధ్యం. ఉత్తమాభిరుచికి, సాంకేతిక జ్ఞాన సంపత్తి తోడయితే ఎలాంటి అద్భుతాలు సృష్టించవచ్చనేదానికి వీరే ఒక ఉదాహరణ.

ఇక్కడ మనం మన అభిరుచికి తగిన అంశాలను స్వంతం చేసుకోవడానికి ఎక్కడ అవకాశం దొరికితే అక్కడికి పరుగెడుతున్నాం. అక్కడ శ్యామ్ నారాయణ్ వంటివారు గౌడౌన్ లాంటి షాపులో కూర్చుని పాటలు, సంగీతం, సాహిత్యం, సినిమాలు… మనిషికి కావలసిన సమస్త అంశాల సమాచారాన్ని సేకరిస్తూ జీవితాన్ని ధారపోస్తున్నారు.

తమకంటూ ఏమీ కోరుకోకుండా తమ కష్టం పదిమందికీ అందితే చాలుననుకుంటూ, భవిష్యత్తులో కనుమరుగు కానున్న అమూల్య రత్నాలను ఇప్పుడే డిజిటలైజ్ చేయిస్తూ భద్రపరుస్తున్న ఇలాంటి మాన్యులకు అంజలి ఘటించడమే ప్రస్తుత సందర్భానికి అర్హమైన విలువగా ఉంటుంది.

మనలో… మన తరంలో… కొందరు చేస్తున్న ఘనతర కృషికి, సంప్రదాయానికి అభివందనం చేస్తూ… ముగిస్తున్నాను….

మర్చిపోకండి.  ఆ 15 వేల సినిమాల మహా సైట్ లింకును మరోసారి చూడండి.

http://www.filmlinks4u.net/

(ఇప్పుడే ఈ బ్లాగ్ పోస్ట్ ముగించి మెయిల్ చూస్తే శ్రీదేవి గారు మరొ ఆణిముత్యాన్ని వెదికిపట్టుకుని పంపారు. కింద చూడండి.)

విజయావారి ‘చంద్రహారం’-1954
-నాగిరెడ్డి చక్రపాణి నిర్మాతలు,

నందమూరి,శ్రీరంజని,సావిత్రి,రేలంగి,ఎస్వీ రంగారావు,సూర్యకాంతం,జోగారావు.

RTS Perm Link

ఆన్‌లైన్‌లో సకల భాషల సినిమాలు

ఆల్కహాలిక్ పిల్లలు, బుజ్జి వంటి చక్కటి ఉచిత పుస్తకాల ప్రచురణతో ఆల్కహాలిక్ పిల్లల సమస్యలకు హృద్య పరిష్కారం చూపుతున్న శ్రీదేవి మురళీధర్ గారు ఈరోజు నా బ్లాగులో అమరశిల్పి జక్కన కథనం చూసి దేశంలోని చాలా భాషల్లోను, ఇంగ్లీషులోనూ వందలాది సినిమాలను ఆన్‌లైన్‌లో ఉచితంగా చూసేందుకు అవకాశం ఇస్తున్న ఒక అద్భుతమైన అన్‌లైన్ వెబ్‌సైట్‌ని చూడమంటూ నాకు మెయిల్ పంపారు.

తెలుగు, హిందీ, ఇంగ్లీష్, తమిళం, మలయాళం, గుజరాతీ, కన్నడ, బెంగాలీ, పంజాబీ, నేపాలీ, మరాటీ తదితర భాషల చిత్రాలను, పిల్లల చిత్రాలు, హారర్ చిత్రాలు, యానిమేషన్ చిత్రాలు, పాత సినిమాలు, లఘుచిత్రాలు, డాక్యుమెంటరీలు, షార్ట్ ఫిలింలు, ఇంగ్లీష్ నుంచి భారతీయ భాషల్లోకి డబ్ అయిన సినిమాలు, మనభాషల్లో ఒకదాంట్లోంచి మరొక దాంట్లోకి డబ్ అయిన సినిమాలు ఇలా వందలాది సినిమాలను ఒకే చోట ఉచితంగా ఈలింకులో చూడవచ్చు.

2007లో ప్రారంభించిన ఈ సైట్‌లో కొన్ని సినిమాలు డౌన్‌లోడ్‌కు కూడా అవకాశం ఉండటం గమనార్హం. టీవీ షోలు, అవార్డు ఫంక్షన్ల లింకులు కూడా దీంట్లో చూడవచ్చు.

ఇంగ్లీషులో 812 సినిమాలుహిందీలో 326 సినిమాలుతెలుగులో 94 సినిమాలుతమిళంలో 93 సినిమాలుమలయాళంలో 73 సినిమాలుకన్నడంలో 43 సినిమాలు…..

ఇలా అన్ని భాషల్లో కలిపి కొన్ని వందల పాత కొత్త సినిమాలను మంచి క్వాలిటీతో ఈ సైట్‌లో చూడవచ్చు. విశేషం ఏమిటంటే ఎవరి అభిరుచికి తగిన సినిమాలు వారికోసం ఇందులో ఉంచారు. పాత తెలుగు సినిమాలు కూడా చక్కటి నాణ్యతతో దీంట్లో చూడటానికి అవకాశ ముంది.  ఇంటర్నెట్ కనెక్షన్ ఖర్చు భరించగలిగితే సినిమా ప్రియులకు ఇది వీనుల విందు కలిగించక మానదు.

శాంపుల్‌గా పాత తెలుగు సినిమా ‘భామావిజయం’ -1967-ని కాస్సేపు చూస్తుంటే మనోహరంగా అనిపించింది1. రెండు చందమామలు ఈ రేయి వెలిగినే…. 2. ఇటు రారా సుందరా3. భువన మోహినీ… భువనమోహినీ..భువనమోహినీ… అవధిలేని యుగయుగాల అమృతవాహినీ….

ఎన్నాళ్లకు మళ్లీ ఈ పాటలు చూసి వినే అవకాశం కలిగిందో..

నర్తనకు, నాట్య శిల్పానికి దశాబ్దిపైగా ప్రతీకగా నిలిచి నాటి తరాన్ని తన నృత్య విన్నాణంతో ఉర్రూతలూగించిన ఎల్ విజయలక్ష్మి మనోహర నాట్య విన్యాసాలను చూడాలంటే ఈ సినిమా చూసి తీరాలి.
ఆన్‌లైన్‌లో అన్ని భాషల్లో ఉచిత సినిమాలు చూడాలనుకుంటే….
కింది లింకును చూడగలరు.

Online Watch Movies Free

http://www.onlinewatchmovies.net/

మంచి సైట్ గురించి మెయిల్ పంపిన శ్రీదేవీ మురళీధర్ గారూ. కృతజ్ఞతలు.

RTS Perm Link

అమరశిల్పి జక్కన – మనసే వికసించెరా

ఈరోజు రాత్రి సన్ టీవీ సినిమా క్లబ్‌లో ‘అమరశిల్పి జక్కన’ సినిమా చూస్తున్నాను. ఒక అద్భుత వర్ణ చిత్ర ప్రపంచం కళ్లముందు అలా పరుచుకున్నట్లయింది. ఎంత గొప్ప సంగీతం, ఎంత మంచి పాటలు. ముఖ్యంగా ఈ నల్లని రాలలో వంటి ఈ చిత్రంలోని ప్రసిద్ధ పాటలు అందరికీ తెలుసు కాని ‘మనసే వికసించెరా’ అంటూ బి. సరోజా దేవి ఆడి పాడిన పాట విని చాలా కాలమయింది. వింటూంటే పరవశించిపోయాను.

లవకుశ -1963- తర్వాత తెలుగులో రెండో ఈస్ట్‌మన్ కలర్ చిత్రం అమరశిల్పి జక్కనే -1964- అనుకుంటాను.

ఆద్యంతం ఈ సినిమా నేపథ్య సంగీతాన్ని, పాటలను వింటూ పిచ్చెత్తి పోత్తున్న నేపథ్యంలో మీకు మెయిల్ చేస్తున్నాను. మీలో ఎవరివద్ద అయినా ఈసినిమా సీడీ లేదా డీవీడీ ఏదయినా ఉందా.. ఉంటే శ్రమ అనుకోకుండా నాకు ఒక కాపీ పంపగలరా..

సాలూరి రాజేశ్వరరావు గారి విశ్వరూపం చూడాలంటే ఈ సినిమా చూసి తీరాలి. ఆయన సంగీత దర్శకత్వం వహించిన చివరి సినిమా ‘తాండ్ర పాపారాయుడు’ అనుకుంటాను. ‘అభినందన మందార మాల’ అనే పాట పాతికేళ్లుగా నన్ను వెంటాడుతూ వస్తోంది. సినీ సంగీతంలో లాలిత్యాన్ని శిఖరస్థాయిలో నిలబట్టిన మహనీయుడు కదా..

ఈ పాట కూడా ఆడియో మాత్రమే దొరుకుతోంది. సినిమా కాని, వీడియో పాట కాని లభ్యం కాలేదు. మీ వద్ద ఉంటే చెప్పండి

విజయావారి సినిమాల సెట్, కెవి రెడ్డి గారి సినిమాల సెట్ లాగా సాలూరు రాజేశ్వర రావు గారి  పాటల సెట్ లేదా సినిమాల సెట్ సేకరించుకోవాలన్నది నా చిర కోరిక.

సుశీల గారు పాడిన పాటల్లో ఆమెకు బాగా నచ్చిన పాట ‘పాల కడలిపై శేషతల్పమున శయనించేవా దేవా’ పాటకు కూడా సంగీతం రాజేశ్వరరావుగారిదే అనుకుంటాను.

మణిరత్నం ‘ఘర్షణ’ చిత్రంలో ‘నిను కోరీ వర్ణం’ అనే పాటలో వినిపించే సంగీత జలపాత ఝరి అప్పటినుంచి ఇప్పటి దాకా ఆకట్టుకుంటూనే ఉంది. అది శ్రోతగా నేను పొందిన ఆనందం. కాని ఈ మధ్యే ఒక చానెల్లో సాలూరు వారి గురించి ప్రసారం చేస్తూ ఈ పాట సంగీతానికి ప్రాణం పోసిన ఇళయరాజాను ఆయన అప్పట్లోనే బాగా ప్రశంసించారని విని పొంగిపోయాను. మనం సంగీతజ్ఞులం కాకున్నా ఏది మంచి సంగీతమో గ్రహించే బుద్ది మనకూ ఉందిలే అనే నమ్మకం దీంతో మరింత బలపడింది.

ఈ ఆనందంలో నెట్లో వెతుకుతుంటే ఎస్వీ రామారావు గారు 2006లో రాసి ప్రచురించిన ‘నాటి 101 చిత్రాలు’ పరిచయాన్ని తెవికీలో చూశాను.

నాటి 101 చిత్రాలు

ఈ లింకులో తెలుగు సినిమా ఆణిముత్యాల సమాచారం చూడవచ్చు.

శ్రీనివాస్, శ్యామ్ నారాయణ, విజయవర్ధన్ గార్లకు….

దీంట్లోని 101 చిత్రాలు మీ సినిమాల కలెక్షన్లో ఏమయినా ఉన్నాయా.. చెప్పండి.

ఏంలేదు.. నా వద్ద ఓ టెరాబైట్ హార్డ్ డిస్క్ ఉంది. మీ సంపదలో కొంత కొల్లగొడదామని దురాశ. అంతే..

ఆహా… ఇంకా సినిమా చూస్తూనే ఉన్నాను. అడుగడుగునా మంత్రముగ్ధం చేస్తున్న నేపథ్య సంగీతం..ఎందుకు మనం పాత సినిమాలను చూడాలో, పాత సంగీతాన్ని వినాలో నిరూపిస్తున్న చిత్రం. ఏమి నా భాగ్యం..

మనసే వికసించెరా.. సాలూరి వారికి పాదాభివందనాలు…

పాత సినిమాల భాండాగారాన్ని సేకరిస్తున్న కె. గౌరీశంకర్ గారి మొబైల్ నెంబర్ మీ వద్ద ఉంటే తెలుపగలరు. ఈమధ్య నా మొబైల్ పోవడంతో అందరి ఫోన్ నంబర్లు పోయాయి.

నా కొత్త మొబైల్ నంబర్

7305018409

మీనుంచి మంచి వార్త వస్తుందని ఆశిస్తూ..

కె. రాజశేఖరరాజు
చెన్నయ్

జక్కన్న నిజజీవితం గురించిన వివరాలకు కింది లింకులు చూడండి.

జక్కన్న

అమరశిల్పి జక్కనాచారి

జక్కన చెక్కిన బేలూరు

తెలుగు సినిమా ‘అమరశిల్పి జక్కన’ -1964- గురించిన వివరాలకు కింది లింకు చూడగలరు.

అమరశిల్పి జక్కన

RTS Perm Link

చందమామ మాన్య పాఠకులు

చందమామ సీనియర్ పాఠకులు శ్రీ బొడ్డపాటి రాజేశ్వరమూర్తి గారు 1950 నుంచి ఇప్పటిదాకా దాదాపు అరవై ఏళ్లపాటు చందమామను విడవకుండా చదువుతూ వస్తున్నారు. 1946 నాటి ‘చిత్రగుప్త’, ‘ఆంధ్రపత్రిక’ నుంచి మొదలుకుని గత 60 ఏళ్లుగా వివిధ తెలుగు దిన వార పత్రికలకు కంటెంట్ ఇస్తున్న సీనియర్ కంట్రిబ్యూటర్ ఈయన. ప్రత్యేకించి అయిదు దశాబ్దాలుగా, అనేక తెలుగు దిన, వార పత్రికలకు జర్నలిస్టుని అని ఈయన సగర్వంగా ప్రకటిస్తుంటారు. నేటికీ ఈయన వ్యాసాలను తెలుగు పత్రికలు ప్రచురిస్తూ ఆదరిస్తున్నందుకు ఈయన ‘బాల్య సంతోషం’ అనుభవిస్తుంటారు.

చందమామ కథాపఠనంతో జీవితాన్ని పండించుకుంటున్న ‘కురువృద్ధబాంధవుడీ’యన. మీగడతరగల్లాంటి తెల్లకాగితంపై అద్భుత వర్ణచిత్రాలను పిండారబోసిన చందమామ గతకాలపు ముద్రణా నాణ్యతను గురించి ఈయన చెబుతుంటేనే మనం వినాలి. చందమామ ఫోటో వ్యాఖ్యల పోటీలో అందరికంటే ఎక్కువ సార్లు విజేతగా బహుమతి అందుకున్న ఘనత తనదే అని చెబుతుంటే ఆయన మాటల్లో పొడసూపే గర్వరేఖలు మనం వినితీరాలి. ప్రైజ్ మనీగా చందమామ నుంచి వందరూపాయలు గెల్చుకుని తీసుకునేవాడినని చెబుతూ ఆయన పొందే సంతోషం అనిర్వచనీయమైనది.

సహస్రచంద్ర దర్శనాలను చూసిన ఈ మాన్య పాఠకులు జీవితపు మలి సంధ్యలో చందమామతో ప్రత్యక్ష సంబంధంలోకి వచ్చారు. నాలుగు నెలల క్రితం వారి చందమామ జ్ఞాపకాలు పంపించినప్పుడు వాటిని అందుకున్నామని ఫోన్‌లో మాట్లాడితే ఆయనలో సంతోషం అంబరమంటిన ఫీలింగ్. 20 నిమిషాల పాటు ధారాపాతంగా తన చందమామ తీపి గురుతులు చెబుతూ పోతుంటే ఆలా వింటూండిపోయాము.

“భారతీయులందరికీ నిజాయితీతో ఈ సూచన చేస్తున్నాను. చందమామను మీ భాషలోనే చదివి దాన్ని జీర్ణం చేసుకోండి. నీతిని గ్రహించడానికి, మన వైభవోజ్వల గతాన్ని దర్శించేందుకు, మన ప్రాచీన రుషులు, మహర్షుల సనాతన వారసత్వాన్ని మన పిల్లలకు అర్థం చేయించి వారిని సరైన మార్గంలో పయనింపజేసేందుకు, దయచేసి చందమామను చదవండి, మీ పిల్లలచేత చదివించండి.”

అంటూ చందమామను ఈ రోజు కూడా సమున్నత స్థానంలో నిలిపి గౌరవిస్తున్న ఈ వయోవృద్దుడికి చందమామ కృతజ్ఞతాంజలులు అర్పిస్తోంది. హృదయపు లోతుల్లోనుంచి పొంగి పొరలి వచ్చిన మీ ఆశీస్సులు ఫలించాలని, చందమామ మరి కొన్ని దశాబ్దాలపాటు పిల్లలకూ, పెద్దలకూ తన దైన కథామృతాన్ని అందిస్తూనే ఉండాలని మనసారా కోరుకుంటున్నాము. మీ వంటి మాన్యుల ప్రేమాభిమానాల అండదండలతో చందమామ తన ప్రయాణం సాగిస్తుందని, నెల్లు, పొల్లు వేరు చేస్తూ తమ గమ్యాన్ని సాగిస్తుందని వినమ్రంగా ప్రకటిస్తున్నాము.

మీ ఆరోగ్యం, మీ ఉనికి మాకు, చందమామకు శక్తిని ప్రసాదించాలని, మీమాట వేదంలా, నాదంలా సకల జనుల మనస్సులలో ప్రతిధ్వనించాలని, మీ శుభాశీస్సులు చందమామ భవితవ్యాన్ని మరింత ముందుకు నడపాలని హృదయ పూర్వకంగా కోరుకుంటూ మనస్సుమాంజలి ఘటిస్తున్నాము.

–చందమామ సిబ్బంది.

రాజేశ్వర మూర్తిగారి చందమామ జ్ఞాపకాలను నవంబర్ సంచికలో ప్రచురించిన తర్వాత ఆయన రాసి పంపిన మూడు లేఖలు, ఆయనతో ఫోన్ సంభాషణ సారాంశాన్ని ఇక్కడ చూడగలరు.

చందమామ పత్రిక ‘కథల కాలక్షేపం’ కాదు
నవంబర్ సంచిక సకాలంలో అందడమే గాక, చందమామతో నా జ్ఞాపకాలు ప్రచురించినందులకు నా హృదయ పూర్వక కృతజ్ఞతలు. కొన్ని నెలల క్రితం చందమామ నాకు ఫోన్ చేసి మీ జ్ఞాపకాలు ఈ డిసెంబర్ మాసంలో రావచ్చని తెలిపింది. అప్పుడు నేను సమాధానమిస్తూ నాకు ఇప్పుడు 82 సంవత్సరాలని జీవితం నీటిబుడగ లాంటిది కాబట్టి, దేవుడు ఎప్పుడు పిలిచినా నేను ‘పరంధామం’ చేరవలసిందే కాబట్టి ఎంత త్వరగా వీలైతే అంత త్వరగా నా జ్ఞాపకాలు ప్రచురించమని కోరాను. దేవుడు నన్ను కరుణించాడు. సరిగ్గా రెండు రోజుల క్రితమే నేను చందమామలో నా జ్ఞాపకాలు చదివాను. ఈ నవంబర్ నెల సంచికలోనే నా జ్ఞాపకాలు ప్రచురించినందుకు కృతజ్ఞతలు తెలుపుకుంటూ అప్పుడే పాఠకుల లేఖలకు రాసి పంపాను కూడా.

అందాల చందమామతో అపురూప ప్రేమానుబంధం అతిమధురం, శాశ్వతం. ఒక విషయంలో పత్రికా ప్రపంచానికి ఛాలెంజ్ చేస్తున్నాను. దేశీయ భాషల్లోనే గాక ఇతర దేశభాషల్లో కూడా ప్రచురించబడుతున్న కథల పత్రిక ఎక్కడైనా ఉందా? ఒక్క చందమామ తప్ప. దీంతో ఇతర కథల పత్రికలు ఎందుకు పోటీపడలేక పోతున్నాయి?

భారతీయులందరికీ నిజాయితీతో ఈ సూచన చేస్తున్నాను. చందమామను మీ భాషలోనే చదివి దాన్ని జీర్ణం చేసుకోండి. నీతిని గ్రహించడానికి, మన వైభవోజ్వల గతాన్ని దర్శించేందుకు, మన ప్రాచీన రుషులు, మహర్షుల సనాతన వారసత్వాన్ని మన పిల్లలకు అర్థం చేయించి వారిని సరైన మార్గంలో పయనింపజేసేందుకు, దయచేసి చందమామను చదవండి, మీ పిల్లలచేత చదివించండి.

82 ఏళ్ల ముదివయస్సులో మీకందరికీ ఒక మాట చెప్పాలనుకుంటున్నాను. చందమామ పత్రిక కేవలం ‘కథల కాలక్షేపం’ కాదు. మానవ నీతి, రుజువర్తనకు సంబంధించి ఇదొక శాశ్వత నిధి. “నవ గ్రహాలు అన్నీ అనుకూలించిన శుభ ముహూర్తంలో” నాగిరెడ్డి, చక్రపాణి గార్లు తమ స్వర్ణ హస్తాలతో చందమామను 1947లో ప్రారంభించారు. ఆ ముహూర్త బలం ఎంత మహత్తరమైనదంటే 65 ఏళ్లుగా చందమామ దేశభాషల్లో ప్రచురితమవుతూ కోట్లాదిమందిని తన వెన్నెల కిరణాలతో తడుపుతూ జాతికి చల్లదనం కలిగిస్తూనే ఉంది. చందమామ మీది, మాది, మనందరిదీనూ.. మీరు చదవండి..మీ పిల్లల చేత చదివించండి చాలు…

ఈనాడు పత్రిక 2006లో చందమామపై కవర్ పేజీ కథనం ప్రచురిస్తూ నా పేరు వెలుగులోకి తెచ్చింది.

ఇపుడు చందమామలో ఫోటోతో సహా నా అభిమాన పత్రికతో నా జ్ఞాపకాలు నిండుపేజీలో ప్రచురించడం ‘హోమ్‌లీ’గా ‘మహదానందంగా’ ఫీల్ అయినాను. మా కుటుంబ సభ్యులు ముఖాముఖిగా, నా సారస్వత మిత్రులు, నా తోటి ప్రభుత్వాధికారులు ఫోన్లోను, ఇమెయిల్ ద్వారా, చందమామతో నాకున్న శాశ్వత బంధాన్ని ప్రశంసిస్తూ పొగడటం నాకు గర్వకారణమైనది. మధుర జ్ఞాపకాలతో జేజేలు పలికినట్లయింది. చందమామ సంపాదకులు, సిబ్బందికి నా ధన్యవాదాలు.

నేను గత 5 దశాబ్దాల నుండి ప్రముఖ తెలుగు దిన, వార పత్రికలకు కంట్రిబ్యూటర్‌ని. 1946లో మదరాసులోని ‘చిత్రగుప్త’ మాస పత్రికతో మొదలై ఆంధ్రపత్రిక వారపత్రిక -1952- నుండి ఈనాటివరకు ఉన్న దాదాపు అన్ని మాసపత్రికలకు జర్నలిస్టుగా పనిచేశాను. నేటికీ వారు నా రచనలు ప్రచురిస్తూ ఆదరిస్తూన్నారు. ఇది నా హాబీ.

చందమామ చిన్న కథలు నిమ్మ తొనలు
ఈ నవంబర్ మాసం ముఖచిత్రం ముచ్చటగొలిపే అమ్మాయి అబ్బాయి, కాసారంలో పడవ విహారం, క్షీరనీరన్యాయం చేసే రాజహంస, హరిత వాతావరణం అద్భుతం. నెహ్రూగారి సందేశ పునర్ముద్రణ అమోఘం. కథలు ఎక్కువగానే ఉన్నాయి. చిన్న కథలు నిమ్మతొనల్లా అలరిస్తూ ఉన్నాయి. పాత ఫోటో వ్యాఖ్యల పోటీని పునరుద్దరించండి. ప్రస్తుత క్విజ్ ఎత్తివేయండి. పాత చందమామల్లో ఉండే పాలతెలుపు కాగితాలే మిన్న. మీగడ తరకల్లాంటి చందమామ కాగితం పదిహేను సంవత్సరాల తర్వాత కూడా వన్నె తగ్గకుండా మిలమిలలాడుతూ ఉండేది.

1950 నుంచి చందమామను చదువుతూనే ఉన్నాను. దశాబ్దాలపాటు చందమామలు బైండ్ చేయించినప్పటికీ బంధువులు వస్తూ పోతూ వాటిని పట్టుకెళ్లిపోయారు. ఒక్కరూ తిరిగి ఇవ్వలేదు. చందమామకు గ్రహణం వీడాక 2000 సంవత్సరం నుంచి అన్ని చందమామల ప్రతులను బైండ్ చేయంచి భద్రంగా ఉంచుకున్నాను. మా బంధువులు, పుత్రులు, మనవళ్లు, మనవరాళ్లు ఎవరడిగినా సరే బయటికి మాత్రం చందమామలను ఇవ్వడం లేదు. నేను ఎంతవరకు ఉంటానో.. ఎప్పుడు పోతానో కూడా తెలియదు. కాని మా పిల్లలకు నేను గత పదేళ్ళ చందమామలను లీగల్ వారసత్వంగా అందించదలిచాను. వారు వాటిని కాపాడతారని, తమ పిల్లలకూ చందమామను అందిస్తారని కోరుకుంటున్నాను. ఇది తప్ప ఈ ముదివయస్సులో నాకిక ఏ కోరికలూ లేవు.

గమనిక: ఇటీవలి సూర్యా పత్రికలో చందమామ చిత్రకారులు చిత్రా గారి గురించి కథనం ప్రచురించారు. దాని కటింగ్ మీకు పంపిస్తున్నాను. గతంలో చందమామ చిత్రకారులు శంకర్ గారి గురించి కూడా ఈ పత్రిక కథనం ప్రచురించింది.

సాటిలేని చందమామ చిత్రాలు

అలాగే ఈ ఆదివారం -13-11-2011- సాక్షి అనుబంధంలో ‘ఇది పిల్లల ప్రపంచం’ అనే పేరుతో చక్కటి ముఖచిత్ర కథనం ప్రచురించారు. దాంట్లో చందమామ కథల గురించి ఆణిముత్యాల్లాంటి వాక్యాలతో ప్రశంసల వర్షం గుప్పించారు. చందమామ కోరకుండానే దానికి ఇంత గౌరవం కల్పించిన ఆ వ్యాసం కటింగ్ కూడా చందమామ కార్యాలయానికి పంపిస్తున్నాను. చూడండి. -

ఇది పిల్లల ప్రపంచం

(అయితే, ప్రధాన కథనంలో భాగంగా చందమామ గురించి సాక్షి పత్రికలో బాక్స్ ఐటమ్ గా వచ్చిన ఈ భాగం సాక్షి ఆన్లైన్ ఎడిషన్లో ఎందుకో రాలేదు.-సాక్షి పత్రిక ఆదివారం అనుబంధం కథనంలో భాగంగా చందమామపై వచ్చిన ప్రశంసను ఇప్పుడు కింద పొందుపర్చడమైనది.

మామ… చందమామ!

పట్టువదలని విక్రమార్కుడు చెట్టువద్దకు వెళ్లాడు. శవాన్ని దింపాడు. ఎప్పటిలాగానే భుజాన వేసుకున్నాడు. . .  చాలు… చాలు.. ఈ మాత్రం నెరేషన్ చాలు..  చందమామ కథ చెబుతున్న విషయం పిల్లలకి అర్థమైపోతుంది. విక్రమ భేతాళ్ అంటూ మన కంటే ముందు వారే లోగుట్లన్నీ విప్పుతారు. చందమామ మాసపత్రిక అంతగా బాలభారతాన్ని అల్లుకు పోయింది. అరవై నాలుగేళ్ల కిందట చెన్నపట్నంలో పుట్టి తరాలకు తారలానే తన వెంట తిప్పుకుంటోంది.

నాగిరెడ్డి, చక్రపాణి మిత్రద్వయం దీన్ని 1947లో తెలుగు, తమిళాల్లో ప్రారంభించారు. నేడిది ఇంగ్లీష్ సహా పదమూడు భాషల్లో వెలువడుతోంది. పిల్లలందరూ ఈ పత్రిక కోసం ప్రతినెలా వేయికళ్లతో ఎదురు చూస్తుంటారు. దీనిమీదున్న కుందేలు బొమ్మతో జట్టుకడతారు… పెద్దాళ్లు కూడా ఈ పుస్తకాన్ని చిన్నాళ్లకి కొనిచ్చేందుకు ముచ్చటపడతారు. మెదడుకు మేతపెట్టే సంగతులు, పసిదనాన్ని నిలువెల్లా నింపుకున్న చిన్న కథలు, భారతీయతను ఒడలంతా రంగరించుకున్న ధారావాహికలు చందమామ ప్రత్యేకత. అసలా  పేరులోనే ఉంది పెన్నిధి. మామ అని అమ్మ తమ్ముణ్ణి పిలుచుకున్నట్టు హాయిగా పిలుచుకోవచ్చు. అందమైన వర్ణచిత్రాలతో, అద్భుతమైన కథనాలతో అలరారే చందమామ పిల్లల రాజ్యానికి నేడూ మహాప్రభువే.

సాక్షిలో ‘ఇది పిల్లల ప్రపంచం’ కథన కర్త డా. చింతకింది శ్రీనివాసరావు గారికి అభినందనలూ… కృతజ్ఞతలూనూ

గమనిక: నిన్న సాయంత్రం చందమామ అభిమాని, మిత్రులు కొమ్మిరెడ్డి శ్రీనివాస్ గారు సాక్షిలో చందమామపై చిరు కథనాన్ని మరో లింకులో ఇచ్చారంటూ మెయిల్ పంపారు. ఆ లింకు ఇక్కడ చూడవచ్చు.

మామ… చందమామ!

http://sakshi.com/main/WeeklyDetails.aspx?Newsid=30615&Categoryid=10&subcatid=29

కె. శ్రీనివాస్ గారూ, ఆ ప్రధాన కథనానికి ఇతర లింకులు సాక్షి ఆన్‌లైన్‌లో కనిపించాయి కాని చందమామ లింకు నాకు తగల్లేదు. పంపిన మీకు ధన్యవాదాలండీ. )

జీవితంలో 80 ఏళ్ళు గడిపిన తర్వాత చందమామ నేరుగా నాకు ఫోన్ చేయడం. నా చందమామ జ్ఞాపకాలు ప్రచురించడం, కాంప్లిమెంటరీ కాపీ పంపడం. నా ఉత్తరాలు రెగ్యులర్‌గా పాఠకుల పేజీలో రావడం. వృద్ధాప్యంలో నేను కోరుకోకుండా నాకు దక్కిన అపురూప వరాలు అనుకుంటాను. మరొక్క విషయం పంచుకోవాలని ఉంది. చందమామ చరిత్రలో బహుశా ఫోటో వ్యాఖ్యల పోటీకి ఎక్కువ సార్లు ప్రైజ్ గెల్చుకున్నది నేనే అని గర్వంగా చెప్పగలను. చందమామ నుంచి ప్రైజ్ మనీగా వందరూపాయలు అందుకోవడం ఎంత సంతోషదాయకమో. మళ్లీ ఫోటో వ్యాఖ్యల పోటీని ప్రారంభిస్తే బాగుంటుంది.

చందమామ సంపాదకులు, సిబ్బందికి నా ప్రేమపూర్వకమైన శుభాభివందనాలు. మేలురత్నం లాంటి ఈ పత్రికలో మీరు పనిచేస్తున్నారు. మీ పని లక్షలాది మందికి వెన్నెల కిరణాలను పంచుతోంది. జాతి పట్ల బాధ్యతతో, గౌరవంతో మీ పని కొనసాగించండి. దీర్ఘాయుష్మాన్ భవ.

-బి.రాజేశ్వరమూర్తి, చిలకలపూడి, బందరు, కృష్ణాజిల్లా, ఎపి.

నిన్ననే -15-11-2011- ఆయన మరొక కార్డు ముక్క చందమామకు పంపించారు. చందమామ కథా, చిత్ర చరిత్రకు కేతనమెత్తిన ఈ హృదయోల్లాస లేఖా వ్యాఖ్యను కింద చూడండి.

‘చందమామ’ ప్రకాశ రహస్యం!!
ప్రారంభదశలో పిల్లల మాసపత్రిక అన్నట్లు గుర్తు! కాని ఇది చదివి వృద్ధులు బాలురైనారు. “నవ్యప్రాచీననవ్యుడితడు” అని పొగడబడిన జ్ఞానపీఠ అవార్డు తొలి గ్రహీత శ్రీ విశ్వనాథ సత్యనారాయణ గారు చందమామ పత్రిక చిరకాల పాఠకుడు. కొత్త చందమామ కోసం నౌకరును పంపి, రాలేదని చెబితే ‘వెధవా! నువ్వు అబద్దాలు ఆడుతున్నావ్’ అని విసుగుకొని తానే వెళ్లి, ఆలస్యం అయితే కొట్టువాడితో దెబ్బలాడేవారు.

పత్రిక వచ్చిన తర్వాత ఆసాంతం చదివి, “ఆహా! ఏమి హాయి” అని అనేవారు. ఆ కాసేపు తన నవలా రచన పక్కన పెట్టేవారు. అలాంటి వారిలో ఎందరో సాహిత్య పీఠాధిపతులు ఉన్నారు. ఐ.ఎ.ఎస్ అధికారులున్నారు. కొడవటిగంటి కుటుంబరావు, ఆరుద్ర, శ్రీశ్రీ, పాలగుమ్మి పద్మరాజు మున్నగువారు నేపథ్య ప్రతిభాశాలురు ఉన్నారు. చక్రపాణి చిత్రాలకు ప్రాతినిథ్యమిస్తూ కథల్ని సైజుతగ్గిస్తూ, ‘టైలరింగ్’ చేసేవారు. చిత్ర, వపా, శంకర్, ఆచార్య గారలు కథలకనుగుణంగా, కళాత్మకంగా, చారిత్రికంగా, సంసార పక్షంగా, పండితులు మెచ్చేటట్లు, పామరులు రంగుల సొగసుతో అబ్బురపడేటట్లు, కథాసన్నివేశాల పక్కనే గీస్తూ వచ్చిన చిత్రాల అమరిక చందమామను జాజ్వల్యమానంగా ప్రకాశింపచేశాయి.

ఇక చిత్రకళాకారుల ప్రతిభా కౌశలం, వారు మన భారత, రామాయణ, భాగవత ఇతిహాసాలకు అనుగుణంగా వస్త్రాలు, నగలు, కిరీటాలు, అంతఃపుర వైభవ దృశ్యాలు, సరోవరాలు, పచ్చటి పకృతి, భీకరారణ్యాలు, గుహలు, ఆటవికుల ఆహార్యాలు, పట్టణాల భవనాల అందచందాలు, పల్లెటూళ్లలోని జానపదుల విచిత్రవైఖరులు, వింత వింత ద్వీపాలలోని  మానవ మృగాల పాశవికత్వాన్ని దేశంలోని ఆయా ప్రాంతాల భౌగోళిక పరిస్థితులను ప్రతిబింబించే కేశాలంకరణ హోదాలను బట్టి దుస్తులు, అచటి జంతువుల రూపాలు,విన్యాసాలు, కురుక్షేత్ర సంగ్రామంలోని పద్మవ్యూహాలు, సేనా పరంపర ‘ఏరియల్ వ్యూ’ గా చిత్రించడం వీరికే చెల్లు.

కీర్తిశేషులైన చందమామ చిత్రకారులకు జోహార్లు. సజీవులైన వారికి అనంత కోటి అభినందనలు. ఎన్నో బాలపత్రికలు వీరిని అనుకరించి కృతకృత్యులు కాలేకపోవడం ‘మామామ’ విశిష్టత. చందమామ చిరంజీవి!!!
-బి.రాజేశ్వరమూర్తి, చిలకలపూడి

రాజేశ్వరమూర్తిగారు చెప్పిన ఈనాడులో ‘చందమామ కథ’ కోసం కింది లింకు చూడగలరు.

ఈనాడులో చందమామ

http://blaagu.com/chandamamalu/category/%E0%B0%88%E0%B0%A8%E0%B0%BE%E0%B0%A1%E0%B1%81%E0%B0%B2%E0%B1%8B-%E0%B0%9A%E0%B0%82%E0%B0%A6%E0%B0%AE%E0%B0%BE%E0%B0%AE/

దాసరి సుబ్రహ్మణ్యం గారి సంస్మరణ సంచికగా ‘రచన’ మాసపత్రిక 2010 మే నెలలో తీసుకువచ్చిన ప్రత్యేక సంచిక వివరాలు దురదృష్టవశాత్తూ మూర్తిగారికి ఇంతవరకూ తెలియవట. నిన్న -15-11-2011- ఆయనతో ఫోన్ సంభాషణలో ఈ విషయం తెలిసింది. చందమామ సీరియల్స్ గురించి ప్రత్యేక సంచికను రచన పత్రిక తీసుకువచ్చిందని తెలియగానే ఆయన చాలా సంతోషించారు.

కొన్ని పనులు సకాలంలో చేయగలిగితే ఎంత బాగుంటుందో అర్థమవుతూ వస్తోంది. దాసరి సుబ్రహ్మణ్యం గారు బొమ్మరిల్లు పత్రికలో 70లలో రాసిన ‘మృత్యులోయ,’ యువ పత్రికలో వచ్చిన ‘అగ్నిమాల’ జానపద నవలలు, దాసరి గారి కథా సంపుటిని కూడా రచన-వాహిని బుక్ ట్రస్ట్ 2011 జనవరిలో అచ్చేసింది. వీలయినంత త్వరలో ఆ పుస్తకం పంపే ఏర్పాట్లు చేయగలనని ఆయనకు మాట ఇచ్చాను.

రచన శాయి గారూ,
‘రచన’ మాసపత్రిక 2010 మే నెలలో తీసుకువచ్చిన ప్రత్యేక సంచిక, దాసరిగారి ‘మృత్యులోయ,’ ‘అగ్నిమాల’ జానపద నవలలు, దాసరి గారి కథల సంపుటి మొత్తం నాలుగు పుస్తకాలు మీవద్ద అందుబాటులో ఉంటే చందమామ సీనియర్ పాఠకులు, రాజేశ్వరమూర్తి గారికి వీలైనంత త్వరలో కింది చిరునామాకు పంపించగలరు. వాటికి సంబంధించిన నగదు మొత్తంగా మీకు త్వరలోనే పంపించగలను.

వారి చిరునామా.

Sri B.Rajeswara murthy
Co-operative Sub Registrar (Retd)
Srikrishna Nagar,
Chilakalapudi -521002
Bandar-2
Krishna (dist)
Andhrapradesh
Land Phone: 08672-254040

నవంబర్ చందమామలో శ్రీ రాజేశ్వరమూర్తిగారి మధుర జ్ఞాపకాలను కింద చూడండి.

చందమామ జ్ఞాపకాలు

RTS Perm Link

అవసరాల రామకృష్ణారావు రచన-జీవితం-వ్యక్తిత్వం

తొలి చందమామ కథకులు -పొట్టిపిచిక కథ 1947- శ్రీ అవసరాల రామకృష్ణారావు గారు గత నెల చివరలో కన్ను మూసిన విషయం తెలిసిందే. గత సంవత్సర కాలంగా చందమామ పనిలో భాగంగా ఆయనతో ఏర్పడిన స్వల్ప పరిచయం, ఆయనతో ఫోన్ సంభాషణలు, చందమామకు ఆయన పంపిన కొత్త కథలు ఆధారంగా ఆయన గురించి నాకు తెలిసిన వివరాలను పంచుకుంటూ మాలిక వెబ్ పత్రికకు కింది వ్యాసం పంపడమైనది.  నిన్న -ఆదివారం- హైదరాబాద్ నగరంలో బాల సాహిత్య పరిషత్ ఆధ్వర్యంలో జరిగిన ఆయన సంతాప, సంస్మరణ సభ వివరాలను సిస్టమ్‌ అందుబాటులో లేక సకాలంలో ఇక్కడ ప్రచురించలేకపోయాను. సభ వివరాలు తెలియవలసి ఉంది.

అవసరాల గారి రచనా జీవిత వ్యక్తిత్వంపై మాలిక వెబ్‌సైట్ పత్రికలో ప్రచురించిన కథనం లింక్ కింద చూడగలరు. మాలిక నిర్వాహకులకు కృతజ్ఞతలు

అవసరాల రామకృష్ణారావు రచన-జీవితం-వ్యక్తిత్వం

http://magazine.maalika.org/2011/11/07/%E0%B0%85%E0%B0%B5%E0%B0%B8%E0%B0%B0%E0%B0%BE%E0%B0%B2-%E0%B0%B0%E0%B0%BE%E0%B0%AE%E0%B0%95%E0%B1%83%E0%B0%B7%E0%B1%8D%E0%B0%A3%E0%B0%BE%E0%B0%B0%E0%B0%BE%E0%B0%B5%E0%B1%81-%E0%B0%B0%E0%B0%9A%E0%B0%A8/

RTS Perm Link

విక్రమార్కుడు, బేతాళుడు, శంకర్….

హిందూ పత్రిక మెట్రోప్లస్ విభాగంలో ఈరోజు చందమామ సీనియర్ చిత్రకారులు శంకర్ గారిపై Vikram, Vetala and Sankar పేరిట ఒక పెద్ద ఇంటర్వ్యూ వచ్చింది.  చేసినది విశ్వనాధ్ ఘోష్.  రెండేళ్ల క్రితం ఈయన టైమ్స్  ఆఫ్ ఇండియా లో పనిచేస్తున్నప్పుడు కూడా శంకర్ గారిపై ఒక ఇంటర్యూ ప్రచురించారు.  హిందూ పత్రికలో చందమామ శంకర్ గారి గురించి అరపేజీ పైగా కథనం ప్రచురించడం ఇదే తొలిసారి అనుకుంటాను.

దీన్ని హిందూ ఆన్‌లైన్‌లో కూడా ఇవ్వాళే హోమ్ పేజీ దిగువన ప్రచురించారు.  దాని లింకుకోసం ఇక్కడ చూడండి.

http://www.thehindu.com/life-and-style/metroplus/article2611627.ece?homepage=true

RTS Perm Link

తొలి ‘చందమామ’ కథకులు ఇక మిగిలి లేరు

శ్రీ అవసరాల రామకృష్ణారావు గారు

“తొలి చందమామ కథకులు ఇక ఎవరూ లేరండీ”

గత శుక్రవారం రాత్రి 10 గంటల వేళ రచన పత్రిక సంపాదకులు శ్రీ శాయి గారు ఉన్నట్లుండి ఫోన్ చేసి చెప్పినప్పుడు మ్రాన్పడిపోయాను. ముందయితే ఆయన ఏం చెబుతున్నదీ ఒక్క క్షణం అర్థం కాలేదు.  తట్టిన మరుక్షణం ‘అయ్యో, అయ్యో’ అనే ఒక్క మాట మాత్రమే నా నోట్లోంచి వచ్చింది. తొలి చందమామ అపరూప కథకులు శ్రీ అవసరాల రామకృష్ణారావు గారు ఇక లేరన్న మాటను శాయి గారు కాస్త మార్చి పై విధంగా చెప్పారు.

ఆయన్ను హైదరాబాద్‌లో కలిసి  10 నెలలయిందనుకుంటాను చందమామ జానపద  సీరియల్స్ రచయిత శ్రీ దాసరి సుబ్రహ్మణ్యం గారి ప్రథమ వర్థంతి సందర్భంగా ఆయన రచనలు మృత్యులోయ, అగ్నిమాల, స్వీయ కథలు ఆవిష్కరణ సభ సందర్భంగా తొలిసారిగా అవసరాల వారిని ఈ జనవరి చివరలో రవీంద్రభవన్‌లో కలిశాము. విశాఖపట్నంలో ఉన్న ఆయనను అంత దూరం నుంచి రప్పించిన వారు రచన శాయి గారు, దాసరి వెంకటరమణ గారు.

ఈ చిన్న పరిచయంతోటే తర్వాత ఆయన  తమ చందమామ జ్ఞాపకాలు, విజయమాల అనే రెండుపేజీల చిన్న కథను పంపారు. ‘రచన’ శాయి గారి సలహాతో వీటిని, 1947 తొలి చందమామ సంచికలో ప్రచురితమైన వారి మొట్టమొదటి కథ పొట్టి పిచుక మూడింటిని కలిపి ఈ సంవత్సరం జూలై సంచికలో చందమామ 64వ  వార్షిక సందర్బంగా చందమామ ప్రచురించి తన్ను తాను గౌరవించుకుంది.

తర్వాత కొన్ని నెలల విరామంతో ఆయన మరొక రెండు కథలు పంపారు. వాటిలో తొలి ప్రచురణగా ‘అవిశ్వాసం’ అనే ఉత్కృష్టమైన విలువల కథను ఈ డిసెంబర్ సంచికలో ప్రచురణకు స్వీకరించడమైంది.  కథ చూడగానే మనసుకు హత్తుకుపోయింది.

తల్లిదండ్రులు లేని పిల్లాడిని దశాబ్దాలపాటు తన వద్ద ఉంచుకుని తన షాపులో పెట్టుకుని ఆప్తబంధువులా చూసుకున్న ఒక యజమాని చివరకు తన ఇంట్లో విలువైన నగ పోయిందనిపించిన్పప్పుడు తన కింద పనిచేసే వాడే తీసుకుని ఉంటాడని అనుమానించి, ‘ఏదో ఒక బలహీన క్షణంలో నువ్వే తీసుకుని ఉంటావు. ఎవరికీ చెప్పనులే ఆ నగను నువ్వే తీసుకొచ్చి దాని స్థానంలో ఉంచు’ అని అక్కడినుంచి ఇంట్లోకి వెళ్లి  చూస్తే యజమాని వాడే దుప్పటి మడతల్లో ఆ నగ ఉంటుంది.  పొరపాటు గ్రహించి ఆ యజమాని తప్పునీది కాదు నాది అన్నప్పుడు అప్పటికే గుండె పగిలి ఇల్లు వదిలి పోతూన్న సేవకుడు  అంటాడొకమాట.

‘పొరపాటు మీది కాదు. నాది బాబుగారూ.. మీరేమో నన్ను దొంగ అనుకున్నారు. నేనేమో మిమ్మల్ని పెద్ద మనిషి అనుకున్నాను అంతే..

మానవ సంబంధాలన్నీ పరస్పర విశ్వాసం మీదే నడుస్తాయి.  అది చెదిరి మనసు విరిగితే మంచివాళ్లు మరక్కడ ఉండలేరు. ‘

చందమామలో పనిచేస్తున్న నా చిన్నిజీవితానికి రెండు మూడు సార్లు మాత్రమే ఫోన్ పలకరింపులతో ప్రేమాభిమానాలను ముద్దగా రంగరించి పరవశింపజేసిన అవసరాల రామకృష్ణారావు గారూ,  మీరు మాత్రమే రాయగల గొప్పమాటలవి.  మీరు మాత్రమే ముగించగల గొప్ప కథా ముగింపు ఇది.

‘మీరేమో నన్ను దొంగ అనుకున్నారు.నేనేమో మిమ్మల్ని పెద్ద మనిషి అనుకున్నాను…’

ఇంతకు మించి ఎవరినీ మారణాయుధంతో పొడవనసరం లేదు. ఇంతకు మించి మరెవ్వరినీ కత్తులతో కుళ్లబొడవనవసరం లేదు.. మనిషి మాటకున్న మహిమాన్విత శక్తిని ఇంతగా వ్యక్తీకరించిన గొప్ప వాక్యాన్ని ఇటీవల కాలంలో నేనయితే చూడలేదు.

మాస్టారూ! తొలి చందమామ కథ ‘పొట్టిపిచుక’లో మీరు పదిహేనేళ్ల వయసులో ప్రదర్శించిన ఆ విరుపు మిమ్మల్ని జీవితాంతం వదలిపెట్టలేదు. బహుశా మీరు రాసిన చివరి కథల్లో ఒకటై ఉండగల ఈ కథ -అవిశ్వాసం- కూడా విశ్వాసం చెదరడం అనే గొప్ప విలువను మహాకావ్య స్పురణతో చూపించింది.

తెలుగు సాహిత్యం ఎంత గొప్ప కథకుడిని పోగొట్టుకుందో బహుశా ఇప్పటికిప్పుడే ఎవరికీ అర్థం కాకపోవచ్చు. ఎంత గొప్ప విరుపుతో కూడిన రచనా శక్తిని మనం పొగొట్టుకున్నామో ఇప్పుడిప్పుడే మనకు బోధపడకపోవచ్చు. చివరకి ఇటీవలే ఆయన స్వాతి పత్రికలో రాసిన సరస రాహిత్యంతో కూడిన సరసమైన కథ భార్యాభర్తల సంబంధాల మధ్య ఘర్షణను,మారుతున్నసంబంధాలను కూడా కొత్త ధోరణితో ముగించి షాక్ తెప్పించింది.

‘అనుమతివ్వక పోతే అటాక్ చేయడం కూడా చేతకాని వాడు…’ అంటూ భర్తను భార్య కామెంట్ చేయగలగటం ఇంత వినూత్నశైలితో మీకు కాక మరెవ్వరికి సాధ్యమవుతుంది మాష్టారూ -స్వాతిలో వీరు రాసిన కొత్త కథ. కథ పేరు గుర్తు రావడం లేదు-

వయస్సు 80 సంవత్సరాలు దాటి ఉండవచ్చు కాని రాయకపోతే అనారోగ్యం అంటూ చెణుకుతూ అలసిన గుండె బాధను ప్రపంచానికి తెలియకుండా నవ్వించిన ఈ మాన్య వృద్ధ యువకుడిని ఎలా మర్చిపోగలం?

ఆయనతో నా చిన్ని పరిచయం ఎంత విషాదకరంగా ముగిసిందో ఊహించడానికే కష్టంగా ఉంది. గత శుక్రవారం సాయంత్రానికి డిసెంబర్ చందమామ సంచిక ఫైనల్ ప్రూప్‌ని ముగించి ఇంటికి వచ్చాను. మీ ‘అవిశ్వాసం’ కథ తప్పకుండా డిసెంబర్‌ నెలలోనే రాబోతుంది మాష్టారూ అంటూ ఆయనకు మంచి వార్త చెప్పి సంతోషపెట్టాలనుకున్నాను.

కాని “తొలి చందమామ కథకులు ఇక ఎవరూ లేరండీ”అంటూ సరిగ్గా గత శుక్రవారం రాత్రే రచన శాయి గారు ఫోన్‌లో చెప్పడం జీవితానికో దిగ్భ్రమ ఘటన.

నా ప్రపంచం గత 25 రోజుల పైగా  ఇంట్లో అంతర్జాలానికి, సిస్టమ్‌కు దూరమైపోయింది. తెలిసి కూడా ఏమీ రాయలేకపోయాను. ఇప్పుడు కూడా పూర్తిగా రాయడం సాధ్యపడక ఇంతటితో ముగిస్తున్నాను.

గత జూలై చందమామ సంచికలో చందమామ పత్రికతో తన బాంధవ్యం గురించి ఆయన అపురూపంగా పంచుకున్న మధుర జ్ఞాపకాలను పాఠకుల కోసం మళ్లీ ఇక్కడ ప్రచురిస్తున్నాము.

చందమామతో నా జ్ఞాపకాలు
-శ్రీ అవసరాల రామకృష్ణారావు

అప్పుడు నా వయసు పదహారు -1947-. ఇప్పుడు ఎనభై -2011-. అప్పుడంటే ఎప్పుడని?  చంద్రోదయమయినప్పుడు.అంటే తెలుగు పిల్లల అందాల మాసపత్రికగా చందమామ మొట్టమొదటి సంచిక వెలువడిన నాటి మాట. అందులో నే వ్రాసిన “పొట్టి పిచిక కథ” అచ్చవడం ఓ విధంగా నా సాహితీ ప్రస్థానానికి తొలి బీజం అవడం కన్న తీపి గుర్తు మరేముంటుంది! నాటి నా బాల్యంలో తొంగి చూసిన ఆ తొలికిరణపు రూపురేఖలే నేటి ఈ వృద్దాప్యంలో కూడా కొనసాగడం మించిన ఆశ్చర్యం, ఆనందం ఇంకేముందని!

అమ్మ చెప్పిన కథే అయినా, అందరికీ తెలిసిన కథే అయినా, మంచి ప్రింటుతో చక్కని బొమ్మలతో వచ్చిన నాటి ఆ చందమామ లోని కథాంశం నా మనసుమీద ఇంప్రింటు చేసేసినట్లుంది! ఓ బడుగు జీవి తను కష్టపడి సాధించుకున్నది అది వేషమే ఔగాక, పోగొట్టుకుంటుంది. ఎంతమందినో కలుసుకుని, ఎవరూ కలిసిరాకపోయినా, పట్టుదల వదలక, చివరికి విజయం సాధిస్తుంది. అదీ ‘పొట్టి పిచిక కథ’ అదే నా విజయసూత్రం అవుతుందని ఆనాడనుకోలేదు!

వెయ్యి పైగా రచనలు చేసి, ఈనాటికీ తల వంచక, కలం దించక తెలుగు కథకుడిగా కొనసాగుతున్న నాకు వేగుచుక్క ఆ కథే కదా! పక్షులతో జంతువులతో మనుషుల్ని కలిపి సామాజికాంశాల్ని సరళంగా చెప్పవచ్చునని నేను నేర్చుకున్నది. చందమామ పత్రిక చలవవల్లనే. ‘గణిత విశారద’ అనే నవల రాసింది చందమామ పఠన స్పూర్థి తోనే. ఆంధ్రప్రదేశ్ సాహిత్య అకాడమీ నుంచి 1969లో బహుమతి పొందిన నా ‘అర్థమున్న కథలు’ పబ్లిషర్స్ చందమామ రక్తసంబంధీకులు ‘యువప్రచురణలు’ వారే. అంతేకాదు. నేను చలసాని-చక్రపాణి అవార్డు అందుకోడం కూడా తత్సంబంధమైన సత్సాంప్రదాయమే.

సైజుతో పాటు చురుకుతనంలో కూడా నాటి పొట్టి పిచిక లక్షణాలు ఇప్పటికీ నాలో మిగిలి ఉన్నాయని నా మీద నేను వేసుకునే సోకైన జోకు!

చందమామ కథ ఇచ్చిన ఊపుతో నేన్రాసి పుస్తక రూపంలో వచ్చిన పిల్లల రచనల గురించి ఇక్కడ చెప్పుకోడం అప్రస్తుతం కాదనుకుంటాను. ‘కేటూ డూప్లికేటూ’, ‘మేథమేట్రిక్స్’ మూడు భాగాలూ, ‘ఆంగ్రేజీ మేడీజీ’ ‘ఆంగ్రేజీ యమఈజీ’ ఇలా మరో అరడజనువరకు చిరు సరుకు దొరుకు.

నెలనెలా వెన్నెలలద్దుకుని, చకచకా సొగసులు సరిదిద్దుకుని, పదారుభాషల వారి కితాబులందుకుని భారతీయ పత్రికగానే కాక, అంతర్జాతీయ స్థాయిని చేరుకున్న చందమామ పుట్టింది మన భాషలోనే అని తలుచుకుంటే ఉప్పొంగని తెలుగు గుండె ఉండదు. కాలక్షేపం కథలతోనే సరిపెట్టుకోక శాస్త్రీయ పరిశోధనాత్మక వ్యాసాలూ, మెదడుకి మేతగా పోటీలూ, అన్యభాషలు నేర్పే ఏర్పాట్లూ– ఇవన్నీ కంటికి నదురైన రంగులతో, అచ్చుతో, అనువైన సైజుతో ఇక్కడ కాక మరెక్కడ దొరుకుతుందని! ఈ సంస్థ పుస్తకరూపంలో పిల్లలకందించే విజ్ఞాన వర్గకోశాలు ఎన్నెన్నని! ఇంతెందుకు ఇటీవల వీరు ప్రచురించిన చందమామ Art Book చూశారా! పదిహేనువందల ఖరీదు కాస్త ఎక్కువే అనిపించవచ్చు కాని అది అందించే శతకోటి అందాల మాట?

నా తొలి ప్రేమ చందమామ. వాక్రూప వర్ణార్ణవం…

ఈ నాటికీ కథాసుధల్ని వెదజల్లుతూ హాయిగా జీవించగలిగే నా మనోధృతికి నాటి చందమామే మదురస్మృతి!

RTS Perm Link

చందమామలు బ్లాగ్ పునర్దర్శనం

గత నెల 20వ తేదీ తర్వాత చందమామలు బ్లాగు మళ్లీ హఠాత్తుగా మాయమయింది. బ్లాగు.కామ్ -blaagu.com అప్‌డేషన్ జరుగుతున్నందున దీంట్లోని బ్లాగులు కనిపించడం లేదని త్వరలో వీటిని తిరిగి తీసుకువస్తామని నిర్వాహకులు అలర్ట్ చేశారు. నేను గమనించక ముందు కొద్ది రోజులు, గమనించిన  తర్వాత చాలా రోజులు సుషుప్తావస్తలో ఉన్న చందమామలు బ్లాగు సరిగ్గా నెలరోజుల తర్వాత నిన్నటి నుంచి మళ్లీ ఉనికిలోకి వచ్చింది.

నా బ్లాగ్ కనిపించడం లేదని బ్లాగు. కామ్ నిర్వాహకులకు మెయిల్ పెట్టిన తర్వాత వారు ఆలస్యంగా చూసుకున్నట్లున్నారు.  మెయిల్ చూడలేదని రెండు రోజుల్లోనే ఈ లోపాన్ని సరిచేయగలమని వారు చెప్పినట్లు సరిగ్గా రెండు రోజుల్లోపే ఈ బ్లాగు మళ్లీ యాక్టివేట్ అయింది.

నెలరోజులు బ్లాగ్‌తో, బ్లాగర్లతో సంబంధాలు కోల్పోయి తిరిగీ మీముందుకు వస్తున్నందుకు సంతోషంగా ఉంది.

ఇంటిలో సిస్టమ్ ఈ సమయంలోనే మొరాయించి మోడెమ్ పాడవడంతో కొత్తది తీసుకోవడం లేటవుతోంది. గత ఏడేళ్లుగా నిర్విరామంగా, రిపేర్ అన్నదే లేకుండా పనిచేసిన నా సిస్టమ్ కూడా ఈ సమయంలోనే మొరాయించేసింది. వీలైనంత త్వరలో ఈ సమస్యనుంచి బయటపడగలనని అనుకుంటున్నాను. అంతవరకు రెగ్యులర్ బ్లాగ్ అప్‌డేషన్లు బహుశా సాధ్యం కాకపోవచ్చు.

ఈ సాంకేతిక సమస్యలకు తోడు కొన్ని వ్యక్తిగత సమస్యలు – కుటుంబంలో  జ్వరాలు, మొబైల్ పోవడం. పాత నెంబర్ మీదే కొత్త సిమ్ తీసుకుంటే వొడాఫోన్ వారు ఉన్న కాస్తంత ఓపికకు కూడా పరీక్ష పెట్టి విసిగించడం వంటివి- కూడా ఒకేసారి తోడై బాగా ఇబ్బంది పెట్టాయి. నంబర్ పోర్టబిలిటీకోసం ప్రయత్నం జరుగుతోంది.  ఇలా  సినిమా కష్టాలు లాగా సమస్యలన్నీ ఒకేసారి రావడంతో కాస్త తేరుకునే క్రమంలో ఉన్నాను.

నా పాత మొబైల్ నంబర్ ని నంబర్ పోర్టబిలిటీ కింద మార్చుకుంటున్న ప్రక్రియ కాస్త ఆలస్యమ వుతోంది.  పాత నెంబర్ -9884612596- సరిగా పనిచేయడం మొదలయ్యేంత వరకు నా కొత్త నంబర్ -రిలయెన్స్- ని మిత్రుల సౌకర్యం కోసం ఇస్తున్నాను.

7305018409

ఈ రెండు నంబర్లూ నావిగానే ఉంటాయి – (మళ్లీ మొబైల్ పోయేంతవరకు)

రాజు

చెన్నయ్

వరుస సమస్యలతో.. నా మరో బ్లాగు ‘నెలవంక’ కూడా అప్ డేట్ కాలేదు

kanthisena.blogspot.com

మళ్ళీ అంతర్జాలంలోకి వస్తున్నందుకు సంతోషంగా ఉంది.

సినిమా కష్టాలు అని నవ్వుకుంటామే గాని కష్టాలు ఒకేసారి వస్తాయనడం నిజమే.. సినిమా కష్టాలు అని తీసిపారేయకూడదేమో…

RTS Perm Link

ఆదిలక్ష్మిగారు : చందమామ జ్ఞాపకాలు

ఆపీసులో కూర్చుని పనిచేస్తుంటే కూడా ఆదిలక్ష్మి గారి కుటుంబ విషాద పరిణామాలు గుర్తుకొచ్చి కళ్లు చెమ్మగిల్లుతున్నాయి. ప్రస్తావనకు వస్తుంటేనే బాథ తన్నుకొస్తోంది. విషయం మా పైవాళ్లకు క్లుప్తంగా తెలిపి మౌనంగా ఉంటున్నాను. ఈ మౌనం కూడా నన్ను కాలుస్తోంది. భరించక తప్పదు.  వృత్తిగత సంబంధంలో ఎంత గొప్ప మేధో సాహచర్యం వారి కుటుంబంతో అబ్బిందో మాటల్లో చెప్పలేను. తల్చుకుంటేనే దుఖం దుఖంగా ఉంటోంది.

విషయం తెలియగానే చందమామ కార్యాలయంలో విషాద వాతావరణం. ఈ సెప్టెంబర్ నెల చందమామలో అచ్చయిన “తీపికి చేదు చెల్లుకు చెల్లు” కథ ఆమె రాసిందే అని చెప్పగానే అందరూ కదిలిపోయారు. చిన్న పిల్ల తెలిసీ తెలియని వయసులో తీసుకున్న అనూహ్య నిర్ణయం ఒక పచ్చటి కుటుంబం పునాదిని ఎంతగా కదిలించివేసిందో తల్చుకుంటూ బాధపడ్డారు. కార్పొరేట్ విద్య పెడుతున్న అపరిమిత ఒత్తిడి మాత్రమే కాకుండా పిల్లలను ఇంత సున్నితంగా మారుస్తూ, వారిని అవాంఛనీయ చర్యలవైపు కొట్టుకుపోయేలా చేసే ప్రథమ శత్రువు టెలివిజన్ అంటూ విమర్శించారు.

కష్టాలొస్తే ఉరి ఒక పరిష్కారం అనేంత భయంకరమైన రీతిలో టీవీలు ప్రదర్శస్తున్న సీరియల్స్, ఉరి తగిలించుకుంటున్న దృశ్యాలు పిల్లల సున్నితత్వంపై దెబ్బతీస్తున్నాయని ఫీలయ్యారు. పిల్లల విషయంలో ఎలా ఉండాలో, వారి మనస్సులో దాగి ఉన్న విషయాలను ఎలా బయట పెట్టాలో కూడా తెలియడం లేదంటూ తమ తమ అనుభవాలు పంచుకున్నారు.

చందమామ ఇటీవల సంపాదించుకున్న ఓ మంచి కథా రచయిత్రి ఆదిలక్ష్మిగారు. ఆన్‌లైన్ చందమామలో తన చందమామ జ్ఞాపకాలు ద్వారా ఆమెతో ఏర్పడిన పరిచయం తర్వాత కథకురాలిగా, అనువాదకురాలిగా బహు రూపాలలోకి విస్తరించింది. స్కేల్ పెట్టి కొలిచినట్లుగా అక్షరాలను ఎంత అందంగా ఆమె చెక్కుతారో. ఆమె 2010లో రాసి పంపగా ఆన్‌లైన్‌లో, ఈ బ్లాగులో ప్రచురించిన ‘చందమామ జ్ఞాపకాలు’ చూస్తే తెలుస్తుంది.

ఆమెకు కలిగిన తీరని కష్టానికి చలించిపోతూనే ఆమెగురించి తెలిసినవారికోసం, చందమామ పాఠకులకోసం ఆమె గతంలో పంపిన చందమామ జ్ఞాపకాలు ప్రచురిస్తున్నాము. తెలుగు అక్షరాలపై ఇంత పట్టు ఉన్న, ఇంత చక్కటి భావుకత, అద్వితీయ ఊహాశక్తి కలిగిన ఈ చందమామ కథకురాలి చందమామ జ్ఞాపకాలను ఇక్కడ ముందస్తు పరిచయంతో పాటు మరోసారి చూడగలరు.

పరిచయం:
‘చందమామ’ జ్ఞాపకాలకు సంబంధించి ‘అమ్మఒడి’ ఆదిలక్ష్మిగారిది ఓ వినూత్న అనుభవం. చిన్నప్పుడు నాన్న చదివి వినిపిస్తే తప్ప చందమామ కథను వినలేని అశక్తత లోంచి ‘నేనే చదువు నేర్చుకుంటే పోలా’ అనే పట్టుదలతో, స్వయంకృషి తోడుగా శరవేగంగా చదువు నేర్చుకున్న అరుదైన బాల్యం తనది. ఈ తీపి జ్ఞాపకాలను ఆమె మాటల్లోనే ఇక్కడ కొద్దిగా విందాం..

“నాన్నకి చదవటం వచ్చు కాబట్టి కదా చక చకా చదివేసాడు. మొదటి సారి ఇష్టంగా చదివేసేవాడు. మళ్ళీ చదవమంటే కుదరదనే వాడు.

’అదే నాకూ చదవటం వస్తే, ఎప్పుడు కావాలంటే అప్పుడు, ఎన్ని సార్లు కావాలంటే అన్ని సార్లు, ఎంచక్కా చదివేసుకోవచ్చు’ – అన్న భావన, అక్షర క్రమం తెలియకుండానే మనసుకి అందింది. చదవటం రాక చందమామ బొమ్మలు పదేపదే చూసుకునే కొద్దీ పసి మనస్సు లోతుల్లో అక్షరాలు నేర్చుకోవాలనే తపన పెరిగింది.

వీధిబడిలో చేర్చగానే, ఇష్టంగా మారాం చేయకుండా అక్షరాలు నేర్చేసాను. పెద్ద బాలశిక్ష చాలా కొద్దీ రోజుల్లో పూర్తి చేసాను. ప్రభుత్వ పాఠశాలలో ఒకటో తరగతిలో చేరేటప్పటికే నాకు కథలు చదవటం వచ్చేసింది.

ఆ విధంగా చందమామ నాకు చదవటం నేర్పింది. చదువు కోవాల్సిన అవసరం నేర్పింది. చదువు నేర్పిన గురువుని గౌరవించటమూ నేర్పింది.”

గీతాప్రియదర్శిని

చందమామ ద్వారా చదవటం నేర్చిన, చదువు నేర్పిన గురువును గౌరవించడం నేర్చిన ఆదిలక్ష్మిగారు, ఒకప్పుడు నాన్నతో తను పొందిన అనుభవాన్ని తన పాపాయి నుంచి కూడా ఎదుర్కొన్నారట. చందమామ కథను ఒకసారి చదివి వినిపిస్తే మళ్లీ మళ్లీ వినాలి అనే కుతూహలంతో తప్పుల తడకగా చందమామ కథను చదివి నవ్వించే పాప గీతాప్రియదర్శిని, ఒకట్రెండుసార్లు చదివి ఇక కుదరదంటే “నేను పెద్దయ్యాక నా పాపకి నీలా చదవను ఫో అనను. ఎన్నిసార్లయినా చదివి వినిపిస్తాను తెలుసా?” అంటూ బుంగమూతి పెట్టేదట.

ఇదీ చందమామ ఘనత, చందమామతో బంధం అల్లుకున్న తరతరాల తెలుగు కుటుంబాల ఘనత. ఆదిలక్ష్మిగారు, ఆమె జీవన సహచరుడు, వారి పాపాయి దశాబ్దాలుగా నింగిలోని చందమామతో పాటు నేలమీది ‘చందమామ’తో కూడా చెలిమి కొనసాగిస్తున్నారు. నేలమీది ‘చందమామ’తో ఇటీవలి వరకు ప్రత్యక్ష సంబంధం లేని ఆదిలక్ష్మి గారు ఇటీవలే చందమామతో పరిచయంలోకి వచ్చారు.

నాన్న ద్వారా పరిచయం అయిన చందమామను కన్నకూతురికి కూడా పరిచయం చేయడమే కాదు… తాను పాఠాలు చెబుతున్న స్కూలు పిల్లలకు కూడా కథామృతాన్ని పంచిపెడుతూ, రేపటి తెలుగు తరాన్ని తయారుచేస్తున్న ఆదిలక్ష్మిగారూ… మీ చందమామ కుటుంబాన్ని చూసి చందమామ సిబ్బందిగా మేం గర్వపడుతున్నాం.

చందమామతో మీ జ్ఞాపకాలను పంచుకున్నందుకు హృదయపూర్వక కృతజ్ఞతలు.

ఆదిలక్ష్మి గారి చందమామ జ్ఞాపకాలు పూర్తి పాఠం ఇక్కడ చూడండి.
————–

అరచేతిలో అందాల చందమామ
ఆదిలక్ష్మి

బాల్యం నుండి ఇప్పటికీ చందమామ మా జీవితంలో ఓ భాగం. అక్షరాలు నేర్చుకోవాలన్న ఆకాంక్షని రేకెత్తించిందే చందమామ.

అమ్మఒడిలో కాళ్ళు చేతులు ఆడిస్తూ, స్వయంక్రీడా వినోదితమైన శైశవ దశలో, ఎవ్వరికైనా పంచభూతాలైన భూమి (మట్టి), ఆకాశం(చందమామ), అగ్ని (వెలిగే దీపం), గాలి, నీళ్ళు పరమ ఆకర్షణలు!

’అనగ అనగా ఓ రాజు. ఆ రాజుకి ఏడుగురు కొడుకులు. ఏడుగురూ వేటకెళ్ళి ఏడు చేపలు తెచ్చారు’ అంటూ కథ చెబితే ’ఊ’ కొట్టటం వచ్చిన నాటి నుండే ఆకాశంలోని చందమామతో పాటు అరిచేతిలోని చందమామా పరమ ఆకర్షణే!

రంగు రంగుల బొమ్మలు; ఒంటికొమ్ము రాక్షసులు, చింతచెట్టు దెయ్యాలు, మాయల మారి మాంత్రికులు, బుద్ది చెప్పే గ్రామాధికారులు, మంచి దారిలోకి మారిపోయే గజ దొంగలు…. ఎన్నో పాత్రలు! ఇతిహాసాలు నేర్పిందీ చందమామే!

విచిత్ర కవలలు జానపద కథలతో వింత లోకాలకి తీసి కెళ్ళిందీ చందమామే!

చిన్నప్పుడు…. అప్పటి కింకా బడిలో చేరలేదు. నాన్న ప్రతి నెలా చందమామ తెచ్చేవాడు. నాన్న చందమామ బిగ్గరగా పైకి చదవాలంటే, ఇద్దరు ఆయన కాళ్ళు పట్టాలి. ఒకరు ఆయన తల దగ్గర కూర్చొని జుట్టులోకి వేళ్ళు పోనిచ్చి మెల్లిగా మర్ధన చెయ్యాలి. అప్పుడు గాని బిగ్గరగా చదివేవాడు కాదు.

తల దగ్గర కూర్చొన్న వాళ్ళు, బొమ్మలు కూడా కనబడుతుండగా కథ వినవచ్చన్న మాట. ఎప్పుడూ నేనే నాన్న తల దగ్గర కూర్చొనే అవకాశం పొందేదాన్ని. నాన్న కథలన్నీ ఒకసారి చదివి పెట్టేవాడు. అంతే! మళ్ళీ మళ్ళీ చదవమంటే “మొన్నే చదివాను కదమ్మా!” అనేవాడు.

నాన్నకి చదవటం వచ్చు కాబట్టి కదా చక చకా చదివేసాడు. మొదటి సారి ఇష్టంగా చదివేసేవాడు. మళ్ళీ చదవమంటే కుదరదనే వాడు.

’అదే నాకూ చదవటం వస్తే, ఎప్పుడు కావాలంటే అప్పుడు, ఎన్ని సార్లు కావాలంటే అన్ని సార్లు, ఎంచక్కా చదివేసుకోవచ్చు’ – అన్న భావన, అక్షర క్రమం తెలియకుండానే మనసుకి అందింది. చదవటం రాక చందమామ బొమ్మలు పదేపదే చూసుకునే కొద్దీ పసి మనస్సు లోతుల్లో అక్షరాలు నేర్చుకోవాలనే తపన పెరిగింది.

వీధిబడిలో చేర్చగానే, ఇష్టంగా మారాం చేయకుండా అక్షరాలు నేర్చేసాను. పెద్ద బాలశిక్ష చాలా కొద్దీ రోజుల్లో పూర్తి చేసాను. ప్రభుత్వ పాఠశాలలో ఒకటో తరగతిలో చేరేటప్పటికే నాకు కథలు చదవటం వచ్చేసింది.

ఆ విధంగా చందమామ నాకు చదవటం నేర్పింది. చదువు కోవాల్సిన అవసరం నేర్పింది. చదువు నేర్పిన గురువుని గౌరవించటమూ నేర్పింది.

చందమామ బొమ్మలు చూసి ఏకలవ్వుడులా రంగుల్లో బొమ్మలు వేయటం నేర్చాను. నా అనుభవాలన్నీ మా వారితో పంచుకోబోతే తానూ మరికొన్ని అనుభవాలు చెప్పాడు. మా పాపని చూస్తే నా బాల్యం మరో సారి కళ్ళముందు కదలాడింది. (రంగుల్లో బొమ్మలతో సహా)

ఓ సారి చదివేసిన చందమామని, మళ్ళీ మా చేత చదివించుకునేందుకు, మా టక్కరి పాప చందమామ పట్టుకుని పక్కనే పడుకుని ఒక్కో పుట తిప్పుతూ తనకి అర్ధమైన కథని తప్పుల తడకగా చెప్పేది. “అలా కాదు నాన్నా! ఆ కథలో ఇలా ఉంది” అని పొరబాటున అన్నామో! అంతే…. “మళ్ళీ చదవవూ” అంటూ బతిమాలేది.

ఒకట్రెండుసార్లు చదివి ఇక కుదరదంటే “నేను పెద్దయ్యాక నా పాపకి నీలా చదవను ఫో అనను. ఎన్ని సార్లయినా చదువుతాను తెలుసా?” అంటూ బుంగమూతి పెట్టేది. “అయితే ముందు నువ్వే చదవటం నేర్చుకో!” అని అనటంతో అక్షరాలు అలవోకగా నేర్చింది.

అదీ చందమామ! అందాల చందమామ! అరచేతిలో చందమామ! కథలతో జీవితాన్ని అనుసంధానించి, భారతానికి రామాయణానికి భగవంతుడికీ దగ్గర చేసింది చందమామ. గురువుకి చెప్పినంత కృతజ్ఞత చందమామకీ చెప్పాలి!

మా విద్యార్ధుల్లో ఒకరి ఇంట్లో చందమామలు బైండింగ్ చేయించి మరీ గృహ గ్రంధాలయంలో దాచి ఉంచుకుంటే చూచి “అబ్బా! వీళ్ళెంత సంపన్నులో కదా!” అన్పించింది.

(నాన్న ద్వారా పరిచయం అయిన చందమామను కన్నకూతురికి కూడా పరిచయం చేయడమే కాదు… స్కూలు పిల్లలకు కూడా కథామృతాన్ని పంచిపెడుతూ, రేపటి తెలుగు తరాన్ని తయారుచేస్తున్న ఆదిలక్ష్మిగారికి… చందమామతో తమ జ్ఞాపకాలను పంచుకున్నందుకు హృదయపూర్వక కృతజ్ఞతలు. సం.)

ఇది 2010 ఏప్రిల్ 9న చందమామ వెబ్‌సైట్‌లో, బ్లాగులో ప్రచురించబడిన కథనం.

తెలిసి తాను జీవితంలో ఎవరికీ అన్యాయం చేయలేదని,  కానీ 18 ఏళ్లుగా కష్టాలమీద కష్టాలను ఎదుర్కొంటున్నానని ఆదిలక్ష్మిగారు మాటలో సందర్బంలో చెప్పేవారు.  ఎన్ని దెబ్బలు తగిలినా కోలుకున్నానంటే, నిబ్బరంగా సహిస్తున్నానంటే తాను నమ్మిన భగవద్గీతే కారణమని, అంతులేని కష్టాల్లో కూడా అనంత శక్తిని ఇస్తూ బతికిస్తూ వచ్చింది ఆ గీతాసారమే అని ఆమె పదే పదే అనేవారు.

ఎంత మంచి మనిషికి, ఎంత మంచి కుటుంబానికి ఇంత కష్టం తగిలింది?

RTS Perm Link

లెనిన్ లేరు… ఆదిలక్ష్మి ఉండలేరు…

సుజాతగారు, వలబోజు జ్యోతి గారు చెప్పిన ఒక విషాదవార్తను మీతో పంచుకోవాలనుకుంటున్నాను. గీతాప్రియదర్శిని కన్నతల్లిదండ్రులు, అమ్మఒడి తదితర తెలుగు ఇంగ్లీషు బ్లాగుల నిర్వాహకులు ఆదిలక్ష్మి, లెనిన్‌బాబు గార్లు.. జీవితం నుంచి సెలవు తీసుకునే ప్రయత్నం చేశారు. శుక్రవారం సాయంత్రం నాలుగు గంటల వేళ కూడా నాతో మాట్లాడిన లెనిన్ బాబు గారు ఇక లేరు. నిద్రమాత్రలు మింగిన ఆదిలక్ష్మిగారు ఆస్పత్రిలో ప్రాణాపాయ స్థితినుంచి కోలుకుంటున్నారని వార్త. (స్వచ్చందంగానే వారిద్దరూ లోకంనుంచి తప్పుకోవడానికి సిద్ధపడే ఇలా చేశారని సుజాత గారి తాజా వార్త -బజ్ ద్వారా- ద్వారా తెలుస్తోంది. )

జూలై 15న గీతాప్రియదర్శిని విద్యాశిక్షణా పరమైన ఒత్తిళ్లకు లోనై జీవితం ముగించుకున్నప్పటినుంచి ఈ కన్న తల్లిదండ్రులకు తమ జీవితమే ఓ ప్రశ్నార్థకమైపోయింది. ‘అమ్మఒడిని లేకుండా చేశారు, అమ్మఒడిని చంపేశారు’ అంటూ ఆరోజు ఆదిలక్ష్మిగారు ఫోన్‌లో చేసిన ఆక్రందన ఇంకా వెంటాడుతూనే ఉంది.

-20 ఏళ్లక్రితం ఆంధ్రప్రదేశ్ తొలి మహిళా పారిశ్రామికురాలిగా జీవితం మొదలెట్టిన ఈమె జీవితంలో అనూహ్యమైన ఎత్తుపల్లాలను చవిచూసి తీవ్రమైన ఇబ్బందులను ఎదుర్కొన్నారు. జాతీయంగా అంతర్జాతీయంగా పాలకవ్యవస్థలు సాగిస్తూ వస్తున్న రాజకీయ వ్యూహ ప్రతివ్యూహాలపై కణిక వ్యవస్థ పేరుతో వందలాది కథనాలు అమ్మఒడి తదితర బ్లాగుల్లో రాశారు.-

నిన్న సాయంత్రం -శుక్రవారం- కూడా లెనిన్ బాబుగారితో చందమామ ఆఫీసునుంచి ఫోన్ చేసి మాట్లాడాను. ఆదిలక్ష్మిగారు గతంలో పంపిన కథ “తీపికి చేదు చెల్లుకు చెల్లు”ను ఈ సెప్టెంబర్‌ నెలలోనే చందమామ ప్రచురించిందని, మీ కొత్త చిరునామా పంపితే చందమామ కాపీ, రెమ్యునరేషన్ పంపుతామని, ఆయనతో మాట్లాడితే శనివారం తప్పుకుండా చిరునామా పంపుతానని చెప్పారు. తీరా శనివారమే ఘోరం జరిగిపోయింది. లెనిన్‌గారు ఉన్నారు కాబట్టే ఆమె గత నెలన్నర రోజులగా బతికి ఉన్నారు.

వ్యవస్థపై తమదైన పోరాటంలో వాళ్లిద్దరూ తన చిట్టితల్లి గీతాప్రియదర్శినిని తమ జీవిత సర్వస్వంగా ప్రేమించారు. పదిహేనేళ్లకు పైగా వారు పడుతూ వస్తున్న తీవ్ర ఆర్థిక, మానసిక బాధలకు కన్నకూతురిపై ప్రేమ రూపంలో వారికి స్వాంతన దొరికిందనుకుంటాను. భారతీయ సాంప్రదాయిక విశ్వాసాలపై ఎనలేని ప్రేమ గల ఆమెకు తన కన్న కూతురు చితాభస్మాన్ని గంగానదికి తీసుకెళ్లి కలపాలని ఉండేది.

స్థలం మారితే అన్నా కాస్త తెప్పరిల్లుతుందేమో అనిపించి, ఈ విషయం లెనిన్ బాబుగారు వారం రోజుల క్రితం చెబితే తప్పకుండా తీసుకెళ్లమని చెప్పాను. చివరకు ఆ కోరికకూడా తీరనట్లుంది. ఎన్నడూ లేనిది శుక్రవారం మాట్లాడినప్పుడు ఆయన గొంతు చాలా డల్‌గా వినిపించింది. మీరెలా ఉన్నారు. ఆమె కోలుకున్నారా అని అడిగితే బతకాలి కాబట్టి బతుకుతున్నాం అన్నారు. ఇప్పుడనిపిస్తోంది. ఆయన అప్పుటికే ఇక జీవితం వద్దు అని నిర్ణయానికి వచ్చారేమో.

వారు కన్నకూతురు తమనుంచి దూరమయినందుకు కూడా పెద్దగా బాధపడలేదనుకుంటాను. కాని నరకబాధలు పెట్టిన ఆ కోచింగ్ సెంటర్‌ నిర్వాహకుడిని చివరిసారిగా కలిసి ఒకే  కోరిక కోరారట. ఏమంటే ఆ సెంటర్లో పాపను ఒక పనామె చాలా బాగా చూసుకుందట. రోజూ ప్రియదర్సిని ఆ పనామె ఆదరణ గురించి ఇంట్లో చెప్పేదట. బతికి ఉండగా తమ పాపను స్కూల్లో అందబాగా చూసుకున్న ఆ పనావిడకు కృతజ్ఞతలు చెబుతామనే ఉద్దేశంతో ఆమెను చూపించమని నిర్వాహకుడిని అడిగితే ఆమె క్లాసుల వద్దకు పనిమీద వెళ్లిందని, కలపడం కుదరదని చెప్పాడట ఆ రాక్షసుడు.

తమ పాప మరణానికి కారణమంటూ కోచింగ్ సెంటర్ మీద కేసు పెట్టాలని ఎంతో మంది సలహా ఇచ్చినా మనిషే పోయాక ఇక కేసు ఎందుకు అనే నిర్వేదంలో ఆ పనికి పూనుకోలేదు వీళ్లు. అలాంటిది ఆ నిర్వాహక రాక్షసులు ఆ పనామెను చివరిసారిగా కలుసుకునేందుకు కూడా తమకు అవకాశం ఇవ్వకపోవడం చూసిన క్షణంలోనే వారి గుండె బద్దలయిపోయింది. లోకం ఎందుకింత అన్యాయంగా మారిపోయిందనే వేదన… కూతురు ప్రాణాలు పోవడానికి కారకులైనవారిని కూడా క్షమించిన తమ పట్ల ఇంత నిర్దయగా వారు ఎలా వ్యవహరించారన్న ఆక్రోశం.. వారి బాధను మరింత రెట్టింపు చేసి ఉన్నట్లుంది.

జూలై 15న చందమామలు బ్లాగులో ప్రియదర్శిని ఆత్మహత్య గురించి ప్రచురించిన కథనాన్ని వాళ్లు చాలా లేటుగా చూశారట. నా అభ్యర్థనను మన్నించి కొంతమంది అజ్ఞాతంగా పంపిన సహాయానికి లెనిన్ బాబు గారు కృతజ్ఞతలు చెప్పారు. సానుభూతి కంటే, తమను మరింతగా పట్టించుకుని ఉంటే, ఇంటివద్దకు ఎవరైనా వచ్చి కలిసి ఉంటే, ఆమెకు స్వాంతన చెప్పి ఉంటే చాలా బావుండేదని ఆయన బాధ వ్యక్తం చేశారు.

ఒక మాటమాత్రం నిజం. వాళ్లు మహానగరంలో ఉండి కూడా భయంకరమైన ఒంటరితనం బారిన పడే ఈ ఘోరానికి పాల్పడ్డారనిపిస్తోంది. పిల్లలకోసం పెట్టిన స్కూలు కూడా నిలిపేశారు. బంధువుల ఒత్తిడి మేరకు వారికి దగ్గరగా ఉన్న అద్దె ఇంటికి మారారు. రెండు నెలలపాటు ఏ పనీ లేకుండా, పైగా అపరిమిత బాధలో ఉన్న ఈ తల్లిదండ్రులు ఇరవై ఏళ్లుగా తాము చేస్తున్న జీవన పోరాటం ఇక చాలని అలసి పోయారనుకుంటాను.

గత పద్దెనిమిదేళ్లుగా బంధువులకు పూర్తిగా దూరమైపోయిన వీళ్లు ఈ మధ్యనే ఓ ఫంక్షన్‌ కోసం హైదరాబాదుకు వెళ్లి బంధువులను అందరినీ కలిసి వచ్చారు. నంద్యాలలో ఎందుకు దూరంగా ఉండటం మహానగరానికి వస్తే మా పిల్లలే చాలామంది ఉన్నారు. స్కూలు పెడితే బాగా జరుగుతుంది అని భరోసా ఇస్తే నంద్యాల నుంచి హైదరాబాద్ వెళ్లారు. బతుకు జరగడం మాటేమిటో కానీ మహానగరం నిలువునా ఒక కుటుంబాన్ని కాల్చేసింది.

పాప  చనిపోవడానికి నెలరోజుల క్రితం  కూడా, ‘ఒక్కసారి చెన్నయ్ రండి, మీ కుటుంబం ఫోటోలు పంపండి’ అని శోభ కోరితే ‘నేరుగా వచ్చి కనబడితే సర్‌ప్రయిజ్‌గా ఉంటుంది కదా. వీలైనంత త్వరలో వస్తాము’ అని చెప్పింది. వృత్తిపర సంబంధంలోకి వచ్చిన నాకంటే శోభతో ఆమె చాలా విషయాలు పంచుకుందట. “లక్ష్మిగారు ఎంత ధైర్యంగా ఉండేవాళ్లు ఇలా ఎలా చేయగలిగారు” అని శోభ ఇప్పుడు షాక్ తింటూ వలవలా ఏడ్చేసింది. ఆమె ఫోన్‌లో నవ్వితే కూడా అంత స్వచ్ఛంగా, ఆనందంగా వినిపించేదని, అన్ని బాధలు, బరువులు, ఒత్తిళ్లు సంవత్సరాలుగా మోస్తూ కూడా ఎలా భరించి ఆమె అంత సహజాతిసహజంగా నవ్వగలిగేదని శోభకు ఆశ్చర్యం. -కారుణ్య.బ్లాగ్‌స్పాట్.కామ్-

నంద్యాలలో ఉన్నప్పుడు ఆమె అద్దె తక్కువగా ఉంటుందని టౌన్‌కు ఆనుకుని ఉన్న పల్లెలో ఇల్లు తీసుకున్నారు. ప్రకృతంటే ప్రాణం, పక్షులంటే ప్రాణం, రోడ్డుమీద తిరుగాడే పశువులంటే ప్రాణం, సాయంత్రం వేళల్లో ఇల్లు వదిలి వాళ్లిద్దరూ, అప్పుడప్పుడూ పాప కూడా పల్లె బాటలో పొలాల గుండా నడుస్తున్నప్పుడు మంద్రమంద్రంగా వీచే ఆ చల్లటి గాలి గురించి, పల్లె అందాల గురించి ఎన్నిసార్లు ఆమె మాట్లాడారో.. హైదరాబాద్‌లో కొత్తగా స్కూలు తెరిచి పిల్లలకు పాఠాలు చెబుతుండగా వారికి మంచినీళ్ల క్యాన్‌లను కూడా అందనీయకుండా చేసిన, తమను చిరకాలంగా వెంటాడుతూ వస్తున్న ఆ అదృశ్య శక్తుల గురించి నవ్వుతూనే ఎంత ధర్మాగ్రహం ప్రకటించారో.

రంగనాయకమ్మగారు ‘జానకి విముక్తి’  నవలలో సత్యం పాత్ర ద్వారా పలికిస్తారు. కష్టాల పట్ల సానుభూతి ప్రకటించగల హృదయం ఉండీ కూడా లోకంలో చాలామంది సహాయం చేయలేని పరిస్థితుల్లో కొట్టుమిట్టాడుతున్నారనే అర్థంలో సత్యం, విశాలాక్షికి ఉత్తరం రాస్తాడు. పాతికేళ్ల క్రితమూ ఇంతే. ఇప్పుడూ ఇంతే.

చెన్నయ్ నుంచి 400 కిలోమీటర్లు దూరంలో ఉన్న హైదరాబాదుకి వెళ్లి వారిని పలకరించలేకపోయాను. ఆమె కోలుకోవడం కష్టమనిపిస్తున్నప్పటికీ కొన్నాళ్లు ఆమెకు తోడు నీడగా ఉండి కాపాడుకోమని లెనిన్ బాబు గారికి  చెప్పానే గాని, భరించలేమనుకున్నప్పుడు కొన్నాళ్లు అన్నీ వదిలి చెన్నయ్‌కి వచ్చి మావద్ద ఉండమని చెప్పలేకపోయాను.

కొన్నాళ్లు వాళ్లిద్దరినీ అలా వదిలేస్తేనే బాగుంటుందని పూర్తిగా కోలుకుంటే తప్పక కలుసుకోవచ్చనుకున్నామే కాని ఒకటన్నర నెల కాకముందే ఇంత ఘోరానికి ఒడిగడతారని అస్సలు ఊహించలేదు. పాప, ఇప్పుడు ఆమె జీవన సహచరుడు కూడా లేకుండా మిగిలిన ఆమె విషం మింగి కూడా బయటపడిందని తెలుస్తోంది. బతికి బయటపడినా ఆమె జీవచ్చవమే. ఆమె జీవిస్తుందనే భరోసా ఈ క్షణంలో నాకయితే కలగడం లేదు. అమ్మ ఒడి నిజంగా ఇప్పుడే ఇవ్వాళే ఖాళీ అయిపోయింది.

తిరుపతిలో ఎలక్ట్రానిక్ షాపులో పనిచేస్తూ చేస్తూ ఉన్నట్లుండి ఇంటికి రాకుండా మాచెల్లెలు కొడుకు మాయమైపోతే గత ఆరునెలలుగా వాడి అనుపానులు కూడా తెలియని స్థితిలో ఉన్నాం మేం. మావాడు కనిపించలేదని పోలీసు స్టేషన్‌లో కంప్లయింట్ చే్స్తే దానికి అతీ గతీలేదు. కేంద్రమంత్రి జైపాల్ రెడ్డి మేనకోడలు మహానగరం నడిబొడ్డున స్వంత ఇంట్లో చంపబడితే కూడా దిక్కులేదు ఈ దేశంలో… మాలాంటి, మనలాంటి సామాన్యుల సమస్యలకు ఎక్కడ పరిష్కారం దొరుకుతుందో అర్థం కాని పరిస్థితి.

చదువుల కోసం, మంచి బతుకుకోసం రాష్ట్రం నుంచి వేలాది కిలోమీటర్ల దూరానికి మనుషులు వెళ్లిపోతున్నారు. దగ్గరే ఉండి కూడా ఇబ్బందుల్లో ఉన్నవారిని, పిడుగుపాటుకు గురయినవారిని కలవలేకుండా ఉన్నాము. రాతలకు చేతలకు మధ్య సంబంధం ఎక్కడో పెటిల్లున తెగిపోయినట్లుంది.

ఆదిలక్ష్మిగారిని తెలిసిన వాళ్లం సకాలంలో స్పందించి ఉంటే, పాప దుర్మరణం తర్వాత మరో ఘోరం ఇలా జరిగి ఉండేది కాదు. ఆమె  కుప్పగూలిపోయినా ధైర్యంగా కనిపించిన, ఆత్మస్థైర్యంతో మాట్లాడిన సహచరుడు లెనిన్ గారి అండ ఉందని, కొన్నాళ్ల తర్వాతయినా ఆమె కోలుకుంటుందని నిజంగానే నమ్మాను నేను.

“వస్తామని కలుస్తామని మాటిచ్చిన లెనిన్ గారు తిరిగిరాని తీరాలకు తరలి వెల్లటం. ఆయనను అనుసరించాలని పోరాడుతున్న ఆదిలక్ష్మీ గారిద్దరూ మాటతప్పారు. మరో పాపానికి ఒడిగట్టారు. ఇంతకంటే ఆత్మీయుల్ని తిట్టలేను. దుఃఖం గుండెను పిండేస్తుంది. లెనిన్, ఆదిలక్ష్మిగార్లు మాట తప్పారు” అంటూ దుర్గేశ్వర గారు తమ హరిసేవలో రాసిన మాట అక్షరసత్యం.

పిల్లలను ప్రేమించడమే, సర్వస్వంగా ప్రేమించడమే తప్పయిపోయే కాలం ముంచుకొస్తోందా? పిల్లలు లేని మాకు ఈ అనుభూతి  గాఢత గురించి ఎన్నటికీ తెలీకపోవచ్చు.

కన్నవారిని కొడుకులు తన్ని తరిమేస్తుంటే కూతుర్లు కాస్త అన్నం పెడుతున్న కాలం వచ్చేసింది. ఆ నమ్మకాన్నే నీ చుట్టూ అమ్మా, నాన్నా అల్లుకున్నారేమో..!

గీతా ప్రియదర్శినీ, అనంత దరిద్రాన్ని ప్రేమించిన కన్నవారు నువ్వు లేని లోకాన్ని ఇలా శపిస్తున్నారు.. ఎందుకిలా చేశావు తల్లీ?

ఆదిలక్ష్మిగారూ, క్షమించండి.. ఘోరమైన తప్పిదం చేశాను. ఇలా చేస్తారని, ఇలా జరుగుతుందని ఊహించలేదు. మీ గురించి సమాచారం తెలుసుకునే చివరి వనరును కూడా పొగొట్టుకున్నాను. ఎప్పుడు కాల్ చేసినా లెనిన్ గారు అందుకునే మీ ఫోన్ ఈ సాయంత్రం నుంచి స్విచ్ఛాఫ్ అయిపోయింది. కష్టాల్లో ఉన్నవారిని కాపాడుకోవడం తెలీని, చేతకాని జీ్వచ్ఛవాలం. మా పాపాలను మన్నించండి..

చందమామ కుటుంబాలకు విషాదవార్త
http://blaagu.com/chandamamalu/2011/07/15/%E0%B0%9A%E0%B0%82%E0%B0%A6%E0%B0%AE%E0%B0%BE%E0%B0%AE-%E0%B0%95%E0%B1%81%E0%B0%9F%E0%B1%81%E0%B0%82%E0%B0%AC%E0%B0%BE%E0%B0%B2%E0%B0%95%E0%B1%81-%E0%B0%B5%E0%B0%BF%E0%B0%B7%E0%B0%BE%E0%B0%A6%E0%B0%B5/

లోకంలోని పిల్లలందరూ ఇక మీ పిల్లలే…
http://blaagu.com/chandamamalu/2011/07/17/%E0%B0%B2%E0%B1%8B%E0%B0%95%E0%B0%82%E0%B0%B2%E0%B1%8B%E0%B0%A8%E0%B0%BF-%E0%B0%AA%E0%B0%BF%E0%B0%B2%E0%B1%8D%E0%B0%B2%E0%B0%B2%E0%B0%82%E0%B0%A6%E0%B0%B0%E0%B1%82-%E0%B0%87%E0%B0%95-%E0%B0%AE/

విషాదవార్త

http://kaburlu.wordpress.com/2011/09/17/%E0%B0%B5%E0%B0%BF%E0%B0%B7%E0%B0%BE%E0%B0%A6-%E0%B0%B5%E0%B0%BE%E0%B0%B0%E0%B1%8D%E0%B0%A4/#comment-388

ఆదిలక్ష్మిగారు ఎందుకిలా చేసారు??

http://jyothivalaboju.blogspot.com/2011/09/blog-post_17.html

లెనిన్ ,ఆదిలక్ష్మిగార్లు మాటతప్పారు

http://durgeswara.blogspot.com/2011/09/blog-post_17.html

ఈ బ్లాగులు ఇక ఎన్నటికీ అప్‌డేట్ కాకపోవచ్చు.

అమ్మఒడి
http://ammaodi.blogspot.com/

ఆహా! ఓహో!
http://paalameegada.blogspot.com/

కింది తాజా సమాచారం చూడగలరు.

కార్పోరేట్ విష సంస్కృతి..

http://vasantalakshmi.blogspot.com/2011/09/blog-post_18.html

2004 డిసెంబర్ 26న విరుచుకుపడిన సునామీ సమాచారంతో ఉన్న కింది లింకును చూసిన ఆదిలక్ష్మిగారు కింది బ్లాగర్‌కు జీమెయిల్‌లో పంపిన కామెంట్ కింది లింకులో చూడగలరు.

జ్ఞాపకాల అలజడిలో…!

http://kaarunya.blogspot.com/search/label/%E0%B0%B8%E0%B1%81%E0%B0%A8%E0%B0%BE%E0%B0%AE%E0%B1%80%20%E0%B0%9C%E0%B1%8D%E0%B0%9E%E0%B0%BE%E0%B0%AA%E0%B0%95%E0%B0%BE%E0%B0%B2%E0%B1%81

తాజా ఆత్మీయ సమాచారం కోసం కింది లింక్ చూడండి

అమ్మఒడి ఆదిలక్ష్మిగారు

http://teluguyogi.blogspot.com/2011/09/blog-post_19.html

RTS Perm Link

చందమామ చిత్ర బ్రహ్మ వపా విశ్వరూపం

గణపతి విశ్వరూపం

చందమామ సెప్టెంబర్ సంచిక మార్కెట్లోకి ఆగస్ట్ 25వ తేదీనే వచ్చేసింది. పాఠకులందరికీ మహదానందం. వినాయక చతుర్థి పర్వదినానికి ఐదు రోజుల ముందే గజాననుడి ముఖచిత్రంతో కనులవిందుగా, కంటికింపుగా చందమామ. నిజంగా కవర్ పేజీపై ఉన్నది వినాయకుడి విశ్వరూపం కాదు. చందమామ అపర చిత్ర బ్రహ్మ వపాగారి విశ్వరూపం అంటే ఇంకా ఖచ్చితంగా ఉంటుందేమో. బ్రహ్మ మహేశ్వరులను కూడా అవలీలగా అలా పక్కన పెట్టిన చిత్రరాజసం వపాగారికి తప్ప మరెవరికి చెల్లుతుంది మరి!  ఈ ముఖ చిత్రం కోసం చందమామ వర్ణన కూడా కింద చదవగలరు.

“అట్టమీది బొమ్మ
విశ్వరూపం

ఈ నెల ముఖచిత్రాన్ని -సెప్టెంబర్ 2011- దివంగతులైన మా సీనియర్‌ చిత్రకారుడు శ్రీ వడ్డాది పాపయ్య 1980లలో చిత్రించారు. వినాయక చవితి వర్వ దినం సందర్భంగా ఈ చిత్రాన్ని ఈ నెల అట్టమీది బొమ్మగా తిరిగి ప్రచురిస్తున్నాము.

గణపతి తన అయిదు తలలతో భారీ రూపం ధరించిన నేపథ్యంలో ఆ విశ్వరూపాన్ని ఈ చిత్రం ప్రదర్శిస్తోంది. బ్రహ్మదేవుడు గణేశ విగ్రహ విశేషాలను వివరిస్తూ కథ చెబుతాడు.

ఒకసారి స్వర్గాధిపతి దేవేంద్రుడు, ఐరావతం సహోదరుడైన గజేంద్రుడిని అవమానిస్తాడు. ఈ సందర్భంగా ‘దేవేంద్రుడు ఏదో ఒక రోజు తన ముందు తలవంచుతాడ’ని గజేంద్రుడు జోస్యం చెబుతాడు. ఆ సందర్భాన్ని తలపిస్తూ ఏనుగు తలను తనదిగా చేసుకున్న వినాయకుడి విశ్వరూపానికి దేవేంద్రుడు మొక్కుతాడు. గణపతిని తాను గతంలో అవమానించినందుకు పశ్చాత్తాపం తెలుపుతూ ఇంద్రుడు తన చెవుల్ని రెండు చేతులతో పట్టుకుంటాడు.

ఈ దృశ్యాన్ని బ్రహ్మదేవుడు మరింత వివరంగా వర్ణిస్తున్నాడు. విఘ్నేశ్వరుడు పూర్తిగా బ్రహ్మ సృష్టి. అయిదు గణాలు లేదా పంచభూతాలను -నీరు, గాలి, అగ్ని, భూమి, ఆకాశం-  తనలో కలిగి ఉన్నందున అతడు మహాగణపతి అయ్యాడు. భౌతిక, మానసిక శక్తులకు ప్రతీకగా గణపతి ఏనుగుతొండం నిలుస్తుంది. ఇతడి విశ్వరూపంలో ఈ అంశమే వ్యక్తీకరించబడింది.

అదే సమయంలో అతడు తన చిన్న వాహనమైన మూషికంపై ప్రయాణిస్తుంటాడు. ఏనుగు తల రెండు చిన్న కళ్లను కలిగి ఉంటుంది. కాని అవి సూక్ష్మాతి సూక్ష్మ వస్తువులను కూడా చూడగలిగేటంత శక్తిమంతంగా ఉంటాయి. అంటే గణపతి చూపునుంచి ఏదీ దాక్కోలేదని ఇది తెలుపుతుంది. అతడి పెద్ద చెవులు విశ్వం లోని ఏమూల నుంచైనా భక్తులు చేసే ప్రార్థనలను వినగలుగుతాయి. అదేవిధంగా పొడవాటి తొండం తను కోరుకున్న ప్రతిదాన్ని అందుకోగలుగుతుంది.

ఆవిధంగా విశ్వ సంపదను మొత్తంగా అతడు పొందగలిగే స్థానంలో ఉన్నాడు. ఏదైనా కార్యాన్ని సాధించాలని కోరుకునే ప్రతి ఒక్కరూ మొదటగా విఘ్నేశ్వరుడినే పూజిస్తారు. విఘ్నేశ్వరుడు భాద్రపద మాసంలోనే అవతరించాడు.

అందుకనే భాద్రపద మాసంలో శుక్లపక్ష చతుర్థినాడు విఘ్నేశ్వరుడిని పూజించినవారికి కోరిన కోరికలన్నీ సిద్ధిస్తాయని ఒక నమ్మకం. ఆవిధంగా కార్యసాధనలో ఎదురయ్యే ప్రతి ఆటంకాన్ని ఎదుర్కొనేందుకు కావలసిన శక్తిని, ధైర్యాన్ని వీళ్లు పొందుతారు.

ఈ నెల అట్టమీది బొమ్మను, దానితో పాటు ప్రచురించిన ఉన్న కథను మీరు ఆస్వాదించారని భావిస్తున్నాము. వచ్చే నెలలో కూడా అట్టమీద బొమ్మ రూపంలోని మరొక చందమామ సుందరమైన కళా సృష్టితో మీ ముందుకు వస్తాము.”

ఈనెల చందమామపై పాఠకుల లేఖలు

సెప్టెంబర్ చందమామను ఆగస్ట్ 27నే అందుకున్నాను. వపాగారి వినాయక చవితి ముఖచిత్రం అద్భుతంగా ఉంది. చందమామకు పూర్వ వైభవం వచ్చినట్టుంది. లోపలి కథలు కూడా చాలా బాగున్నాయి. అచ్చులో నా కథ చూసుకుంటే మహదానందమేసింది.
–ఆరుపల్లి గోవిందరాజులు, విశాఖపట్నం

సెప్టెంబర్ చందమామ వినాయకుడి ముఖచిత్రంతో అబ్బురమనిపించింది. వపాగారి మార్కు ముఖచిత్రాల్లో ఇది హైలెట్. అలాగే ఈ నెల బేతాళ కథలో కొట్టొచ్చినట్లు మార్పు ఏమంటే శంకర్ గారు పూర్తి పేజీ బొమ్మ వేయడం. బేతాళ కథకు ఫుల్ పేజీ బొమ్మ వేయడం చందమామ చరిత్రలో ఇదే తొలిసారేమో. రాజు, గుర్రం, పాముని శంకర్ పూర్తి పేజీలో అందంగా చిత్రించారు. కథ కూడా బాగుంది.
సారయ్య, కరీంనగర్, ఎపి.

సెప్టెంబర్ సంచిక సకాలంలో అందటం మహదానందంగా ఉండటమే కాకుండా ఇంతవరకు చందమామ సుదీర్ఘ చరిత్రలో ముఖచిత్ర వివరణ, -వినాయకుడు- చిత్రకారుని ప్రతిభ గురించి ఎప్పుడూ విశ్లేషించలేదు. వడ్డాది పాపయ్య గారు చందమామకు జీవనాడి. అలాగే నేడు కూడా కథోచిత చిత్రాలు అందిస్తున్న సీనియర్ చిత్రకారులు శంకర్ -కె.సి. శివశంకరన్- గారికి పెద్ద పీట వేసి గౌరవించాలి. పాత కొత్తల మేలుకలయికతో చందమామ చల్లని కిరణాలతో పరవశించని పాఠకుడు ఉండడంటే అతిశయోక్తి కానేరదు. ఆబాలగోపాలాన్ని హిమశీకరాలతో షష్ఠిపూర్తి దాటినా అందాల చందమామ అలరించడం ఎంత చిత్రం. వంద ఏళ్ళు చదవాలనే పాఠకుల ఆశ ఎంత విచిత్రం. ఇది దురాశ కాదెంతమాత్రం. ఇది మీకు నా శాశ్వత శుభప్రశంస.
–బి. రాజేశ్వరమూర్తి, చిలకలపూడి, కృష్ణా జిల్లా, ఎపి.

RTS Perm Link

చందమామ కథల మునితో కబుర్లు!

శ్రీ కోలార్ కృష్ణయ్యర్ గారు

చందమామ కథల రచయిత కోలార్ కృష్ణయ్యర్ గారు డిల్లీ వెళ్తారని తెలిసి ఇవ్వాళ -23-08-2011- సాయంత్రం రెండున్నర గంటలకు మా దంపతులు ఇరువురం ఆయనను బెంగుళూరులోనే కలవడానికి నిర్ణయించుకున్నాము. అంతకు ముందురోజు రాత్రి కావలినుంచి బస్సులో ప్రయాణించి రావడంతో బాగా అలసిపోయాము. కృష్ణయ్యర్ గారు కథల ప్రచురణ కోసం రేపు ఢిల్లీ బయలుదేరి రెండు నెలలు అక్కడే ఉంటానని చెప్పారు కాబట్టి అలసటగా ఉన్నా కలవాలనుకున్నాము. ఇంటివద్దనుంచి బయల్దేరి  నాలుగన్నర గంటలకు వారు ఇప్పుడు ఉంటున్న ఇల్లు చేరాము. బెంగుళూరులో ఆయన ఉన్న ప్రాంతం మాకు చాలాదూరం. మాది తూర్పు సరిహద్దు. వారిది పడమర సరిహద్దు. వారి కుమార్తె మధ్య మధ్యలో ఫోన్ చేస్తుంటే దారిచెప్పగా వారి ఇల్లు కనుక్కుని వెళ్ళాము.

పండుముసలి ఐనా పదేళ్ళపిల్లాడిలా -89 ఏళ్లు- ఆయన తమ అనుభవాలను, అనుభూతులను పంచారు. మావారూ చాలా సరదాపడి విషయాలన్నీ విని నన్ను కొన్ని నోట్ చేసుకోమన్నారు. కృష్ణయ్య గారి కధలపై ఎవరో పేరు చెప్పారు గానీ నేను పెన్ పుచ్చుకునేలోగా చెప్పడం ఐపోయింది. వారిని తిరిగి వెనక్కు తీసుకెళ్ళడం ఇష్టం లేక మౌనంగా ఉండి విన్నాను. – ఈ కథనం చివరలో అదనపు సమాచారంలో దీనిని చూడవచ్చు-

నేను “మీరు అన్ని కధల్లోనూ’ శిల్లంగేరి’ అనే పేరు ఎందుకని పెడతారు” అని అడగ్గా , కృష్ణయ్యగారు “మాపూర్వులు ఆనాటి ముస్లింల ధాటికి ఝడిసి సొంత ఊరినుండీ పారిపోయి కర్ణాటక ప్రాంతంలోని అయిదు ఊర్లలో తలదాచుకున్నారుట. వాటిలో ఒకటి శిల్లంగేరి. అది మేము నివసించిన ప్రాంతం’ అని అన్నారు.

“మరి మీ ఇంటిపేరు ‘కోలార్’ అని ఎందుకు వచ్చింది” అనే నా సందేహానికి  వారు “మానాయన గారు చదువుకోలేదు. నిరక్షరాస్యులు. నన్ను బడిలో చేర్పించడానికి వెళ్ళినపుడు పంతుళ్ళు ‘మీ అబ్బాయి పేరేమి’ అనగా ‘కృష్ణయ్య’ అని చెప్పారుట. మరి ఇంటి పేరేమి? అని అడగ్గా “మేము ఉండేది కోలార్‌లో’ అని చెప్పగా పంతుళ్ళు తన ఇంటిపేరు ‘కోలార్’ అని రాశారుట! అలా తమ పేరు కోలార్ కృష్ణయ్య అయిందని చెప్పారు.

వారి విద్యాభ్యాసం ఎక్కువగా అనంతపురంలోనే సాగిందట. ఇంకో తమాషా ఏమంటే వారు తెలుగు కాక కన్నడ మీడియంలో చదివారుట! ఎనిమిదవ వతరగతి వరకూ తెలుగే చదివారు కానీ, ఒకరోజున తెలుగు పంతులుగారు పరీక్ష పేపర్లన్నీ దిద్ది అందరికీ ఇస్తూ కృష్ణయ్య గారి పేపర్ మాత్రం ఇవ్వక, చివరగా పిలిచి, చెవి మెలివేసి “ఏరా మొద్దూ ! ప్రతివాక్యానికీ ముందు ‘సున్న’ పెడుతున్నావ్ ! సున్నతో వాక్యం మొదలెడతారా? తెలివితక్కువ గాడిదా!” అంటూ భుజంపై ఒక్కదెబ్బ వేశారుట.

దాంతో మన కృష్ణయ్య బాబుకు (అపుడు చిన్నవాడుకదా!) కోపం, పౌరుషం వచ్చి, వాళ్ళ నాన్నగారి వద్దకెళ్ళి ‘నేను తెలుగులో చదవను’ అని చెప్పాడట. అప్పటికే కన్నడ మీడియంలో పిల్ల్లలు తక్కువై ఆ సెక్షన్ ఎత్తేస్తారనే భయంతో ఉన్న ఉపాధ్యాయులకు అదొక బాసట! దాంతో కృష్ణయ్యగారి తండ్రివెళ్ళి మావాడు కన్నడంలో చదువుతాడనిచెప్పి “వెళ్ళి ఆ సెక్షన్ లో కూర్చోపో” అని చెప్పారుట.

అప్పటినుండీ కన్నడ మీడియంలోనే చదివారాయన. కానీ పెద్దయ్యాక నాలుగు వందల తెలుగు కధలు రాసి, పండిన పండితుడు మన కోలార్ కృష్ణయ్య. కన్నడ మీడియంలో చదివి తెలుగులో చిన్నపిల్లలకోసం కధలు కాయించిన కర్పూర కల్పవృక్షం కోలార్ కృష్ణయ్యగారు. ఆయన “మరి కన్నడంలో కధలు వ్రాయలేదా?” అన్న నాసందేహానికి ” కన్నడంలో కధలేవీ వ్రాయలేదని” చెప్పారు.

చదువంటేనే తెలీని వారి తండ్రికి ఇలాంటి కధల పండితుడు తన సంతానమంటే ఎంత ఆనందించారో! మరికొన్ని విషయాలు మాట్లాడాలంటే సమయం చాలలేదు. కృష్ణయ్యగారి సంతానం , మనుమలు మనుమరాళ్ళు ,మునిమనుమలు ,మునిమనుమరాళ్ళు  అంతా తాతగారి పుస్తకాలు చదువుతారుట! విదేశాల్లో ఉన్న తన సంతతిని అక్కడివారు ‘కోలార్ ‘ అనే పేరుతోనే పిలుస్తారని మురిసిపోతూ చెప్తున్న ఆ 89 ఏళ్ళ నవ్వుల ముని ఆక్షణంలో ఎనిమిదేళ్ళ పిల్లాడిలా అనిపించారు. -ఇతరదేశాల్లో ఇంటిపేరే అసలు పేరుగా పిలుస్తారు కదా-

కళాశాల చదువు పూర్తయి ప్రభుత్వోద్యోగాలూ, ఆపై తిరుమల తిరుపతి దేవస్థానంలో ఉద్యోగం అయ్యాక ప్రస్తుతం పిల్లలందరి దగ్గరా కొన్నాళ్ళు గడపుతూ, తిరుగుతూ, తిరిగి చందమామకు కధలు రాస్తూ నవ్వుకుంటూన్న నాగరికుడీయన. తాను ఇంగ్లీషులోనూ, తెలుగులోనూ రాసిన కధలను, కొందరు పబ్లీషర్స్ విజయవాడనుండీ, మద్రాసునుండీ -ఇంకా ఢిల్లీ అని చెప్పిన గుర్తు-  ప్రింట్ చేసి వెయ్యిరూపాయలు కొందరిస్తే, అచ్చంగా ఆరే ఆరుకాపీలు కొందరు ఇస్తారుట!

ఇల్లు వెతుక్కుంటూ మధ్య మధ్య ఫోన్ చేస్తున్నమమ్ము తీసుకెళ్ళడానికి వారి పెద్దమ్మాయి అనుకుంటా.. క్రిందికి వచ్చి అప్యాయంగా పలుకరించి దారిచూపారు. అక్కడ ఉన్నకాస్తంత సమయాన్నీ కోలార్ గారితో మాట్లాడి బంగారం తవ్వుకోవాలనే ప్రయత్నంలో ఆమె  పేరు సైతం అడగడం మరచాము.

ఇటీవలే మార్చి ఐదున అనుకుంటాను  కోలార్ గారి గృహలక్ష్మి వారికి శాశ్వతంగా దూరమైందని తెలిసి బాధేసింది. వారి అమ్మాయి “ఎన్నో ఏళ్ళ అనుబంధం కదా నాన్నగారు తట్టుకోడం కష్టం” అనిచెప్పారు. కోలార్ కృష్ణయ్యగారు అందుకేనేమో తమవద్ద ఉన్న ప్రింటైన తమ రచనలన్ని అందరికీ పంచుతున్నారుట! -ఆగస్టు చివరలో కలిసిన తమకే ఆయన పాతిక పుస్తకాలు ఇచ్చేశారని హైమవతి గారు చెప్పి ఆశ్చర్యపరిచారు-

తిరుపతిలో కుమారునివద్ద కొంతకాలం , మంగుళూర్ కుమారునివద్ద కొంతకాలం, బెంగుళూర్ కుమార్తెవద్ద కొంతకాలం, ఢిల్లీలో కుమారునివద్దకు ఈరోజే ప్రయాణమవుతున్నారుట, అందుకే మేము హడావిడిగావెళ్ళి చూసి, మాట్లాడి వారు ఎంతో అప్యాయతగా మాకోసం తిరుపతి నుండీ తెచ్చిన షుమారుగా పాతిక పుస్తకాలు మాకు అందించారు, మరోమారు తీరుబాటుగా ఒక్కరోజంతా కలసి కబుర్లు చెప్పుకుందాము ” అనిచెప్పారు. సాగనంపటానికి క్రిందివరకూ రాలేమనగా, వారికి నమస్కరించి శలవుతీసుకుని మేడదిగాం.

తిరిగి ట్రాఫిక్ జోరులో డ్రైవర్ కారు నడుపుతుండగా మేమిరువురం  కోలార్ గారి కబుర్లు చెప్పుకుంటూ రెండుగంటలతర్వాత ఇల్లు చేరాం–.

అన్నట్లు – కోలార్ కృష్ణయ్యగారు నిర్మొహమాటంగా – “చందమామలో కొన్నికధలు పిల్లలకోసం లాగా ఉండవు. పెద్దవారు చదువుతున్నప్పటికీ ‘ ప్రేమించడం, పెళ్ళిచేసుకోడం, దయ్యలూ పిశాచాలూ లాంటివి పిల్లలకు అర్ధం కాకపోగా భయంకలిగిస్తాయని నా అభిప్రాయం. కొన్నిడైలాగ్స్, మాటలూ కూడా పిల్లలస్థాయిని మించి ఉంటాయి.నాకు తెలుగు కాస్తే వచ్చును, అందువలన నేను ఉపయోగించే భాషకూడా పిల్లలస్థాయికి సరిపోతుంది. (దేవునికధలు చందమామలో వేయరు అనికూడా అన్నారు).” అని వ్యాఖ్యానించారు. తాము ఏఏ పిల్లల పుస్తకాలకు వ్రాశారో కూడా చెప్పారు. (చంపక్, గోకుల్ వంటివి).

ఆయనను కలవడానికి నాలుగు గంటలు పోనూ రానూ  కష్టం అనిపించినా ఒక తలపండిన తపస్వినీ, కధల మునినీ చూసి మాట్లాడామన్న తృప్తి సంతోషం మిగిలాయి.

కోలార్ గారితో కొంతసేపు కబుర్లివే-!

అదనపు సమాచారం
కృష్ణయ్యగారి కధలపై రీసెర్చ్ చేసిన వ్యక్తి ” మీకు కధలకు ప్లాట్స్ ఎలాదొరుకుతాయి? ఈకధ రాయాలని ఎలా తోస్తుంది? ” అని అడిగారుట. దానికి కృష్ణయ్యగారు ” ఏదైనా సంఘటన చూసినపుడో, విన్నపుడో  వచ్చిన ఆలోచనను తనదైన శైలిలో కధలా మలుస్తానని చెప్పారుట.”ఏ కధకైనా ఒక సందేశం ఉండాలి, లేక పోతే ఆ కధ వలన ప్రయోజనం ఉండదు.ఇటీవల కధలు ఉత్తిగా వ్రాస్తున్నారు తప్ప, ప్రయోజనం కనిపించడంలేదు.” అన్నారు.

వారు తాను చూసే ఒక సీరియల్ లో (ఆ ఒక్కటే మేమూ చూసే సీరియల్ కావడం తమాషాగా అనిపించింది) -మొగలిరేకులు- దాన్లో దేవి (ఒక కారెక్టర్) తమ కుటుంబానికి విరోధి ఐన వ్యక్తిని ప్రేమించి పెళ్ళాడతానని చెప్తుంది. పెద్దలకు ఇష్టం లేక పోయినా అలాచేయడంవలన తమ రెండు కుటుంబాల చిరకాల విరోధం పోయి స్నేహం తిరిగి విరుస్తుందని ఆమెభావన. ఈ ఆలోచనతో ఒక కధ వ్రాశానని చెప్పారు.

“ఏమైనా డిస్ట్రిబ్యూటర్స్‌తో చాలాబాధ. ప్రింట్ ఐందాకా నమ్మకంలేదు.” అన్నారు. ఎంతైనా ఓపిగ్గా వ్రాస్తూ  డిస్ట్రిబ్యూటర్స్‌తో తంటాలు పడుతూ ఇంకా పుస్తకాలు ప్రింట్ కోసం తపిస్తున్న ఇప్పటికి 40పైగా పుస్తకాలు ప్రచురించారు. ఇంకా 60 పిల్లల పుస్తకాల కూర్పుకు ప్రయత్నిస్తున్నారు. ఆ మహా మనీషికి మాతృభాషపట్ల, చిన్నపిల్లలకు మానవతా విలువలు నేర్పాలనే అభిలాష పట్ల ఉన్న మక్కువ ఎక్కువే!

వారు నాకు ఇచ్చిన తమ పుస్తకాలలోని కొన్ని క్యారెక్టర్స్ చారిత్రక, పురాణాలలోనివి ఇంగ్లీషులోకి అనువదించమని సూచించారు చూడాలి నావయస్సూ 65. ఆయనంత ఓపిక భగవంతుడు నాకూ ఇవ్వాలిగా! పైగా ఆయనలా డిస్ట్రిబూటర్స్‌తో ప్రింట్ కోసం తంటాలు పడటం నావల్ల అయ్యేపనికానే కాదు.

ఆదూరి హైమవతి.

(చందమామ సీనియర్ కథకులు శ్రీ కోలార్ కృష్ణయ్యర్ గారితో హైమవతి గారి కుటుంబానికి రెండు తరాల కథారూప పరిచయం ఉంది. గత 35 ఏళ్లకు పైగా వీరు ఈయన కథలు విడవకుండా చదవడమే కాకుండా తమ పిల్లలకూ కూడా వీరి కథలను పరిచయం చేశారట. ఈ కుటుంబం మొత్తానికి చందమామతో సుదీర్ఘ అనుబంధం ఉంది. కృష్ణయ్యర్ గారితో ప్రత్యేక అనుబంధం కూడానూ. మూడున్నర దశాబ్దాల తర్వాత ఈ చందమామ కథల మునితో పరిచయం కలిగే అవకాశం కోసం గత ఆరునెలలుగా ఈ కుటుంబం ఎదురు చూసింది. ఆయన తిరుపతిలో, బెంగుళూరులో, మంగుళూరులో తమ పిల్లల వద్ద గడుపుతూ రావడంతో సమయం కుదరలేదు. మొత్తంమీద ఆయన బెంగళూరు చిరునామా తీసుకుని అక్కడే కలియనున్నామని చెప్పడంతో కలిసిన తర్వాత వివరాలను రాసి పంపమని కోరాము. మరుసటి రోజే హైమవతి గారు ఆయనతో భేటీ వివరాలు రాసి పంపారు. కాస్త ఆలస్యంగా వీటిని ఇక్కడ ప్రచురించడమైనది. తెలుగు టీచర్ మందలించారనే కోపంతో తెలుగే చదవనని భీష్మించుకుని కన్నడ మాధ్యమంలోకి మారిపోయిన కృష్ణయ్యగారు తర్వాత నాలుగు వందల తెలుగు కథలు రాసి తెలుగు బాలసాహిత్యానికి తమదైన చేర్పునందించడం చూస్తుంటే హృద్యంగా అనిపిస్తోంది. ప్రస్తుతం కథల ప్రచురణ కోసం ఢిల్లీలో ఉన్న ఈయన అక్టోబర్ చివరలో తిరిగొస్తారు. జీవితం చివరి అంచులోనూ కథారచనను వదిలిపెట్టని ఈ రుషితుల్యుడితో మాట్లాడాలంటే దిగువ నంబర్లలో సంప్రదించవచ్చు.)

తిరుపతి    :   Land line : 0877-2251715
ఢిల్లీ           :   Mobile no: 09483321031 -ఇప్పుడు ఇక్కడే ఉన్నారు-
బెంగళూరు: Land line: 080 23494065

ఆదూరి హైమవతి దంపతుల చందమామ జ్ఞాపకాలకోసం కింది లింకులు చూడండి.

చందమామ చదవకుంటే?

‘చందమామ’ జ్ఞాపకాలతో వృధ్ధాప్యమూ పసితనమే…!!

RTS Perm Link

గణపతి చరిత్ర

ఆదిమసమాజంలో గణవ్యవస్థ రూపుదాల్చిన క్రమంలో సమాజ సంరక్షణ కొరకు ఎన్నుకోబడ్డ నాయకుడే గణపతి లేదా గణనాయకుడు లేదా గణాధిపతి. ప్రతి గణానికి ఒక గుర్తు లేదా సంకేతం పాము, ఎలుక, ఏనుగు, కుక్క, చిలుక, తాబేలు, పక్షి మొక్క మొదలైన పేర్లు చిహ్నాలుగా ఉండేవి. గణపతికి ఏనుగుతల ఉండటం ఆ గణం యొక్క ఆధిపత్యాన్ని లేదా మిగతా గణాలపై గల సార్వభౌమత్వాన్ని తెలియజేస్తుంది.

ఆ గణ సంకేతాలే నేటి సమాజంలో గోత్రాలుగా కొనసాగుతున్నాయి. ఆచార సంప్రదాయాలు, కట్టుబాట్లు, నోములు, వ్రతాలు, పూజలు పరిశీలిస్తే ఆదిమ సమాజ లక్షణాలు కనబడతాయి. గోత్రనామం తెలుగు అర్థం తెలుసుకుంటే సమాజపరిణామంలో మనిషి మూలాలు తెలుస్తాయి.

ఆదిమ సమాజంలో భక్తి వ్యక్తిగతం. రాజ్యవ్యవస్థ, వ్యక్తిగత ఆస్థి ఏర్పడిన తర్వాతే భక్తి ప్రదర్శనగా మారింది. నేడు భక్తి వ్యాపారమైంది. ఇప్పుడు పూజా ద్రవ్యమూ సరుకే. దేవుడూ సరుకే. భక్తి కూడా సరుకే. పెట్టుబడిదారీ సమాజంలో సరుకు ఉత్పత్తి లాభం కోసమే. ప్రదర్శన వ్యాపార లక్షణం. గణేశ ఉత్సవంలో కనిపిస్తున్న తీరుకి ఇది నిదర్శనం. భక్తి వేలం వెర్రిగా మారటం సామ్రాజ్యవాద సంస్కృతి తలకెక్కి తైతక్కలాడటమే.

భయం+అజ్ఞానం దేవుడు. భయానికి కారణం అభద్రత, అజ్ఞానానికి హేతువు విచక్షణా జ్ఞానం కొరత. విచక్షణే సైన్స్ సమస్యలకు పరిష్కారం చూపుతుంది.

– డా. జి,వి. కృష్ణయ్య. drgvkrishnaiahkp@gmail.com

డాక్టర్ గారూ, మన చరిత్ర సైన్స్‌కి సంబంధించిన మంచి విషయాన్ని ఇవ్వాళే ఈమెయిల్ ద్వారా పంచుకున్నందుకు కృతజ్ఞతలండీ.

క్లుప్తంగానే అయినా గణపతి భావన వెనక ఉన్న ఒక సుదీర్ఘ చరిత్రను ప్రస్తుతం దాని వికృత పరిణామాలను సుస్పష్టంగా వివరించారు.

దాదాపు 30 ఏళ్ల క్రితం హైదరాబాద్ బుక్ ట్రస్ట్ వాళ్లు ‘గణపతి’ పేరిట, దేవీప్రసాద్ చటోపాధ్యాయ రచించిన ప్రామాణిక పుస్తకం ‘లోకాయత’లోంచి చిన్న భాగాన్ని పుస్తకంగా వేశారు. భగవద్గీత చారిత్రక పరిణామాలపై, గణపతిపై ఇతర అంశాలపై వీరు ప్రచురించిన చిన్న పుస్తకాలు అప్పట్లో సంచలనం కలిగించాయి. కాని ఆ సంప్రదాయాన్ని, తరం తర్వాత తరానికి అందవలిసిన శాస్త్రీయ జ్ఞాన వారసత్వాన్ని ప్రస్తుతం ఎవరూ కొనసాగిస్తున్నట్లు లేదు.

ఈ సందర్భంగా జనవిజ్ఞాన వేదిక వారు ప్రచురించిన వందకు పైగా పుస్తకాలు తెలుగు పిల్లల, పెద్దల జ్ఞాన దాహాన్ని, శాస్త్రీయ చింతనను ఒకరకంగా తీరుస్తున్నాయని చెప్పవచ్చు. వీటిలో నలభైపుస్తకాలు ఆన్‌లైన్‌లో కూడా పీడీఎఫ్ రూపంలో ఉచితంగా అందుబాటులో ఉండటం చాలా మంచి విషయం.

పండుగలు, సంప్రదాయాలు, పేరుకుపోతున్న మౌఢ్యం వంటివాటి వెనుక చారిత్రక అంశాలను వివరించి చెబుతున్న ఇలాంటి రచనలను ప్రతి పండుగ పూటా గుర్తు చేయడం, ప్రత్యామ్నాయ పత్రికలు ప్రచురించడం చాలా అవసరం. నిఖిలేశ్వర్ గారు పాతికేళ్ల క్రితం ఉదయం పత్రికలో అనుకుంటాను. శ్రామికవర్గ పండుగల గురించి చాలా మంచి వ్యాసం రాశారు. అలాంటివి తరం తరానికి అందాలి. కనీసం ఆన్‌లైన్ ప్రతులుగా అయినా అందరికీ అందుబాటులో ఉంటే మంచిదేమో..

మనుషులు జరుపుకుంటున్న ప్రతి పండుగ వెనుక ఎంత  చరిత్ర దాగి ఉందో.. మన వ్యవసాయ సంస్కృతిని వందల సంవత్సరాలుగా ప్రదర్శిస్తూ వస్తున్న పండుగలు ఇప్పటి వేలం వెర్రిలో, తెప్పలుగా పారుతున్న భక్తి రసం వెల్లువలో తమ రూపాన్ని, సారాన్ని పూర్తిగా మార్చుకుంటున్నాయి.

‘లోకాయత’ భారతీయ తాత్వికచింతనలో హేతువుకు, నాస్తిక వాదానికి పట్టం గడుతూ దశాబ్దాల క్ర్రితమే దేవీప్రసాద్ చటోపాధ్యాయ రాసిన పరమ ప్రామాణిక రచన. మోర్గాన్ రాసిన ‘పురాతన సమాజం’ తో సరిపోలగల గొప్ప రచన. కాని 700 పేజీల ఈ ఉద్గ్రంతం తెలుగు పాఠకులకు ఈనాటికీ అందుబాటులో లేదు. నిజమైన విషాదం.

కొడవటిగంటి కుటుంబరావు గారి రచనల సంకలనాలలో విరసం గతంలో ప్రచురించిన “సంస్కృతి వ్యాసాలు” సంపుటిలో మన ప్రాచీన ఆచార వ్యవహారాలు, పండుగలు, సంప్రదాయాలు గురించిన విశ్లేషణాత్మక రచనలు చాలానే ఉన్నాయి. ప్రత్యేకించి గోత్రాల వెనుక నేపథ్యంపై, వివిధ కుల, వర్గ సమూహాలు చరిత్ర క్రమంలో పాటిస్తూ వచ్చిన నిషేధాలపై చక్కటి వివరణ ఈ పుస్తకంలో ఉంది. ఈ పుస్తకం త్వరలో ప్రచురణ కావచ్చు.

వందేళ్ల క్రితం కందుకూరి, గురజాడ తదితరులు తెలుగు సమాజానికి అందించిన హేతుపూర్వక భావ సంస్కారం ఇప్పుడు కనుమరుగవుతున్నట్లోంది.

హితసూచిని : రాజశేఖర చరిత్ర

http://kanthisena.blogspot.com/2010/12/blog-post.html

వీధికొక గుడి, గుంపులుగా దందాలు.. ‘తెలుగునాట భక్తిరసం కుప్పలుగా పారుతోంది…’ అంటూ తెలుగు కవి చేసిన అద్భుత వ్యక్తీకరణ ఇప్పుడు మరింత వాస్తవంగా మారుతోంది.

కృష్ణయ్యగారూ,
హేతు దృష్టిని, శాస్త్రీయ చింతనను ప్రోత్సహించే ఇలాంటి మంచి రచనలను వీలైనప్పుడల్లా తప్పక పంచుకోగలరు. చరిత్ర పట్ల, సైన్స్ పట్ల మమకారం గల మీరు సైన్స్, ఆధ్యాత్మికత అంశాలపై తెలుగు బ్లాగుల్లో కొనసాగుతున్న చర్చలో కూడా పాల్గొంటే మంచిదేమో.. ఆలోచించండి.

బొందలపాటి సీతారాం ప్రసాద్ గారు మతం, సైన్స్, ఆధ్యాత్మికత వంటి అంశాలపై గత కొంత కాలంగా తన బ్లాగులో తన కోణంలో తను చర్చిస్తున్నారు. ప్రాథమికంగా ఈయన మత వ్యతిరేకీ కాదు, సైన్స్ వ్యతిరేకీ కాదు. తన వ్యక్తిగత అనుభవాలు, అనుభూతులు, పరిశీలన ద్వారా మతం, సైన్స్ పట్ల తనకు ఏర్పడుతున్న భావాలను అక్షరీకరిస్తున్నారు.

ఒక తెలుగు సాఫ్ట్ వేర్ ఇంజినీర్

http://bondalapati.wordpress.com

సైన్స్ పరిధికి, సైన్స్ పరిమితికి అవతల ఉంటున్న అంశాలను ఆధ్యాత్మిక కోణంలో పరిశీలించవచ్చు అని ఈయనా, ఇతర మిత్రుల అభిప్రాయం.  సైన్స్‌ని సైన్స్‌గానూ, ఆధ్యాత్మికతను ఆధ్యాత్మికతగానూ పరిశీలించడానికి, సానుకూల, ప్రతికూల అభిప్రాయాలను పరస్పరం పంచుకోవడానికి సీతారాం గారి కింది రచనలు ఉపయోగపడతాయనుకుంటాను.

ముఖ్యంగా సైన్స్ ఎన్నటికీ కనిపెట్టలేని అంశాలు, సైన్స్‌కు సాధ్యం కాని ఆవిష్కరణలు, భౌతిక సూత్రాలకు అతీతంగా, నిరూపితం కాని వాస్తవాలు అంటూ ఈయన పంచుకుంటున్న స్వంత ఆలోచనలపై సమగ్ర అవగాహనకోసం కింది లింకులను అధ్యయనం చేయవలసిన  అవసరముంది.

సైన్స్‌‌లో లోతుగా ప్రవేశమున్నవారు -సైన్స్ రచనలు చదువుకున్నవారు, సైన్స్ పట్ల అభిమానం ఉన్నవారు, విశ్వాసం ఉన్నవారు కాదు అని కాదు- ఈ చర్చలో పాల్గొంటే మంచి ఫలితాలు వస్తాయని నా ఉద్దేశం.

రోహిణీ ప్రసాద్ గారూ, శ్రీనివాస చక్రవర్తి గారూ -శాస్త్రవిజ్ఞానము బ్లాగు,  http://scienceintelugu.blogspot.com – మీ అమూల్యమైన సమయాన్ని కాస్త ఈ ప్రతిపాదిత అంశాలపై వెచ్చిస్తే ఈ చర్చ ఫలవంతమవుతుందని భావిస్తున్నాను. ఏ మాత్రం వీలున్నా మీరు కింది లింకులను చూడగలరు.

బ్లాగు రూపంలో చర్చ కష్టమనుకుంటే నేరుగా సీతారాం గారితోటే మీరు చర్చించవచ్చు. తన ఈమెయిల్ ఐడీ కింద చూడగలరు.

sitarama.prasad@gmail.com

అతీంద్రియ శక్తులు : నా అనుభవాలూ, ఆలోచనలూ, వైఖరి.

అలౌకిక అనుభవాలు: నా అనుభవాలూ, ఆలోచనలూ, వైఖరి.

దేవుడూ, సృష్టి జననం, కాలం యొక్క అంతం మొదలైన ప్రశ్నలు..

జ్ఞానోదయాలు, అధిభౌతిక ప్రపంచం (metaphysical world), పరిపూర్ణ సత్యం మొదలైనవి..

మానవ జాతి పయనం ఎటు వైపుకి?

విశ్వం పుట్టుక కి కారణం లేదనటం హేతువాదమే!

స్వేఛ్ఛాఇఛ్ఛ, లేక ఫ్రీ విల్, ఉందా..లేదా..?

మతమూ, సైన్సూ వాటి ఆవశ్యకత…

రిచర్డ్ ఫేన్మేన్ మతం,సైన్స్ గురించి ఇచ్చిన ఉపన్యాసాలు

NB: సైన్స్‌తో, ఆధ్యాత్మికతో బాగా పరిచయం ఉన్న, అవగాహన ఉన్న ఇతర మిత్రులు ఎవరయినా సరే ఈ చర్చలో పాలు పంచుకోవచ్చు. శాస్త్ర జ్ఞానంపై, సైన్స్ ఆవిష్కరణలపై, భౌతిక సూత్రాల పరిమితిపై, ఆధ్యాత్మికతపై కూడా చర్చ జరగడం తెలుగులో చాలా, చాలా తక్కువ.  అందులోనూ ఆరోగ్యకరమైన చర్చ జరగటం మరీ తక్కువ. తెలుగులో, ఇంగ్లీషులో కూడా పై లింకులలో మీరు చర్చించవచ్చు. మీ అవగానలను పంచుకోవచ్చు.

శాస్త్రవిజ్ఞానం

http://scienceintelugu.blogspot.com

శాస్త్ర విజ్ఞానం – ఆధునిక సమాజాల ఆయువుపట్టు అనే  కేప్షన్‌తో తెలుగులో ఒక నిబద్ద సైన్స్  బ్లాగ్ పాఠకులందరికీ అందుబాటులో ఉంది. విజ్ఞాన శాస్తంలోని వివిధ విభాగాలపై కథ, నవల వంటి ఆకర్షణీయ శైలితో రెగ్యులర్‌గా ఈ బ్లాగును నడుపుతున్నారు. శాస్త్ర విషయాలను ఇంత విస్తృతంగా రోజువారీగా పోస్ట్ చేస్తున్న బ్లాగు మరొకటి తెలుగులో లేదంటే ఆశ్చర్యపోవలసిన అవసరం లేదు. ఈ విశిష్ట బ్లాగు ఇతర భారతీయ భాషలలో కూడా వస్తోంది.

కలైడోస్కోప్‌ఇండియా

http://www.kaleidoscopeindia.blogspot.com/

తెలుగులో సైన్స్ మీదే రాస్తున్న కొన్ని బ్లాగులను కింద చూడండి.

http://scienceintelugu.blogspot.com/
http://lolakam.blogspot.com/
http://rohiniprasadkscience.blogspot.com/
http://emitiendukuela.blogspot.com/2010/05/what-is-raman-effect.html

NB: ఇప్పుడే చూస్తున్నాను సాహిత్యాభిమాని బ్లాగులో చందమామ అభిమాని శివరాంప్రసాద్ గారు వినాయకచవితి పేరిట జరుగుతున్న పనికిరాని ఆర్భాటాలపై చక్కటి వ్యంగ్య రచన ప్రచురించారు. కింది లింకులో చూడండి.

అమ్మో వినాయక చవితి!

http://saahitya-abhimaani.blogspot.com/2011/09/blog-post.html

శివరాంప్రసాద్ గారూ, ఆధ్యాత్మికతను పాటిస్తున్నప్పటికీ పండుగల పేరుతో సాగుతున్న వేలంవెర్రిని దుయ్యబడుతూ చక్కటి కథనం ప్రచురించినందుకు ధన్యవాదాలు. మీరన్నట్లు ఎవరో ఒకరు మూడో కన్ను తెరవనంతవరకు పండుగ పేరిట జరుగుతున్న పర్యావరణ విధ్వంసానికి అడ్డుకట్ట పడదనుకుంటాను.

మరోసారి అభినందనలు.

రాజశేఖర రాజు

http://blaagu.com/chandamamalu

http://kanthisena.blogspot.com

krajasekhara@gmail.com

RTS Perm Link

చందమామ విజయగాథ….!!!

“భారతీయ సాహిత్యాకాశంలో కథా కాంతులు మెరిపించిన గొప్ప చరిత్ర చందమామ సొంతం. కోట్లాది మంది పిల్లల, పెద్దల మనో ప్రపంచంపై దశాబ్దాలుగా మహత్ ప్రభావం కలిగిస్తున్న అద్వితీయ చరిత్ర చందమామకే సొంతం. గ్రామఫోనూ, రేడియో తప్ప మరే ఇతర వినోద విజ్ఞాన సాధనమూ లేని కాలంలో చదువగలిగిన ప్రతి వారికి చక్కటి వినోద సాధనంగా పనిచేసిన చరిత్రకు సజీవ సాక్ష్యం చందమామ.

చందమామ ఆవిర్భవించి అప్పుడే ఆరు దశాబ్దాలు గడిచిపోయాయి. ఇలాంటి కథల పత్రిక ప్రపంచంలో మరొకటి లేదని సామాన్యులు, మాన్యులు కూడా ముక్తకంఠంతో దశాబ్దాలుగా ఘోషిస్తున్నారు. చందమామ పత్రిక పఠనంతో తమ జ్ఞాపకాలను అపూర్వంగా పంచుకుంటున్నారు. ఆధునిక తరం అవసరాలకు అనుగుణంగా రూపొందిన పిల్లల పత్రికలు ఎన్ని వచ్చినా; కంప్యూటర్లూ, సెల్‌ఫోన్లూ, ఐప్యాడ్‌లూ వంటి ఆధునిక సాంకేతిక, వినోద ఉపకరణాలు ఎన్ని ఉనికిలోకి వచ్చినా పిల్లలూ, పెద్దలూ, వయో వృద్ధులూ.. ఇలా అన్ని వయస్సుల వారినీ, తరాల వారినీ అలరిస్తూ వస్తున్న ఏకైక కథల పత్రిక అప్పుడూ ఇప్పుడూ కూడా చందమామే.

తెలుగు నేలమీదే కాదు.. భారతీయ భాషలన్నింటిలోనూ అలనాటి తరం, నేటి తరం పాఠకులు ఎవ్వరూ కూడా చందమామతో తమ అనుబంధం మర్చిపోలేదు. చందమామ కథలతో పాటే పెరిగిన పిల్లలు జీవితంలో ఎన్ని దశలనూ అధిగమించినా సరే ఈనాటికీ వారు తమ బాల్యాన్ని మర్చిపోలేదు. తమ బాల్యాన్ని మంత్రనగరి సరిహద్దులలో ఊగించి, శ్వాసించిన చందమామ కథలనూ మర్చిపోలేదు. దేశీయ భాషలకు చెందిన సమస్త పాఠకులూ ఈనాటికీ చందమామ కార్యాలయానికి పంపుతున్న లేఖలూ, అభిప్రాయాలే దీనికి తిరుగులేని సాక్ష్యం.

తొలి సంచిక ప్రారంభమైన 1947 నుంచి చందమామ పత్రికను కొంటూ తమ పిల్లలకు, మనవళ్లు, మనవరాళ్లకూ కూడా చందమామ కథలు చదివి వినిపిస్తూ, తాము మళ్లీ మళ్లీ చదువుతూ చందమామతో తాదాత్మ్యం చెందుతున్న పాఠకులు దేశంలో ఏ భాషలోనూ, ఏ ప్రాంతంలోనూ మరే పత్రికకూ లేరని చెప్పడంలో ఇసుమంత అతిశయోక్తి లేదు.

తెలుగునాడులో, భారతదేశంలో కొన్ని తరాల పిల్లలు, పెద్దల కాల్పనిక ప్రపంచాన్ని చందమామ కథలు ఉద్దీప్తం చేశాయి. నాగిరెడ్డి-చక్రపాణిగార్ల మహాసంకల్పం, కుటుంబరావు గారి అద్వితీయ -గాంధీ గారి-శైలి చందమామ కథలకు తిరుగులేని విజయాన్నందించింది. ఆ కథల అమృత ధారలలో దశాబ్దాలుగా ఓలలాడుతూ వస్తున్న వారు చందమామ కథాశ్రవణాన్ని తమ తదనంతర తరాల వారికి కూడా అందిస్తూ ఒక మహత్తర సంస్కృతిని కొనసాగిస్తూ వస్తున్నారు….”

మాలిక వెబ్ పత్రికకు రచనలు పంపమని కొన్ని రోజుల క్రితం వలభోజు జ్యోతిగారు మెయిల్ పంపారు. కాస్త ఆలస్యంగానే చందమామ విజయగాథ అనే పేరుతో ఈ కథనం పంపడంతో వారు సాదరంగా స్వీకరించి ప్రచురించారు.  ఏ విజయగాథకూ తీసిపోని చందమామ కథపై ఈ చిన్ని కథనం పూర్తి పాఠాన్ని చూడాలంటే కింది లింకుపై క్లిక్ చేయండి.

‘చందమామ’ విజయగాథ

ఒక పత్రిక మరో పత్రిక గురించి  ఆ పత్రిక ఇంకో పత్రిక గురించి బండబూతులతో సత్కరించుకుంటున్న పాడుకాలం ఇది.  చందమామ పత్రిక చరిత్రను తడుముతున్న  ఈ కథనాన్ని ప్రచురణకు స్వీకరించిన మాలిక వెబ్ పత్రిక నిర్వాహకులకు కృతజ్ఞతలు.

జ్యోతి గారూ మీకు ప్రత్యేక ధన్యవాదాలు.

RTS Perm Link

చందమామ ‘ఆర్ట్‌బుక్’

చందమామ ఇటీవలి సంవత్సరాలలో తీసుకువచ్చిన ప్రచురణలలో చందమామ ‘ఆర్ట్‌బుక్’కి విశిష్టస్థానం ఉంది. దశాబ్దాలపాటు చందమామ కార్యాలయంలో బొమ్మలు వేస్తూ లక్షలాదిమందిని మంత్రముగ్ధులను చేస్తూ మెరిసిన నలుగురు మహా చిత్రకారుల చిత్రరచనలలో కొన్నింటిని ఆర్ట్‌బుక్‌ పేరుతో చందమామ 2010 మే నెలలో తీసుకువచ్చింది. ఎంటివి ఆచార్య, శంకర్, చిత్ర, వపా గార్లు భారతీయ చిత్రకళా వైభవానికి చందమామ అందించిన అద్భుత చేర్పులు.

‘అనంతమైన ప్రకృతిలో ఒదిగిన అరణ్య సౌందర్యం చందమామ బొమ్మల్లో అద్భుతంగా సాక్షాత్కరించ’డానికి, జానపద, పౌరాణిక చిత్ర సంపద చందమామలో దశాబ్దాలుగా మిరుమిట్లు గొల్పుతూ ప్రకాశించడానికి కారణభూతులైన ఈ నలుగురు చిత్రబ్రహ్మలు ప్రసాదించిన 200 ఒరిజనల్ చిత్రాలను తొలిసారిగా చందమామ ‘ఆర్ట్‌బుక్’ భారతీయ పాఠకులకు సగర్వంగా అందించింది.

ఆసక్తి చంపుకోలేక రూ. 1500లు వెలను కూడా తట్టుకుని కొనగలిగిన పాఠకులు, కథకులు, చిత్రకారులు, చందమామ అభిమానులు… ఆర్ట్‌బుక్ వెన్నెల కాంతులను చూసి పరవశిస్తూ ప్రశంసల వర్షం కురిపిస్తున్నారు. తెలుగుతో పాటుగా ప్రాంతీయ చందమామల చివరి లోపలి పేజీలో వేస్తున్న ఆర్ట్‌బుక్ చిత్రాలు పాఠకులను తీవ్రంగా ఆకట్టుకుంటున్నాయి. ఇంత వెల పెట్టినా సంవత్సరంలోపే ఆర్ట్ బుక్ రెండు ముద్రణలు పూర్తి చేసుకోవడం గమనార్హం.

ఆర్ట్‌బుక్‌పై పాఠకుల, కథకుల, చిత్రకారుల స్పందనలలో కొన్ని ఇక్కడ పొందుపరుస్తున్నాము.  అలాగే చందమామ పత్రికతో చందమామ బొమ్మలతో తన జ్ఞాపకాలను హృద్యంగా పంచుకున్న సిహెచ్ వేణుగారి కథనంలో కొంత బాగాన్ని ఇక్కడ చేర్చడమైనది. అలాగే, ‘ఆర్ట్‌బుక్‌’లో చందమామ చిత్రకారులపై ఆంగ్లంలో ఉన్న సమాచారాన్ని సమయాభావం కారణంగా ఇక్కడ ఇంగ్లీషులోనే యధాతథంగా ప్రచురించడమైనది.

1.
అలనాటి చందమామ వీరాభిమాని, తెలుగువారికి సున్నిత హాస్యం రుచిచూపిన ప్రముఖ కార్టూనిస్టు శ్రీ మట్టెగుంట అప్పారావు గారు ఇటీవలే చందమామ ఆర్ట్‌బుక్ తీసుకుని చూసి దాన్ని 64కళలు.కామ్ అనే వెబ్‌సైట్‌లో పరిచయం చేశారు.

చందమామ ఆర్ట్‌బుక్ 1, 2 భాగాలు
64kalalu.com కోసం శ్రీ మట్టెగుంట అప్పారావు గారు ఆర్ట్‌బుక్ గురించి చేసిన పరిచయ కథనం కోసం కింది లింకును చూడగలరు. ఆర్ట్‌బుక్‌పై ఆన్‌లైన్‌లో తొలి పరిచయం ఇదే.

http://64kalalu.com/book-review?start=8

(క్షమించాలి. 64 కళలు.కామ్ లో చందమామ ఆర్ట్ బుక్ పై సమీక్ష వచ్చిన గతంలోని లింకు స్థానంలో మరొక పుస్తక సమీక్ష లింకు వచ్చి చేరింది. పాత లింకు పనిచేయడం లేదు. కాబట్టి కింది ఇమేజ్‌లోని విషయాన్ని చూడండి)

చందమామ ఆర్ట్‌బుక్

2.

ఆర్ట్ బుక్ రెండు వాల్యూమ్స్ అందాయి. పేజీలు తిరగేసాక నేను పొందిన అనుభూతి అనిర్వచనీయం.
చందమామలో తొలి కథ ప్రచురించబడినప్పుడు ఎంత సంతోషించానో అంతకు మించి ఆనందించాను.
వీటిని నేను మహానుభావులు ఆచార్య,శంకర్, చిత్ర, వపా గార్లు భారతీయులకు అందించిన విలువైన నిధిగా భావిస్తున్నాను. ఆర్ట్ బుక్ ఆద్యంతం అద్భుతం. రంగుల లోకంలో విహరింపజేసింది. దివ్యలోకాలను ఆవిష్కరించింది. పురాణ పురుషుల సన్నిధిని నిలిపింది.ఎంత చూసినా, ఎన్నిసార్లు చూసినా తనివి తీరని విచిత్ర పరిస్థితి.
ఈ ఆర్ట్ బుక్ భవిష్యత్ తరాలకు మార్గ దర్శిని.  పెద్దలు, ఈ ఆర్ట్ బుక్‌ని పిల్లలకు చూపితే పురాణ పురుషుల దివ్య రూపాలు వారి చిన్నారి హృదయాల్లో ముద్రించుకుపోతాయి. చందమామ కుటుంబీకులదగ్గర తప్పక ఉండవలసిన చందమామ కురిపించిన వెన్నెల ఇది. ఆర్ట్‌బుక్ అందించే ఆనందానుభూతిముందు మనం చెల్లించే మూల్యం అత్యల్పం. వెన్నెల లోకం చేరుకోవడానికి త్వరపడండి.
శ్రీ ఎన్.శివ నాగేశ్వరరావు, తెనాలి
(చందమామ రచయిత)

3.

‘చందమామ ఆర్ట్‌బుక్‌’లో బాల్య స్మృతులను గుర్తుకు తెచ్చిన వడ్డాది పాపయ్య గారి చిత్రాలు, శంకర్, చిత్ర, MTV ఆచార్య గార్ల చిత్రాలు- కంటికి అందంగా, ఆరోగ్యంగా – మధురానుభూతిని మిగిల్చాయి! చందమామలో వచ్చిన నాటి చిత్రాలు – చక్కటి ప్రింటింగ్‌తో అందంగా అందించిన -ఈ ప్రయోగం – చిత్రాభిమానులకు అపురూపమైన కానుక! జీవిత కాలం పదిలంగా దాచుకోవాల్సిన అమూల్యమైన సంపద!
ఇక – చిత్ర విషయాలకు వస్తే – శంకర్ గారు వేసిన ఖాండవ దహనం – “ప్రజ్జ్వలిస్తున్న అగ్నికీలల వేడిమి” అనుభూతిని కలగజేసింది. అలాగే అచార్య గారు వేసిన కృష్ణుడు గోపికలతో “వెన్నెలలో రాసక్రీడలు” చిత్రం “విజయా” వారి వెన్నెలను కళ్ళముందు ఆవిష్కరించింది! వ.పా.గారి ఏకలవ్యుడు చిత్రంలో -ద్రోణాచార్య పోలికలతో రూపొందిన ఆయన శిల్పం – పోలికలు ఒకేలా ఉన్నా – మనిషికి, శిల్పానికి తేడా అద్భుతం!
-పోతే సందేహమే అయినా – వడ్డాది పాపయ్య గారి – రామాయణ చిత్రమాలికలో – రాముడు, సీత – లవ కుశులు ఒకేసారి కలవకపోయినా – వారు నలుగురూ ఉన్న చిత్రం చాలా అందంగా ఉన్నది!
ఈ కోవలోనే – పూర్వం – యువ దీపావళి ప్రత్యేక సంచికలలో వచ్చిన వ.పా. గారి చిత్రాలు కూడా ప్రత్యేకంగా అందిస్తారని ఆశిస్తూ – అభినందనలతో -
శ్రీ  పి.శ్రీరామ చంద్ర మూర్తి, తెనాలి
చందమామ అభిమాని.

4.

నెలనెలా వెన్నెలలద్దుకుని, చకచకా సొగసులు సరిదిద్దుకుని, పదారుభాషల వారి కితాబులందుకుని భారతీయ పత్రికగానే కాక, అంతర్జాతీయ స్థాయిని చేరుకున్న చందమామ పుట్టింది మన భాషలోనే అని తలుచుకుంటే ఉప్పొంగని తెలుగు గుండె ఉండదు. కాలక్షేపం కథలతోనే సరిపెట్టుకోక శాస్త్రీయ పరిశోధనాత్మత వ్యాసాలూ, మెదడుకి మేతగా పోటీలూ, అన్యభాషలు నేర్పే ఏర్పాట్లూ– ఇవన్నీ కంటికి నదురైన రంగులతో, అచ్చుతో, అనువైన సైజుతో ఇక్కడ కాక మరెక్కడ దొరుకుతుందని! ఈ సంస్థ పుస్తకరూపంలో పిల్లలకందించే విజ్ఞాన వర్గకోశాలు ఎన్నెన్నని!

ఇంతెందుకు ఇటీవల వీరు ప్రచురించిన ‘చందమామ ఆర్ట్‌బుక్‌’ చూశారా! పదిహేనువందల ఖరీదు కాస్త ఎక్కువే అనిపించవచ్చు కాని అది అందించే శతకోటి అందాల మాట!

నా తొలి ప్రేమ చందమామ. వాక్రూప వర్ణార్ణవం…
ఈ నాటికీ కథాసుధల్ని వెదజల్లుతూ హాయిగా జీవించగలిగే నా మనోధృతికి నాటి చందమామే మధురస్మృతి!

శ్రీ  అవసరాల రామకృష్ణారావు, విశాఖపట్నం
తొలి చందమామ -1947-లో తొలి కథ రాసిన వారు. తొలిచందమామ కథకులలో మిగిలి ఉన్న ఏకైక మాన్యులు.

5.

అందమైన చందమామ బంధం!

“చందమామ’ అంటే  అమాయకమైన, అందమైన నా బాల్యం!

చందమామ పేజీల్లోకి  చూపులు సారిస్తే.. చెప్పలేనంత పరవశం. ఆ అక్షరాలు ఊహలకు రెక్కలు తొడిగేవి. అద్భుత కథల లోకాల్లోకి అలవోకగా తీసుకెళ్ళేవి. అంతులేని కుతూహలాన్ని రేకెత్తించేవి.

ఉత్కంఠ కలిగించే  కథలూ,  ధారావాహికలూ; కథలో పాత్రలకు  ప్రాణం పోసే అద్భుతమైన రంగుల బొమ్మలూ… !

ముఖ్యంగా జానపద, పౌరాణిక ధారావాహికల్లో పేజీ సైజులో మురిపించే  అపురూప చిత్రాలు నా చిన్ననాటి స్మృతులను  వర్ణ రంజితం చేశాయి.

అవి  ఏవో మామూలు  బొమ్మలని  అనిపించవెప్పుడూ. జీవం తొణికిసలాడుతూ కథల్లో భాగమౌతాయి. చాలాసార్లు  కథలకే  కొత్త అందాలను సంతరిస్తాయి. ఒక్కోసారైతే ఆ  కథలనే  మించిపోయేంతగా  మురిపిస్తుంటాయి!

‘ఎప్పుడైనా అరణ్యాలను చూశావా’ అని ఎవరైనా అడిగితే  ‘లేదు!’ అని చప్పున చెప్పాలనిపించదు.  ఎందుకంటే  కీకారణ్యాలూ,  కారడవులూ నాకు  సుపరిచితమే అనిపిస్తుంది.  అందమైన ఆకులూ, పూలూ, ఫలాలతో పొడుగ్గా, విశాలంగా  పెరిగిన వృక్షాలూ; ఆ చెట్లను పెనవేసుకుపోయే ఊడలూ; నేల మీద హొయలు పోయే రెల్లు పొదలూ … సుదూరంగా కొండలూ … ఇలా అనంతమైన ప్రకృతిలో ఒదిగిన అరణ్య సౌందర్యం చందమామ బొమ్మల్లో అద్భుతంగా  సాక్షాత్కరిస్తుంది.

చందమామ కోసం  ప్రతి నెలా ఆత్రంగా ఎదురుచూసేవాణ్ణి.  మంత్రముగ్ధం చేసే  వ.పా. ముఖచిత్రం, దానిపై సన్నని తెలుపు బోర్డరుతో ఎర్రని  త్రికోణాకృతి… దానిలో ఉండే 1 రూపాయి…  వీటన్నిటినీ తనివి తీరా చూడటం వల్లనేమో  మనసులో  ముద్రించుకుపోయాయి.

మూడు సంవత్సరాల క్రితం కొడవటిగంటి రోహిణీ ప్రసాద్ గారు ‘ఈమాట’ వెబ్ మ్యాగజీన్ లో రాసిన ‘చందమామ జ్ఞాపకాలు’ వ్యాసం చదివాను.  అప్పటివరకూ  చందమామ గురించి నాకు తెలియని ఎన్నో విశేషాలు గ్రహించాను.  చందమామకు అద్భుత ముఖచిత్రాలను అందించిన, ‘మహా భారతం’ పాత్రలకు రూపురేఖలు దిద్దిన-  ఎంటీవీ ఆచార్య అనే గొప్ప చిత్రకారుడి గురించి రోహిణీప్రసాద్ గారి వ్యాసమే పరిచయం చేసింది.

సజీవమైన, చక్కని  తెలుగు వాడుక భాష  చందమామ ద్వారానే నాకు  అందింది. బాల్యంలోనే నాలో తరగని పఠనాసక్తిని పెంచింది  చందమామే!

పది సంవత్సరాల క్రితం చందమామ ప్రచురణ ఆగిపోయినప్పుడు  ఆత్మీయ నేస్తం దూరమైన బాధ. మళ్ళీ  ప్రచురణ ఆరంభమైనపుడు ఎంతో సంబరం !

చందమామ అంటే అక్షరాల్లో సంపూర్ణంగా వ్యక్తం కానంత అపురూపమైన అనుబంధం!”

శ్రీ  సి.హెచ్ వేణు, హైదరాబాద్
‘చంపి’ -చందమామ పిచ్చోళ్లు బృందసభ్యులలో ముఖ్యులు-

5. ‘ఆర్ట్‌బుక్‌’లో చందమామ చిత్రకారులపై ఆంగ్లంలో ఉన్న సమాచారాన్ని యధాతథంగా ఇక్కడ ప్రచురించడమైనది.

SANKAR

Sankar, a professionally trained artist, joined Chandamama in 1952. For nearly six decades,
he has enthralled readers with his artwork. He recalls several touching instances of people
from different parts of the country traveling far to meet him, or calling him up to offer warm words of appreciation. Today, for old and new readers of the magazine, his name is synonymous with Vikram-Vetal. Now in his eighties, Sankar continues to work with the same passion and dedication that he had at the start of his career. Prior to Chandamama, he had worked with a literary magazine, Kalaimagal, Manjari (a digest) and another, Kannan.
He received the Chandamama Excellence Award for Drawing in 2002.

CHITRA

Chitra was ‘discovered’ by Chakrapani. His real name was TV (Tiruvallur Veera) Raghavulu, and he worked for Chandamama from 1947 to 1978, the year he passed away. Chitra was a self-taught artist with no formal training in art. He was also an excellent photographer and some of his works have won awards nationally and internationally. He was in the ARP during the Second World War. Later, he worked with Kleir & Peyerl as a photographer and block maker. Following this, he worked with Oxford University Press as artist and salesman, before joining Chandamama. He consistently did the back cover, called the wrapper, in Chandamama.

MTV ACHARYA

MTV Acharya, a prolific artist, joined Chandamama when the magazine was launched in 1947. Mostly, he worked on cover illustrations. Some of his best works include those done for the Mahabharata series. Later, MTV started an art school in Bangalore, Acharya Chitrakala Parishes, and became the first in Indian history to start a postal art correspondence school. He worked as an art director for several magazines. He was the recipient of several national awards like the Kala Beeshma and Kala Bagheeratha.

VAPA

Vaddari Papayya, affectionately called Vapa, was with Chandamama between 1960 and 1991. With almost 470 covers to his credit, Vapa transformed the face of Chandamama cover art with his explosive palette. His style is unique in that he took care to embed layers of meaning that would reveal themselves only on close examination.

6.

Art Book Add in online chandamama

https://www.chandamamashop.com/index.php?action=productDetails&productId=211

Chandamama Art Book is a unique anthology of art work created by Chandamama’s celebrated artists. Stunning pictures by illustrators such as Sankar, Chitra, M.T.V. Acharya, and Vapa will take you down memory lane. Each illustration is a beautiful depiction of a scene in Chandamama’s favourite stories. With intricate details in vibrant colours, this collection will appeal to everyone.

Specifications: Published in 2 volumes

Size: 9.5 x 12.5 inch
Weight: 2.75 kg’s
Pages: 384  (Two Books)

Language : English
Price        : 1500.00
Overseas Price : $ 60.00

సిహెచ్ వేణు గారూ,
ఆర్ట్ బుక్ సమాచారం కావాలని కోరారు. కాస్త ఆలస్యంగానే అయినా ఆర్ట్ బుక్‌పై స్పందనలను ఇలా కూర్చి పొందుపర్చాము చూడండి. మీ నుంచి ఆర్ట్ బుక్‌పై విశిష్ట వ్యాసం త్వరలోనే ఆశించవచ్చా…?

చందమామ ఆర్ట్‌బుక్ కావాలంటే నేరుగా ముంబై కార్యాలయానికి రూ. 1500 ఎంఓ లేదా చెక్ పంపి తెప్పించుకోవచ్చు. లేదా చెన్నయ్ ఆఫీసు నుంచి కూడా తెప్పించుకోవచ్చు. కావలసినవారు కింది ల్యాండ్ లైన్ లేదా మొబైల్ నంబర్లకు కాల్ చేసి సంప్రదించవచ్చు.

Chandamama India Limited
No.2 Ground Floor, Swathi Enclave
Door Nos.5 & 6 Amman Koil Street
Vadapalani, Chennai – 600026
Phone :  +91 44 43992828 Extn: 819
Mobile : +91 9884612596

RTS Perm Link

చందమామ ద్వారా హిందీ నేర్చుకుంటున్నా…

కొంతకాలం క్రితం చెన్నయ్ చందమామ కార్యాలయానికి ఒక అరుదైన ఉత్తరం వచ్చింది. ఆస్ట్రేలియాలోని సిడ్నీలో ఉంటున్న ఒక ఇంగ్లీషు పెద్దాయన చందమామ సహాయంతో తాను హిందీ నేర్చుకుంటున్న వైనాన్ని  హిందీలో రాసి పంపారు. ఉత్తరంలో అదీ పెన్సిల్‌తో రాసి ఆయన పంపిన ఆ సుదూర ఉత్తరం ఈ అక్టోబర్ నెలలో ప్రచురణకోసం స్వీకరించడమయింది.

హిందీ భాష నేర్చుకునే క్రమంలో గురువు ద్వారా పరిచయమైన చందమామ తన జీవితంలో నూతన ద్వారాలను తెరిపించిందంటున్నారీ పెద్దాయన. ముసలివాడినైన తనకే చందమామ ద్వారా హిందీ నేర్చుకోవడం సాధ్యమవుతున్నప్పుడు మీకెందుకు సాధ్యం కాదు అంటూ పరభాషాల అధ్యయనంపై కొత్త కాంతిని ప్రసరింపజేస్తున్నారీయన.

45 ఏళ్లుగా సాధించలేనిది గత మూడేళ్లుగా గురువులు ద్వారా, చందమామ పత్రిక ద్వారా సాధించగలుగుతున్నాననే సంతోషం ఈ వృద్ధుడిది.

ఈ విదేశీ వృద్ధుడి చందమామ జ్ఞాపకాలు కింద చూడండి.

“మీ పత్రిక ద్వారా, ఇంగ్లీష్ వృద్ధుడినైన నేను హిందీ నేర్చుకోవడంలో చాలా సహాయం పొందగలిగాను. నేను ఇప్పుడు ఆస్ట్రేలియాలో హిందీ భాష నేర్చుకుంటున్నాను. హిందీ భాష నేర్చుకోవడం నాకు మొదట్లో కొంచెం కష్టంగా తోచింది. కాని నా ‘పూజ్య గురుదేవ్’ నాకు చందమామ సంచికను ఇచ్చి దానిద్వారా హిందీ నేర్చుకోమన్నారు. ఆయన ప్రసాదించిన ఈ ఆలోచనాత్మకమైన బహుమతి నా అధ్యయనాన్ని మరింత సులభతరం చేసింది. నిజం చెబుతున్నా చందమామలో నేను చదివిన కథల వంటివి నా జీవితంలో ఇంతవరకు నేను చూడలేదు.

బహుశా, నేను తప్ప ఈ ఆస్ట్రేలియాలో విక్రమ్ బేతాళ కథలు గురించి ఎవరికీ తెలియదనుకుంటున్నాను. మీవల్లే నేను ఇలాంటి కథలు తెలుసుకుంటున్నాను. మీ పత్రిక వల్లే నేనిప్పుడు హిందీని బాగా అర్థం చేసుకుంటున్నాను. గడచిన 45 ఏళ్ళకాలంలో నేను పెద్దగా నేర్చుకోలేకపోయాను. కాని గత మూడేళ్ళనుంచి ఇద్దరు పరమ గురువులు మరియు చందమామ ద్వారా నా జీవితంలో నూతన ద్వారాలు తెరుచుకున్నాయి.

నాకు సాధ్యమైంది మీకెందుకు సాధ్యం కాదు?
అందుకే, పాఠకులకు నేను ఒక విషయం చెప్పాలనుకుంటున్నాను. వయోవృద్ధుడినైన నేనే చందమామ ద్వారా భాష నేర్చుకోగలిగినప్పుడు.. మీకెందుకు సాధ్యపడదు. గుర్తుంచుకోండి. హిందీ,  ప్రపంచంలోని ఏకైక సుందరభాష.

నా ఈ ఉత్తరం ముగించడానికి ముందుగా నా గురువుల పేర్లు వెల్లడించాలనుకుంటున్నాను. దీపాల్ తక్కర్ అనే ఒక గుజరాతీ మహిళ హిందీ అక్షరమాలను, అక్షరాలను సరిగా ఉచ్చరించడాన్ని, అనేక పదాలను రూపొందించడాన్ని నాకు నేర్పించారు. ఆమె ఈరోజుకీ సిడ్నీలో టెలిఫోన్ ద్వారా నాకు హిందీ నేర్చుకోవడంలో శిక్షణ ఇస్తున్నారు. సోదరీ, మీకు నా కృతజ్ఞతలు!

ఇప్పుడు నా ప్రధాన గురువు విద్యాసాగర్ పట్టన్. ఈయనే నాకు తొలిసారిగా చందమామను పరిచయం చేశారు. ఇది నా జ్ఞానాన్ని మరింతగా మెరుగుపర్చింది. ఈ సందర్భంగా, వయసులో చిన్నవాడైన నా గురువుకి నా ఆశీర్వాదాలు.

ప్రియమైన చందమామా…! నీకు ముమ్మారు కృతజ్ఞతలు. నీవు చేపడుతున్న ఈ మంచి కృషిని మరో వంద సంవత్సరాలు కొనసాగించాలని  ప్రార్థిస్తున్నాను.”

ఆండ్రూ హెవెట్, మెల్‌బోర్న్, సిడ్నీ, ఆస్ట్ర్లేలియా 3071

(ఈయన పెన్సిల్‌తో హిందీలో తెల్లకాగితంపై రాసి ఎయిర్ మెయిల్ ద్వారా తన చందమామ విశేషాలు పంపారు. తన ఈమెయిల్, ఫోన్ వివరాలు తెలుసుకోవడానికి ప్రయత్నాలు చేస్తున్నాము.)

RTS Perm Link

విజిటింగ్ కార్డుతోనూ ప్రమాదమే…

అదొక పెట్రోల్ పంపు. తన కారులో పెట్రోల్ పోయించుకుంటున్న మహిళవద్దకు ఒకతను వచ్చి తానొక పెయింటర్ నని చెప్పుకున్నాడు. తన సేవలు అవసరమైతే పిలువమంటూ తన విజిటింగ్ కార్డును ఆమె చేతిలో పెట్టి వెళ్ళాడు. ఆమె మారుమాటాడకుండా తల ఊపి ఆ కార్డును తీసుకుని కారులో కూర్చుంది. ఆ వ్యక్తి కూడా మరొక వ్యక్తి కారులో కూర్చున్నాడు.

పెట్రోల్ పంపు వద్దనుంచి బయటపడ్డ ఆమెకు, అదే సమయంలో తనను ఆ వ్యక్తులిద్దరూ వెంబడిస్తున్నట్లు అర్థమైంది. మరుక్షణంలోనే ఆమెకు కళ్లు తిరిగినట్లయింది. శ్వాస పీల్చడం కూడా ఆమెకు కష్టమైపోయింది. కారు తలుపు తీయడానికి ప్రయత్నించింది. ఇంతలో తన చేతినుంచి ఏదో వాసన వస్తున్నట్లనిపించిందామెకు. పెట్రోల్ బంక్ వద్ద ఆ వ్యక్తి వద్దనుంచి కార్డు తీసుకున్నచేతి నుండే ఆ వాసన వస్తోంది.

ఇంతలో ఆ ఇద్దరు వ్యక్తులూ తనకు అతి సమీపంలోకి వచ్చినట్లు ఆమె గమనించింది. ఏదో ఒకటి తక్షణమే చేయాలని అర్థమై, దారి మలుపులోకి కారును మళ్లించి సహాయం చేయమంటూ అదే పనిగా హారన్ మోగించడం మొదలుపెట్టింది. దీంతో ఆ వ్యక్తులు అక్కడినుంచి వెళ్ళిపోయారు. తర్వాత కూడా ఆమె చాలాసేపు అక్కడే ఇబ్బందిపడుతూ ఉండిపోయింది. చివరకు ఆమె శ్వాస పీల్చుకోసాగింది.

దీనంతటికీ కారణం ఆమె ఆ వ్యక్తినుంచి తీసుకున్న కార్డే. ఆ కార్డుపై పూయబడిన పదార్థం ఆమెను తీవ్రంగా ఇబ్బంది పెట్టింది.

ఆ మందు పేరు బురుండంగ -Burundanga- దీనిగురించి ప్రజలకు పెద్దగా తెలీదు కాని అంతర్జాలంలో దీనిపై చాలా సమాచారమే పొందుపర్చబడి ఉంది. వ్యక్తులకు ఊపిరాడకుండా  నిర్వీర్యులను చేసి వారినుండి ఏదైనా తస్కరించడానికి ఈ డ్రగ్‌ని ఉపయోగిస్తున్నారట. ఇది ‘డేట్ రేప్ డ్రగ్’ కంటే నాలుగింతల ప్రమాదకరంగా ఉంటుందని వార్తలు.

మహిళలపై అత్యాచారం చేయడానికి చాలాకాలంగా ‘మృగాళ్లు’ ఉపయోగిస్తున్న డ్రగ్ ముద్దు పేరు ‘డేట్ రేప్ డ్రగ్’ దీన్ని ఆహారంలో, పానీయంలో కూడా కలిపి ప్రయోగిస్తుంటారు.

‘బురుండంగా’ అని పైన ప్రస్తావించిన మందు సాధారణమైన కార్డు లేదా కాగితంపై కూడా పూసి తీసుకుపోవడానికి వీలుగా ఉంటోందట.

కాబట్టి మీరు ఒంటరిగా ఉన్నప్పుడు, లేదా వీధుల్లో వెళుతున్నప్పుడు పొరపాటుగా కూడా విజిటింగ్ కార్డులు, పత్రాలు వంటివాటిని ఎవరైనా ఇస్తే తీసుకోకూడదని విజ్ఞుల హెచ్చరిక.

మన ఇంటి ముంగిటకు వచ్చి తలుపు తట్టి, ఫలానా సేవలందిస్తామంటూ ఏదో ఒక కార్డు ముక్క చేతుల్లో పెట్టే సందర్బాలకు కూడా ఈ హెచ్చరిక వర్తిస్తుందట.

ఇది ముంబై పోలీస్ బలగాలకు చెందిన ఒక వ్యక్తి ఇటీవల పంపిన ఈమెయిల్ అట.

మీ భార్య, సోదరిలు, కుమార్తెలు, మనవరాళ్ళు, అమ్మలు, స్నేహితురాళ్ళు, సహచరులు -విమెన్ కొల్లీగ్స్- అందరికీ ఈ సందేశాన్ని పంపించవలసిందని ఈ ఈమెయిల్ అభ్యర్థన.

మందుబాబుల పిల్లలపై మన సమాజంలో పడుతున్న తీవ్రమైన దుష్ప్రభావాల గురించి ‘ఆల్కహాలిక్ పిల్లలు‘, ‘బుజ్జి’ అనే రెండు అతి మంచి పుస్తకాలను ఇటీవలే ప్రచురించి ఉచితంగా పంపిణీ చేస్తున్న శ్రీదేవీ మురళీధర్ గారు ఇవ్వాళ ఇంగ్లీషులో పంపిన హెచ్చరిక సందేశానికి తెలుగు సేత ఇది. దీంట్లోని అక్షరాక్షరం వాస్తవమే.

కాని. ఒక్కమాట మాత్రం చెప్పితీరాలి. 20 ఏళ్లకు పైగా పల్లెటూళ్లలో జీవితం గడిపినంత కాలం మా ఊళ్ల ఆడపడుచులకు ఇలాంటి భయాలు ఒక్కటంటే ఒక్కటీ కూడా ఉండేవి కావు. కాస్త ఏమారితే జీవితాలనే మార్చేసే ఇలాంటి భయంకరమైన మందుల గురించీ, మాదక ద్రవ్యాల గురించి, విషపుటాలోచనల ప్రతిబింబాల గురించీ మా ఊహల్లోకూడా అనుభవంలోకి వచ్చేవి కావు.

ఇతరులకు సహాయం చేయి, చెడు సహవాసం చేయకు.. అనే బోధలు మాత్రమే మా ఊళ్లలో వినిపించేవి. కానీ. మనిషి కాదు కదా. వాడిచ్చే కార్డు ముక్కను కూడా నమ్మవద్దని పై సందేశం ఆకాశంలో సగాన్ని హెచ్చరిస్తోంది. పక్క ప్రయాణీకుడిచ్చే బిస్కట్ ముక్క కూడా ముట్టరాదన్న ప్రచారం మన రైళ్లలో ఎప్పుడో మొదలైపోయింది.

అసత్యములాడరాదు, పెద్దలను గౌరవించవలెను అంటూ తరతరాలుగా నీతిబోధలు చేస్తూ వస్తున్న సమాజంలో ఆధునిక నీతి బోధలు ఇలాంటి రూపంలోకి మారుతున్నాయి.

బిస్కట్టును నమ్మవద్దు… కార్డును నమ్మవద్దు.. మనిషిని నమ్మరాదు. మగాడిని, మృగాడిని నమ్మరాదు. మనందరం గర్వంగా చెప్పుకుంటున్న, పిలుచుకుంటున్న ఆధునిక జీవితం మన కళ్లముందే ఎంత పలుచనవుతుందో కదా…!!!

మనుషులను మనుషులే నమ్మడానికి వీల్లేకుండా పోతున్న సమాజ వాస్తవికతను ఇంత నగ్నంగా ఎత్తి చూపే ఈమెయిల్‌ని పంపిన శ్రీదేవి గారూ…

మీకు కృతజ్ఞతలు చెప్పాలా వద్దా అని తటపటాయిస్తున్నానండీ..

RTS Perm Link

మన్నించు మహానుభావా!

చందమామ కార్యాలయానికి ఉదయం యధాప్రకారం బస్సులో వెళుతూ రోజువారీ ఆలవాటుగా పేపర్‌తో పాటు జూలై నెల ‘నడుస్తున్న చరిత్ర’ మాసపత్రిక పేజీలు తిరగేస్తుంటే మధ్యపేజీల్లో ‘మన్నించు మహానుభావా’ అంటూ ఆర్ద్రంగా పలకరించిందో కథనం. ఇటీవలే కన్ను మూసిన నటరాజ రామకృష్ణగారితో మిత్రుడు ఆర్.ఎం. ఉమామహేశ్వరరావు నెమరువేసుకున్న పాత జ్ఞాపకాలకు అక్షరరూపం ఇది. ఈ మూడు పేజీల హృద్య కథనం రెప్పలార్చకుండా చదివినప్పుడు కళ్లు చెమ్మగిల్లాయి.

మన చుట్టూ, మన ఎరుకలోకి రాకుండా, ఎంత మంది మహనీయులు ఒక లక్ష్యం కోసం జీవితకాలం నిబద్ధ కృషి చేస్తూ కనుమరుగవుతున్నారో అనే వేదన మనస్సును కదిలించేసింది. ముఖ్యంగా ఉమా తన నాన్నతోపాటు తొలిసారిగా రామకృష్ణగారిని కలిసినప్పుడు వారికి ఎదురైన అపురూప సత్కారం, వందేళ్లకాలం నుంచి సమాజంచేత చీత్కరించబడుతున్న నాట్యకళాకారిణులను, దేవదాసీల దుర్భరజీవితాలను తల్చుకుంటూ రామకృష్ణ గారు రోదించిన వర్ణన చదువుతున్నప్పుడు… ‘ఆయన నన్ను కోరుకునే కొద్దీ నేను దూరం కావడం మొదలెట్టాను. ఆ మహాకళాకారుడికి అంత దగ్గర ఉండే శక్తి నాకు లేదం’టూ తన కథనాన్ని ఉమా ముగించిన తీరును చూస్తున్నప్పుడు నేనెక్కడ ఉండి చదువుతున్నానో కూడా మర్చిపోయాను.

ఉమా.. పదిహేనేళ్లుగా తిరుపతిలో మీ ఇంటికి ఎప్పుడు వచ్చినా వాలు కుర్చీలో కూర్చున్న భంగిమలో ఉన్న నాన్న ఫోటోని చూస్తుండిపోయానే కాని ఆయన గురించి నాకు పెద్దగా తెలీదు. మిత్ర సంబంధాలకు అవతల మీ ఈ జ్ఞాపకం మీలోని ఓ కొత్త మనిషిని చూపిస్తోంది.

“ఒక్కొక్కసారి ప్రేమనూ అభిమానాన్నీ స్వీకరించడానికి కూడా చాలా శక్తి కావాలి. అంత శక్తి లేక నేను నటరాజ రామకృష్ణను చాలా కోల్పోయాను, సరిగ్గా మా నాయనను కోల్పోయినట్లే.”

“ఇప్పటిదాకా వాళ్ళు జీవించిన జీవితం చెడ్డదని వాళ్ళు అనుకోకూడదు. వాళ్ళు గొప్ప కళాకారులు. కళాకారులమనే తృప్తితోనే వాళ్ళు కన్ను మూయాలి. కన్ను మూయకముందే వాళ్ళకా తృప్తి కలిగించాలి’ అనేవాడాయన.

“నాట్యం కోసం కుటుంబానికి దూరమైన ఆయన శిష్యులమీద ఎంతో నమ్మకం పెట్టుకున్నాడు. ఆశ పెట్టుకున్నాడు. తను నమ్మినవాటి కోసం తన సంపదమంతా ఖర్చు చేసిన ఆయన తన శిష్యులే తన ఆస్తి అనుకున్నాడు. అయితే, యీ ఆశలన్నీ భగ్నమవుతున్నట్టుగా నాకు ఆయన మాటలను బట్టీ అనిపించేది. ఆయన నాట్యకళకు వారసులున్నారు. అద్భుత అభినయాలతో వారు అలరించగలరు. అయితే, ఆయన కోరుకున్న తీరులో మాత్రం ఆ కళావారసత్వం కొనసాగదేమో అనే దిగులు నాకు ఆయనలో కనిపించేది.

ఆంధ్రనాట్యం గురించీ, పురిణి గురించీ ఆయన మాట్లాడే మాటలేవీ నాకు అర్థమయ్యేవి కాదు. అయితే ఆ అద్భుత కళారూపాల వెనుక వున్న కన్నీళ్ల గురించిన ఆయన వేదన మాత్రం నాకు అర్థమయ్యేది. బహుశా అదే ఆయనను నాకూ, నన్ను ఆయనకూ దగ్గర చేసిందేమో. ఆ దగ్గరితనమే నన్ను భయపెట్టేది. ఆయన నన్ను కోరుకునే కొద్దీ నేను దూరం కావడం మొదలుపెట్టాను. ఆ మహాకళాకారుడికి అంత దగ్గరగా వుండే శక్తి నాకు లేదు. ఆయన ఆఖరి రోజుల్లోగానీ, ఆయన మరణించిన తర్వాత గానీ నేను హైదరాబాద్‌ వెళ్ళలేదు. వెళ్ళే శక్తి నాకు లేకపోయింది.”

నటరాజ రామకృష్ణ గారి ఆంతరంగిక హృదయాన్ని స్పర్శిస్తున్న ఈ అపురూప కథనంకోసం కింది లింకును చూడండి.

మన్నించు మహానుభావా!
http://maavooru.wordpress.com/2011/07/15/%E0%B0%AE%E0%B0%A8%E0%B1%8D%E0%B0%A8%E0%B0%BF%E0%B0%82%E0%B0%9A%E0%B1%81-%E0%B0%AE%E0%B0%B9%E0%B0%BE%E0%B0%A8%E0%B1%81%E0%B0%AD%E0%B0%BE%E0%B0%B5%E0%B0%BE/

RTS Perm Link

చందమామ కథ

చందమామ చరిత్రకు సంబంధించి 2006 సంవత్సరానికి ఓ విశిష్టత ఉంది. చందమామ అంతర్గత విషయాల గురించి లక్షలాదిమంది పాఠకులకు ఇటు ప్రింట్‌లోనూ, అటు ఆన్‌లైన్‌లోనూ తొలిసారిగా పరిచయం చేసిన సంవత్సరమది. దీనికి ఈమాట.కామ్ వెబ్‌సైట్‌లో అంకురార్పణ చేసినవారు కొడవటిగంటి రోహిణీ ప్రసాద్ గారు, తర్వాత చందమామ కథ పేరిట ఈనాడులో ఆదివారం అనుబంధంలో వచ్చిన ప్రధాన కథనం. తర్వాత తెలుగు వికీపీడియా వెబ్‌సైట్‌లో చందమామ అభిమానులు కొందరు కలిసి చందమామ విశిష్ట చరిత్రపై రాసిన బృహత్ వ్యాసం.

ఈ మూడు కథనాలు అప్పటినుంచి ఇప్పటి దాకా చందమామ గురించి తెలుసుకోవాలనుకునేవారికి కరదీపికలాగా ఉపయోగపడుతున్నాయి. ఆ తర్వాత సర్వశ్రీ వసుంధర, త్రివిక్రమ్, శివరామ్ ప్రసాద్, బ్లాగాగ్ని, నాగమురళి, సిహెచ్ వేణు, సుజాత, రవి, రవిచంద్ర, తదితర బ్లాగర్లు, రచయితలెందరో తమకు తెలిసిన చందమామ గురించి ప్రధానంగా ఆన్‌లైన్ పాఠకులతో పంచుకున్నారు. పంచుకుంటున్నారు.

ప్రత్యేకించి శ్రీ కప్పగంతు శివరాం ప్రసాద్ గారి ఆధ్వర్యంలో కేవలం తెలుగు చందమామ పాత చరిత్రను తడుముతున్న వ్యాసాలు, కథనాలను ప్రచురిస్తూ ఆన్‌లైన్ పాఠకులకు పరిచయం చేస్తున్న మనతెలుగుచందమామ బ్లాగ్ తెలుగు బ్లాగుల్లో ఒక ప్రత్యేక బ్లాగుగా నిలిచింది.
http://manateluguchandamama.blogspot.com

(చందమామ గురించి రాయదలిచిన వారందరికీ ప్రచురించడానికి అవకాశమిస్తూ ఈ విశిష్ట బ్లాగ్ పాఠకుల ఆదరణ పొందుతోంది. దీన్ని గురించి మరొక సారి వివరంగా చర్చించుకుందాం.)

కొన్ని నెలలక్రితం శివరాం ప్రసాద్ గారు ‘మనతెలుగుచందమామ’ బ్లాగును ‘అలనాటితెలుగుచందమామ’ గా పేరు మార్చారు. కింది లింకును చూడగలరు

http://alanaatiteluguchandamaama.blogspot.com

“చందమామ” జ్ఞాపకాలు
కొడవటిగంటి రోహిణీ ప్రసాద్
http://www.eemaata.com/issue41/chandamama.html

ఈమాట.కామ్ వెబ్‌సైట్‌లో 2006 జనవరి సంచికలో ఇది ప్రచురించబడింది. చందమామ చరిత్రకు సంబంధించి గత దశాబ్దంలో ఆన్‌లైన్ పాఠకులకు అందుబాటులోకి వచ్చిన మొట్టమొదటి రచన ఇది.

1960 ప్రాంతాల్లో సెలవురోజుల్లో చందమామ ఆపీసుకు వెళ్లి రోజంతా గడుపుతూ పొందిన అరుదైన చందమామ జ్ఞాపకాలను కొడవటిగంటి రోహిణీ ప్రసాద్ గారు ఈ పెద్ద వ్యాసంలో వివరించారు. చందమామ లోపలి చరిత్రను సూచనప్రాయంగా తడిమిన తొలిరచన కావడంతో ఇది విశేష ప్రాచుర్యం పొందింది. గత అయిదేళ్లుగా ఈ కథనాన్ని చందమామ అభిమానులు నిరంతరం చదువుతూ ఉపయోగరకమైన లింకులు అందిస్తూ, అభిప్రాయాలు ప్రచురిస్తూ దీన్ని చందమామ నిత్య కరదీపికగా నిలబెడుతూ వస్తున్నారు.

“చందమామ” బృహత్ వ్యాసం
తర్వాత తెలుగు వికీపీడియాలో  చందమామ గురించిన తొలి పరిచయం 2006 ఏప్రిల్ 12న జరిగింది. -నిర్దిష్టంగా ఏ తేదీన తెవికీలో చందమామ వ్యాసం సంక్షిప్త భాగం ప్రచురించారో, ప్రస్తుతం దీంట్లో మనందరం చూస్తున్న ప్రధాన వ్యాసం ఎప్పుడు పూర్తి చేశారో తెలీదు. (తెవికీలో చందమామపై పెద్ద వ్యాసం రచనలో పాలుపంచుకున్న అభిమానులందరి పేర్లను త్రివిక్రమ్ గారు తెలిపితే చరిత్రకు ఉపయోగకరంగా ఉంటుంది) ఎంతమంది చందమామ అభిమానులు ఈ బృహత్ వ్యాస రూపకల్పనలో పాలు పంచుకున్నారో తెలీదు కాని, తెవికీ చరిత్రలోనే వందలసార్లు చేర్చి, దిద్ది, సవరించి ప్రచురించిన కొద్ది వ్యాసాలలో ఇదీ ఒకటి.

http://te.wikipedia.org/wiki/%E0%B0%9A%E0%B0%82%E0%B0%A6%E0%B0%AE%E0%B0%BE%E0%B0%AE

చందమామ కథ
2006 నవంబర్ 12న ఈనాడు ఆదివారం అనుబందంలో వచ్చిన చందమామ కథ లక్షలాది మంది పాఠకులను అచ్చురూపంలో చేరి ఉర్రూతలూగించింది. చందమామ చరిత్ర కథను బేతాళుడు చెబుతున్నట్లుగా రూపొందిన ఈ అయిదు పేజీలవ్యాసం చందమామ అద్భుత పయనాన్ని, భారతీయ పాఠకుల ఊహాకల్పనపై అది అద్దిన పంచరంగులను అత్యంత ఆకర్షణీయంగా అచ్చురూపంలో పరిచింది.

రోహిణీ ప్రసాద్ గారి చందమామ జ్ఞాపకాలు వ్యాసం, వికీపీడియాలో వచ్చిన చందమామ వ్యాసం ఈ నాటికీ అంతర్జాల పాఠకులకు అందుబాటులో ఉంటూ వస్తున్నాయి. కాని ఈనాడు ఆన్‌లైన్‌లో వారు ప్రచురించిన చందమామ కథ లింకు చాలాకాలంగా అందుబాటులో లేకుండా పోయింది. సంవత్సరం తర్వాత ఆన్‌లైన్ పత్రికలలోని పాత లింకులను చెరిపివేస్తున్నందున ఈ అపురూప కథనం పాఠకులకు అందుబాటులో లేకుండా పోయింది. 2008లో వికీపీడియాలో చందమామపై కథనం చదివినప్పటినుంచి నేను చెరిపివేయబడిన ఈ లింకుకోసం, చందమామ కథ వ్యాసం ప్రింటవుట్ల కోసం తీవ్రంగా ప్రయత్నిస్తూనే ఉన్నాను. కాని ఫలితం లేకపోయింది.

చిట్ట చివరకు చందమామ ప్రియమిత్రుడు, సిహెచ్ వేణు గారు ఈనాడులో వచ్చిన చందమామ కథ ఫైళ్లను శ్రమతీసుకుని మరీ పంపారు. భారతీయ సాంస్కృతిక రాయబారిగా, మన సాంస్కృతిక వారసత్వంగా ప్రశంసలందుకుంటున్న చందమామ ఉజ్వల చరిత్రను తెలిపే ఈ అరుదైన కథనాన్ని ఇక్కడ ఇమేజ్‌ల రూపంలో చూడండి.

చందమామ చరిత్రపై ఒక అరుదైన వ్యాసం కనుమరుగు కాకుండా తోడ్పడిన వేణుగారికి కృతజ్ఞతాభివందనలు.

అలాగే….

అయిదేళ్ల క్రితమే తెలుగు చందమామ పాఠకుల హృదయాలను రంజింప చేస్తూ ఇంత చక్కటి కథనాన్ని ప్రచురించిన ఈనాడు పత్రికకు ప్రత్యేక కృతజ్ఞతలు.

ఈనాడు పత్రిక సౌజన్యంతో…

ఇప్పుడు చందమామ కథను ఇక్కడ చూడండి.

గమనిక: నేరుగా ఇక్కడ ఇమేజ్‌లను చూస్తుంటే అక్షరాలు చిన్నవిగా ఉండి కనిపించటం లేదు. ఇమేజ్‌పై క్లిక్ చేసి మరో విండోలో తెరువబడిన ఇమేజీని కుడి క్లిక్ చేస్తే కాస్త స్పష్టంగా కనబడుతోంది. పరిష్కారం దొరికితే సరిచేయడం జరుగుతుంది. ప్రింటవుట్ తీసుకుంటే ఇది మంచి క్వాలిటీతో వస్తోంది.

చందమామ కథ

చందమామలు 2

చందమామ కథ 3

చందమామ కథ 4

చందమామ కథ 5

RTS Perm Link

చిన్ని చిన్ని అపార్థాలు

ఇది ఇద్దరు అన్నాచెల్లెళ్ల మధ్య నడిచిన ఎస్ఎమ్ఎస్ సంభాషణ.

ఆరోజు అన్న పుట్టినరోజు. ఆ అమ్మాయి తన 18వ పుట్టిన రోజు జరుపుకున్న అయిదు రోజుల తర్వాత అతడి పుట్టినరోజు వచ్చింది. కాని అతడు ఆమెకు శుభాకాంక్షలు చెప్పడం మర్చిపోయాడు. అప్పుడు చెల్లెలు అతడికి ఇలా సందేశం పెట్టంది.

“అన్నా! నీకో కథ  చెబుతాను వినాలి మరి. ఒక అమ్మాయి తన 18వ పుట్టిన రోజున తన సోదరుడు తనకు జన్మదిన శుభాకాంక్షలు చెబుతాడని ఆరోజు రాత్రి 11. 59 నిమిషాల వరకు ఎదురుచూసింది. కానీ, ఆమె శుభాకాంక్షలను అందుకోనేలేదు. తర్వాత అయిదురోజుల పాటు ఆమె ఆగ్రహంతో, ఆశాభంగంతో గడిపింది. చివరికి అతడి జన్మదినం రానే వచ్చింది. ఆమె మనస్సులో, హృదయంలో పెద్ద పోరాటం. ఆమె హృదయం చెప్పింది. “అతడికి శుభాకాంక్షలు చెప్పు” కానీ ఆమె మనస్సు తిరగబడింది. అప్పుడామెలో పెద్ద డైలమా. అప్పుడు ఆ సోదరుడు ఏం చేసి ఉంటాడో నాకు చెప్పు. ఆమె డైలమా ఎలా తొలిగిపోయి ఉంటుంది?”

అప్పుడామె తిరుగు సందేశంలో అందుకున్న సమాధానం:

“అన్న ఆమెతో ఇలా చెప్పి ఉంటాడు.” ‘జూన్ 23వ తేదీని నేనెలా మర్చిపోయాను? ఆఫీసులో కాస్త పని ఒత్తిడిలో ఉండి ఉన్నప్పటికీ ఆ విషయం మర్చిపోయి ఉండకూడదు. జరిగిన పొరపాటుకు నేను హృదయపూర్వకంగా క్షమాపణలు తెలియజేస్తున్నా..

…కాని.. ఒకటి మాత్రం నిజం..ఆ చెల్లెలు పది కిలోల బరువున్నప్పుడు నేను ఎత్తుకుని పెంచిన చెల్లెలే అనడంలో సందేహం లేదు. సరైన సందర్భంలో, సకాలంలో అతడి నోటినుంచి ఎలాంటి  మాటలూ రానప్పటికీ, అన్న మనసులో ఏముంటుందో తనకు తెలుసు. ఆమెకు తెలియదా? తను ఇప్పుడు ఎదుర్కొంటున్న డైలమ్మా వెనుక ఆమె మనసులో ఏం దాగి ఉందో నాకు తెలీదా మరి!”

అన్న పంపిన సందేశం చివరి వాక్యం చదివీ చదవక ముందే ఆమె కళ్లలో ధారలుగా కన్నీళ్లు… గొంతు పెగల్లేదామెకు. నోట మాట లేదు. స్థాణువైపోయింది. పై ఎస్ఎమ్ఎస్ చదువుతున్నప్పుడు ఆమె కాలేజీ బస్సుకోసం వేచి ఉంటోంది. అందరూ తననే చూస్తున్నారని గ్రహించడానికి ఆమెకు కాసింత సమయం పట్టింది. అప్పుడామె కళ్లలో పడిన దుమ్మును తుడుచుకుంటున్నట్లు నటించింది. తను ఏడవడానికి కారణం కంట్లో దుమ్మే అని ఆమె భ్రమింపజేసి ఉండవచ్చు.

కానీ…. వాస్తవానికి తన సోదరుడికి తనపట్ల ఉన్న ప్రేమ గురించి తన మనసులో ఏర్పడిన సందేహాలను తుడుచుకోవడానికి ఆమె అలా వ్యవహరించి ఉండవచ్చు…

ఆ చెల్లెలు ఎవరో కాదు… నేనే.. లవ్ యు బ్రదర్….”

శ్రుతి మురళి, బీడీఎస్ ప్రధమ సంవత్సరం, శ్రీవేంకటేశ్వర డెంటల్ కాలేజ్, తలంబూర్, తమిళనాడు

హిందూ పత్రిక చెన్నయ్ టాబ్లాయిడ్‌లో ఇవ్వాళ -21-07-2011-న వచ్చిన “Little misunderstandings” పేరిట వచ్చిన  కథనాని‌కి ఇది తెలుగు పరిచయం.

(నిన్న గాక మొన్న దారుణంగా కనుమరుగైపోయిన గీతా ప్రియదర్శిని జ్ఞాపకాలకోసం ఈ పోస్ట్…)

2.  ఆదిరెడ్డి దాకా…..

ఈ రోజే ఢిల్లీలో ఆదిరెడ్డి ఆత్మహత్య… తెలంగాణా ప్రత్యేక రాష్ట్రంకోసం జరుగుతున్న ఆత్మబలిదానాల్లో ఇది తాజా దుర్ఘటన… శవానికి కూడా ఎపీ భవన్‌లో చోటు లోని ఘోరం.  కొన్ని నెలల మౌనం తర్వాత మళ్లీ కొన్ని సందేహాలు….

అన్నెం పున్నెం ఎరుగని పసిబిడ్డలు వందలమంది భావోద్రేకం సాక్షిగా శలభాల్లా మాడిపోతున్నారు. చివరికి ఎవరి ప్రయోజనాల కొమ్ముగాయడానికి తమ ప్రాణాలను ఫణంగా పెట్టి పసిపిల్లలు ఇలా మృత్యుధిక్కారాన్ని ప్రకటిస్తున్నారో బోధపడటం లేదు. గత సంవత్సర కాలం పైగా 600కు పైబడిన మరణాలు. భావోద్వేగంతో చెప్పాలంటే అమరత్వాలు….

నిర్భీతిగా ఒక విషయాన్ని అడగాలని ఉంది.. ఆంధ్ర రాష్ట్రంలో ఈ కొసనా, ఆ కోసనా  ఏ ఒక్క రాజకీయ నేత సంతానం, ఒక్క ప్రజాప్రతినిధి సంతానం కూడా ప్రాణత్యాగం చేసిన ఘటన లేదు. ఒక్క ప్రముఖ నేత కుమారుడు లేదా కుమార్తె జైలు పాలయిన చరిత్రలేదు. వీరి లక్ష్యసాధనలో ఒక్కడంటే ఒక్క నేత కొడుకు కూడా బలయిన చరిత్ర భూతద్దంలో గాలించినా కానరావడం లేదు. వీళ్లంతా ఉన్నత విద్యల కోసం అటు అమెరికా బాట లేదా ఇటు కోస్తా బాట పట్టారేమో తెలీదు.

వీళ్ల తండ్రులు మాత్రం ఉద్యమం పేరిట తోటి ప్రజాప్రతినిధులను, దళిత అధికారులను చావగొడుతూ, స్వచర్మ రక్షణకోసం బలవంతపు క్షమాపణలు ప్రకటిస్తూ చరిత్ర క్రమంలో బతికేస్తుంటారు.

కాని బలిదానాల చరిత్రలో కూడా ఈ అన్యాయ పరంపర కొనసాగుతున్న దారుణం మాటేమిటి?

ఇంత పెద్ద అపార్ధాలు చోటు చేసుకున్నాక, పెంచి పోషించబడుతున్న విద్వేషాగ్ని ఇంత ఉచ్ఛనీచాలెరుగని భాషాప్రయోగాలతో దాడికి దిగటం మొదలయ్యాక….

నూనూగు మీసాల నవయువకుల్లారా? మీ బలిదానాల చరిత్ర మన జాతికి మంచి చేయాలని మాత్రమే కోరుకుంటున్నాను. కడుపుమంటలోంచి, అరవై ఏళ్ల అవమానాల  సుదీర్ఘ చరిత్ర నుంచి పుట్టుకొస్తున్న మీ త్యాగం అంతిమంగా పరాన్నభుక్కుల పాలబడరాదని మాత్రమే మనసా వాచా కోరుకుంటున్నాం.

విలువైన జీవితాలను తృణప్రాయంగా ధారపోస్తున్న మీ అమరత్వానికి మకిలి అంటకూడదని, మీ నిస్వార్థం నిర్మలంగా నిలిచిపోవాలని ఆశిస్తున్నాం.

ప్రత్యేక రాష్ట్రం కనుచూపు మేరలో కనబడటం లేదని స్పష్టమవుతున్న వేళ…

తెలంగాణా “ప్రజల” న్యాయమైన ఆకాంక్ష ఫలించాలని మనసారా కోరుకుంటూ..
ఆదిరెడ్డికి, ఆరువందలమంది ప్రాణ త్యాగులకు కన్నీటి నివాళులతో…

RTS Perm Link