(చందమామ అనుకోగానే గుర్తొచ్చేవి బొమ్మలే అంటున్నారు మేధాగారు. చందమామలో కథల కంటే కూడా బొమ్మలు చాలా బావుండేవని తన అభిప్రాయం. యువరాణి ఎంత అందంగా ఉంటుందో చూడాలంటే చందమామలోనే చూడాలంటున్నారు. కథలు కూడా ఏ వ్యక్తిత్వ వికాసానికీ తీసిపోని విజ్ఞాన గనులట. “గుణపాఠాలు నేర్చుకునే కధలు, మార్పు(పశ్చాత్తాపం) గురించిన కధలు, మంచిగా ఉండేవాళ్ల కధలు.. చిన్నప్పటి నుండి ఇలాంటివి చదవడం వల్ల, మనకి తెలియకుండానే ఎన్నో మంచి విషయాలు నేర్చుకుంటాం.. ఎప్పుడైనా తప్పు చేయాల్సి వచ్చినా భయమేస్తుంది, ఆ కధలోలా నాకు కూడా ఏమైనా జరుగుతుందేమో అని..” అంటున్నారు.

తరాలుగా చందమామను చదువుతూ వచ్చిన వారి మనోభావాలకు చందమామ జ్ఞాపకాలు ఓ ప్రతీక. ‘మా బామ్మ చదివింది చందమామ, మా అమ్మ చదివింది చందమామ, నేను చదివాను చందమామ..’ అంటూ గ్రైఫ్ వాటర్ ప్రకటనను గుర్తు చేయడం ద్వారా చందమామను ఇంటిల్లిపాదీ ఎలా తమ హృదయాలకు హత్తుకునేవారో తేల్చి చెప్పారు. చక్కటి చందమామ జ్ఞాపకాలు పంపిన మేధాగారికి కృతజ్ఞతాభినవందనలు. నాలోనేను పేరిట చక్కటి బ్లాగును కూడా తను నిర్వహిస్తున్నారు.

“ఇప్పటికీ బస్టాండ్‌లో బస్ కోసం నించున్నప్పుడు నాన్నగారు ‘చందమామ తీసుకురానా!’ అంటుంటారు..” బిడ్డకు చందమామను కొనిపెట్టే తండ్రి… చందమామను పిల్లలకు కొని ఇవ్వగలిగిన తెలుగు కుటుంబాలు గత కొన్ని దశాబ్దాలుగా ఇదే పని చేస్తున్నాయనుకుంటాను. ఏమయినా మీ జన్మ ధన్యమైనది. మీ నాన్నగారికి చందమామ తరపున మనఃపూర్వక వందనాలు.

మేధాగారి చందమామ జ్ఞాపకాల పూర్తి పాఠాన్ని ఇక్కడ చదవండి.)

చందమామ – 1970/80/90 ల తరానికి పరిచయం అక్కర్లేని పత్రిక.. పిల్లల పత్రికల్లో అగ్రతాంబూలం అందిపుచ్చుకున్న పత్రిక. కేవలం పిల్లల పత్రిక అంటే, చంపిలు నా మీద దండెత్తే ప్రమాదం కూడా ఉంది..

చందమామతో పరిచయం ఎలా జరిగిందో గుర్తు లేదు కానీ, నేను చదివిన మొదటి పుస్తకం మాత్రం చందమామే!.. అదేదో గ్రైఫ్‌వాటర్ ప్రకటనలోలా, మా బామ్మ చదివింది చందమామ, మా అమ్మ చదివింది చందమామ, నేను చదివాను చందమామ..!

అప్పట్లో చందమామ వస్తుంది అంటే చకోర పక్షుల్లా ఎదురు చూసే వాళ్ళం.. మేము ఉన్న ఊర్లో ఈ పుస్తకాలు దొరికేవి కాదు, అందుకని ప్రక్క ఊరికి వెళ్ళి తీసుకు వచ్చేవారు నాన్నగారు.. ఈ రోజు వెళ్ళి తీసుకు వస్తాను అంటే, నాన్నగారు వచ్చేసరికల్లా, చదువంతా పూర్తి చేసుకుని, ఎదురు చూస్తూ ఉండేవాళ్ళం.. అది రాగానే, నా కంటే నాకు అని గొడవలు, పోట్లాటలు..

చందమామ అనుకోగానే, గుర్తొచ్చేవి బొమ్మలు.. కధల కంటే కూడా బొమ్మలు చాలా బావుండేవి.. రాము(రాముడు మంచి బాలుడు) ఇలానే ఉంటాడేమో.. పాపం విక్రమార్కుడు ఇలా బేతాళుడిని మోసుకువెళ్ళేవాడా, అబ్బ ఆ యువరాణి ఎంత అందంగా ఉందో! గయ్యాళి గంగమ్మ ఇలానే ఉంటుందా.. బొమ్మలు అంటే ముఖచిత్రం గురించి కూడా చెప్పాలి.. ఆ నెలలో ఏమైనా పండగలు ఉంటే వాటికి తగ్గ బొమ్మలతో అందంగా ముస్తాబై ఉండేది..

కధల గురించి చెప్పుకోవాల్సి వస్తే, ఏ వ్యక్తిత్వ వికాసానికి తీసిపోని విజ్ఞాన గనులు. విలువలు నేర్పుతూ, ఊహాశక్తిని పెంపొందిస్తూ, సమస్యల చిక్కుముడులు ఎలా విప్పదీయాలో చూపిస్తూ, క్రొత్త విషయాలు నేర్పుతూ, చరిత్రని గురించిన సంగతులు, పురాణాలు, ఇతిహాసాలు.. ఒహటేమిటి, అదీ-ఇదీ అని కాదు, లేనిది లేనే లేదు..

నీతి కధల్లోనే ఎన్నో రకాలు.. గుణపాఠాలు నేర్చుకునే కధలు, మార్పు(పశ్చాత్తాపం) గురించిన కధలు, మంచిగా ఉండేవాళ్ల కధలు – ఇలా ఎన్నో.. చిన్నప్పటి నుండి ఇలాంటివి చదవడం వల్ల, మనకి తెలియకుండానే ఎన్నో మంచి విషయాలు నేర్చుకుంటాం.. ఎప్పుడైనా తప్పు చేయాల్సి వచ్చినా భయమేస్తుంది, ఆ కధలోలా నాకు కూడా ఏమైనా జరుగుతుందేమో అని.. అలా పిల్లల వ్యక్తిత్వాలని తీర్చిదిద్దే పత్రిక చందమామ అంటే అతిశయోక్తి కాదేమో..

ఇక విక్రమార్కుడి కధలు అసలు సిసలు విశ్లేషణా సామర్థ్యం ఉన్న కధలు.. మరీ చిన్నప్పుడు ముగింపు చదివితే తప్ప ఇలా పరిష్కరిస్తారు అని తెలిసేది కాదు.. తరువాత తరువాత కాస్త కాస్త విశ్లేషణ చేయడం, అప్పుడప్పుడు నేను అనుకున్నట్లు లేకపోతే అమ్మతో ఎందుకు ఇలా ఉంది, ఇలా కూడా ఉండచ్చు కదా అని వాదనలు.

ఇక సీరియల్స్.. యండమూరిలు, యధ్ధనపూడిలు, డాన్ బ్రౌన్‌లు సరిపోరు అనిపిస్తుంది.. ఆ సీరియల్ కోసం మళ్ళీ నెల ఆగాలంటే అమ్మో అనిపించేది.. ముగింపు వచ్చిన సంచిక ప్రక్కన పెట్టుకుని మళ్ళీ అన్ని భాగాలు చదివితే తప్ప తృప్తిగా ఉండేది కాదు.

వీటన్నింటితో పాటు, ప్రముఖుల జీవిత చరిత్రలు చిట్టి-పొట్టి కధల రూపంలో వస్తుండేవి.. ఇక్కడ కూడా మళ్ళీ బొమ్మలదే ప్రముఖ పాత్ర..

మొదట్లో సంపాదకీయం చదివేదాన్ని కాదు కానీ, కొంచెం పెద్దయిన తరువాత అది కూడా చదవడం మొదలుపెట్టాను.. తక్కువ పదాలలో, చెప్పదలుచుకున్న విషయాన్ని సూటిగా ఎలా చెప్పాలో తెలుస్తుంది!

ఇవన్నీ ఒకెత్తు, పురాణాల గురించిన కధలు ఇంకో ఎత్తు. ఇప్పుడంటే డేటాబేస్ బాగా దెబ్బతింది కానీ అప్పట్లో, పురాణాలలో ఏ కధ గురించి అడిగినా కూడా తడుముకోకుండా చెప్పగలిగి ఉండేదాన్ని.. మా తమ్ముడైతే ఒకడుగు ముందుకేసి, మా పిన్నిలని, మామయ్యలని ఎక్కడెక్కడి ప్రశ్నలో అడిగి వాళ్ళని ఇబ్బంది పెడుతూ ఉండేవాడు.

ఇంకా ప్రకటనలు, మీకు తెలుసా అంటూ క్విజ్‍లు, బొమ్మకి వ్యాఖ్యలు.. అదో నోస్టాల్జియా..

కొసమెరుపేంటంటే, ఇప్పటికీ బస్టాండ్‌లో బస్ కోసం నించున్నప్పుడు నాన్నగారు ‘చందమామ తీసుకురానా!’ అంటుంటారు..

–మేధా
http://nalonenu.blogspot.com

మేధాగారి చందమామ జ్ఞాపకాలను చందమామ వెబ్‌సైట్‌లో కూడా కింది లింకులో చూడగలరు
http://www.chandamama.com/lang/story/stories.php?lng=TEL&mId=12&cId=49&stId=2433

మీ చందమామ జ్ఞాపకాలను కూడా రాసి కింది లింకుకు పంపగలరు.
abhiprayam@chandamama.com

RTS Perm Link

చిన్న కథే అయినా మనిషి కష్టాలు చూసి దయ్యమే భయపడి మనుషులను పీడించుకు తినడం ఆపేసిందని ముగించడం చాలా బాగుందని శంకర్ గారు చెప్పారు. దయ్యం కథ మళ్లీ చాన్నాళ్ల తర్వాత చందమామలో రాబోతోందని  సంతోషపడ్డారు. ‘ఇలాంటి కథలే కావాలి. ఎందుకు చందమామలో కార్టూన్లు, లోకజ్ఞానం ఇలా  రకరకాల విషయాలు రాస్తున్నారం’టూ బాధపడ్డారు.

‘చందమామ అంటే పూర్తి పేజీలలో కథలు ఉండాలని కథలు లేకుండా చందమామను నింపడం ఏమిట’ని ఆయన దెప్పి పొడిచారు. ఇన్ని సంవత్సరాలుగా చందమామ వస్తోందంటే  కారణం కథలేనని, కథల కోసమే చందమామను చదువుతున్నారని ఆయన అమూల్యమైన అభిప్రాయం  చెప్పారు.

పేదవాళ్లకు, పనిపాటలు చేసుకుంటూ కాస్త తీరిక సమమంలో చదువుకునేందుకు కథలు తప్ప జీకేలు, కార్టూన్‌లు ఉపయోగపడవని, కష్టజీవులకు కాస్త సరదా తెప్పించేందుకు, శ్రమను మరిపించేందుకోసమే చందమామ కథలు ముందునుంచి ప్రయత్నించాయని కథల స్థానంలో కార్టూన్లు, జీకెలు వేస్తే ఎవరికి అవసరమని ఆయన ఢంకా భజాయించారు.

ఆయన మాటలు వింటూంటే ఆ క్షణం నా నోట్లో ఎవరో అమృతం పోసినట్లయ్యింది. చందమామ కథలు ఎవరికోసం ఉంటూ వచ్చాయో. ఎవరికి ఉపయోగపడ్డాయో ఇంత అధ్భుతంగా చెప్పగా నేనింతకు ముందు ఎన్నడూ వినలేదు. ఒక్కసారిగా నా బాల్యం కళ్లముందు సాక్షాత్కరించింది.

పల్లెల్లో వ్యవసాయానికి కరెంట్ పగలు నాలుగు గంటలు, రాత్రి నాలుగు గంటలు మాత్రమే ఇచ్చిన ఆ కాలంలో -1970లు- అప్పుడే మా ప్రాంతాల్లో పరిచయమయిన కరెంట్ మోటర్‌ను ఆన్ చేసి పొలాలకు నీళ్లు మలపడం, బావిలో నీళ్లు అయిపోతాయోమే మోటర్‌లో గాలిపోతే మళ్లీ ఆన్ కాదేమో అని భయంతో పొలంకాడికి, దగ్గరే ఉన్న బావికాడికి  చక్కర్లు కొడుతూ ఉన్నప్పుడు మాకు చందమామే అప్తబంధువయ్యేది.

ఒక పొలంలో నీళ్లు తడుపుతూ మరో పొలానికి నీళ్లు మలిపే మధ్య కాలంలో దొరికే విరామాన్ని చందమామను చదువుతూనే గడిపేశాం. ఇంకా రాత్రి పూట పొలాలకు నీళ్లు పెట్టవలసి వస్తే లైటు అవసరం లేని సమయంలో కూడా ఆపివేయకుండా దాన్ని అలాగే వుంచి ఆ వెలుతురులో  కొత్త చందమామను చదివి సంతోషపడిన రోజులు మావి. ఎందుకంటే పగటిపూట చందమామ చదివేందుకు ఇళ్లలో చాలా పోటీ ఉండేది. ఒక పట్టాన దొరికేది కాదు.

‘నెలరోజులు పనిచేయవలిసిన లైట్ అప్పుడే కాలిపోయిందేమిట్రా బ్యాటరీలు తింటున్నారా ఏమి అంటూ మా పెద్దవాళ్లు ఎగిరితే మాకేం తెలుసు పొలంకాడికి తీసుకుపోయాం అంతే’ అని అమాయకంగా ముఖం పెట్టి తప్పుకోవడం మర్చిపోగలమా..

శంకర్ గారూ! ఎంత మంచి విషయాలు మళ్లీ గుర్తుచేశారు మీరు. నిజంగా చందమామ పేదవాళ్లకు, పని పాటలు చేసుకుని అలసట తీర్చుకునే వాళ్లకు ఎంత చక్కగా ఉపయోగపడిందో. పేరుకు  దయ్యం కథ అనగానే మూడనమ్మకాలను మళ్లీ ప్రచారం చేస్తున్నట్లు విమర్శలు రావడం సహజమే కానీ, చీకటిని ఇంకా అనుభవిస్తున్న, చీకటిలో ఇంకా ప్రయాణాలు కొనసాగిస్తున్న భారతీయ ప్రజలకు దయ్య్యం అనే భావనను మర్చిపోవడం సులభం కాదు.

నడిరాత్రులు పక్క ఊళ్లనుంచి వస్తూ దట్టంగా ఉన్న చెట్ల ఆకులు కదిలితే, ఉన్నట్లుండి పక్కనే ఉన్న చెట్టు కొమ్మ విరిగి పడితే చచ్చాన్లో బాబోయ్ అంటూ పరుగుపెడుతున్న గాఢాంథకారపు అనుభవం ఇంకా మన మనస్సులలో మిగిలే ఉంది.

ఇలాంటి వారు చింతచెట్టుమీద దయ్యం గురించి చదివితే, ఆ దయ్యం కూడా మనిషి కష్టాలు దయ్యం పెట్టే బాధల కంటే ఎక్కువ అనే సత్యాన్ని గ్రహించి అప్పటినుంచి అది మనుషులను పీడించడం మానుకున్న వైనం చదివితే వారి మనస్సుకు ఎంత ఆహ్లాదంగా ఉంటుంది. అందుకే చందమామ కథను లక్షలాది మంది భారతీయులు తమ స్వంత జీవిత అనుభవాలతో పోల్చుకుని పరవశించడం. దశాబ్దాలుగా ఇదే తీరు.

చందమామలో దయ్యం కథలు మళ్లీ  వేస్తే ఎక్కడ విమర్శలు  వస్తాయో అనే భయంతోనే వేసి చూద్దాం ఏమవుతుందో అని సాహసించి జూన్ చందమామలో రెండు దయ్యం కథలు ఎంపిక చేశాము. అది ఇంకా బయటకు రాకముందే. బొమ్మలు కూడా ఇంకా తయారు కాకముందే చందమామ చిత్రమాంత్రికులు శంకర్ గారు అమాంతంగా వాటిని ఆకాశానికి ఎత్తి ప్రశంసించడం. నిజంగా గుండె పొంగిపోతోంది నాకయితే..

‘దయ్యం  కోరిక’ అనే మరో కథ ఆరుపల్లి గోవిందరాజులు గారు -విశాఖపట్న- పంపారు. ఇది కూడా ముగింపు కాస్త మార్చి జూన్ నెలకే ఎంపిక చేయడమైంది. శంకర్ గారు రెండు కథలూ బాగున్నాయని ప్రశంసించారు. చాలాకాలం తర్వాత ఇంత స్పష్టంగా ఉన్న కథలకు బొమ్మలు వేస్తున్నానని ఆయన చక్కటి తెలుగులో మాట్లాడుతుంటే వాటిని ఎంపిక చేసుకోవడంలో తప్పు లేదనిపిస్తోంది.

జగమెరిగిన చిత్రకారులు ఒకే చెప్పారు. ఇక పాఠకుల తీర్పు కావాలి. ఈసారి చందమామలో ఎన్నడూ లేనివిధంగా అయిదు కథలు కొత్తవి ఎంపిక చేయడమైంది. అన్నీ మంచి కథలే. జూన్ చందమామ వచ్చాక అభిమానులుగా మీరే తీర్పు చెప్పండి.

శంకర్ గారూ! ఒక  పేజీ కథ అయినా వెంటనే దాని గొప్పతనాన్ని పట్టేశారు. నా కథల ఎంపికకు గౌరవం కలిగించారు. జీవితం ధన్యమైంది.

మీరు చల్లగా ఉండండి. చందమామ కథల సారం విప్పిచెప్పారు. ఎవరి కోసం చందమామ కథలు వేయాలో కూడా తేల్చి చెప్పారు.

మీరు కలకాలం ఆరోగ్యంగా ఉండి, ఇలాగే బొమ్మలు గీస్తూ ఉండండి.

లక్షలాది ప్రజలకు ఉపశమనం కలిగించిన, కలిగిస్తున్న మీకు మా వందనాలు…

రాజు.

RTS Perm Link

ఆకాశంలో సగం నీవు
విప్లవ పథంలో మనిద్దరం
ఒకరినొకరం బాస చేసుకొనేవేళ
విప్లవ పథానికి మనిద్దరం
కలిసి కట్టుగా బాస చేసిన వేళ
త్యాగం మన పేరు
పోరాటం మన ఊరు

ఆకాశంలో సగం నీవు
అనంత కోటి నక్షత్రాల్లో
సగం నీవు సగం నేను
విప్లవాకాశంలో
సగం నీవు సగం నేను

(Women are the half of the sky – Chairman Mao)
 
మన భావాలను, సైద్దాంతిక విభేదాలను, ఘర్షణలను కాస్సేపు పక్కన బెడదాం. దాదాపు 80 సంవత్సరాల క్రితం చైనా చారిత్రక పరిస్థితుల్లో స్త్రీ పురుష సమానత్వాన్ని కోరుతూ ప్రభవించిన మహా గీతం ఇది. మావో సేటుంగ్ పట్ల అభిమానాన్ని, ఆగ్రహాన్ని కూడా పక్కన బెట్టి ఈ గీతం వెలువరిస్తున్న కవితా లయను వినగలిగితే… ఏదో మంత్రనాదం మన సమస్త దేహాలను చీల్చుకుంటూ వెళుతున్నట్లనిపిస్తూ ఉంటుంది.

ఎన్ని సార్లు విన్నా, చదివినా, పాడుకున్నా తనివి తీరని ఆ శబ్దనాదం ఎక్కడో గుండెను పిండుతున్నట్లు ఉంటుంది.

ఆకాశంలో సగం నీవు
అనంత కోటి నక్షత్రాల్లో
సగం నీవు సగం నేను

80 ఏళ్ల క్రితం ఈ గీతం చైనా ఆకాశంలో బద్దలై ప్రపంచమంతటా వినిపించింది. కానీ ఇవ్వాళ స్త్రీపురుష సమానత్వం అనే భావన పరిమితార్థంలో అయినా సరే మన పార్లమెంటులో మరొరకంగా బద్ధలవుతోంది. జుగుప్సాత్మకంగా… భయానకంగా…  మన మొండిబండగుండెలను ఏ చారిత్రక సందర్బాలు కూడా కరిగించలేవని బాగానే అర్థమవుతోంది కదూ..

(మార్చి 8. మన అమ్మలకు, అక్కలకు, చెల్లెళ్లకు, జీవన సహచరులకు దశాబ్దాలుగా వేగు చుక్కలా దారిచూపుతున్న దివ్యక్షణం. వారి ఆశలకు, ఆరాటాలకు, ఆకాంక్షలకు మనం మద్దతిద్దాం)

RTS Perm Link

తోకచుక్క    (Jan-54-June-55 )      -శ్రీ దాసరి వెంకటరమణ
మకరదేవత  (July-55-Decem 56) -శ్రీ కొడవటిగంటి రోహిణి ప్రసాద్
ముగ్గురు మాంత్రికులు (Jan-57-June 58) శ్రీ చొక్కాపు వెంకట రమణ
కంచుకోట    (July-58-Dec-59)       -శ్రీ ఫణి (బ్లాగాగ్ని)
జ్వాలాద్వీపం (Jan-60-June-61)   -శ్రీ రచన శాయి
రాకాసిలోయ (July-61-May-64)   -శ్రీమతి లక్ష్మీగాయత్రి
పాతాళదుర్గం  (May-66 -Dec-67)  -రాజశేఖర రాజు
శిథిలాలయం  (Jan-68 -Sept-70    -శ్రీ శివరామ ప్రసాద్
రాతిరథం       (Oct-70 -April-72)   -శ్రీ వేణు
యక్షపర్వతం  (May-72-June-74) -శ్రీ వేణు
మాయా సరోవరం (Jan-76-June-78) -శ్రీమతి సుజాత
భల్లూక మాంత్రికుడు (July-78-April-80) శ్రీ ఎం. వి. వి.సత్యనారాయణ

(వీటిలో శ్రీమతి లక్ష్మీగాయత్రి గారు ‘రాకాసిలోయ’ సీరియల్‌పై, శ్రీ రోహిణీ ప్రసాద్ గారు ‘మరకదేవత’పై రాసి పంపిన వ్యాసం ఇప్పటికే అందాయి.)

పై సేరియల్స్ పై విశ్లేషణ రాసేముందు గమనించ వలసిన అంశాలు:

క్లుప్తంగా కథా,
శ్రీ సుబ్రహ్మణ్యం గారు సంఘటనలతో కథను నడిపించిన విధానం.
పాత్రలు- తీరు తెన్నులు ,
చదివింప చేసే అంశాలు ,
అంతర్లీనంగా అందచేసిన సందేశం
మొదలైనవాటిని దృష్టిలో పెట్టుకోగలరు.

మీ వ్యాసం నేరుగా శ్రీ రచన శాయి ( cell no 9948577517 ) rachanapatrika@gmail.com
గారికి ఈ నెల మార్చి  పది లోగా పంపగలరు.  సత్వరమైన మీ స్పందన గురించి ఎదురు చూస్తూ…….సెలవు .

PS;  క్లుప్తత: చందమామ కథల విశిష్ట ప్రత్యేకత. దానిని దృష్టిలో వుంచుకొని మీ వ్యాసం అచ్చులో నాలుగైదు పేజీలు మించకుండా జాగ్రత్త పడగలరు. వ్యాసం యూనికోడ్ లోను మరియు పిడిఎఫ్ ఫైలు రెండింటి ద్వారా పంపగలరు.
–
Dasari Venkata Ramana
General Secretary,
Bala Sahitya Parishattu,
5-5-13/P4, Beside Sushma Theatre,
Vanasthalipuram, HYDERABAD – 500070.
04024027411. Cell: 9000572573.
email: dasarivramana@gmail.com

పాత సమాచారం కోసం ఇక్కడ చూడండి.

‘రచన’లో దాసరి సుబ్రహ్మణ్యం గారి ధారావాహికలు

RTS Perm Link

చందమామ అభిమానులైన మీకు నమస్కారం.  చందమామ కథా మాంత్రికుడు శ్రీ దాసరి సుబ్రహ్మణ్యం గారు దివంగతులైన సంగతి మీకు తెలిసిందే. ఆయనకు నివాళిగా  రచన శాయి గారు రచన ఏప్రిల్ సంచికను ప్రత్యేక సంచికగా వెలువరిస్తున్నారు.

శ్రీ దాసరి సుబ్రహ్మణ్యం గారి సీరియల్ రచనా విధానం వైవిధ్యమైనది. తన మనో ప్రమేయం ఏమాత్రం లేకుండా ఎవరో తోస్తే చటుక్కున బాలల సీరియల్ రచనా  తటాకంలో పడి వెంటనే తేరుకొని చిన్న చిటికేసి, ఒక నూతన ఒరవడితో అందమైన జానపద ధారావాహికలను నభూతో నభవిష్యతి అన్నట్లుగా బాలలకు వరప్రసాదంగా తోకచుక్క మొదలుకొని భల్లూకమాంత్రికుడు వరకు 12 ధారావాహికలను అందించారు.

భల్లూక మాంత్రికుడు

ఆ సీరియల్స్‌ను మీరు అభిమానిస్తున్నట్లయితే ఏదైనా ఒక సేరియల్‌ను ఎన్నుకొని ఒక విశ్లేషణాత్మకమైన వ్యాసం రాయవలసిందిగా మిమ్మల్ని కోరడం జరుగుతున్నది. కొంతమంది అభిమానులు ఈ క్రింది సీరియల్స్‌ను ఈ క్రింది వారు రాస్తే బాగుంటుంది అని సూచించారు.

తోకచుక్క (Jan-54 – June-55 ) -శ్రీ దాసరి వెంకటరమణ
మకరదేవత (July-55 – December 56)
ముగ్గురు మాంత్రికులు (January-57 – June 58) -శ్రీ త్రివిక్రమ్
కంచుకోట (July-58 – Dec-59) -శ్రీ వేణు
జ్వాలాద్వీపం (Jan-60 – June-61)  -శ్రీ రచన శాయి
రాకాసిలోయ (July-61 – May-64) -

పాతాళదుర్గం (May-66 – Dec-67)  – రాజశేఖర రాజు
శిథిలాలయం (Jan-68 – Sept-70) – శ్రీ శివరామ ప్రసాద్
రాతిరథం (Oct-70 – April-72)
యక్షపర్వతం (May-72 – June-74)
మాయా సరోవరం (Jan-76 – June-78) -శ్రీమతి సుజాత
భల్లూక మాంత్రికుడు (July-78 – April-80)

పై సేరియల్స్ పై విశ్లేషణ రాసేముందు…
 

పాతాళదుర్గం

క్లుప్తంగా కథా, శ్రీ సుబ్రహ్మణ్యం గారు సంఘటనలతో కథను నడిపించిన తీరు, పాత్రలు- తీరు తెన్నులు , చదివింప చేసే అంశాలు , అంతర్లీనంగా అందచేసిన సందేశం మొదలైనవాటిని దృష్టిలో పెట్టుకోగలరు.

పై సూచన గమనించి మీరు ఎంచుకున్న సీరియల్ పేరు వెంటనే తెలియచేయగలరు.. ఎందుకంటే ఒకే సీరియల్ మీద ఇద్దరు వ్రాయడాన్ని నివారించాలనే ప్రయత్నం.

ఆ తర్వాత  మీ వ్యాసం నేరుగా శ్రీ రచన శాయి (cell no 9948577517) rachanapatrika@gmail.com
గారికి ఈ నెల పది లోగా పంపగలరు. 

సత్వరమైన మీ స్పందన గురించి ఎదురు చూస్తూ…….

సెలవు.

PS; క్లుప్తత చందమామ కథల విశిష్ట ప్రత్యేకత. దానిని దృష్టిలో వుంచుకొని మీ వ్యాసం అచ్చులో నాలుగైదు పేజీలు మించకుండా జాగ్రత్త పడగలరు.

Sri Dasari Venkata Ramana
General Secretary,
Bala Sahitya Parishattu,
5-5-13/P4, Beside Sushma Theatre,
Vanasthalipuram, HYDERABAD – 500070.
04024027411. Cell: 9000572573.
email: dasarivramana@gmail.com
 
Sri Y.V.S.R.S. Sai
1-9-286/2/P, విద్యానగర్ (రాం నగర్ గుండు దగ్గర)
హైదరాబాద్-500 044
040-27071500 (O)
040-27077599 (R)
09948577517 (M)
email: rachanapatrika@gmail.com

RTS Perm Link

చందమామ సీనియర్ కథల రచయిత శ్రీఎమ్.వి.వి సత్యనారాయణ -విశాఖపట్నం- గారు కుటుంబరావు గారి కాలంనుంచి చందమామకు కథలు, బేతాళకథలు పంపుతూ వచ్చారు. అప్పట్లో దాసరి గారితో తనకు కలిగిన పరిచయాన్ని ఆయన హృద్యంగా చందమామతో ఇటీవలే పంచుకున్నారు.

ఈయన 1980కి ముందు ఓసారి కుటుంబరావుగారిని కలిసి చూసి పోదామని చెన్నయ్ లోని చందమామ ఆఫీసుకు వచ్చారట. ఆ సమయానికి కొకు ఆఫీసులో లేరు. దీంతో ఈయన చందమామ కార్యాలయంలోని కుటుంబరావు గారి కుర్చీవద్దకు వచ్చి దండం పెట్టి వెళ్లారట.

కొకు లేని సమయంలో వచ్చి ఆశాభంగంతో వెనుదిరిగి వెళుతున్న తనను దాసరిగారు రిసీవ్ చేసుకుని భోజనం కోసం హోటల్‌కు తీసుకెళ్లారట. ఆరోజు దాసరిగారు  అన్నమాటలు ఈరోజుకీ ఈయన మర్చిపోలేదు.

‘కొకును ఎలాగూ కలవలేకపోయావు గాని, కొంచెం నా పేరు ఆ గిన్నెస్‌లోకి ఎక్కేటట్టు చూడు’ అని దాసరి గారు ఈయనతో ముక్తాయించారట. ఈయనకు ముందు అర్థం కాలేదట. ‘35 ఏళ్లుగా హోటల్ తిండి తింటున్నాను. ఇంటిభోజనం తినే యోగం వస్తుందో లేదో తెలీదు. ఈలోగా సాధిస్తున్న రికార్డును ఎందుకు పోగొట్టుకోవాలి. హోటల్ వదలని వీరుడిగా నా పేరన్నా గిన్నెస్‌ బుక్‌లో ఎక్కించు బాబ్బాబు’ అని దాసరి గారు జోకులేస్తుంటే ఈయనకు నవ్వాగింది కాదట.
 
నిజమే మరి. దాసరి గారి వ్యక్తిగత జీవితం కూడా రికార్డుల మయమే. మద్రాసులో చందమామలో చేరినప్పటినుంచి అంటే 1952 నుంచి 2006 వరకు కూడా చెన్నయ్‌లో ఒకే అద్దె ఇంట్లో దాసరి గారు ఉంటూ వచ్చారు. ఒకే అద్దె ఇంట్లో 54 ఏళ్లకు పైగా జీవితం. మనుషులకు సాధ్యమయ్యే పనేనా ఇది.

ఒకే ఆఫీసులో 54 ఏళ్లు పనిచేయడం. ఇప్పుడే కాదు ఎప్పుడు కూడా సగటు మనుషులకు సాధ్యం కాని పని. నా ఉద్దేశ్యంలో అలవాటు బలంమీద ఆయన అన్నేళ్లపాటు చెన్నయ్‌లో ఒకే హోటల్‌లోనే భోంచేసి ఉంటారేమో అని నా సందేహం.

(తాజా సమాచారం ప్రకారం చందమామ ఎక్కౌంటెంట్‌గా సుదీర్ఘకాలం పాటు పనిచేసిన చందమామ రామారావుగారు 2006 వరకు తన ఇంటినుంచి దాసరి గారికి మధ్యాహ్న భోజనం తీసుకువచ్చి ఇచ్చేవారట. దీన్ని బట్టి దాసరిగారికి చందమామలో పనిచేసినంత కాలం ఒంటిపూట ఇంటి భోజన భాగ్యం దక్కిందని తెలుస్తోంది. ప్రస్తుతం జూనియర్ చందమామ అసోసియేట్ ఎడిటర్‌గా పనిచేస్తున్న వాసుకి చెబుతున్న దాని ప్రకారం దాసరి సుబ్రహ్మణ్యం గారితో చందమామలో పనిచేసిన కాలం తన లాంటి పిల్లలకు బంగారు కాలమట.)

చివరకు బాలసాహిత్యానికి, ఆబాల గోపాల సాహిత్యానికి కూడా పేరొందిన చందమామలో వరుసగా పాతికేళ్లపాటు సీరియల్స్ రాస్తూ వచ్చిన అరుదైన రికార్డు కూడా ఈయన పేరు మీదే ఉంది.

అప్రస్తుతమనుకోకుంటే వివాహమైనప్పటికీ చెన్నయ్‌లో 50 ఏళ్లకు పైగా ఒంటరిగానే జీవించిన అరుదైన రికార్డు కూడా ఈయనదే. 84 ఏళ్ల వృద్ధాప్య దశలో చివరకు కనీసావసరాలకు మనిషి తోడు లేని పరిస్థితుల్లోనే దాసరి గారు చందమామను వదిలి విజయవాడకు వెళ్లవలసి వచ్చింది.

అప్పుడు కూడా ఆరోగ్యం బాగయితే తాను మళ్లీ చందమామకు తిరిగి వస్తానని అప్పటి చందమామ ఉద్యోగులకు మాట ఇచ్చి మరీ వెళ్లారు. కానీ రాలేకపోయారు. శివరాం ప్రసాద్ గారు తన సాహిత్య-అభిమాని బ్లాగు ( http://saahitya-abhimaani.blogspot.com/ ) లో రాసినట్లుగా స్వర్గమనేది నిజంగా ఉంటే, దాసరి గారు ఇప్పుడు అక్కడ బిజీగానే ఉంటారు. ఎందుకంటే నాగిరెడ్డి, చక్రపాణి గారు ఇప్పటికే ‘స్వర్గం’లో ‘చందమామ’ పత్రికను మొదలు పెట్టేసి ఉంటారు కదా.

వేణుగారు ఈయనను ఇంటర్వ్యూ చేస్తూన్నప్పడు, తన వయసు (87సంవత్సరాలు) ఓసారి స్మరించుకొని, ‘I am over stay here!’ అని సరదాగా జోక్ చేసిన అరుదైన వ్యక్తిత్వం దాసరిగారిది. భూమ్మీద అవసరానికి మించి ఉండటం, బతకడం, బతకవలసి రావడం కూడా సరైంది కాదు అనే ప్రత్యేక సామాజిక తత్వం దాసరి గారిది.

చివరకు 87 ఏళ్ల ప్రాయంలో కూడా ఎవరినీ ఇబ్బంది పెట్టకుండా, వైద్య ప్రక్రియలతో పనిలేకుండా, సునాయాసంగా, సుఖంగా కన్నుమూసిన అపర భీష్ముడు శ్రీ దాసరి. సుఖ మరణం పొందడం అనేది మానవజాతి ప్రాచీన స్వప్నాలలో ఒకటి. నొప్పింపక, తానొవ్వక అన్న చందంగా సునాయాసంగా పోవడం ద్వారా జాతి స్వప్నాన్ని కూడా సాకారం చేసుకున్న అరుదైన మనీషి ఆయన. 

బాలసాహిత్యంలో ధ్రువతారగా నిలిచే చందమామ తాతయ్య శ్రీ దాసరి సుబ్రహ్మణ్యం గారి దివ్యస్మృతికి చందమామ నీరాజనాలు.

RTS Perm Link

“బెంగళూరులో తెలుగు చందమామలు దొరికేది తక్కువ. వెబ్‌సైట్ వలన ప్రపంచ వ్యాప్తంగా ఉన్న మా లాంటి తెలుగు వారికి చందమామ చదివే అవకాశం కల్పించినందుకు ధన్యవాదాలు. ఐదారేళ్ళు ఉన్న తెలుగు పిల్లలు ఇంగ్లీషులో కథలు అర్ధం చేసుకోవటం కష్టం.(ఇప్పటి ఇంగ్లీషు మీడియం చదువులతో కూడా ఐదారేళ్ళకి ఇంగ్లీషు అర్ధం చేసుకునే శక్తి పిల్లలకి పరిమితం గానే ఉంటుంది).

అలాంటప్పుడు చందమామ వెబ్‌సైటు తెరిచి కొన్ని తెలుగు కథలు చదివి వినిపిస్తే పిల్లల మానసిక వికాసం పెరుతుంది. ఆ కథలు కూడా మమ్మల్ని చిన్నప్పుడు అలరించిన కథలైతే ఇంకా కావల్సింది ఏముంది?నేను మా పిల్లలకి ఇక నుంచీ చందమామ ఆర్కైవ్స్ నుంచీ కథలు చదివి వినిపించటానికి ప్రయత్నిస్తాను.”
– ప్రసాద్

డియర్ ప్రసాద్ గారూ, మీ అభిమానానికి కృతజ్ఞతలు.

“మీ పిల్లలకు మీరు ధన, ధాన్య, కనక, వస్తు, వాహనాదులు సమకూర్చి పెట్టడం కన్నా బాల్యంలో వారికి కాసిన్ని కథలు వినిపించి, చదవటం అలవాటు చేయండి. మనిషి జీవితానికి సంబంధించిన సంస్కారం దానంతటదే అలవడుతుంది. ఆ సంపద చాలు వారికి. ఎలా జీవించాలో నేర్చుకుంటారు.”
–చందమామ

“ప్రసాద్ గారూ, మీరు ఒక పని చేయండి. బెంగళూరులో విడిగా చందమామలు దొరకవంటున్నారు కాబట్టి మీరు చందమామ సంవత్సర చందా కట్టండి. తెలుగు చందమామ సంవత్సర చందా రూ.240లు మాత్రమే. కడితే మీకు పోస్టులో రెగ్యులర్‌గా ఇంటికే వస్తుంది. మీరు మీ చందాను డిసెంబర్ 2009 నుంచి తీసుకుంటే ‘పంచతంత్ర కథలు’ తిరిగి పొందడానికి వీలవుతుంది.

దాదాపు 40 ఏళ్ల తర్వాత ‘పంచతంత్ర కథలు’ గత డిసెంబర్ నుంచి కలర్‌పుల్‌గా చందమామలో మళ్లీ సీరియల్‌గా వస్తున్నాయి. అలాగే మార్చి నెల నుంచి దాసరి సుబ్రహ్మణ్యం గారి సీరియల్ ‘శిథిలాలయం’ పునర్ముద్రణ అవుతోంది. ఇప్పటికే గత నాలుగేళ్లుగా ఆయన ధారావాహికలు ‘యక్షపర్వతం,’ ‘ రాకాసిలోయ,’ ‘పాతాళదుర్గం’ చందమామ పత్రికలో పునర్ముద్రణ పొందిన విషయం తెలిసిందే.

రామాయణం ‘ఉత్తర కాండ’ కూడా ఏప్రిల్ నుంచి ప్రారంభం అవుతోంది. అలాగే మార్చి నుంచి చందమామ బేతాళకథ, 25 సంవత్సరాల నాటి కథ, హాస్య కథ, జానపద కథ, బీర్బల్ కథలు, పొట్టి కథలు ఇలా చందమామ దాదాపుగా కథలతోనే వస్తోంది.

మీరు చందమామకు చందా కట్టగలిగితే మీ పిల్లలు రంగుల బొమ్మలు, కథలతో చక్కగా ఆస్వాదించడానికి వీలవుతుంది. వీలైతే చందా తీసుకోవడంపై ఆలోచించండి. శివరాం ప్రసాద్ గారు కూడా 20 ఏళ్ల విరామం తర్వాత ఇటీవలే చందమామకు చందా తీసుకున్నారు.”

చందమామ పాఠకులకు విజ్ఞప్తి

చందమామ పుస్తకంలోని మాట్లాడే బొమ్మలను చూస్తూ, కథలను చదువుతూ పెరిగిన తరం మీది. మీ పిల్లలకు కూడా ఆ అనుభవం అందించండి. మీ ఇంట చందమామ ఉంటే మీ పిల్లల బాల్యానికి కథల రూపంలో మానవ జీవన సంస్కారం అబ్బినట్లే…

చందమామ పాఠకులకు కూడా చందమామ తరపున మంచి ప్రతిపాదన. ఈ మార్చినెలలో సంవత్సర చందా కట్టే చందాదారులకు చందమామ తరపున మంచి బహుమతి లభించనుంది. బహుమతి వివరాలు తెలియవు కానీ, ఆసక్తి కల పాఠకులు చందమామను నేరుగా ఇంటిలోనే పోస్ట్ ద్వారా పొందాలంటే సంవత్సర చందా తీసుకోగలరు. మార్చిలో చందా తీసుకునే చందాదారులందరికీ బహుమతి ఉంటుంది.

గమనిక: అనివార్యంగా ఏర్పడిన సాంకేతిక కారణాల వల్ల చందమామ ఫిబ్రవరి సంచిక ఇంకా మార్కెట్లోకి రాలేదు. 1998లో చందమామ అజ్ఞాతవాసం చేసిన తదుపరి దాదాపు 12 సంవత్సరాల తర్వాత, ప్రింటింగ్ విభాగంలో అనుకోని సాంకేతిక లోపాల వల్ల ఫిబ్రవరి సంచిక విడుదల కావడం బాగా లేటయింది. మార్చి నెల పత్రిక కంటెంట్ పూర్తయి, ఏప్రిల్ నెల కంటెంట్ కూడా దాదాపుగా పూర్తి కావస్తున్నప్పటికీ సాంకేతిక వైఫల్యం చందమామ ఫిబ్రవరి సంచిక ప్రింటింగ్‌ను అడ్డుకోవడం విచారకరం.

ఈ సమస్య త్వరలో పరిష్కారమవుతుందని ఆశిస్తూ, పాఠకులకు, చందాదారులకు మానుంచి జరిగిన అసౌకర్యానికి చింతిస్తున్నాం. సాంకేతిక సమస్య శాశ్వత పరిష్కారానికి ఏర్పాట్లు పూర్తవుతున్నందున పాఠకులు, చందాదారులు ఫిబ్రవరి సంచిక ముద్రణలో జరిగిన జాప్యాన్ని మనసులో ఉంచుకోకుండా చందమామకోసం వేచి ఉండమని అభ్యర్థిస్తున్నాం. 

చందమామ.

RTS Perm Link

సీతారాం ప్రసాద్ గారూ, చందమామ బ్లాగులో ‘మీ విశ్వాసాలతో మేం ఏకీభవించకపోవచ్చు…’ అనే నా మునుపటి కథనంపై వ్యాఖ్యల ద్వారా మీరు చందమామ బ్లాగును చూశారు. దాంతోపాటు చందమామ వెబ్‌సైట్‌ను కూడా తొలిసారి చూసి మీ ఆనందాన్ని వ్యాఖ్యలద్వారా పంచుకున్నారు.

చందమామ వెబ్‌సైట్‌ని మీరు చూసి సంతోషం వ్యక్తం చేసినందుకు మీకు కృతజ్ఞతలు. చందమామ అభిమానిగా మీరు చందమామ వెబ్‌సైట్, బ్లాగుతో అనుబంధాన్ని కొనసాగిస్తారని దృఢంగా విశ్వసిస్తున్నాం. మీ కోసం, చందమామ పాఠకులకోసం కింది వివరాలు పొందుపరుస్తున్నాం.

1947 నుంచి 2000 వరకు అన్ని చందమామలు ఆన్‌లైన్ చందమామ ఆర్కైవ్స్‌లో ఉన్నాయి కనుక మీరు వీలైనప్పుడల్లా ఆర్కైవ్స్‌ను చూసి చందమామ కథలను ఆస్వాదించవచ్చు.

ప్రపంచంలో ఏ పత్రికా, ఏ వెబ్‌సైట్ కూడా తన పాఠకులకు అందించని విధంగా 53ఏళ్లుగా చందమామలో వచ్చిన వేలాది కథలను చందమామ ఆన్‌లైన్ ద్వారా తన పాఠకులకు అదీ ఉచితంగా అందిస్తోంది. -త్వరలో 2008 వరకు చందమామ కథలను ఆన్‌లైన్ భాండాగారంలో ఉంచడానికి ప్రయత్నాలు జరుగుతున్నాయి.-

చందమామ కథల భాండాగారంలో పొందుపర్చిన వేలాది కథలు, ధారావాహికల కోసం కింది లింకులో చూడండి.
చందమామ కథల భాండాగారం

దీనికి పాఠకులుగా, అభిమానులుగా మీరెంత సంతోషిస్తున్నారో చందమామ సిబ్బందిగా మేం అంత గర్వపడుతున్నాం. తెలుగు జాతికే కాదు భారతీయ కథల ప్రేమికులందరికీ ఆన్‌లైన్ భాండాగారం ద్వారా కథామృతాన్ని ఉచితంగా పంచిపెట్టగలుగుతున్నందుకు చందమామ పత్రిక, అందులో పనిచేస్తున్న సిబ్బంది జీవితం ధన్యమైందనే మేం భావిస్తున్నాం.

60 ఏళ్లుగా వస్తున్న చందమామ కథలను పైసా ఖర్చు లేకుండా ఆన్‌లైన్ ద్వారా పాఠకులకు అందించడానికి మేం గత సంవత్సర కాలం పైగా చేసిన కృషిని మీ వంటి పాఠకులు, అభిమానులు చూసి, చదివి హృదయపూర్వకంగా పంపుతున్న అభినందనలు చూసినప్పుడల్లా మాకందరికీ ఒకటే అనుభూతి.. జీవితంలో మర్చిపోలేని ఓ మహత్కార్యాన్ని చందమామ సిబ్బందిగా మేం సాధించామని ఉప్పొంగిపోతుంటాము.

ఇన్ని వేల కథలను ప్రపంచవ్యాప్తంగా ఉన్న చందమామ ప్రియులకు, అభిమానులకు అందించడానికి తెర వెనుక యాజమాన్యం, సిబ్బంది పడిన, పడుతున్న కష్టం మేం చెప్పుకోకూడదు. కాని మీలాంటివారు ఆన్‌లైన్ ఆర్కైవ్స్‌లో చందమామ పాత కథలను చదివినప్పుడు, మర్చిపోలేని ఆ బాల్య జ్ఞాపకాలను మీరు మళ్లీ గుర్తుచేసుకుంటూ అభినందనలు తెలియజేస్తున్నప్పడు మేం పొందుతున్న సంతోషం మాత్రం మాటల్లో వర్ణించలేము. ఒక జీవితకాలానికి సరిపడే మహదానందానుభూతి మమ్మల్ని కదిలించివేస్తుంటుంది.

ఈ సందర్భంగా మీకూ, చందమామ అభిమానులకు ఒక విజ్ఞప్తి. చందమామ సిబ్బందిగా మేం చేస్తున్న ఈ కృషిలో లోపాలు, దిద్దుకోవలసిన అంశాలు మీ దృష్టికి వస్తే తప్పక మాతో ఈమెయిల్స్ ద్వారా, చందమామ ఆఫీసుకు ఉత్తరాల ద్వారా పంచుకోగలరు.

చందమామ పత్రిక, వెబ్‌సైట్ నిర్వహణకు సంబంధించి మీరు పంపే వ్యాఖ్యలు, ఉత్తరాలు మా పనికి మరింత విలువ తీసుకునివస్తాయి. చందమామలో మీరు కోరుకుంటున్న ఇతర అంశాలను కూడా వ్యాఖ్యల ద్వారా పంపగలరు.

అలాగే… చందమామ అభిమానులు, పాఠకులు తమ బాల్య జీవితంలో చందమామతో పరిచయం పొందిన మర్చిపోలేని క్షణాలను అందరితో పంచుకోవడానికి గాను “మా చందమామ జ్ఞాపకాలు” పేరిట ఆన్‌లైన్ చందమామలో ఓ విభాగం తెరిచాము.
మా చందమామ జ్ఞాపకాలు

ఇప్పటికే 20మంది పాఠకులు, అభిమానులు, ప్రముఖ బ్లాగర్లు చందమామతో బాల్య జ్ఞాపకాల మధుర క్షణాలను తల్చుకుంటూ ఆన్‌లైన్ చందమామకు తమ అనుభూతులను రాసి పంపారు. మీరూ, ఇతర చందమామ అభిమానులు కూడా ఈ విభాగంలోని కథనాలు చూసి చందమామ పత్రికతో మీ తొలి పరిచయం అనుభవాలను కూడా పంచుకోవాలని కోరుతున్నాం.

“మా చందమామ జ్ఞాపకాలు”  పూర్తిగా చందమామ పాఠకుల, అభిమానులకు అంకితమైన విభాగం కనుక వీలైనంత ఎక్కువమంది పాఠకులు, ఆన్‌లైన్‌ చందమామతో పరిచయం ఉన్న పాఠకులు తమ చందమామ జ్ఞాపకాలను తప్పక పంపించాలని కోరుకుంటున్నాం.

ఇన్నేళ్ల చందమామ జీవితంలో పాఠకులకు నచ్చిన చందమామ కథలు చాలానే ఉంటాయి. చందమామలో మీకు నచ్చిన కథ, కథలు, సీరియల్స్ గురించి పరిచయం చేస్తూ కథనాలు రాసి పంపితే వాటిని మీ పేరుతో తెలుగు ఆన్‌లైన్ చందమామలో ప్రచురించగలం.

ఆన్‌లైన్‌లో మీకు నచ్చిన చందమామ కథల పరిచయం, మీ చందమామ జ్ఞాపకాలు వంటి కథనాలను కింది లింకుకు పంపగలరు. అలాగే చందమామ వెబ్‌సైట్‌, అందులోని కథలపై మీ అభిప్రాయాన్ని కూడా కింది లింకుకు పంపగలరు.
abhiprayam@chandamama.com   (telugu online chandamama)

సీతారాం ప్రసాద్ గారూ,

మీ వంటి సహృదయపాఠకులను పొందడం ‘చందమామకు గర్వకారణం. నా వెనుకటి కథనంపై మీ వ్యాఖ్య ఆధారంగా మళ్లీ ఈ కథనం ప్రచురిస్తున్నాను. మీ వ్యాఖ్య వ్యక్తిగతం కాదు కాబట్టి చందమామ పాఠకులతో పంచుకోవడం అవసరమని భావించి మిమ్మల్ని సంబోధిస్తూ రూపొందించిన ఈ కథనాన్ని ప్రచురించడానికి సాహసిస్తూ, ఇందుకు అన్యధా భావించరని ఆశిస్తున్నాను

మీ పర్సనల్ ఈ మెయిల్‌ వ్యాఖ్య లింకులో ఉంది కాబట్టి, చందమామపై విశేష వ్యాసాలు, విశిష్ట కథనాలు ప్రచురిస్తూ వస్తున్న ప్రముఖ చందమామ బ్లాగర్ల బ్లాగ్ లింకులను నేను సేకరించగలిగినంత మేరకు మీకు పంపిస్తాను. మీ ఈమెయిల్‌ను కూడా చందమామ అభిమానుల ఈమెయిళ్ల జాబితాలో పొందుపరుస్తున్నాను. 

చందమామతో మీ అనుబంధం దీర్ఘకాలం కొనసాగుతుందని, కొనసాగాలని మనసారా కోరుకుంటూ…

రాజశేఖర రాజు,
అసోసియేట్ ఎడిటర్
rajasekhara.raju@chandamama.com  (telugu online & print chandamama)

తెలుగు చందమామ వెబ్‌సైట్ లింక్
http://www.chandamama.com/lang/index.php?lng=TEL

(తెలుగు చందమామ వెబ్‌సైట్. or)
www.telugu.chandamama.com

గమనిక. చందమామతో తమ బాల్య జ్ఞాపకాలను, చందమామ కథల పరిచయాన్ని తెలుగులో పంపడానికి టైపింగ్ తెలియని వారు ఇంగ్లీషులో కూడా వాటిని పంపవచ్చు.

నోట్: సీతారాం ప్రసాద్ గారు కింది బ్లాగ్‌లో “ఒక సాఫ్ట్ వేర్ ఇంజనీర్” పేరిట చక్కటి సీరియల్ కథ రాశారు. వీలైతే చూడగలరు.

http://bondalapati.wordpress.com/

RTS Perm Link

మా సృష్టికర్తకు మా నివాళి

చందమామ కథల మాంత్రికుడు దాసరి సుబ్రహ్మణ్యం గారు కన్నుమూసిన వార్త తెలియగానే చందమామ వీరాభిమాని శివరాం ప్రసాద్ గారు కొత్త రీతిలో ఆయనకు సంతాపం పలికారు. దాసరి గారు తమ ధారావాహికలలో సృష్టించిన పాత్రలనే ఆయనకు అశ్రు నివాళి పలుకుతున్నట్లుగా చందమామ బొమ్మకు మెరుగులద్దారు.

జానపద కథా బ్రహ్మగా రూపొంది లక్షలాది మంది పిల్లలను, పెద్దలను కాల్పనిక సాహితీ మంత్రజగత్తులో విహరింప జేసిన దాసరి గారు జీవితం పొడవునా కార్మిక వర్గ పక్షపాతిగా, కమ్యూనిస్టుగా సైద్ధాంతిక దృక్పధాన్ని పాటించిన విషయం ఇప్పుడు అందరికీ తెలుసు.

శివరాం గారు నాకు తెలిసి సంప్రదాయాలంటే ప్రాణమిచ్చే వ్యక్తి. కాని దాసరి గారి రాజకీయ విశ్వాసాన్ని గౌరవించడంలో ఆయనకు తన సాంప్రదాయాలు ఏవీ అడ్డురాలేదు. అందుకే చందమామ బొమ్మలో సుత్తీ కొడవలి జొప్పించి మరీ దాసరిగారికి ఆయన పాత్రలే నివాళి పలుకుతున్నట్లుగా మార్పు చేసి పంపారు.

పైగా మనుషులు కలకాలం గుర్తుంచుకోవలసిన జీవన తాత్వికతను ఈ చిత్రానికి జొప్పించారు కూడా. “We may not agree with your beliefs sir, but we respect your openions.” “మీ విశ్వాసాలతో మేం ఏకీభవించకపోవచ్చు, కానీ మీ అభిప్రాయాలను మేం గౌరవిస్తాం”. మనుషులందరూ గుర్తుంచుకోవలసిన గొప్ప సత్యం ఈ చిన్న వాక్యంలో ఇమిడ్చారు.

తరతరాలుగా పోగుపడుతూ వచ్చిన మానవ సమాజ జ్ఞాన నిధిని గుడ్డిగా వ్యతిరేకిస్తూ తోసిపారేయడం, రాజకీయ, సైద్దాంతిక, సాంస్కృతిక రంగాల్లో పరిణామక్రమంలో నెలకొంటూ వచ్చిన ప్రతి మార్పును గుడ్డిగా వ్యతిరేకించడం.. ఇవి రెండూ చారిత్రక అభాసలే.. అందుకే.. “మీ విశ్వాసాలతో మేం ఏకీభవించకపోవచ్చు, కానీ మీ అభిప్రాయాలను మేం గౌరవిస్తాం”.

మనిషి బతికి ఉన్నంతవరకూ గుర్తుంచుకోవలసిన, పాటించవలసిన పరమసత్యమిది. ఫ్రెంచి విప్లవ మూలపురుషులలో ఒకరైన వోల్టేర్ కూడా ఇదే అభిప్రాయాన్నే మరొకలా చెప్పినట్లుంది. ఎవరు చెప్పినా, ఎన్ని రకాలుగా చెప్పినా ఈ వాక్య సారాంశం మాత్రం సమాజానికి చిరంజీవిగా మిగలాలి.

మెరుగులద్దిన చందమామ బొమ్మను పంపిస్తూ శివరాం గారు నాకు పంపిన ఈమెయిల్‌ను, దానికి నా స్పందనను ఈ సందర్బంగా ఇక్కడ జోడిస్తున్నాను. సారాంశంలో ఇవి వ్యక్తిగత మెయిళ్లు కావు కాబట్టే వాటిని ఇక్కడ యథాతథంగా ఇస్తున్నాను.

ఫిబ్రవరి 15, 2010

DEAR RAJUGAROO, YOU MAY FIND IT STRANGE COMING FROM ME. BUT WE RESPECT THE IDEALS OF SHRI DASARI. JUST SEE THE ATTACHMENT AND LET ME KNOW YOUR OPINION AND ALSO WHETHER WE CAN USE IT WHEN RACHANA BRINGS OUT ITS SPECIAL ISSUE TO HIGHLIGHT THAT IN OUR BLOG.

THIS PICTURE IS FOR YOU ONLY FOR THE PRESENT STILL SOME MORE WORK TO BE DONE AND WORDS TO BE CHANGED. REGARDS,

శివరామప్రసాదు కప్పగంతు
బెంగుళూరు భారత్ నుండి
http://saahitya-abhimaani.blogspot.com/

డియర్ శివరాంప్రసాద్ గారూ, లేటుగా స్పందిస్తున్నా, క్షమించాలి. దాసరి గారికి ఇంతకు మించిన నివాళి ఎవరైనా తెలుపగలరంటే నేను నమ్మలేను. ఆయన సృష్టించిన సాంప్రదాయిక పాత్రలు ఆయన విశ్వాసాలను గౌరవిస్తూ, ఆయన జీవిత పర్యంతమూ పాటించిన శ్రామిక వర్గ పక్షపాతానికి గౌరవమిస్తూ ఆయనకు నివాళి పలుకుతున్న దృశ్యం..

నాకయితే కలకాలం దాచుకోవాలనిపిస్తోంది. దానికి మీరిచ్చిన పదాలంకారం కూడా చాలా బాగుంది. “We may not agree with your beliefs sir, but we respect your openions.” మనుషులందరూ గుర్తుంచుకోవలసిన గొప్ప సత్యం, తాత్వికత ఈ రెండు వాక్యాలలో ఇమిడ్చారు. చాలా బాగుంది.

మీరు రోడ్డు ప్రమాదం నుంచి కోలుకున్నాక వీలయితే వెంటనే మీ బ్లాగులో, మనచందమామబ్లాగులో పెట్టేయండి. తర్వాత చందమామ, బ్లాగులో కూడా ప్రచురిద్దాము. దాసరి గారి సంస్మరణ సభ ప్రకటనను, దాసరి రమణ గారు పంపిన విశేష కథనాన్ని కలిపి చందమామ బ్లాగులో పెట్టాలనుకుంటున్నాము. ఆయన పర్మిషన్ తీసుకుని వెంటనే రంగంలోకి దిగుదాము. ఎందుకంటే రేపే కదా సంస్మరణసభ.

మీరు దాసరి గారి సీరియల్ శిథిలాలయం బొమ్మలను కార్టూన్‌గా మారుస్తున్న విషయం పైవారికి తెలియజేస్తాము. ఇది కొంత ఆలస్యం అయినా మంచి నిర్ణయం తీసుకుంటారని ఆశిస్తున్నాను.

రాజు.

నిన్న సాక్షి ఆదివారం అనుబంధంలో, ఆంధ్రజ్యోతి పత్రిక మెయిన్ మూడో పేజీలో దాసరి సుబ్రహ్మణ్యం గారి జ్ఞాపకాలను ప్రచురించారు. కింది లింకులను చూడండి.

‘చందమామ’ను చేరుకున్నారు
http://sakshi.com/main/WeeklyDetails.aspx?Newsid=47656&Categoryid=10&subcatid=29

ఆరిపోయిన ‘చందమామ’ వెలుగు
-కొడవటిగంటి రోహిణీ ప్రసాద్

ఆరిపోయిన చందమామ వెలుగు

RTS Perm Link

తెలుగులో బాలసాహితీ వికాసానికి చందమామ తరపున ఎనలేని కృషి చేసిన కథల మాంత్రికుడు శ్రీ దాసరి సుబ్రహ్మణ్యం గారు 88 ఏళ్ల ప్రాయంలో ఇటీవలే విజయవాడలో కన్నుమూసిన విషయం తెలిసిందే. చందమామ అభిమాని, రచయిత, శ్రేయోభిలాషి శ్రీ దాసరి వెంకట రమణ గారు ఈ ఆదివారం -21-02-2010- సాయంత్రం ప్రజాసాహితి వేదిక ఆధ్వర్యంలో విజయవాడలో జరుగనున్న దాసరి సుబ్రహణ్యం గారి సంస్మరణ సభ విశేషాలను మెయిల్‌లో పంపారు.

చందమామ అభిమానులు, ప్రత్యేకించి చందమామ చరిత్రలో అత్యద్భుత విజయం సాధించిన ధారావాహికల రచయిత శ్రీ దాసరి సుబ్రహ్మణ్యం గారి అభిమానులు, ఆయన మిత్రులు, ప్రత్యక్షంగా, పరోక్షంగా ఆయనను ఎరిగినవారు ఈ సభకు హాజరై వారి మనోభావాలను పంచుకోవలసినదిగా ఆయన ఈ మెయిల్‌లో అందరికీ ఆహ్వానం తెలిపారు.

చందమామ జ్ఞాపకాలను, దాసరి గారి కథా రచనా పటిమను ఈనాటికి హృదయాల్లో పదిలపర్చుకుంటున్న చందమామ పాఠకులు, అభిమానులు ప్రత్యేకించి విజయవాడ నగరంలో ఉన్నవారు.. దాసరి సుబ్రహ్మణ్యం గారి సంస్మరణ సభకు తప్పక హాజరై ఆయనతో, ఆయన ధారావాహికలతో తమ పరిచయాన్ని అందరితో పంచుకుంటారని ఆశిస్తున్నాం.

దాసరి రమణ గారు పంపిన ఈమెయిల్ పూర్తి పాఠం కింద చూడండి.

విజయవాడలో దాసరి సుబ్రహ్మణ్యం గారి సంస్మరణ సభ

( ప్రజాసాహితి వేదిక విజయవాడ వారి ఆధ్వర్యంలో )

( తేది21-02-2010 ఆదివారం, సా: 6 గం.లకు చండ్ర రాజేశ్వరరావు  గ్రంథాలయం, శిఖామణి సెంటర్, విజయవాడ.)

తెలుగువారి సంప్రదాయానికి ప్రతీకగా నిలిచి, మన వుమ్మడి వారసత్వ సంపదగా అభివర్ణించ దగిన చందమామ మాస పత్రికలో  53  సం.లు పని చేసిన శ్రీ దాసరి సుబ్రహ్మణ్యం గారు మొన్న జనవరి 27వ తేది సా. 5 గం.లకు విజయవాడలో వారి అన్నయ్య శ్రీ ఈశ్వర ప్రభు గారి కుమార్తె శ్రీమతి గోళ్ళ ఝాన్సి గారి ఇంట్లో కన్నుమూశారు.

శ్రీ దాసరి సుబ్రహ్మణ్యం గారు ప్రత్యక్షంగాను, పరోక్షంగాను బాల సాహితీ వికాసానికి చేసిన సేవ ఎనలేనిది. దురదృష్టవశాత్తు … ఆ విషయం చాల కొద్ది  మందికి మాత్రమె తెలుసు.

1954 జనవరి చందమామ లో ప్రారంభమైన  శ్రీ దాసరి సుబ్రహ్మణ్యం గారి తోకచుక్క రంగుల జానపద కథా ధారావాహిక నాటి  తెలుగునాటి బాలల హృదయాల్లో గిలిగింతలు పెట్టింది. పిల్లలనే కాదు పెద్దలను సైతం అబ్బురంగా ఆకర్షించి ఊపిరి బిగ పట్టేంత  ఉత్కంటకు గురిచేసిన ఆ ధారావాహిక … తరువాయి భాగం ఎప్పుడా అని మరుసటి నెల చందమామ కోసం ఎదురు చూసేలా చేసింది. చందమామ సర్క్యులేషన్ గణనీయంగా పెరగడానికి కారణభూతమైనది. ఆ ధారావాహిక విజయంతో  శ్రీ దాసరి సుబ్రహ్మణ్యం గారు వెనక్కు తిరిగి చూడలేదు.

తోకచుక్క                        (Jan-54 – June-55 )
మకరదేవత                     (July-55 – December 56)
ముగ్గురు మాంత్రికులు (January-57 – June 58)
కంచుకోట                        (July-58 – Dec-59)
జ్వాలాద్వీపం                  (Jan-60 – June-61)
రాకాసిలోయ                  (July-61 – May-64)
పాతాళదుర్గం                  (May-66 – Dec-67)
శిథిలాలయం                  (Jan-68 – Sept-70)
రాతిరథం                         (Oct-70 – April-72)
యక్షపర్వతం                  (May-72 – June-74)
మాయా సరోవరం          (Jan-76 – June-78)
భల్లూక మాంత్రికుడు     (July-78 – April-80)

దాసరి మంత్రనగరి

ఇలా..మొత్తం 12 ధారావాహికలు రాశారు. ఈ ధారావాహికల రుచి కేవలం అనుభవైకవేద్యం.  నేడు ప్రపంచాన్ని కుదిపేస్తున్న సంచలనాత్మక హారీపోటర్ కథల కంటే  శ్రీ దాసరి సుబ్రహ్మణ్యం గారి కథలు, కథా కథనం లోనూ, పాత్రల సృష్టి లోనూ ఎన్నో రెట్లు మెరుగని నాటి పాటకులకు, వాటిని చందమామలో పున: ప్రచురించినందున నేటి పాఠకులకు … ఆస్వాదించిన వారికి మాత్రమే అర్థమౌతుంది. “శ్రీ దాసరి సుబ్రహ్మణ్యం తెలుగు వాడవడం మన అదృష్టం ఆయన దురదృష్టం” అని తెనాలి వాస్తవ్యులు శ్రీ వెలగా వెంకటప్పయ్య గారు అనేవారు.

కొడవటిగంటి కుటుంబరావు గారితో పాటు చందమామ సంపాదక వర్గంలో ఒకడుగా – చందమామ కథల ఎంపిక లోనూ, వాటిని తిరిగి వ్రాసే ప్రక్రియ లోనూ శ్రీ దాసరి సుబ్రహ్మణ్యం గారి కృషి మరువలేనిది. 1975లో శ్రీ చక్రపాణి మరణానంతరం, ముఖ్యంగా 1980లో శ్రీ  కొడవటిగంటి కుటుంబరావు గారు మరణించాక చందమామ పత్రికా నిర్వహణలో శ్రీ విశ్వనాథ రెడ్డి గారికి  శ్రీ దాసరి సుబ్రహ్మణ్యం వెన్నెముకలా వ్యవహరించాడని చెప్పవచ్చు.

తెనాలికి సమీపం లోని పెద్ద గాజులపర్రు లో 1922 అక్టోబర్25 న జన్మించిన శ్రీ సుబ్రహ్మణ్యం గారికి మరణించే నాటికి ఆయన వయసు 88 సం.లు.

మా సృష్టికర్తకు కథాంజలి!

శ్రీ కొత్తపల్లి రవిబాబు  అధ్యక్షతన, శ్రీ దాసరి వెంకటరమణ (సుబ్రహ్మణ్యం గారి బంధువు కారు- చందమామ కథల  పరిశోధకులు, ప్రధాన కార్యదర్శి-బాల సాహిత్య పరిషత్తు హైదరాబాద్)  ముఖ్య వక్తగా పాల్గొంటున్న ఈ సభలో, ఇంకా శ్రీమతి  గోళ్ళ ఝాన్సీ (సుబ్రహ్మణ్యం గారి అన్న కీ.శే.ఈశ్వరప్రభు గారి కూతురు),శ్రీ అట్లూరి అనిల్ (సుబ్రహ్మణ్యం గారి మిత్రులు, హైదరాబాద్.), రాంపల్లి  శ్రీలక్ష్మి (చందమామ అభిమాని), శ్రీ గోళ్ళ నారాయణరావు (సుబ్రహ్మణ్యం గారి అన్న కీ.శే.ఈశ్వరప్రభు గారి మనుమడు) మొదలగు వారు ప్రసంగిస్తారు.

చందమామ అభిమానులు, శ్రీ దాసరి సుబ్రహ్మణ్యం గారి అభిమానులు, ఆయన మిత్రులు,ప్రత్యక్షంగా, పరోక్షంగా ఆయనను ఎరిగినవారు  ఈ సభకు హాజరై వారి రచనల గురించి గాని, వారితో తమకు గల అనుబంధం గురించి కాని, సుబ్రహ్మణ్యం గారి వ్యక్తిత్వం గురించి కాని, వారి మనోభావాలను పంచుకోవడానికి ఈ వేదికను ఉపయోగించుకోవలసిందిగా మనవి.

వివరాలకు సంప్రదించండి
శ్రీ కొత్తపల్లి రవిబాబు: +919490196890
e mail: ravibabu@yahoo.co.in

శ్రీ దివికుమార్ :  +919440167891, 0866-2417890:
e mail:  1949@yahoo.com

ప్రజాసాహితి వేదిక,
విజయవాడ 

సమావేశ స్థలం:
ప్రజాసాహితి వేదిక విజయవాడ వారి ఆధ్వర్యంలో
తేది. 21-02-2010 ఆదివారం, సా: 6 గం.లకు చండ్ర రాజేశ్వరరావు  గ్రంథాలయం, శిఖామణి సెంటర్, విజయవాడ.

ఫిబ్రవరి 21 అంతర్జాతీయ మాతృ భాషా దినోత్సవం ……స్మరించుదాం.

……………….

విజయవాడలో ఈ ఆదివారం జరుగనున్న దాసరి సుబ్రహ్మణ్యం గారి సంస్మరణ సభ వివరాలను ఈమెయిల్ ద్వారా పంపిన దాసరి వెంకటరమణ గారికి కృతజ్ఞతలు.

ఫోటోలు: వేణు, శివరాం ప్రసాద్ గార్లు, చందమామ సౌజన్యంతో

(చందమామ కథల మాంత్రికుడు దాసరి సుబ్రహ్మణ్యం గారిపై ఈ ఆదివారమే సాక్షి దినపత్రిక అనుబంధంలో ‘చందమామ’ను చేరుకున్నారు! పేరిట కథనం ప్రచురించనున్నారు.)

చందమామ వెబ్‌సైట్‌లో, బ్లాగులో ఇటీవల దాసరి గారిపై ప్రచురించిన కథనాల లింకులు కింద చూడగలరు.

చందమామ కథల మాంత్రికుడి సంస్మరణ సభ
http://www.chandamama.com/lang/story/stories.php?lng=TEL&mId=12&cId=49&stId=2427

RTS Perm Link